1 Corintios
14 Xmotlasojtlatokan, pero noijki xmokojtilijtokan para toTajtsin mamechpaleui xchiuakan tlatlamantik* tekitl, niman más para uelis nenkimijtoskej teotlajtoltin. 2 Akin tlajtoua okse tlajtojli xkinnotsa tlakamej, kinotsa toTajtsin, pampa xakaj kasikamati maski espíritu santo kichiua makijto tlen iyantika. 3 Pero, akin kimijtoua teotlajtoltin kinchikauilia intlaneltok oksekimej, kinyolchikaua niman kinyolseuiya ika tlen kijtoua. 4 Akin tlajtoua ika okse tlajtojli san no yejua kichikaua itlaneltok, pero akin kimijtoua teotlajtoltin kinchikauilia intlaneltok akin nemij ipan tlanechikojli. 5 Nikuelitaskia ika nochimej nemejuamej xtlajtokan tlatlamantikej tlajtoltin, pero más nikuelitaskia xkimijtokan teotlajtoltin. Akin kimijtoua teotlajtoltin, más ueyi tekitl kipiya, xken akin tlajtoua tlatlamantikej tlajtoltin. Pero, tla akin tlajtoua tlatlamantikej tlajtoltin kineki kinyolchikauas akin nemij ipan tlanechikojli, makitlajtolkuepa tlen kijtoua. 6 Pero, nokniuan, tla ijkuak najsiskia nimechnotsaskia ika miyek tlajtoltin, pero xnimechijliskia tlen toTajtsin yonechijli, xnimechnotsaskia ika tlamachilistli, xnimechijliskia se teotlajtojli nion xnimechmachtiskia, ¿tlenon ika mechpaleuiskia yejon?
7 Noijki ijkon panoua ika ken kakisti flauta noso arpa. Tla xkuajli ken kintsotsonaj, ¿kenon tikmatiskej tlen kitsotsontokej ika flauta noso arpa? 8 Niman tla xmás kuajli kakisti tlenon kipitsaj ika trompeta, ¿akinon nemis listo para yas ipan guerra? 9 Noijki ijkon, tla xnenkijtouaj tlajtoltin tlen nimantsin manasikamatikan, xakaj uelis kimatis tlen nenkijtojtokej. Yeskia kentla nenkinotstoskiaj ajakatl. 10 Ipan yejuin mundo, gente tlajtoua ika miyekej tlajtoltin, niman nochi kipiya tlen kijtosneki. 11 Pero, tla xnikasikamati tlen noijtoua, yeskia kentla tla xnichanej para akin nechnotstika niman para nejua akin nechnotstika yeskia kentla yakaj akin xchanej. 12 Noijki ijkon panoua nemouan. Kuakon, pampa melak nenkinekij tlen kitetlayokolia espíritu, xmokojtilikan nenkipiyaskej yejon tetlayokoliltin tlen ika nenkinchikauiliskej intlaneltok akin nemij ipan tlanechikojli.
13 Kuakon, akin tlajtos ika okse tlajtojli, makitlajtlanili toTajtsin makipaleui maueli makitlajtolkuepa. 14 Pampa, tla nikchiua oración ika okse tlajtojli, ueli ijkon nikchiua ipampa tlen toTajtsin yonechtlayokoli, pero nejua xtlaj nikasikamati. 15 Kuakon, ¿tlenon nikchiuas? Nikchiuas oración ika tlen espíritu onechtlayokoli, pero noijki ninokojtilis nikasikamatis. Ninokuikatis ika tlen espíritu onechtlayokoli, pero noijki ninokojtilis nikasikamatis. 16 Pero, tla tejua tikueyichiua toTajtsin ika itlaj tlen yejua yomitstlayokoli niman tikchiua se oración para tiktlasojkamachilis, ¿kenon kijtos “Amén” yakaj akin xkimati tlenon tikijtojtika pampa xokimachtijkej? 17 Melak kuajli ken tiktlasojkamachilia toTajtsin, pero akin mitskaktika xkichikauilia itlaneltok. 18 Niktlasojkamachilia toTajtsin pampa más niueli nitlajtoua miyek tlajtoltin, xijkon ken nemejuamej. 19 Ipan tlanechikojli más nikuelita nikijtos makuijli tlajtoltin tlen manasikamati para nikinmachtis oksekimej, xijkon ken tla nikijtos diez mil tlajtoltin ika okse tlajtojli.
