1 Corintios

7 Aman nimechnankilis tlen onennechtlajtoltijkej ijkuak onennechtlajkuilouilijkej. Más kuajli tla se tlakatl xnoteka iuan se siuatl. 2 Pero, pampa aman melak miyekej auilnemij* kuajli tla se tlakatl kipiya isiuauj niman se siuatl kipiya iueuentsin. 3 Tlakatl noneki notekas iuan isiuauj niman isiuauj noijki noneki ijkon kichiuas. 4 Tesiuauj xyejua akin kiyekana itlalnakayo, iueuentsin kiyekana. Noijki ijkon, teueuentsin xyejua akin kiyekana itlalnakayo, isiuauj yejua akin kiyekana. 5 Maka xkijtokan tla xsan sekan nemotekaskej. Pero, tla nenomemej yonenkijtojkej ika xsan sekan nemotekaskej se tiempo, ijkon xchiuakan para nenkichiuaskej oración niman sakin oksejpa san sekan xnemikan. Ijkon, Satanás xuelis kichiuas xtlajtlakokan san pampa xueli nemoteltiaj. 6 Uelis nenkichiuaskej ijkon ken yonimechijli, pero, xse tlanauatijli. 7 Nejua niknekiskia ika nochimej tlakamej makichiuakan ijkon ken nejua. Pero, toTajtsin kinkauilia ika sekimej manonamiktikan niman sekimej ka. Yejua ika, sekimej nonamiktiaj niman sekimej ka.

8 Akin xenonamiktiaj niman akin kaualtsitsintin nikimijlia ika más kuajli tla kichiuaj ken nejua. 9 Pero, tla xueli noteltiaj, manonamiktikan. Pampa más kuajli tla nonamiktiaj xijkon ken tla xok ueli kiteltiaj tlen kileuiyaj.

10 Se tlakatl akin yononamikti maka makikaua isiuauj niman se siuatl akin yononamikti maka makikaua iueuentsin. Yejuin xnejua nimechnauatia, mechnauatia toTeko. 11 Tla se siuatl kikaua iueuentsin, maka manonamikti noso tlamo manoyolseui iuan iueuentsin. Niman se tlakatl xnoneki kikauas isiuauj.

12 Pero oksekimej nikimijlia, ika tla se tokniuj kipiya isiuauj akin xtlaneltoka niman yejua kineki iuan nemis, maka makikaua. Yejuin nejua nimechijlia, xmechnauatia toTeko. 13 Niman, tla se siuatl kipiya iueuentsin akin xtlaneltoka niman yejua kineki iuan nokauas, maka makikaua iueuentsin. 14 Pampa teueuentsin akin xtlaneltoka kiteochiuaj ipampa isiuauj niman tesiuauj akin xtlaneltoka kiteochiuaj ipampa tokniuj tlakatl. Tla xijkon yeskia, inkoneuan xkinteochiuaskiaj, pero aman inkoneuan yokinteochijkej. 15 Pero, tla akin xtlaneltoka kineki tekauas, mauiya. Nion tokniuj tlakatl nion tokniuj siuatl xnoneki iuan nemis tla xkineki. ToTajtsin kichijtok xyolsejtokan. 16 Pampa, tesiuauj, ¿kenon tikmati tla uelis noso xuelis tikmakixtis moueuentsin? Noso, teueuentsin, ¿kenon tikmati tla uelis noso xuelis tikmakixtis mosiuauj?

17 Pero, nochimej manemikan ijkon ken Jehová yokinkauili niman ijkon ken nemiyaj ijkuak toTajtsin okinnots. Yejuin tlen nikimijlia nochimej tlanechikoltin. 18 ¿Yakaj okinotskej ijkuak yokinochiuilijka circuncisión? Maka makichiua ken akin xkinochiuilia circuncisión. ¿Yakaj okinotskej ijkuak xkinochiuiliaya circuncisión? Maka makinochiuili circuncisión. 19 Xtlaj ika tepaleui tla yakaj yokinochiuili circuncisión noso ka. Más tepaleui tla tiktlakamatij tlen technauatia toTajtsin. 20 Cada se manemi ijkon ken nemiya ijkuak toTajtsin okinots. 21 ¿Titlakeuajli katka ijkuak omitsnotskej? Maka mamitsajmana yejon. Pero, tla uelis tikchiuas mamitsmakauakan, xuiya. 22 Pampa akin tlakeuajli katka ijkuak toTeko okinots, aman kentla yokimakajkej niman iyaxka* toTeko. Noijki, akin xtlakeuajli katka ijkuak okinotskej, aman itlakeual Cristo. 23 Maka xmochiuakan kentla itlakeualuan gente pampa nemejuamej yomechkojkej. 24 Nokniuan, cada se manemi ijkon ken nemiya ijkuak toTajtsin okinots.

