1 Corintios

13 Tla nitlajtoua ken on gente niman ken ángeles pero xnitetlasojtla, niyeskia kentla se tepostli tlen san tsilini niman tetsontekonkoko.* 2 Tla xnitetlasojtla, xtlaj ika tepaleuiya maski tla ueli nikinteneua teotlajtoltin, maski tla nikasikamati nochi tlen iyantika, maski tla melak nitlamachilise niman maski tla notlaneltok ueliskia kimolinis tepemej. 3 Tla xnitetlasojtla, xtlaj ika nitepaleuiya maski tla niktemaka nochi tlen nikpiya para nikintlakualtis oksekimej noso ninotemakas manechmiktikan para ninoueyimatis.

4 Akin tetlasojtla teijyouiya niman teiknelia. Akin tetlasojtla xtenexikolita, xkijtojtinemi tlen kichiua, xnoueyimati, 5 xkichiua tlen tepinajti, xsan itech tlanemilia, xnimantsin kualani, xkilnamiki kechpa yokichiuilijkej tlen xkuajli. 6 Yolpaki ijkuak nochiua tlen kuajli niman xyolpaki ijkuak nochiua tlen xkuajli. 7 Akin tetlasojtla nochi kijyouiya, nochi kineltoka, nochi kichia, nochi kixikoua.

8 Tlasojtlalistli xkeman tlamis. Pero xok yakaj uelis kinteneuas teotlajtoltin, xok tlajtos ika miyek tlajtoltin* nion xok tlajtos ika tlamachilistli, pampa nochi yejon popoliuis. 9 Pampa xnochi tikixmatij niman xueli tikteijliaj nochi tlen kijtoua teotlajtojli. 10 Pero ajsis tonajli ijkuak nochi tikasikamatiskej niman xok san achijtsin tikasikamatiskej. 11 Ijkuak nikonetl katka, nitlajtouaya ken konetl niman nitlanemiliaya ken se konetl. Pero aman ika yenitlakatl xok nikchiua ken se konetl. 12 Pampa aman titlachixtokej ipan se espejo de tepostli kampa xnochi kuajli nesi, pero sakin kuajli tikitaskej. Aman xnochi kuajli nikmati, pero ijkuakon kuajli nikmatis ijkon ken miyek kimatij notech. 13 Pero tejuamej nochipa titlaneltokaskej, tikchiaskej ika toTajtsin matechpaleui niman titetlasojtlaskej. Pero de nochi yejuin, más nonekis titetlasojtlaskej.