1 Corintios
15 Nokniuan, aman nimechilnamiktia kuajli tlajtoltin tlen yonimechijlijka, tlen onenkiselijkej niman yomechpaleui xmelajkanemikan. 2 Noijki, mechmakixtiskej ipampa kuajli tlajtoltin tlen yonimechijlijka tla itech nentlaneltokaj. Tla ka, xtlaj ika mechpaleuis maski onentlaneltokakej.
3 Pampa tlen kachtopa onimechijli yejon tlen noijki onechijlijkej. Onimechijli ika Cristo omik ipampa totlajtlakoluan, ijkon ken kijtouaj Tlajkuiloltin; 4 ika okitokakej niman okiyolitijkej* ipan yeyi tonajli, ijkon ken kijtouaj Tlajkuiloltin. 5 Niman ika ouajnonexti ixpan Cefas* niman imixpan on Doce. 6 Satepan ouajnonexti imixpan más de 500 tokniuan ijkuak san sekan nemiyaj. Miyekej de yejuamej ok* touan nemij pero sekimej yomikkej. 7 Sakin ouajnonexti ixpan Santiago niman sakin imixpan nochimej apóstoles. 8 Sa ika tlami, nixpan ouajnonexti niman oninomachili ken se konetsintli akin xekinamikiya uajnemis.
9 Pampa nejua akin xmás niueyixtika de nochimej apóstoles, nion xnechnamiki manechijlikan apóstol, pampa onikintlajyouilti akin nemiyaj ipan itlanechikol toTajtsin. 10 Pero pampa toTajtsin onechikneli maski xnechnamiki, aman niapóstol. Niman toTajtsin yonechikneli maski xnechnamiki pampa más yonitekit xijkon ken yejuamej. Pero nochi yejuin ueli nikchiua pampa toTajtsin yonechikneli. 11 Kuakon, maski tla nejua nitenojnotsa noso apóstoles tenojnotsaj, tinochimej san noijki tlen tikteijliaj, niman nemejuamej yonentlaneltokakej.
12 Kuakon, tla noteijlijtika ika Cristo okiyolitijkej intech akin yomikkej, ¿tleka sekimej de nemejuamej nenkijtouaj ika xyoliuiskej akin yomikkej? 13 Tla xyoliuiskej akin yomikkej, kuakon Cristo noijki xokiyolitijkej. 14 Pero, tla Cristo xokiyolitijkej, ken titenojnotsaj xtlaj ika tepaleuiya, niman nemotlaneltok noijki xtlaj ika tepaleuiya. 15 Hasta ueliskia noijtos ika tikijtojtokej tlen xmelauak itech toTajtsin pampa yotikteijlijkej ika yejua yokiyoliti Cristo. Tla melauak ika akin yomikkej xkinyolitiskej, kuakon Cristo xokiyolitijkej. 16 Pampa tla akin yomikkej xkinyolitiskej, kuakon Cristo noijki xokiyolitijkej. 17 Niman tla Cristo xokiyolitijkej, nemotlaneltok noijki xtepaleui niman ok nenkipiyaj tlajtlakojli. 18 Noijki, akin okitekichiuilijkej Cristo pero yomikkej, yomikkej para nochipa. 19 Tla san aman ika tiyoltokej tikchiaj tlen tikseliskej itech Cristo, tejuamej akin más kinamiki matechiknelikan.
20 Pero de nochimej akin yomikkej, Cristo yejua akin kachtopa okiyolitijkej. 21 Ijkon ken san ipampa* se tlakatl tinochimej opeuj timikij, akin yomikkej noijki yoliuiskej san ipampa se tlakatl. 22 Pampa ijkon ken san ipampa Adán nochimej miktokej, noijki ipampa Cristo nochimej kiseliskej nemilistli. 23 Pero yejuin nochiuas ken kinamiki: kachtopa Cristo niman sakin akin Cristo inyaxka* ijkuak yetouan nemis. 24 Sakin tlapopoliuis, ijkuak yejua kimaktilis iTaj niman iTajtsin on iGobierno. Ijkon kichiuas ijkuak kinpopolos gobiernos, akin uejueyixtokej niman akin kipiyaj poder. 25 Pampa yejua noneki tlayekanas hasta ijkuak toTajtsin ikxitlan kintlalis itlauelikniuan. 26 Niman sa ika tlami kipopolos mikilistli, akin totlauelikniuj. 27 Pampa toTajtsin nochi okimaktili niman ikxitlan okitlali para makiyekana. Pero ijkuak kijtoua ika nochi okimaktili para makiyekana, xkijtosneki tla noijki onotemaktili akin okimaktili nochi yejon. 28 Niman ijkuak nochi yokimaktilijkej para makiyekana, teKoneuj notemaktilis itech akin nochi okimaktili para makiyekana, ijkon toTajtsin nochi kiyekanas.
