1 Corintios

5 Yonechijlijkej ika ompa nemi yakaj akin kichijtika itlaj tlen melak xkuajli. Itlaj tlen nion xkichiuaskiaj akin xtlaneltokaj itech toTajtsin. Yonechijlijkej ika se tlakatl chanti* iuan isiuauj itaj. 2 ¿Niman nemejuamej nemoueyimatij? ¿Xnonekiskia nemajmanaskej para makikixtikan yejon tlakatl akin ijkon kichijtok? 3 Maski xnemouan ninemi, nemejuamej yenenkimatij kenijki nitlanemilia. Niman yoniktlajtlakolmakak yejon tlakatl akin ijkon okichiuj. Nejua oniktlajtlakolmakak ijkon ken tla ompa ninemiskia. 4 Xmosentlalikan ika itoka toTeko Jesús. Xkilnamikikan kenijki nitlanemilia niman ika ipoder toTeko Jesús 5 xmaktilikan Satanás yejon tlakatl para mapopoliui tlen xkuajli nochiua. Ijkon xijtlakauis ken kuajli tlanemiliaj akin nemij ipan tlanechikojli ijkuak ajsis itonal toTeko.

6 Xkuajli tla nemoueyimatij. ¿Xnenkimatij ika san achijtsin levadura kichiua manajkokui nochi harina? 7 Xkixtikan levadura tlen youejkauj para uelis nemochiuaskej kentla harina tlen yenkuik. Se harina tlen xkipiya levadura, ijkon ken aman nemejuamej. Pampa yokiuentlalijkej Cristo, toborreguito akin kiuentlaliaj ipan Pascua. 8 Kuakon, maka matiiluipanokan ika tlen xkuajli niman ika tlajtlakojli, tlen yeskia kentla levadura tlen youejkauj. Matiiluipanokan ika nochi toyojlo niman ika tlen melauak, tlen yeskia kentla pan tlen xkipiya levadura.

9 Ipan se carta, onimechijkuilouili ika maka xmouikakan imiuan akin auilnemij.* 10 Ika yejuin xoniknek nikijtos tla nion achijtsin xnoneki nemoneloskej imiuan akin auilnemij,* akin nochi kinoyaxkatisnekij,* akin tekajkayauaj noso akin kinueyichiuaj imágenes. Tla ijkon yeskia, nemejuamej nonekiskia nenkisaskej de yejuin mundo. 11 Pero, aman nimechijkuilouilia ika maka sa xmosentlalikan iuan akin maski kijliaj tokniuj, auilnemi,* nochi kinoyaxkatisneki, kinueyichiua imágenes, teuijuikaltia,* borracho noso tekajkayaua. Nion maka iuan xtlakuakan. 12 Pampa, ¿tleka noneki nikintlajtlakolmakas akin xtokniuan? ¿Xnemejuamej nenkintlajtlakolmakaj tokniuan 13 niman toTajtsin kintlajtlakolmaka akin xtokniuan? “Xkixtikan akin kichiua tlen xkuajli niman nemouan nemi”.