ROMANOS

1 Nejua niPablo, akin niitlakeual Cristo Jesús niman yonechtlalijkej ken apóstol, para nikteijlis tlen kualtsin kichiuas toTajtsin. 2 Yejuin tlen nikteijlia itlaj tlen yejua yokijtojka ika kichiuas ipampa* iteotlajtojkauan akin noteneuaj ipan Tlajkuiloltin 3 niman tlajtoua itech iKoneuj. Yejua onochiuj Tlakatl niman oualeuj itech ichanejkauan David. 4 Pero, ika ipoder espíritu santo okitlalijkej ken iKoneuj toTajtsin ijkuak okiyolitijkej intech akin yomikkej. Kema, yejua toTeko Jesucristo. 5 Ipampa yejua techikneliaj maski xtechnamiki, niman techtlaliaj ken apóstoles para nochimej akin xjudíos matetlakamatikan niman matlaneltokakan para kiueyiliskej itoka. 6 Nemejuamej noijki omechnotskej itech yejuin pueblos para neniyaxkauan* yeskej Jesucristo. 7 Nochimej akin nemij ne Roma, akin toTajtsin kintlasojtla niman yokintlapejpeni.

Niktlajtlani ika toTajtsin akin yejua toTaj, niman noijki toTeko Jesucristo makimikneli maski xkinnamiki niman makinyolseui.

8 Ipampa Jesucristo niktlasojkamachilia noTajtsin nemopampa, ijkon nikchiua pampa ipan nochi mundo kijtouaj kenijki nentlaneltokaj. 9 Nejua chikauak niktekichiuilia toTajtsin niman nikteijlia kuajli tlajtoltin itech iKoneuj. Yejua ika, toTajtsin kimatstika ika xnisiaui ika nimechteneua ipan nooraciones. 10 Niman niktlajtlani, ika tla ueli niman tla toTajtsin kineki, aman kema manimechtlajpaloti. 11 Sa niknektika nimechitas para nimechijlis itlaj tlen kichiuas más xtlaneltokakan itech toTajtsin. 12 Noso para ika nemotlaneltok niman notlaneltok nochimej san sekan matoyolchikauakan.

13 Nokniuan, maski hasta aman xueli niauj, nikneki xmatikan ika miyekpa oniknek nimechontas para nikitas kenijki miyekej yopeuj tlaneltokaj pampa yonitenojnots, ijkon ken ipan okseki pueblos. 14 Nejua nikmachilia ika kentla itlaj nikinuikilia akin griegos niman akin xgriegos, akin tlamachilisejkej niman akin xtlamachilisejkej. 15 Yejua ika, sa niknektika nimechijlis kuajli tlajtoltin noijki ne Roma. 16 Pampa nejua xnipinaui nikteijlis kuajli tlajtoltin. Yejuin kuajli tlajtoltin kiteititiaj ipoder toTajtsin para kinmakixtis nochimej akin tlaneltokaj, kachtopa akin judío niman noijki akin griego. 17 Yejuin kuajli tlajtoltin kichiua ika akin tlaneltokaj itech toTajtsin makitakan tlen melajki kichiua niman más matlaneltokakan. Ijkon ken ijkuilijtika: “Akin kichiua tlen kuajli yoltos pampa tlaneltoka”.

18 Kema, toTajtsin desde ne ipan cielo kiteititia ika kikualaniaj tlakamej akin kichiuaj tlen xkuajli niman xkitekauiliaj makimatikan tlen melauak, 19 pampa toTajtsin kuajli yokimititi nochi tlen noneki kimatiskej itech yejua. 20 Yejuamej xuelis kijtoskej tla xnemi, pampa maski xueli tikitaj toTajtsin, uelis tikixmatiskej tla tomachtiaj kenijki okichijchiuj yejuin mundo niman tla tikitaj nochi tlen okichijchiuj. Nochi yejuin kiteititia ika ipoder xkeman tlami niman ika yejua akin melauak toTajtsin. 21 Maski kixmatiyaj toTajtsin, xokiueyichijkej ijkon ken noneki nion xokitlasojkamachilijkej. Yejuamej opeuj kinemiliaj tlen xtepaleui niman inyojlo okimijtlako. 22 Yejuamej onochijkej tontos maski kijtouayaj ika tlamachilisejkej. 23 Niman xok okiueyichijkej toTajtsin akin nochipa yoltika, yejuamej opeuj kinueyichiuaj imágenes tlen nesij ken tlakamej, totomej, yolkamej uan kinpiyaj naui imikxiuan niman yolkamej uan notilanaj.

24 Pampa yejuamej miyek kileuiayaj ipan inyojlo, toTajtsin okinkauili makichiuakan tlen xchipauak para san no yejuamej makijtlakokan intlalnakayo. 25 Yejuamej okipatlakej tlen melauak itech toTajtsin ika tlen xmelauak. Niman opeuj kiueyichiuaj niman kitekichiuiliaj tlen okichijchijkej niman xokiueyichijkej akin otlachijchiuj, akin kinamiki nochipa makiueyichiuakan. Amén. 26 Yejua ika, toTajtsin okinkauili makichiuakan tlen tepinajti pampa siuamej xok okinekkej notekaskej imiuan tlakamej niman opeuj kinekij notekaskej imiuan siuamej. 27 Noijki ijkon, tlakamej xok okinekkej notekaskej imiuan siuamej, opeuj kinuelitaj tlakamej niman okichijkej tlen tepinajti. Niman opeuj tlajyouiyaj ipampa tlen san no yejuamej xkuajli yokichijkaj.