25 ToTeko xnechijlia tla itlaj manikinnauati akin xakaj iuan notekaj. Maski ijkon, nikneki nimechijlis tlen kinemilia yakaj akin toTeko yokikneli para mayolmelajkanemi. 26 Pampa aman onka miyek tlauejli, niknemilia ika más kuajli tla se tlakatl nokaua ijkon ken aman nemi. 27 ¿Tikpiya mosiuauj? Maka xnemilijto tikauas. ¿Xtikpiya mosiuauj? Maka xtejtemo tikpiyas. 28 Pero, tla timonamiktia xtikchiua se tlajtlakojli, niman tla nonamiktia yakaj akin xakaj iuan noteka, xkichiua se tlajtlakojli. Pero, akin nonamiktiaj, kipiyaj miyek tlauejli ipan innemilis. Nejua xnikneki xkixnamikikan yejon.

29 Nokniuan, noijki nimechijlia ika sa achijtsin tiempo tikpiyaj. Desde aman, akin kipiyaj insiuauj manochiuakan kentla akin xkipiyaj. 30 Niman akin chokaj manochiuakan kentla akin xchokaj, akin yolpakij kentla akin xyolpakij, akin tlakouaj kentla akin xkipiyaskiaj tlen kikouaj, 31 niman akin kitekitiltiaj yejuin mundo, manochiuakan kentla akin xnochi kitekitiltiaj. Pampa yenopatlatiuj tlen aman panotika ipan yejuin mundo. 32 Nimechijlia yejuin pampa xnikneki xmajmanakan. Se tlakatl akin xnonamiktia san kinemilijtika kenon kichiuas tlen yokinauati toTeko niman kiyolpaktis. 33 Pero, se tlakatl akin yononamikti san kinemilijtika kenon kichiuas tlen onka ipan yejuin mundo niman kenon kiyolpaktis isiuauj 34 niman xelijtika. Se siuatl akin xnonamiktia niman se siuatl akin xakaj iuan noteka, san kinemilijtokej kenon kichiuaskej tlen yokinnauati toTeko para chipauak kipiyaskej intlalnakayo niman intlamachilis. Pero, se siuatl akin yononamikti san kinemilijtika kenon kichiuas tlen onka ipan yejuin mundo niman kenon kiyolpaktis iueuentsin. 35 Pero yejuin nimechijlia pampa nikneki nimechpaleuis, xnimechijlia para nimechteltis* xchiuakan itlaj. Nimechijlia pampa nikneki xchiuakan tlen kuajli niman maka itlaj mamechtsakuili nochipa xtekichiuilikan toTeko.

36 Pero tla yakaj akin xnonamiktia yeueyi niman kimachilia ika yakaj kineki iuan notekas, más kuajli tla nonamiktia, pampa xse tlajtlakojli. 37 Pero yakaj más kuajli kichiuas tla kitlapejpenia ipan iyojlo ika xnonamiktis niman ueli san iselti noteltia, noijki tla kimati ika xnoneki nonamiktis niman ipan iyojlo kitlapejpenia nokauas iselti. 38 Kuakon, akin nonamiktia kuajli tlen kichiua, pero, akin xnonamiktia más kuajli tlen kichiua.

39 Se siuatl xuelis nonamiktis iuan okse tlakatl tla iueuentsin ok* yoltok. Pero tla iueuentsin miki, uelis nonamiktis iuan san akinon yejua kinekis. Pero akin iuan nonamiktis noneki kichiuas ijkon ken toTeko. 40 Pero, nejua niknemilia ika más yolpakis tla nokaua ijkon ken nemi. Pampa nejua nikmatstika ika noijki nikpiya iespíritu toTajtsin.