1 Corintios
3 Yejua ika, nokniuan, xouel onimechnots kentla akin noyekanaj ika iespíritu santo toTajtsin. Onimechnots kentla akin noyekanaj ika tlen kileuiya intlalnakayo. Ken kokonej akin xkasikamatij kenijki kichiuaskej ken Cristo. 2 Onimechmakak leche, xonimechmakak tlakuajli pampa xenenkojtikej katkaj. Niman hasta aman xnenkojtikej. 3 Nemejuamej ok* nemoyekanaj ika tlen kileuiya nemotlalnakayo. Ijkuak nemonexikolitaj niman nemokualaniaj, ¿xnenkiteititiaj ika nemoyekanaj ika tlen kileuiya nemotlalnakayo niman ika nenkichiuaj ijkon ken tlakamej? 4 Ijkuak nenkijtouaj “Nejua niiyaxka* Pablo”, pero okse kijtoua “Nejua niiyaxka Apolos”, ¿xnenkiteititijtokej ika nenkichiuaj san ken tlakamej?
5 ¿Akinon Apolos? ¿Akinon Pablo? Yejuamej san itekipanojkauan toTajtsin, akin otlapaleuijkej para xkixmatikan. Tikchiuaj tlen toTeko otechnauati matikchiuakan. 6 Nejua oniktokak, Apolos okatekij, pero toTajtsin okichiuj manoskalti. 7 Kuakon, nion akin toka nion akin tlaatekiya xtlaj kijtosnekij, san toTajtsin, akin kichiua manoskalti. 8 Akin tlatoka niman akin tlaatekiya san sekan tekitij. Pero, cada se kiselis itlaxtlauil ipampa tlen kichiua. 9 Pampa tejuamej san titekitij iuan toTajtsin. Nemejuamej kentla itlal toTajtsin tlen yejua kitokatika. Se ueyi kajli tlen yejua kichijchijtok.
10 Pampa toTajtsin yonechikneli maski xnechnamiki, nejua onikpeualti kajli ken yakaj akin melak kuajli kinchijchiua kaltin, pero yakaj okse kichijchijtok. Cada se makita kenijki kichijchiua. 11 Xakaj uelis kipatlas tlen ika yokipeualtijkej kajli, pampa Jesucristo yejua akin ika yokipeualtijkej. 12 Kampa yonopeualti kajli, yakaj uelis itlaj kichijchiuas ika oro, plata niman kualtsitsintin temej, noso ika madera niman ika tlatlamantik sakatl. 13 Pero ajsis se tonajli ijkuak noteititis kenijki okichiuj itekiyo cada se, pampa ipan yejon tonajli tlitl kiteititis tla kuajli noso xkuajli okichiuj itekiyo. 14 Tla tlen okichijchiuj se tlakatl kampa onopeualti kajli kixikoua tlitl, kitlaxtlauiliskej. 15 Tla tlen okichiuj se tlakatl tlatla, kipolos nochi, pero san no yejua nomakixtis. Maski ijkon, yejua yes kentla se tlakatl akin choloua de tlitl.
16 ¿Xnenkimatij ika nemejuamej kentla itemplo toTajtsin niman ika iespíritu nemopan onka? 17 Tla yakaj kipopoloua itemplo toTajtsin, toTajtsin kipopolos, pampa itemplo yokixelo para yejua. Niman nemejuamej yejon templo.
18 Maka xmokajkayauakan: tla yakaj de nemejuamej kinemilia ika tlamachilise ipan yejuin tiempo,* manochiua kentla yakaj akin xitlaj kimati para nochiuas tlamachilise. 19 Pampa toTajtsin kita ika tlamachilistli de yejuin mundo xtlaj kijtosneki. Ijkon ken ijkuilijtok: “ToTajtsin kinkauilia akin tlamachilisejkej inselti manokajkayauakan”. 20 Noijki ijkuilijtika: “Jehová kimatstok ika tlen kinemiliaj akin tlamachilisejkej xtlaj ika tepaleui”. 21 Kuakon, maka yakaj makiueyiteneua tlen kichiuaj tlakamej, pampa nochi nemoyaxka. 22 Pablo, Apolos, Cefas,* yejuin mundo, nemilistli, mikilistli, tlen aman onka noso tlen sakin onias ika tlayekapan nochi nemoyaxka. 23 Niman nemejuamej neninyaxka Cristo, niman Cristo iyaxka toTajtsin.