28 Pampa xokitakej tla nonekiya kixmatiskej toTajtsin, yejua okinkauili makinemilikan tlen xkuajli para makichiuakan tlen xnoneki nochiuas. 29 Yejuamej nochipa kinemilijtoyaj kitekichiuiliskej tlen xmelajki, yolpakiyaj ika tlen xkuajli, kinekiyaj notomintiskej niman kileuiayaj tlen xkuajli. Melak tenexikolitayaj, temiktiayaj, nouisokiyaj, tekajkayauayaj, tentoyaj ika tlen xkuajli niman tetejteneuayaj. 30 Yejuamej tetlajtolchijchiuiliayaj, kitlauelitayaj toTajtsin, xpinajkayojkej katkaj, noueyimatiyaj, noueyiteneuayaj maski xtlaj kipiayaj, kinemiliayaj kenijki kichiuaskej tlen xkuajli, xkintlakamatiyaj intajuan, 31 xtlaj kasikamatiyaj, xkichiuayaj tlen yokijtojkaj kichiuaskej, xtetlasojtlayaj niman xteikneliayaj. 32 Maski yejuamej kimatij ika toTajtsin yokijto ika akin ijkon kichiuaj kinamiki mamikikan, yejuamej xkikajkauaj ika ijkon kichiuaj, niman hasta kinmatlaxkalouiliaj akin noijki ijkon kichiuaj.

2 Kuakon, tla titetlajtlakolmaka, maski san tiakinon, xmitsnamiki ijkon tikchiuas. Ijkuak titetlajtlakolmaka san no tejua timotlajtlakolmakatika, pampa tejua akin titetlajtlakolmaka san noijki ijkon tikchiua. 2 Tikmatstokej ika toTajtsin tetlajtlakolmaka ika tlen melauak niman kimixnamiki akin ijkon kichiuaj.

3 Pero, tejua akin tikintlajtlakolmaka akin kichiuaj tlen tejua noijki tikchiua, ¿tiknemilia ika toTajtsin xmitstlajtlakolmakas? 4 ¿Noso xtikneltoka ika toTajtsin kipiya kuajli iyojlo, techxikoua niman techijyouiya? ¿Xtikmati ika toTajtsin kuajli iyojlo pampa kiyejyekotika kichiuas xmoyolkuepa? 5 Pero, pampa xtitlakaki niman xtimoyolkuepa, san no tejua tikchijtok mopan mauajla* itlauel toTajtsin tlen kiteititis ijkuak yejkos itonal niman tetlajtlakolmakas ijkon ken kinamiki. 6 Niman yejua kinmakas nochimej tlen kinnamiki ipampa tlen kichiuaj. 7 Kipiyaskej nemilistli tlen xkeman tlami akin kiueyiliaj toTajtsin, kitlakaitaj niman xnoijtlakouaj ijkuak tlaxikouaj niman kichiuaj tlen kuajli. 8 Pero onias tlauejli para akin kipeualtia tlen xkuajli niman kitlakamati tlen xmelauak pero xkitlakamati tlen melauak. 9 Melak tlajyouis akin kichiua tlen xkuajli, kachtopa akin judío niman noijki akin griego. 10 Pero kiueyiliskej, kitlakaitaskej niman yolsejtos akin kichiua tlen kuajli, kachtopa akin judío niman noijki akin griego. 11 Pampa toTajtsin xtechikoita.

12 Nochimej akin okichijkej se tlajtlakojli niman xokixmatkej tlanauatijli, mikiskej maski xokixmatkej tlanauatijli. Pero nochimej akin okichijkej se tlajtlakojli niman kixmatiyaj tlanauatijli, kintlajtlakolmakaskej ijkon ken kijtoua tlanauatijli. 13 Pampa toTajtsin xkimita ika yolmelajkej akin kikakij tlanauatijli, yejua kimitas ika yolmelajkej akin kichiuaj tlen kijtoua tlanauatijli. 14 Pampa, ijkuak judíos kichiuaj tlen kijtoua tlanauatijli maski xkixmatij, yejon tlen kichijtokej nochiua kentla se tlanauatijli para yejuamej. 15 Yejuamej kiteititiaj ika tlanauatijli ijkuilijtika ipan inyojlo niman intlamachilis noijki kinpaleuiya. Tlen kinemiliaj kichiua makimatikan tla kuajli noso tla xkuajli tlen okichijkej. 16 Yejuin ijkon nochiuas, ijkuak nochi tlen gente san ichtaka kichiua kintlajtlakolmakaskej ipan tonajli ijkuak toTajtsin tetlajtlakolmakas ipampa* Cristo Jesús. Ijkon ken kijtouaj kuajli tlajtoltin tlen nikteijlia.

17 Pero tla tejua tikijtoua ika tijudío, tiktlakamati tlanauatijli niman tiyolpaki pampa timouika iuan toTajtsin, 18 tla tikmati tlenon kineki toTajtsin niman tikneki manochiua tlen kuajli pampa yomitsmachtijkej Tlanauatijli tlen okimakakej Moisés, 19 tla tikmatstika ika tikinyekana akin xtlachiaj niman kentla titlauijli para akin nemij kampa tlayouatok, 20 tla tikinmachtia akin xtlamachilisejkej niman kokonej akin pipitikej* niman tla kuajli tikasikamati tlen xouijtika niman tlen melauak itech Tlanauatijli..., 21 kuakon, tejua akin titemachtia, ¿xsan notejua timomachtia? Tejua akin tikteijlia “Maka xtlachteki”, ¿titlachteki? 22 Tejua akin tikijtoua “Maka xmoteka iuan akin xmoixnamik”, ¿timoteka iuan akin xmoixnamik? Tejua akin xtikimitasneki imágenes, ¿titlachteki kampa templos? 23 Tejua akin timoueyimati pampa tikixmati tlanauatijli, ¿tikteititia ika xtiktlakaita toTajtsin pampa xtiktlakamati Tlanauatijli? 24 Pampa, ijkon ken ijkuilijtika, “nochimej akin xjudíos yokixnamikkej itoka toTajtsin san nemopampa”.

