1 Corintios

8 Tinochimej tikmatij tlen kijtoua tlanauatijli itech comida tlen yokinuentlalilijkej imágenes. Akin kinemilia ika miyek kimati noueyimati, pero akin tetlasojtla, kinpaleuiya oksekimej. 2 Tla yakaj kinemilia ika itlaj kimati, kijtosneki ika xekimati tlen kinemilia ika yekimati. 3 Pero tla yakaj kitlasojtla toTajtsin, yejua kixmati.

4 Kuakon, ¿kuajli tla tikuaj tlen yokinuentlalilijkej imágenes? Tikmatstokej ika imágenes xtlaj kijtosnekij ipan yejuin mundo, niman ika san se toTajtsin nemi. 5 Miyekej kijtouaj ika nemij miyekej dioses ne ipan cielo niman nikan ipan yejuin mundo, niman melauak ika nemij miyekej “dioses” niman miyekej “akin tetekouan”. 6 Maski ijkon, para tejuamej san se toTajtsin tikpiyaj, akin toTaj. Yejua akin nochi itech ualeua niman otechchijchiuj. Niman san se toTeko nemi, Jesucristo, akin ipampa* nochi onochijchiuj niman akin ipampa tinemij.

7 Pero xnochimej kimatij yejuin. Sekimej, pampa kachtopa kinueyichiuayaj imágenes niman xchikauak kipiyaj intlamachilis, ijkuak kikuaj comida kimachiliaj kentla tla kikuajtoskiaj tlen yokinuentlalilijkej imágenes niman kinpasoloua intlamachilis. 8 Pero comida xkichiua más matiknisiuikan toTajtsin. Tla xtijkuaj, xtlaj tikpolouaj niman tla tijkuaj, xtlaj tiktlanij. 9 Pero kuajli xkitakan ika ijkuak itlaj nenkitlapejpeniskej, maka makitlajkali akin xkipiya chikauak itlaneltok. 10 Tejua yetikmati tlenon kijtoua tlanauatijli. Pero tla yakaj mitsitaskia ika titlakuajtika ipan templo kampa kinueyichiuaj imágenes, ¿xtiknemilia ika akin xkipiya chikauak itlamachilis ueliskia peuas kinemilis ika kuajli tla kikua tlen kinuentlaliliaj imágenes? 11 Ijkon, ika tlen tejua tikmati, tikchiua ika se tlakatl akin xkipiya chikauak itlaneltok mapoliui, se mokniuj akin Cristo omik ipampa. 12 Ijkuak ijkon nentlajtlakouaj imiuan nemokniuan niman nenkimijtlakouaj akin xchikauak kipiyaj intlamachilis, nentlajtlakouaj itech Cristo. 13 Yejua ika, tla ika comida niktlajkali nokniuj, xok keman nijkuas nakatl, ijkon xniktlajkalis nokniuj.