20 Nokniuan, maka xtlanemilikan ken kokonej. Más kuajli tla nenkichiuaj ken kokonej akin xekixmatij tlen xkuajli niman tla nenkichiuaj ken akin yeuejueyimej akin miyek yekasikamatij. 21 Ipan Tlanauatijli ijkuilijtika: “Ijkin kijtoua Jehová: ‘Maski niknotsas yejuin pueblo ika intlajtol akin xchanejkej niman ika inkamak akin xkimixmatij, yejuamej xnechkakisnekiskej’”. 22 Yejua ika, tlajtoltin xkinpaleuiyaj akin tlaneltokaj, kinpaleuiyaj akin xtlaneltokaj, niman teotlajtoltin xkinpaleuiyaj akin xtlaneltokaj kinpaleuiyaj akin tlaneltokaj. 23 Yejua ika, tla nochimej akin nemij ipan tlanechikojli, san sekan nosentlaliaj niman peuaj tlajtouaj ika tlajtoltin niman ompa onkalakij akin xokinmachtijkej noso akin xtlaneltokaj, ¿xkijtoskej ika nemejuamej yonentlamachilispolijkej? 24 Pero, tla nochimej nenkimijtojtokej teotlajtoltin niman ompa onkalaki yakaj akin xtlaneltoka noso akin xokimachtijkej, kimachilis ika xkuajli tlen kichijtika niman ika nochimej sa kitstokej tlen kichijtok. 25 Pampa kimatiskej tlen kipiya ipan iyojlo, yejua nopachos hasta ipan tlajli niman kiueyichiuas toTajtsin niman ijkin kijtos: “ToTajtsin yemelak nemouan nemi”.
26 Nokniuan, ijkuak nemosentlaliaj, se nokuikatia, okse temachtia, okse kijtoua tlen toTajtsin yokichiuj makimati, okse tlajtoua okse tlajtojli niman okse tlajtolkuepa. ¿Kenon noneki nenkichiuaskej nochi yejuin? Nochi xchiuakan para nemopaleuiskej nenkipiyaskej chikauak nemotlaneltokil. 27 Niman, tla sekimej tlajtouaj okse tlajtojli, matlajtokan san omemej noso yeyimej, makichiuakan ijkuak kinnamikis, niman yakaj nonekis kitlajtolkuepas tlen yejuamej kijtouaj. 28 Pero, tla xnemi yakaj akin kintlajtolkuepilis, maka manauatikan ijkuak nemiskej ipan tlanechikojli niman san no yejuamej makinotsakan toTajtsin ipan inyojlo. 29 Matlajtokan omemej noso yeyimej teotlajtojkej niman oksekimej kuajli makitakan tlenon kijtosneki. 30 Pero, tla toTajtsin kichiua itlaj makimati yakaj akin ompa yeuatika, akin kachtopa tlajtojtoya maka sa manauati. 31 Pampa ijkuak nonekis, nochimej nemejuamej uelis nenkijtoskej teotlajtoltin para nochimej nenueliskej niman nemoyolchikauaskej. 32 Espíritu yokichiuj ika teotlajtokej makimijtokan teotlajtoltin, pero noneki kichiuaskej ijkuak kinamikis. 33 Pampa toTajtsin kineki nochi kuajli manochiua niman ika nochimej mayolsejtokan.
Ijkon ken panoua ipan nochi tlanechikoltin kampa nemij tokniuan, 34 siuamej maka matlajtokan ipan tlanechikoltin pampa xnoneki ijkon kichiuaskej. Más kuajli, tla kinnokauiliaj makinyekanakan ijkon ken kijtoua Tlanauatijli. 35 Tla itlaj kinekij kimatiskej, ijkuak nemiskej inchan makintlajtoltikan inueuentsitsinuan, pampa tepinajti tla se siuatl tlajtoua ipan tlanechikojli.
36 ¿Nemotech okis itlajtol toTajtsin? ¿San nemejuamej akin onenkiselijkej?
37 Tla yakaj kinemilia ika teotlajtojketl noso ika espíritu itlaj yokitlayokoli, noneki kasikamatis ika nimechijkuilouilia tlen technauatia toTeko. 38 Pero, tla yakaj xkiselia yejuin, toTajtsin noijki xkiselis akin ijkon kichiua.* 39 Kuakon, nokniuan, xmokojtilijtokan nenkimijtoskej teotlajtoltin niman maka xkinchiualtikan oksekimej maka matlajtokan tlatlamantikej tlajtoltin. 40 Pero xchiuakan nochi ken kinamiki niman ken noneki.