25 Pampa circuncisión san tepaleuiya tla tiktlakamati tlanauatijli. Pero, tla xtiktlakamati tlanauatijli, yeskia kentla tla xtikpiyaskia circuncisión. 26 Yejua ika, tla se tlakatl akin xkinochiuilia circuncisión kitlakamati nochi Tlanauatijli tlen okimakakej Moisés, ¿xnenkinemiliaj ika yejon tlakatl kitaskej kentla tla yekipiya circuncisión? 27 Niman yejon tlakatl akin xkinochiuilia circuncisión ipan itlalnakayo, ijkuak kitlakamati tlanauatijli, mitstlajtlakolmakas tejua akin xtiktlakamati maski tikpiya tlanauatijli niman yotikmochiuili circuncisión. 28 Pampa akin kijtoua ika judío xkijtosneki tla melauak judío. Nion xtlaj kijtosneki tla kinochiuilia circuncisión ipan itlalnakayo. 29 Tlen onka ipan iyojlo se tlakatl, kiteititia tla melauak judío. Ika espíritu santo kinochiuilia circuncisión ipan iyojlo, niman xkichiua san pampa ijkon kijtoua tlanauatijli. ToTajtsin kiueyiteneua akin ijkon kichiua niman xtlakamej akin kiueyiteneuaj.

3 Kuakon, ¿tlenon ika tepaleui tiyes judío? ¿Tlenon ika tepaleui tikpiyas circuncisión? 2 Nochipa tepaleui. Kachtopa, judíos yejuamej akin okimijlijkej itlajtol toTajtsin. 3 Kuakon, ¿tlenon panoua? Tla sekimej xok otlaneltokakej, ¿kijtosneki ika toTajtsin noijki xok kichiuas tlen yokijtojka? 4 ¡Ka! Pampa toTajtsin nochipa kichiua tlen kijtoua, maski nochimej tlakamej matekajkayauakan, ijkin ken ijkuilijtika: “Para motlajtoluan makiteititikan ika tiyolmelajki niman para titetlanis ijkuak mitstlajtlakolmakatoskej”. 5 Kuakon, tla ijkuak xtiyolmelajkej, tikteititiaj ika toTajtsin yolmelajki, ¿tlenon tikijtoskej? ¿Kijtosneki ika toTajtsin xyolmelajki ijkuak kiteititia itlauel? (Ijkon tlanemiliaj sekimej). 6 Ijkuak toTajtsin kiteititia itlauel, xkijtosneki tla xyolmelajki, pampa ¿kenijki kintlajtlakolmakaskia akin nemij ipan yejuin mundo?

7 Pero, tla pampa nitekajkayaua más noteititia ika toTajtsin kijtoua tlen melauak niman ueyixtika, ¿tleka ijkuak nechtlajtlakolmakaj nechitaj ken nitlajtlakole? 8 ¿Niman tleka xtikijtouaj “Matikchiuakan tlen xkuajli para manochiua tlen kuajli”, ijkon ken sekimej kijtouaj ika tikijtojtinemij? Kinnamiki makintlajtlakolmakakan yejon tlakamej.

9 Kuakon, ¿tlenon? ¿Kijtosneki ika tejuamej más tikuajkualtin? ¡Ka! Pampa ken yotikijtojkej, nochimej tlajtlakolejkej, akin judíos niman akin griegos. 10 Ijkin ijkuilijtika: “Xnemi yakaj akin mayolmelajki, nion se; 11 xnemi yakaj akin makimati tlen noneki nochiuas; xnemi yakaj akin makitejtemo toTajtsin. 12 Nochimej yoixpolijkej, nochimej xtlaj ika tepaleuiyaj; nion se xkiteititia tla kipiya kuajli iyojlo, nion se”. 13 “Inakoko* yeskia kentla se tlalkontli tlen tlapojtika; yejuamej tekajkayauaj ika innenepil”. “Ipan inten* kipiyaj inveneno kouamej”. 14 “Yejuamej kimijtouiliaj oksekimej ika inpan manochiua tlen xkuajli niman ipan inkamak kipiyaj tlen chichik”. 15 “Imikxiuan notlalouaj para ontemiktiskej”.* 16 “Kampa nojuitiaj kitechiuiliaj tlen xkuajli niman tetlajyouiltiaj, 17 niman xkixmatij ojtli tlen kinpaleuis mayolseujtokan”. 18 “Yejuamej xkimojkaitaj toTajtsin”.

19 Kuajli tikmatstokej ika Tlanauatijli para akin kixmatij Tlanauatijli, para maka yakaj itlaj makijto niman nochimej makimatikan tleka kintlajtlakolmaka toTajtsin. 20 ToTajtsin xakaj kitas tla kipiya kuajli iyojlo san pampa kitlakamati tlen kijtoua tlanauatijli, pampa tlanauatijli techpaleuiya matikasikamatikan tlenon tlajtlakojli.

