1 Corintios

2 Yejua ika, nokniuan, ijkuak oniaj kampa nennemiyaj, xonikintekitilti* tlajtoltin tlen san kimasikamatij akin uejueyixtokej noso melak tlamachilisejkej para nimechijlis tlen toTajtsin kiyantika. 2 Pampa ijkuak nemouan oninen, san oniknek nimechnojnotsas itech Jesucristo niman kenijki okipilojkej ipan kojtli melaktik. 3 Nejua nikmachiliaya ika xnikojtik, ninomojtiaya niman hasta nikuekuetlakaya ijkuak oniaj kampa nemejuamej. 4 Niman ijkuak onimechnots niman onimechnojnots itech itlajtol toTajtsin, xonikintekitilti tlajtoltin tlen kintekitiltiaj akin tlamachilisejkej. Nejua onikintekitilti tlajtoltin tlen kiteititiaj ipoder espíritu santo. 5 Para maka xtlaneltokakan itech tlen gente kimati, san xtlaneltokakan itech ipoder toTajtsin.

6 Akin kipiyaj chikauak intlaneltok, tikinnojnotsaj itech tlamachilistli, pero xtikinnojnotsaj itech tlamachilistli tlen kipiyaj akin nemij ipan yejuin tiempo nion itech tlamachilistli tlen kipiyaj gobiernos tlen onokej* ipan yejuin tiempo,* akin kinpopoloskej. 7 Tejuamej tikteijliaj itech tlamachilistli tlen kipiya toTajtsin, tlen yeuejkaui yokiyanka. Yejuin tlamachilistli iyantoya, pero toTajtsin yokijtojka achto ika oniaskia tlen aman onka,* para techueyilis. 8 Yejuin tlamachilistli xokixmatkej nion se de yejon gobiernos akin nemij ipan yejuin tiempo.* Pampa tla kixmatiskiaj, xkipiloskiaj ipan kojtli melaktik toTeko akin ueyixtika. 9 Pero ijkin ijkuilijtika: “Xakaj okitak nion xakaj okikak nion iyojlo se tlakatl xokinemili tlen toTajtsin yokiyektlali para akin kitlasojtlaj”. 10 Tejuamej akin toTajtsin yotechititi ika iespíritu, pampa espíritu ueli kita nochi tlen onka. Hasta ueli kita tlamachilistli tlen kipiya toTajtsin, tlen xkeman uelis tikasikamatiskej.

11 Pampa, ¿uelis yakaj kimatis tlenon kinemilia se tlakatl? Ka. San yejua kimati tlenon kinemilia. Noijki xakaj uelis kimatis tlenon kinemilia toTajtsin pampa san espíritu santo kimati. 12 Pero, xtoyekanaj ken tlanemiliaj niman ika tlen kichiuaj akin nemij ipan yejuin mundo, tejuamej toyekanaj ika iespíritu santo toTajtsin para tikixmatiskej tlen toTajtsin yotechmakak pampa techtlasojtla. 13 Tejuamej noijki titlajtouaj itech yejuin, pero xtikintekitiltiaj tlajtoltin tlen gente akin tlamachilisejkej temachtiaj. Tejuamej tikintekitiltiaj tlajtoltin tlen ualeuaj itech espíritu santo, ijkon titemachtiaj itech toTajtsin ika tlajtoltin tlen ualeuaj itech espíritu.

14 Se tlakatl akin noyekana ika tlen kileuiya itlalnakayo, xkiselia tlen ualeua itech iespíritu toTajtsin, pampa kita ika xtlaj ika tepaleui. Noijki xuelis kasikamatis pampa xkipiya iespíritu santo toTajtsin. 15 Pero, se tlakatl akin noyekana ika espíritu santo kimatstika nochi yejuin niman xakaj uelis kijlis tla kuajli noso xkuajli ken nemi. 16 Pampa, “¿akinon kimati tlen kinemilia Jehová para uelis kimachtis?”. Pero, tejuamej kema titlanemiliaj ken Cristo.