3 Juan
1 Nejua akin nitlayekanketl,* nimitsontlajkuilouilia tejua nokniuj Gayo, akin melak nimitstlasojtla.
2 Noknitsin, nikchiua oración para nochi tlen tikchiua kuajli makisati niman maka xkualo. Niktlajtlani kuajli xnemi ijkon ken hasta aman. 3 Pampa melak oniyolpak ijkuak ouajlajkej tokniuan niman okijtojkej ika timelajkanemi niman xtikajkaua on tlen melauak. 4 Nejua melak niyolpaki ijkuak nikaki ika nokoneuan xkikajkauaj on tlen melauak.
5 Noknitsin, tikteititijtika ika titlaneltoka itech toTajtsin ika tlen tikchiua ipampa tokniuan, maski xtikimixmati. 6 Yejuamej yokimijlijkej tokniuan ipan tlanechikojli kenijki tejua melak titetlasojtla. Se favor, xkinmaka tlen kitekitiltiskej* ijkuak oksekan yaskej niman xchiua ijkon ken toTajtsin kuelita. 7 Pampa ijkuak yejuamej okiskej para kiteijliskej itoka toTajtsin, xtlaj okintlajtlanilijkej akin xtlaneltokaj itech Jesús. 8 Kuakon, tejuamej noneki kuajli tikinseliskej tokniuan akin kichiuaj ijkon ken yejuamej, para tikinpaleuiskej oksekimej makixmatikan tlen melauak.
9 Itlaj onikimijkuilouili tokniuan akin nemij ipan tlanechikojli, pero Diótrefes, xkuajli kiselia on tlen tikijtouaj pampa san nochipa kineki yejua mechyekanas. 10 Ika yejon, tla ompa niauj, nikteijlis ika totech kijtojtinemi tlen xkuajli. Niman xsan yejon, noijki xkuajli kinselia tokniuan niman xkintlakaita. Niman, akin kinekij kinseliskej tokniuan, yejua kita kenijki tokniuan maka ijkon makichiuakan niman kita kenijki kinkixtis itech tlanechikojli.
11 Noknitsin, maka xchiua ken akin kichiuaj tlen xkuajli, xchiua ken akin kichiuaj tlen kuajli. Akin kichiua on tlen kuajli ualeua itech toTajtsin. Akin kichiua tlen xkuajli xkixmati toTajtsin. 12 Nochimej yejuamej kuajli yotlajtojkej itech Demetrio, niman tlen kijtouaj yonoteititi ika melauak pampa yejua nemi ijkon ken otemachti Cristo. Hasta tejuamej noijki itech titlajtouaj niman tejua tikmatstok ika xtitlakajkayauaj.
13 Nikpiaya miyek tlen niknekiya nimitsijlis, pero xnikneki san nimitsijkuilouilis. 14 Sa niknektika nimitsonitas niman san sekan titlajtoskej.
Xyolsejto.
Toamigos akin nikan nemij mitsontlajpalouaj. Xnechintlajpalouili cada se de toamigos akin ompa nemij.