21 Pero aman, yonoteititi ika toTajtsin uelis techitas ika tiyolmelajkej maski xtiktlakamatij tlanauatijli, ijkon ken kijtoua Tlanauatijli niman tlen okijkuilojkej Teotlajtokej. 22 Kema, toTajtsin kimita ika kipiyaj kuajli inyojlo nochimej akin tlaneltokaj itech Cristo. Para yejua nochimej san noijki. 23 Pampa nochimej yotlajtlakojkej niman xueli kiteititiaj iueyilis toTajtsin. 24 Yejua mechiknelia maski xmechnamiki, yejua ika, mechita ken yolmelajkej, niman yejuin se tetlayokolijli. Yejuin ijkon opanok pampa Cristo otechmakixti ijkuak onotemakak topampa. 25 ToTajtsin okitlali kentla se uentli para tejuamej uelis oksejpa iuan touikaskej tla titlaneltokaj itech iyesyo Cristo. Yejuin okichiuj para kiteititis ika yejua yolmelajki pampa toTajtsin okimijyoui niman okintlapopoluilij intlajtlakoluan tlen youejkauj okichijkej. 26 Okichiuj para kimititis akin nemij ipan yejuin tiempo ika yejua yolmelajki. Noijki ijkon kiteititia ijkuak kijtoua ika yakaj yolmelajki pampa tlaneltoka itech Jesús.

27 ¿Noneki toueyimatiskej? Ka. ¿Katlejua tlanauatijli xtechkauilia matoueyimatikan? ¿Tlanauatijli tlen techijlia tlen tikchiuaskej? Ka, tlanauatijli tlen techijlia matitlaneltokakan xtechkauilia ijkon matikchiuakan. 28 Pampa yotikitakej ika se tlakatl kitaj ika yolmelajki ipampa itlaneltok niman xpampa tla kichiua tlen kijtoua tlanauatijli. 29 ¿Yejua san inTajtsin akin judíos? ¿XinTajtsin noijki akin xjudíos? Kema, yejua noijki inTajtsin akin xjudíos. 30 Nemi san se akin toTajtsin, yejua kimitas ika yolmelajkej akin tlaneltokaj maski tla okinochiuilijkej circuncisión, noso ka. 31 Kuakon, ¿tikitaj ika xueyi kijtosneki tlanauatijli pampa titlaneltokaj? ¡Ka! Tejuamej tikteititiaj ika tlanauatijli melak ueyi kijtosneki.

4 Kuakon, ¿tlenon uelis tikijtoskej ika okiseli Abrahán, tochanejkauj akin yeuejkaui onen? 2 Se ejemplo, tla kijtoskiaj ika Abrahán kipiaya kuajli iyojlo ipampa tlen okichiuj, yejua ueliskia noueyimatis. Pero xueliskia ijkon kichiuas ixpan toTajtsin. 3 Pampa ¿tlenon kijtouaj Tlajkuiloltin? “Abrahán otlaneltokak itech Jehová niman yejua okitak kentla yakaj akin kipiaya kuajli iyojlo”. 4 Ijkuak yakaj kimakaj tomin pampa yotekit, xkijtosneki tla kimakaj pampa kikneliaj maski xkinamiki. Pampa yejon tomin nonekiya kimakaskej. 5 Pero toTajtsin kita ika yakaj kipiya kuajli iyojlo ipampa itlaneltok niman xsan ika tlen kichiua. Pampa toTajtsin uelis kitas ika kipiyaj kuajli inyojlo akin tlajtlakolejkej. 6 David noijki kijtoua kenijki melak yolpaki yejon tlakatl akin toTajtsin kita ika kipiya kuajli iyojlo pero xipampa tlen kichiua. 7 Yejua okijto: “Yolpakij akin yokintlapopoluilijkej tlen xkuajli* okichijkej niman akin yokintlapopoluilijkej intlajtlakoluan. 8 Yolpaki akin Jehová xok kilnamikis itlajtlakol”.

9 Kuakon, ¿yejuin pakilistli san kipiyaj akin yokinochiuilijkej circuncisión, noso noijki akin xkipiyaj circuncisión? Pampa tikijtouaj: “Abrahán okitakej ika kipiaya kuajli iyojlo pampa otlaneltokak”. 10 ¿Kemanon okitakej ika kipiaya kuajli iyojlo? ¿Ijkuak yekipiaya circuncisión, noso ijkuak xekipiaya circuncisión? Yejua xekinochiuiliaya circuncisión. 11 ToTajtsin okijli Abrahán makinochiuili circuncisión para kiteititiskia ika kipiaya kuajli iyojlo, pampa yotlaneltokaka ijkuak xekinochiuiliaya circuncisión. Yejuin onochiuj para yejua manochiua intaj nochimej akin tlaneltokaj maski xkinochiuiliaj circuncisión. Ijkon, nochimej kimitaskej ika kipiyaj kuajli inyojlo 12 niman para manochiua intaj akin kipiyaj circuncisión. Pero, xpara san akin kipiyaj circuncisión, noijki para akin kiteititiaj ika tlaneltokaj ijkon ken totaj Abrahán otlaneltokak ijkuak xekinochiuiliaya circuncisión.

13 ToTajtsin okijli Abrahán ika kimakaskia yejuin mundo ken herencia pampa okiteititi ika kuajli iyojlo niman otlaneltokak, xipampa se tlanauatijli. 14 Pampa tla kiseliskej herencia san akin kitlakamatij tlanauatijli, kijtosneki ika xtlaj ika tepaleui tla titlaneltokaj niman ika xnochiuas tlen okijlijkej Abrahán. 15 Kampa onka Tlanauatijli onka tlauejli, pero kampa xonka tlanauatijli noijki xakaj uelis kijtos tla xkitlakamatij tlanauatijli.

