1 Corintios
1 Nejua niPablo, Cristo Jesús onechtlapejpeni para maninochiua iapóstol, pampa toTajtsin ijkon okinek. Nejua iuan tokniuj Sóstenes 2 timechtlajkuilouiliaj nemejuamej akin nennemij ipan tlanechikojli tlen onka Corinto. Nemejuamej akin yomechchipajkej pampa nentlaneltokaj itech Cristo Jesús. ToTajtsin yomechtlapejpeni nemejuamej para xtekichiuilikan niman noijki yokintlapejpeni oksekimej akin kitekitiltijtokej* itoka toTeko Jesucristo, akin inTeko niman noijki toTeko.
3 Niktlajtlanilia toTajtsin, akin toTaj, niman noijki niktlajtlanilia toTeko Jesucristo ika mamechikneli maski xmechnamiki niman mamechyolseui.
4 Nochipa niktlasojkamachilia noTajtsin nemopampa. Yejua yomechititi ika mechiknelia maski xmechnamiki ipampa Cristo Jesús. 5 Ipampa yejua, toTajtsin nochi yomechmakak, yomechkauili kuajli xteijlikan itlajtol niman miyek xmatikan. 6 Nemejuamej ika nochi nemoyojlo yonenkineltokakej tlen onotemachti itech Cristo. 7 Yejua ika, xtlaj mechpoloua aman ika sa nenkichiatokej manoteititi toTeko Jesucristo. 8 Yejua noijki mechpaleuis xmelajkanemikan hasta ijkuak nochi tlamis para maka kijtoskej tla yonenkichijkej itlaj tlen xkuajli ijkuak yejkos itonal toTeko Jesucristo. 9 ToTajtsin yolmelajki. Yejua omechnots para xnemikan iuan toTeko Jesucristo, akin iKoneuj.
10 Aman, nokniuan, nimechtlajtlanilia ipampa itoka toTeko Jesucristo ika nochimej xmotlajtolnamikikan, maka xmoxejxelokan, xmokojtilikan san noijki ken nentlanemiliskej niman san noijki ken nentetlajtlakolmakaskej. 11 Nokniuan, sekimej akin chantij ichan Cloe, onechijlijkej ika nemokualaniaj. 12 Ijkon nikijtoua pampa sekimej ijkin kijtojtinemij: “Nejua niiyaxka* Pablo”, “Nejua niiyaxka Apolos”, “Nejua niiyaxka Cefas”,* niman “Nejua niiyaxka Cristo”. 13 ¿Cristo xejxelijtika? ¿Xmelak ika xokipilojkej Pablo ipan kojtli melaktik nemopampa? ¿Noso omechapolaktijkej ipampa itoka Pablo? 14 Niktlasojkamachilia toTajtsin pampa xonimechapolakti nion se de nemejuamej. San Crispo niman Gayo. 15 Pampa ijkon xakaj uelis kijtos tla nemejuamej omechapolaktijkej ika notoka. 16 Melauak, noijki onikinapolakti akin nemij ichan Estéfanas. Pero, xok nikilnamiki tla yakaj más onikapolakti. 17 Cristo xonechajtitlan para maniteapolakti, yejua onechajtitlan para manikteijli kuajli tlajtoltin. Nejua xonikintekitilti tlajtoltin tlen kinkuij akin tlamachilisejkej para maka nikchiuas ika kentla san nenka ika Cristo okipilojkej ipan kojtli melaktik.*
18 Akin kinpopoloskej kitaj ika xtlaj ika tepaleui tikteijliskej ika Cristo okipilojkej ipan kojtli melaktik. Pero, para tejuamej akin techmakixtijtokej, yejuin kiteititia ipoder toTajtsin. 19 Pampa ijkuilijtika: “Nikpopolos intlamachilis akin tlamachilisejkej niman xnikselis tlen kimatij akin melak yonomachtijkej”. 20 ¿Kanon nemi akin melak tlamachilise? ¿Kanon nemi akin melak kixmati tlanauatijli? ¿Kanon nemi akin melak kuelita teuan nokamatlatlanis ipan yejuin mundo? ¿ToTajtsin xokichiuj ika tlamachilistli de yejuin mundo maka itlaj ika matepaleui? 21 Akin chantij ipan yejuin mundo xkixmatij toTajtsin pampa kinneltokaj akin tlamachilisejkej. Pero, toTajtsin okiteititi ika yejua tlamachilise ijkuak okinmakixti akin tlaneltokaj itech tlen tikteijliaj, maski sekimej kitaj ika xtlaj ika tepaleui.
22 Akin judíos kinekij makimititikan milagros* niman akin griegos kitejtemouaj tlamachilistli. 23 Pero tejuamej tikteijliaj ika Cristo okipilojkej ipan kojtli melaktik. Niman yejuin itlaj tlen kichiua judíos mauetsikan niman akin xjudíos kitaj ika xtlaj ika tepaleui. 24 Pero, judíos niman griegos akin yokinnotskej kimatij ika Cristo kiteititia ipoder niman itlamachilis toTajtsin. 25 Gente uelis kitas ika xtlaj ika tepaleui tlen iyaxka toTajtsin, pero yejon tlen iyaxka toTajtsin más tlamachilisej niman más kojtik xijkon ken yejuamej.
26 Nokniuan, xmoitakan san no nemejuamej akin yomechnotskej: xnemij miyekej akin gente kinemilia ika tlamachilisejkej, akin kojtikej noso akin oualejkej itech familias akin uejueyixtokej. 27 ToTajtsin okitlapejpeni ipan yejuin mundo tlen gente kinemilia ika xtlaj ika tepaleui para kinpinajtis akin tlamachilisejkej. ToTajtsin okitlapejpeni ipan yejuin mundo tlen gente kita ika xkojtik para kipinajtis tlen kojtik. 28 Niman para toTajtsin kiteititis ika tlen gente kipatiojkaita xtlaj ika tepaleui, okitlapejpeni ipan yejuin mundo tlen yejuamej kitaj ika xueyi kijtosneki niman tlen xkitlakaitaj. Okitlapejpeni yejon tlen xtlaj ika tepaleui. 29 Ijkon xakaj uelis noueyimatis ixpan toTajtsin. 30 Xtlasojkamachilikan pampa yejua okichiuj ika nemejuamej xnemikan iuan Cristo Jesús. Yejua yokichiuj ika matikpiyakan tlamachilistli tlen ualeua itech toTajtsin, matikpiyakan kuajli toyojlo, matichipajkanemikan niman matechmakixtikan. 31 Para manochiua ijkon ken ijkuilijtok: “Akin noueyimati, manoueyimati pampa kixmati Jehová”.