29 Tla xijkon yeskia, ¿tlenon kichiuaskiaj akin noapolaktiaj para mikiskej? Tla akin yomikkej xyoliuiskej, ¿tleka yejuamej noapolaktiaj para noijki makinyolitikan? 30 ¿Niman tleka nochipa tikixnamikij tlen uelis kichiuas matimikikan? 31 Mojmostla nikixnamiki tlen uelis nechmiktis. Xnimechkajkayaua nokniuan, ijkon ken xnimechkajkayaua ijkuak nimechijlia ika melak nennechyolpaktiaj pampa nenkitekichiuiliaj toTeko Cristo Jesús. 32 Tla nejua, ijkon ken oksekimej tlakamej, ne Éfeso yonikimixnamik yolkamej uan tekuaj, ¿tlenon ika nechpaleuiya? Tla akin yomikkej xyoliuiskej, “matitlakuakan niman itlaj matikonikan, pampa mostla timikiskej”. 33 Maka xmokauilikan mamechkajkayauakan. Tla nemouikaj imiuan akin kichiuaj tlen xkuajli, kijtlakos tlen kuajli nenkichiuaj. 34 Kuajli xtlanemilikan, xchiuakan tlen kuajli niman maka xchiuakan tlajtlakojli, pampa sekimej xkixmatij toTajtsin. Nimechijlia yejuin para xpinauikan.
35 Pero uelis yakaj kijtos: “¿Kenon yoliuiskej akin yomikkej? ¿Kenon yes intlalnakayo?”. 36 ¡Titonto! Xtikmati ika tlen tiktoka noneki achto mikis para sakin noskaltis. 37 Tejua xtiktoka itlaj tlen yonoskalti, tiktoka ixinach trigo noso okse xinachtli. 38 Pero toTajtsin kiskaltia ken yejua kineki, niman ijkuak noskaltia xsan noijki ken nesi. 39 Xnochimej san noijki intlalnakayo: onka intlalnakayo tlakamej, intlalnakayo yolkamej, intlalnakayo totomej niman intlalnakayo michimej. 40 Noijki nemij akin chantij ne cielo niman akin chantij ipan yejuin mundo, noijki tlamantik* ken nesij akin nemij ne cielo niman akin nemij ipan yejuin mundo. 41 Tonaltsintli niman metstli xsan noijki ken nesij, niman sitlalimej noijki tlamantik ken nesij, cada sitlalin tlamantik.
42 Noijki ijkon panos ijkuak yoliuiskej akin yomikkej. Ijtlakaui itlalnakayo ijkuak yakaj miki, pero ijkuak kiyolitiskej, xok ijtlakauis itlalnakayo. 43 Ijkuak yokitokakej se tlalnakayotl xkitlakaitaj, niman ijkuak kiyolitiaj kiueyiteneuaj. Ijkuak kitokaj xkojtik, niman ijkuak kiyolitiaj kipiya poder. 44 Kitokaj ken se tlalnakayotl niman kiyolitiaj ken se tlalnakayotl tlen xkipiya inakayo nion iomiyouan. Tla onka se tlalnakayotl noijki onka se tlalnakayotl tlen xkipiya inakayo nion iomiyouan. 45 Ijkin ijkuilijtika: “Adán, akin kachtopa tlakatl, okimakakej inemilis”. Niman sa ika tlami Adán, onochiuj se espíritu akin kitemaka nemilistli.* 46 Pero, yakaj xuelis kachtopa kipiyas itlalnakayo tlen xkipiya inakayo nion iomiyouan. Kachtopa noneki kipiyas itlalnakayo niman sakin kipiyas itlalnakayo tlen xkipiya inakayo nion iomiyouan. 47 Kachtopa tlakatl okichijchijkej ika tlajli nikan ipan yejuin mundo, on ika ome ualeua de ne cielo. 48 Akin okinchijchijkej ika tlajli, san noijki ken akin okichijchijkej ika tlajli. Pero akin nemij ne cielo noijki ken akin oualeuj ne cielo. 49 Niman, pampa otechchijchijkej ijkon ken akin okichijchijkej ika tlajli, noijki techchijchiuaskej ijkon ken akin oualeuj ne cielo.
50 Pero nokniuan, nimechijlia ika akin kipiyaj innakayo niman inomiyouan* xuelis kiseliskej iGobierno toTajtsin. Noijki, se tlalnakayotl tlen ijtlakaui xuelis kiselis itlaj tlen xijtlakaui. 51 ¡Xkakikan! Nimechijlis itlaj tlen xakaj kimati: xnochimej timikiskej, pero nochimej nimantsin techpatlaskej. 52 Nimantsin techpatlaskej ken ijkuak tikintlapouaj niman tikintsakuaj tixtololojuan, ijkuak kipitsaskej sa ika tlami trompeta. Pampa trompeta kakistis niman akin yomikkej yoliuiskej, pero xok ijtlakauis intlalnakayo, niman tejuamej techpatlaskej. 53 Pampa yejuin tlen ijtlakaui noneki nokuepas ken tlen xijtlakaui, niman yejuin tlen miki noneki nokuepas ken tlen xmiki. 54 Pero, ijkuak tlen ijtlakaui xok ijtlakauis niman ijkuak tlen miki xok mikis, ijkuakon nochiuas tlen ijkuilijtika: “Kipopolojtokej* mikilistli para nochipa”. 55 Mikilistli, ¿kanon onka mopoder para titetlanis? Mikilistli, ¿kanon onka moveneno? 56 Tlajtlakojli yejon veneno tlen kichiua matimikikan, niman Tlanauatijli kimaka poder tlajtlakojli. 57 ¡Pero tiktlasojkamachiliaj toTajtsin pampa yejua kichiua matitetlanikan ipampa toTeko Jesucristo!
58 Pero, noknitsitsinuan, xmelajkanemikan, maka xkauilikan itlaj mamechtlajkali niman nochipa xpiyakan miyek tekitl ipan itekiyo toTeko, pampa nenkimatij ika nochi yejon xsan nenka.