16 Yejua ika, tlen toTajtsin yokijto techmakas uelis tikseliskej tla titlaneltokaj, para ijkon manesi ika yejua techiknelia maski xtechnamiki. Ijkon, tlen toTajtsin yokijto kichiuas kinpaleuis nochimej akin ualeuaj itech totaj Abrahán niman akin tlaneltokaj ijkon ken yejua, xsan akin kichiuaj tlen kijtoua tlanauatijli. 17 Ijkon ken ijkuilijtika: “Yonimitstlali ken se tajtli para miyekej pueblos”. Yejuin opanok ixpan toTajtsin, akin ueli kinyolitia akin yomikkej niman kijtoua ika yonochiuj itlaj tlen xenochiua. Yejua akin Abrahán itech tlaneltokaya. 18 Maski xok ueliskia, yejua okineltokak ika tajtli yeskia de miyekej pueblos. Ijkon ken yonoijtojka: “Ijkin miyekej yeskej mokoneuan”. 19 Niman maski nochipa otlaneltokak, yejua kimatstoya ika itlalnakayo kentla yomikka pampa yekipiaya kanaj 100 años niman ika Sara xueliya kinpiaya ikoneuan. 20 Yejua nochipa otlaneltokak ipampa tlen toTajtsin okijli ika kichiuas. Itlaneltokil okikojtili niman yejua ika, okiueyiteneuj toTajtsin. 21 Niman yejua kuajli kimatstoya ika toTajtsin ueliskia kichiuas tlen yokijlijka. 22 Yejua ika, okitakej ken yakaj akin kipiya kuajli iyojlo.

23 Pero, xsan yejua kitenejtoyaj ijkuak kijtoua “okitakej”. 24 Noijki techtenejtoya tejuamej. Akin techitaskej ken akin kipiyaj kuajli inyojlo pampa titlaneltokaj itech akin okiyoliti toTeko Jesús. 25 Yejua okitemakakej ipampa totlajtlakoluan niman okiyolitijkej* para uelis techitaskej ken akin tikpiyaj kuajli toyojlo.

5 Yejua ika, aman ika yotechitakej ken akin kipiyaj kuajli inyojlo pampa titlaneltokaj, matiyolsejtokan iuan toTajtsin ipampa* toTeko Jesucristo. 2 Pampa itech titlaneltokaj, toTajtsin ueli techititia ika techiknelia maski xtechnamiki. Niman matiyolpakikan pampa yotechijli ika techueyilis. 3 Matiyolpakikan ijkuak tikixnamikiskej tlen xkuajli, pampa tikmatstokej ika ijkuak tikixnamikij tlen xkuajli, kichiua matitlaxikokan. 4 Tla titlaxikouaj, kichiua ika toTajtsin matechseli. Tla toTajtsin techselia, kichiua matikchiakan tlen yotechijli ika techmakas, 5 niman tlen toTajtsin yotechijli techmakas, nochiuas. Tikmatstokej ipan toyojlo ika toTajtsin techtlasojtla pampa yotechmakak espíritu santo.

6 Ijkuak xakaj ueliya techpaleuiaya, Cristo omik ipampa akin tlajtlakolejkej para kinpaleuis ijkuak ajsis tonajli. 7 Yakaj kanaj xmás kinekis notemakas ipampa se tlakatl akin kuajli iyojlo. Yejua kanaj más kinekis mikis ipampa yakaj akin kichiua tlen kuajli. 8 Pero, toTajtsin yotechititi ika techtlasojtla pampa maski ok* titlajtlakolejkej katkaj, Cristo omik topampa. 9 Tla ipampa iyesyo, toTajtsin techitas ika tikpiyaj kuajli toyojlo, uelis tikmatstoskej ika san ipampa, techmakixtis ijkuak kiteititis itlauel. 10 Pampa, tla toTajtsin okitemakak iKoneuj para iuan toyolseuiskej ijkuak xeiuan touikayaj, uelis kuajli tikmatstoskej ika pampa iKoneuj yokitemakak inemilis, techmakixtiskej aman ika yotoyolseuijkej iuan toTajtsin. 11 Niman xsan yejon, noijki tipakij pampa touikaj iuan toTajtsin ipampa tlen okichiuj toTeko Jesucristo. San ipampa yejua, ouel iuan otoyolseuijkej.

12 Ijkon tej, ipan yejuin mundo onka tlajtlakojli, pampa se tlakatl otlajtlako niman tlajtlakojli kichiua matimikikan. Kema, tinochimej timikij pampa nochimej titlajtlakolejkej... 13 Pampa yeonkatka tlajtlakojli ipan yejuin mundo achto ika oniaskia Tlanauatijli. Pero, xuelis tikijlis yakaj ika okichiuj se tlajtlakojli tla xonka tlanauatijli. 14 Mikilistli nemiya ken rey desde ijkuak nemiya Adán hasta ijkuak nemiya Moisés. Niman hasta kinyekanaya akin xotlajtlakojkej ijkon ken otlajtlako Adán, akin noijki yeskia kentla akin satepan uajlaskia.

15 Pero tlen techtlayokolia toTajtsin xijkon ken itlajtlakol Adán. Pampa maski miyekej omikkej san ipampa itlajtlakol se tlakatl, más miyekej akin toTajtsin okimikneli maski xkinnamiki niman itlaj okintlayokoli pampa Jesucristo okimikneli maski xkinnamiki. 16 Niman, xsan noijki tlen panoua ika itlajtlakol se tlakatl niman ika itetlayokolil toTajtsin. Pampa nochimej opeuj kipiyaj tlajtlakojli ijkuak otlajtlako se tlakatl, pero toTajtsin okitemakak itetlayokolil ijkuak miyekej otlajtlakojkej niman ijkon ouel okimitak ika kipiayaj kuajli inyojlo. 17 Tla mikilistli onen ken rey san ipampa itlajtlakol se tlakatl, ¡uelis kuajli tikneltokaskej ika akin kimikneliaj maski xkinnamiki niman kitaj ika kipiyaj kuajli inyojlo, nemiskej niman kintlaliskej ken reyes san ipampa se tlakatl, Jesucristo!

