1 Corintios

16 Noijki, nikneki nimechijlis ika ijkuak nenkisentlaliskej tomin tlen nenkinekij nenkinmakaskej tokniuan xchiuakan ijkon ken onikimijli tlanechikoltin tlen onokej* Galacia. 2 Ijkuak peuas semana, nochimej nemejuamej xxelokan nemotomintsin ijkon ken nenueliskej. Para ijkuak najsis maka kemach ompa nenkisentlalijtoskej. 3 Niman ijkuak najsis kampa nennemij, nejua nikomontitlanis ne Jerusalén yejon tlakamej tlen ipan nemocartas nennechijliskej ika intech nentlaneltokaj. Para kitkiskej yejon tomintsin tlen nenkinekij nenkitetlayokoliskej. 4 Pero, tla nonekis ika nejua noijki maniuiya, yejuamej nouan yaskej.

5 Nimechontlajpalos ijkuak yonipanok Macedonia. Pampa nipanos ne Macedonia. 6 Kanaj nemouan ninokauas se tiempo noso hasta ijkuak yopanok ijkuak melak seua. Para nennechpaleuiskej ijkuak nias. 7 Tla Jehová kineki, nikneki nemouan nonuejkauis, xnikneki san nimechitstikisas. 8 Nejua ninokauas ne Éfeso hasta ipan Iluitl Pentecostés 9 pampa ompa nechkauiliskej más manitenojnotsa, pero nemij miyekej akin nechixnamikij.

10 Noijki, nikneki nimechijlis ika ijkuak ajsis Timoteo, xchiuakan nochi tlen noneki para maka manomojti. Pampa yejua noijki kitekichiuilijtika Jehová, ijkon ken nejua. 11 Kuakon, nochimej makitlakaitakan. Xpaleuikan para nouan manosentlaliki, pampa nejua niman oksekimej tokniuan tikchiatokej.

12 Nejua miyekpa onikijli Apolos mamechtlajpaloti imiuan tokniuan. Yejua xkinemilijtoya yas amantsin, pero yas ijkuak uelis.

13 Xtlatlachixtokan, xmelajkanentokan ipan nemotlaneltok, xmoyolchikauakan, xkojtitokan. 14 Nochi xchiuakan pampa nentetlasojtlaj.

15 Nokniuan, nikneki itlaj nimechtlajtlanilis. Nemejuamej nenkimatij ika ne Acaya tokniuj Estéfanas niman ichanejkauan yejuamej akin kachtopa opeuj tlaneltokaj niman okinpaleuijkej tokniuan. 16 Nikneki nimechtlajtlanilis ika xmokauilikan mamechyekanakan akin ijkon kichiuaj niman nochimej akin tlapaleuiyaj niman chikauak tekitij. 17 Melak niyolpaki ika nikan nouan nemi Estéfanas, Fortunato niman Acaico. Yejuamej melak yonechpaleuijkej pampa nemejuamej xnikan nennemij. 18 Yejuamej yonechyolchikajkej niman noijki mechyolchikajtokej. Yejua ika, xteititikan ika nenkinpatiojkaitaj tlakamej akin ijkon kichiuaj.

19 Tokniuan akin nemij ipan tlanechikoltin de ne Asia mechontlajpalouaj. Áquila niman Prisca niman akin nosentlaliaj inchan, akin kichiuaj ken toTeko, mechontlajpalouaj. 20 Nochimej tokniuan mechontlajpalouaj. Xmotlajpalokan ika se beso kentla nemikniujtin yeskiaj.

21 Nejua, Pablo, nikijkuiloua yejuin ika noma.

22 Tla yakaj xkitlasojtla toTeko, makipopolokan. ¡ToTeko, xuajla!* 23 Nikchia ika toTeko Jesús nochipa mamechikneli maski xmechnamiki. 24 Melak nimechtlasojtla pampa nemejuamej nenkichiuaj ken Cristo Jesús.