Filemón

1 Nejua Pablo, nitsauktika pampa nitlaneltoka itech Cristo Jesús. Nejua ninemi nikan iuan Timoteo niman nimitsontlajkuilouilia tejua nokniuj Filemón, akin touan titlapaleuiya. 2 Noijki nimitsontlajkuilouilia tejua nokniuj Apfia, Arquipo akin chikauak touan titekiti ijkon ken se soldado, niman nochimej tokniuan akin nosentlaliaj mochan.

3 Niktlajtlanilia toTajtsin akin toTaj, niman toTeko Jesucristo, mamechiknelikan maski xmechnamiki niman mamechyolseuikan.

4 Ijkuak niknotsa noTajtsin, nochipa nimitsteneua niman niktlasojkamachilia 5 pampa niktekakilia ika titlaneltoka niman tiktlasojtla toTeko Jesús niman noijki akin yokintlapejpenijkej. 6 Niktlajtlanilia toTajtsin mamitspaleui xkita nochi tlen kuajli tikpiyaj ipampa* Cristo, pampa titlaneltoka ijkon ken oksekimej tokniuan. 7 Onechyolpakti niman onechyolseui ijkuak onikmat ika melak titetlasojtla. Yejuin tlen yotikchiuj melak yokinyolchikauj tokniuan akin yokintlapejpenijkej.

8 Yejua ika, maski ueliskia nimitsnauatis tlenon noneki tikchiuas pampa niiapóstol Cristo, 9 nejua, Pablo, akin aman yoniueuentsintiak niman nitsauktika ipampa Cristo Jesús, miyekpa nimitstlajtlanilia xchiua tlen nimitsijlis pampa tikintlasojtla oksekimej. 10 Filemón, miyekpa nimitstlajtlanilia ika oksejpa xseli Onésimo, akin yonochiuj ken nokoneuj nikan kampa nitsauktika. 11 Kachtopa xmitspaleuiaya, pero aman tiomemej techpaleuiya. 12 Oksejpa nimitsontitlanilia Onésimo, akin melak niktlasojtla.

13 Nikuelitaskia nouan manokaua para mamitstekipatla niman manechpaleui nikan kampa nitsauktika pampa nikteijlia on kuajli tlajtoltin. 14 Pero xnikneki nikchiuas yejuin tla tejua xtikneki. Nikuelitaskia ika tlen tikchiuas makisa ipan moyojlo niman maka san pampa nejua nimitsnauatia. 15 Kanaj yejua achijtsin tiempo* omitstlalkaui para oksejpa motech nokuepas niman xok keman mitskajteuas. 16 Aman maka xseli ken motlakeual, xseli ken mokniuj akin melak tiktlasojtla. Nejua melak niktlasojtla, pero tejua más tiktlasojtlas ken motlakeual niman ken mokniuj. 17 Kuakon, tla yemelak tinoamigo, kualtsin xseli kentla tla nejua tinechseliskia. 18 Niman tla omitschiuili itlaj tlen xkuajli noso tla itlaj mitsuikilia, nejua nimitstlaxtlauilis. 19 Nejua, Pablo, akin nimitstlajkuilouilia, nimitsijlia ika nimitstlaxtlauilis. Pero xkilnamiki ika tejua más miyek tinechuikilia. 20 Nokniuj, xchiua tlen nimitstlajtlanilia pampa tiomemej tiktekichiuiliaj toTeko, niman xchiua maniyolchikaui pampa noijki tikchiua ken Cristo.

21 Nimitstlajkuilouilia pampa kuajli nikmatstika ika xsan tikchiuas tlen onimitstlajtlanili, noijki okseki tikchiuas. 22 Melak nimechtlasojkamachilia ipampa nemooraciones niman nikchia ika oksejpa nimechontlajpalos. Kuakon, noijki xkita kanon ueliskia ninokauas.

23 Epafras, akin nouan tsauktika pampa noijki tlaneltoka itech Cristo Jesús, mitsontlajpaloua. 24 Noijki mitsontlajpalouaj Marcos, Aristarco, Demas niman Lucas, akin nouan tlapaleuiyaj.

25 ToTeko Jesucristo mamechikneli maski xmechnamiki ipampa on tlen kuajli nenkichiuaj.