18 San ipampa itlajtlakol se tlakatl, nochimej opeuj kipiyaj tlajtlakojli. Noijki ijkon, san ipampa itlaj tlen kuajli onochiuj, miyekej akin miyekan ualeuaj kitaskej ika kipiyaj kuajli inyojlo niman kiseliskej nemilistli. 19 Pampa ijkon ken miyekej onochijkej tlajtlakolejkej san pampa xotetlakamat se tlakatl, noijki miyekej kimitaskej ika kipiyaj kuajli inyojlo san pampa otetlakamat se tlakatl. 20 ToTajtsin okitemakak tlanauatijli, para nochimej makimatikan ika melak tlajtlakouaj. Pero kampa más yotlajtlakojkaj, más okimiknelijkej maski xkinnamikiya. 21 ¿Tleka ijkon onochiuj? Pampa ijkon ken tlajtlakojli niman mikilistli otlayekankej ken reyes noijki teiknelilistli tlen xtechnamiki matikselikan tlayekanas ken rey, pampa toTajtsin kitas ika tikpiyaj kuajli toyojlo. Ijkon uelis tikseliskej nemilistli tlen xkeman tlamis ipampa tlen okichiuj toTeko Jesucristo.

6 Kuakon, ¿tlenon tikijtoskej? ¿Noneki más titlajtlakoskej para más manesi ika techikneliaj maski xtechnamiki? 2 ¡Ka! Tla yotechmakixtijkej itech tlajtlakojli, kuakon, ¿tleka ok* titlajtlakojtoskej? 3 ¿Noso xnenkimatij ika nochimej akin otechapolaktijkej itech Cristo Jesús noijki otechapolaktijkej itech imikilis? 4 Kuakon, ijkuak otoapolaktijkej itech imikilis kentla tla iuan otechtokakej para tejuamej noijki matikselikan se yenkuik nemilistli, ijkon ken Cristo okiyolitijkej intech akin yomikkej ika iueyilis iTaj. 5 Tla iuan tinemij pampa timikij ken yejua omik, noijki iuan tinemiskej ijkuak tiyoliuiskej ken yejua oyoliuj. 6 Pampa tikmatstokej ika tlen yeuejkaui tikchiuayaj niman ken titlanemiliayaj, okipilojkej ipan kojtli melaktik iuan Jesús. Niman ijkon totlalnakayo xok uelis kichiuas tlen xkuajli niman tlajtlakojli xok kiyekanas. 7 Pampa akin miki kitlapopoluiliaj itlajtlakol.

8 Noijki, tla yotimikkej iuan Cristo, tikneltokaj ika noijki iuan tinemiskej. 9 Tikmatstokej ika Cristo yokiyolitijkej intech akin yomikkej niman xok keman mikis; mikilistli xok itlaj uelis kichiuilis. 10 Pampa ijkuak yejua omik, omik san sejpa niman para nochipa para techkixtilis tlajtlakojli. Pero aman nemi niman kichiua tlen toTajtsin kineki. 11 Noijki, kuajli xmatstokan ika yonenmikkej ipampa nemotlajtlakol. Pero ika aman nennemij ipampa Cristo Jesús para nenkichiuaskej tlen toTajtsin kineki.

12 Yejua ika, maka xkauilikan ika tlajtlakojli makiyekana nemotlalnakayo tlen ueli miki para xnenkichiuaskej tlen nenkileuiyaj. 13 Noijki, maka xmotemakakan itech tlajtlakojli para nenkichiuaskej tlen xkuajli, más kuajli tla nemotemakaj itech toTajtsin para nenkichiuaskej tlen kuajli ijkon ken akin yomikkaj pero yoyolijkej. 14 Xnoneki mechyekanas tlajtlakojli pampa xnemoyekanaj ika tlanauatijli. Nemejuamej nemoyekanaj ika iteiknelilis toTajtsin tlen mechititia maski xmechnamiki.

15 Kuakon, ¿tlenon? ¿Kijtosneki ika tikchiuaskej tlajtlakojli pampa xtoyekanaj ika tlanauatijli niman toyekanaj ika iteiknelilis toTajtsin tlen techititia maski xtechnamiki? ¡Ka! 16 ¿Xnenkimatij ika akin nenkitlakamatij nochiua kentla nemoteko? Tla nemochiuaj itlakeualuan tlajtlakojli, nenmikiskej; pero tla nemochiuaj itlakeualuan toTajtsin niman nenkitlakamatij, mechitaskej ken akin kipiyaj kuajli inyojlo. 17 Pero tiktlasojkamachiliaj toTajtsin pampa maski nentlakeualtin katkaj itech tlajtlakojli, onenkitlakamatkej ika nochi nemoyojlo tlen omechmachtijkej. 18 Kema, pampa omechmakixtijkej itech tlajtlakojli, aman yonemochijkej kentla tlakeualtin para nenkichiuaskej ken akin kipiyaj kuajli inyojlo. 19 Nimechnotstikaj ika tlajtoltin tlen uelis nenkasikamatiskej pampa nentlajtlakolejkej. Kachtopa nenkichiuayaj tlen nemotlalnakayo kinekiya, nenkichiuayaj tlen xchipauak niman tlen xkuajli. Aman xtekitiltikan nemotlalnakayo para nenkichiuaskej tlen kuajli niman tlen chipauak. 20 Pampa ijkuak nennemiyaj ken tlakeualtin itech tlajtlakojli xueliya mechyekanaya tlen kuajli.

