1 Corintios
9 ¿Xuelis nikchiuas tlen nikneki? ¿Xniapóstol? ¿Xonikitak Jesús, akin toTeko? ¿Xnemejuamej akin nenkiteititiaj ika niktekichiuilia toTeko? 2 Maski para oksekimej nejua xniapóstol, kuajli nikmatstika ika para nemejuamej kema niapóstol. Pampa nemejuamej nenyeskiaj kentla se sello tlen kiteititia ika nejua niiapóstol toTeko.
3 Yejuin tlen nikneki nikimijlis akin tlajtojtinemij notech. 4 ¿Xmelak ika tinochimej uelis titlakuaskej niman itlaj tikoniskej? 5 Tejuamej noijki uelis tikpiyaskej tosiuauj akin matlaneltoka itech toTajtsin. Ijkon ken kichiuaj oksekimej apóstoles, ken ikniuan toTeko niman Cefas.* 6 ¿Noso san Bernabé niman nejua noneki titekitiskej para tikpiyaskej tlen ika topanoltiskej? 7 ¿Akinon tlapaleuiya ken soldado niman san no yejua kitlaxtlaua tlen ika nopanoltia? ¿Akinon kitoka uva niman xkikua ijkuak yotlak? Noso, ¿xmelak ika akin kintlajpiyaj inborregos noijki kinmoniliaj inleche?
8 Nejua xnikijtoua san tlen gente kinemilia, pampa ipan Tlanauatijli noijki ijkon kijtoua. 9 Pampa ipan Tlanauatijli tlen okimakakej Moisés ijkin kijtoua: “Maka xtenbozalti uakax ijkuak papanos* ipan trigo para kitejteinis”. ¿ToTajtsin ijkon otlanauati pampa najmana ipampa uakaxtin? 10 Ka. Yejuin onoijkuilo topampa. Pampa yejon tlakatl akin tlaxoponia niman tlakatl akin kitejteinia trigo kichiua pampa kimatstika ika itlaj kiselis.
11 Pampa otiktokakej itlajtol toTajtsin ipan nemoyojlo, ¿xkuajli yeskia tla nentechpaleuiskiaj ika tlen techpoloua? 12 Tla nemejuamej ijkon nenkinpaleuiyaj oksekimej, ¿tleka xuelis timechtlajtlaniliskej xtechpaleuikan? Pero xijkon tikchiuaj. Tejuamej titlaxikouaj pampa xtiknekij yakaj tiktsakuiliskej matlaneltoka itech tlen tikteijliaj itech Cristo. 13 ¿Xnenkimatij ika akin kitekichiuiliaj toTajtsin kampa templo kikuaj tlen ompa onka niman ika akin tlauentlaliaj noijki kiseliaj achijtsin itech tlen kiuentlaliaj? 14 Noijki, toTeko otenauatij ika akin kiteijliaj kuajli tlajtoltin manemikan ipampa* kuajli tlajtoltin.
15 Pero xtlaj onimechtlajtlanili. Nejua xnimechijkuilouilia yejuin para xnechpaleuikan. Melak niyolpaki pampa xtlaj niktlani ijkuak nikteijlia kuajli tlajtoltin. Xnijkauilis ika yakaj makichiua maka sa maniyolpaki. 16 Nejua xnoneki ninoueyimatis tla nikteijlia kuajli tlajtoltin pampa yejon tlen kipiya ika nikchiuas. ¡Melak xkuajli tlen nopan nochiuaskia tla xnikteijliskia kuajli tlajtoltin! 17 Tla nikchiua ika nochi noyojlo, nechteochiuaskej. Pero, tla nikchiuaskia maski xnikneki, kipiya ika nikchiuas pampa yejon tekitl tlen yonechmaktilijkej. 18 ¿Kenon nikselia yejon tlateochiualistli? Nejua nikselia tlateochiualistli ijkuak nikteijlia kuajli tlajtoltin niman xtlaj niktlani. Ijkon, xtlaj niktlani maski nechnamikiskia itlaj maniktlani pampa nikteijlia kuajli tlajtoltin.
19 Maski uelis nikchiuas san tlen nejua nikneki, yoninochiuj se tlakeuajli para melak miyekej nikinpaleuis. 20 Imiuan akin judíos oninochiuj kentla judío para nikintlaneltokiltis akin judíos. Imiuan akin kitlakamatij tlanauatijli oninochiuj kentla tla niktlakamatiskia tlanauatijli para uelis nikintlaneltokiltis akin noyekanaj ika tlanauatijli, maski nejua xninoyekana ika tlanauatijli. 21 Ijkuak ninemi imiuan akin xnoyekanaj ika tlanauatijli, ninochiua ken yejuamej para uelis nikintlaneltokiltis. Maski nejua kema niktlakamati itlanauatil toTajtsin niman itlanauatil Cristo. 22 Ijkuak ninemiya imiuan akin xchikauak kipiyaj intlaneltok, oninochiuj kentla yejuamej para uelis nikintlaneltokiltis. Nejua yonikchiuj nochi tlen noneki para uelis sekimej nikinmakixtis. 23 Pero nochi yejuin nikchiua para uelis nochimej nikimijlis kuajli tlajtoltin.
24 ¿Xnenkimatij ika maski miyekej notlalouaj kampa notlatlanij, san se akin tetlani? Xmotlalokan para nentetlaniskej. 25 Nochimej akin notlatlalouaj notlajpiyaj para maka itlaj inpan mapano. Yejuamej ijkon kichiuaj para kiseliskej se corona tlen ueli pilini. Pero tejuamej tikchiuaj para tikseliskej se corona tlen xueli pilini. 26 Kuakon, nejua ninotlaloua pampa yenikmati kanon noneki najsis. Noijki, ijkuak nitlauijsoki,* xsan ajakatl nikuijsoki. 27 Nejua niktlajyouiltia notlalnakayo kentla se tlakeuajli. Tla xijkon nikchiuas toTajtsin xnechselis, maski nikinnojnotsas oksekimej.