1 Corintios

4 Nochimej noneki techitaskej ken tiitlakeualuan Cristo niman ken mayordomos itech tlen toTajtsin yokiyan. 2 Nochia ika akin mayordomos mayolmelajkanemikan. 3 Nejua xnechimportaroua tla nemejuamej noso jueces nechtlajtlakolmakaj. Hasta nion nejua xninotlajtlakolmaka. 4 Pampa chipauak nikpiya notlamachilis, pero yejon xkijtosneki tla nikpiya kuajli noyojlo. Jehová yejua akin nechtlajtlakolmaka. 5 Yejua ika, maka xtetlajtlakolmakakan, xmochiakan hasta mayejko tiempo ijkuak uajlas toTeko. Yejua kikixtis ipan tlauijli tlen iyantika kampa tlayoualyotl niman kichiuas manomati tlen tikpiyaj ipan toyojlo. Kuakon, cada se toTajtsin kiueyilis ken kinamiki.

6 Nokniuan, yonimechijli nochi yejuin niman yoninoteneuj nejua niman yonikteneuj Apolos para mamechpaleui tlen tikchiuaj niman para xkasikamatikan yejuin: “San xchiuakan tlen ijkuilijtika”. Ijkon xnemoueyimatiskej niman xnemoxejxeloskej. 7 ¿Akinon kichiua ika tejua más xueyixto? ¿XtoTajtsin omitsmakak tlen tikpiya? Kuakon, tla toTajtsin omitsmakak, ¿tleka timoueyimati kentla tla yetikpiyaskia?

8 ¿Yenenkipiyaj nochi tlen mechpoloua? ¿Yenenricos? Maski tejuamej xetipeuaj titlanauatiaj, ¿nemejuamej yonenpejkej? Kuajli yeskia tla yenentlanauatiskiaj, para tejuamej noijki nemouan titlanauatiskej. 9 Pampa nejua nikita ika akin tiapóstoles, toTajtsin sa ika tlami yotechkauj para matechmiktikan, yejua yotechtlali para matechitakan nochimej akin nemij ipan yejuin mundo niman ángeles. 10 Tejuamej xtitlamachilisejkej ipampa Cristo, pero nemejuamej nentlamachilisejkej ipampa Cristo; tejuamej xtikojtikej, pero nemejuamej nenkojtikej; nemejuamej mechtlakaitaj, pero tejuamej xtechtlakaitaj. 11 Hasta aman xtikpiyaj tlen tikuaskej niman tlen tikoniskej, xmiyek tikpiyaj totlaken, techuijuisokij,* xtikpiyaj tochan 12 niman chikauak titekitij ika tomauan. Ijkuak techuijuikaltiaj,* kuajli tikinnankiliaj. Ijkuak techtlajyouiltiaj, titlaxikouaj niman tikimijyouiyaj, 13 ijkuak techtlajtolchijchiuiliaj, tejuamej xtikualanij. Hasta aman, gente techita ken itlajsol mundo, tlen xakaj kineki.

14 Xnimechijkuilouilijtika yejuin para nimechpinajtis, nejua nimechnojnotsa kentla nokoneuan akin melak nikintlasojtla. 15 Pampa maski nenkinpiyaskiaj 10,000 tlakamej akin mechmachtiskej itech Cristo, xmiyekej nemotajuan nenkinpiyaj; pampa itech Cristo Jesús nejua oninochiuj ken nemotaj ijkuak onimechijli kuajli tlajtoltin. 16 Yejua ika, nimechtlajtlanilia xchiuakan ken nejua. 17 Niman nimechontitlanilia Timoteo, pampa yejua kentla nokoneuj akin melak niktlasojtla niman ika nochi iyojlo kitekichiuilia toTeko. Yejua mechilnamiktis kenijki oniktekichiuili Cristo Jesús, ijkon ken nejua nimechmachtijtika nochiuiyan ipan tlanechikoltin.

18 Sekimej noueyimatij pampa kinemiliaj ika xnias nimechontlajpalos. 19 Pero, tla Jehová kineki, sa achijtsin poliui para nimechontlajpalos niman xninomojtia nikinkakis itlajtoluan akin noueyimatij. Niman nikitas tla ipoder toTajtsin kinyekana noso ka. 20 Pampa iGobierno toTajtsin* xnoteititia ika tlajtoltin, noteititia ika poder. 21 ¿Tlenon nenkinekij? ¿Manajsi ika se tlakotl? ¿Noso manimechnotsa ika tlasojtlalistli niman yemanki tlajtojli?