21 Kuakon, ¿tlenon nenkichiuayaj ijkuak ijkon nennemiyaj? Miyek tlen aman nenpinauij nenkijtoskej, nochi yejon mechuikaya itech mikilistli. 22 Pero aman ika yomechmakixtijkej itech tlajtlakojli niman yonemochijkej itlakeualuan toTajtsin, nenkichiuaj tlen chipauak niman nenkiseliskej nemilistli tlen xkeman tlami. 23 Pampa tlajtlakojli teuika itech mikilistli. Pero toTajtsin kitetlayokolia nemilistli tlen xkeman tlami ipampa Cristo Jesús toTeko.

7 Nokniuan, ¿xnenkimatij ika Tlanauatijli kinauatia se tlakatl ijkuak ok* yoltika? Nimechnotsa nemejuamej akin nenkixmatij tlanauatijli. 2 Se ejemplo, tlanauatijli kijtoua ika se siuatl noneki nemis iuan iueuentsin ijkuak ok yoltok; pero tla iueuentsin miki, xok noneki kitlakamatis tlanauatijli kampa kijtoua ika noneki iuan nemis. 3 Kuakon, tla yejua nonamiktiskia iuan okse tlakatl ijkuak iueuentsin ok yoltok, yejua kixmatiskiaj ken se siuatl akin tlakapapatla. Pero, tla iueuentsin miki, xok noneki kitlakamatis tlanauatijli niman tla nonamiktia iuan okse tlakatl xok kixmatiskej ken yakaj akin tlakapapatla.

4 Kuakon, nokniuan, nemejuamej nonekiya nenkitlakamatiskej Tlanauatijli, pero aman xok noneki ijkon nenkichiuaskej pampa Cristo onotemakak nemopampa. Aman, neniyaxkauan* Cristo, akin oyoliuj para matikchiuakan tlen kuelita toTajtsin. 5 Pampa ijkuak tikchiuayaj tlen kineki totlalnakayo, Tlanauatijli kichiuaya ika tlen totlalnakayo kileuiaya matechyekana niman matechuika itech mikilistli. 6 Pero, aman yotechmakixtijkej itech Tlanauatijli, pampa xok ika toyekanaj. Aman tiktekichiuiliaj toTajtsin pampa techyekana ika iespíritu santo, xpampa toyekanaj ika tlanauatijli.

7 Kuakon, ¿tlenon tikijtoskej? ¿Tlajtlakojli yejon Tlanauatijli tlen okimakakej Moisés? ¡Ka! Nejua xnikmatiskia tlenon tlajtlakojli tla xoniaskia Tlanauatijli. Se ejemplo, nejua xnikmatiskia tlenon kijtosneki tikileuis tlen xmoyaxka tla Tlanauatijli xkijtoskia “Maka xkileui tlen xmoyaxka”. 8 Pero tlajtlakojli okitekitilti tlanauatijli para kichiuas ika nejua manikileui miyek tlen xnoyaxka, pampa ijkuak xeonkatka tlanauatijli noijki miktoya tlajtlakojli. 9 Ijkuak xekitlaliayaj tlanauatijli, nejua niyoltoya. Pero, ijkuak okitlalijkej tlanauatijli, kuajli ones ika nikpiya tlajtlakojli niman nejua onimik. 10 Niman onikitak ika tlanauatijli tlen nejua niknemiliaya ika nechuikaya kampa nemilistli, nechuikaya kampa mikilistli. 11 Pampa tlajtlakojli okitekitilti tlanauatijli para nechyoltilanas niman nechmiktis. 12 Tlanauatijli tlen okimakakej Moisés chipauak, niman tlen ompa kijtoua noijki chipauak, melauak niman kuajli.

13 Kuakon, ¿kijtosneki ika itlaj tlen kuajli onechmikti? ¡Ka! Pero, tlajtlakojli kema onechmikti. Tlajtlakojli okitekitilti itlaj tlen kuajli para nechuikas itech mikilistli niman kiteititis tlenon yejon tlajtlakojli. Ijkon, tlanauatijli okiteititi ika tlajtlakojli melak xkuajli. 14 Pampa tikmatstokej ika Tlanauatijli ualeua itech toTajtsin, pero, nejua san nitlakatl niman yonechnemakakej itech on tlajtlakojli. 15 Pampa xnikasikamati tlen nikchiua: xnikchiua tlen nikneki, nikchiua tlen niktlauelita. 16 Pero, tla nikchiua tlen xnikneki, nikteititia ika kuajli tlen kijtoua Tlanauatijli. 17 Pero aman xok nejua ijkon nikchiua, ijkon kichiua tlajtlakojli tlen nopan onka. 18 Kuajli nikmatstika ika ipan notlalnakayo xonka itlaj tlen kuajli. Pampa, maski nikneki nikchiuas tlen kuajli, xueli nikchiua. 19 Pampa xnikchiua tlen kuajli, tlen niknekiskia nikchiuas. Nikchiua tlen xkuajli, tlen xnikneki nikchiuas. 20 Kuakon, tla nikchiua tlen xnikneki, xok nejua ijkon nikchiua, ijkon kichiua tlajtlakojli tlen nopan onka.

21 Yejua ika, nikita ika nechyekana yejuin tlanauatijli: ijkuak nikneki nikchiuas tlen kuajli, más nechyoltilana nikchiuas tlen xkuajli. 22 Ipan noyojlo nikneki nikchiuas tlen toTajtsin technauatia, 23 pero ipan notlalnakayo nikita ika onka se tlanauatijli tlen kixnamiki tlanauatijli tlen onka ipan notlamachilis. Tlajtlakojli yeskia kentla se tlanauatijli tlen onka ipan notlalnakayo niman nechnauatia. 24 ¡Melak niktemaka lástima! ¿Akinon nechmakixtis itech notlalnakayo tlen kichiua manimiki? 25 ¡Niktlasojkamachilia toTajtsin pampa okitekitilti toTeko Jesucristo para nechmakixtis! Pampa ika notlamachilis niktekichiuilia itlanauatil toTajtsin, pero ika notlalnakayo niktekichiuilia itlanauatil tlajtlakojli.

8 Yejua ika, akin nemij iuan Cristo Jesús, xkipiyaj tlajtlakojli. 2 Pampa itlanauatil espíritu santo kichiua matiyoltokan iuan Cristo Jesús. Yejua otechmakixti itech itlanauatil tlajtlakojli niman mikilistli. 3 Tlanauatijli tlen okimakakej Moisés xuelis techmakixtis pampa tejuamej xtikojtikej niman titlajtlakolejkej. Pero, toTajtsin uelis techmakixtis pampa okuajtitlan iKoneuj ken se tlakatl para makipopoloki tlajtlakojli. Ijkon okitlajtlakolti on tlajtlakojli tlen tikpiyaj ipan totlalnakayo, 4 para manochiua tlen Tlanauatijli techtlajtlaniliaya tejuamej akin toyekanaj ika espíritu niman xtoyekanaj ika tlen kineki totlalnakayo. 5 Pampa akin noyekanaj ika intlalnakayo nokojtiliaj kichiuaskej tlen kineki intlalnakayo, pero akin noyekanaj ika espíritu santo nokojtiliaj kichiuaskej tlen kineki espíritu santo. 6 Akin nokojtiliaj kichiuaskej tlen kineki intlalnakayo mikiskej, pero akin nokojtiliaj kichiuaskej tlen kineki espíritu santo, nemiskej niman yolsejtoskej. 7 Tla timokojtilia tikchiuas tlen kineki motlalnakayo, xuelis timouikas iuan toTajtsin, pampa totlalnakayo xkeman uelis kitlakamatis itlanauatil toTajtsin. 8 Yejua ika, akin noyekanaj ika tlen kineki intlalnakayo xuelij kiyolpaktiaj toTajtsin.

9 Tla iespíritu toTajtsin nemopan onka, nemejuamej xmechyekana nemotlalnakayo, mechyekana espíritu santo. Pero, akin xtlanemiliaj ken Cristo, yejuamej xinyaxka* Cristo. 10 Tla Cristo nemouan nemi, tlajtlakojli kichiua ika nemotlalnakayo mamiki, pero espíritu santo mechmaka nemilistli pampa nenkichiuaj tlen kuajli. 11 Niman tla espíritu santo tlen okichiuj ika Jesús mayoliui intech akin yomikkej nemopan onka, akin okikuiteuj Cristo Jesús intech akin yomikkej, noijki kitekitiltis* iespíritu para kiyolitis nemotlalnakayo, yejon espíritu tlen nemopan onka.

12 Yejua ika, nokniuan, xok noneki tikauiliskej ika totlalnakayo matechnauati nion xok noneki tikchiuaskej tlen kineki totlalnakayo. 13 Tla nemejuamej nemoyekanaj ika nemotlalnakayo, nenmikiskej. Pero, tla ika espíritu santo nenkimiktiaj tlen xkuajli kichiua nemotlalnakayo, nennemiskej. 14 Pampa nochimej akin kinokauiliaj makinyekana iespíritu toTajtsin, kema ikoneuan toTajtsin. 15 Pampa nemejuamej, xonenkiselijkej se espíritu tlen makichiua xmochiuakan kentla tlakeualtin noso makichiua xmomojtikan. Nemejuamej onenkiselijkej se espíritu tlen mechselia ken ikoneuan. Yejon espíritu kichiua matikijtokan: “¡Abba,* noTaj!”. 16 Espíritu santo kiteititia ika tejuamej tiikoneuan toTajtsin. 17 Kuakon, tla tiikoneuan toTajtsin, kijtosneki ika noijki tikseliskej herencia. Pero san uelis tikseliskej, tla tiknekij titlajyouiskej ijkon ken Cristo para noijki iuan techueyiliskej. ToTajtsin techmakas herencia, pero yejon herencia tikseliskej iuan Cristo.

18 Yejua ika, niknemilia ika tlen aman tikijyouiyaj xtlaj kijtosnekis ijkuak toTajtsin kichiuas matiueyixtokan. 19 Pampa tlen toTajtsin okichijchiuj sa kichiatika manoteititikan ikoneuan toTajtsin. 20 Pampa tlen toTajtsin okichijchiuj xsan iselti oijtlakauj, oijtlakauj pampa toTajtsin ijkon okitekauili. Pero tikchiaj manochiua yejuin: 21 ika tlen toTajtsin okichijchiuj kimakixtiskej itech tlajtlakojli niman mikilistli, nemiskej ken ikoneuan toTajtsin niman kinmakauaskej. 22 Tikmatstokej ika nochi tlen toTajtsin okichijchiuj hasta aman tlajyouijtika niman nokokojtika. 23 Xsan yejon, tejuamej akin tikpiyaj iespíritu santo toTajtsin, ken itlaj tlen kachtopa notetlayokolia, noijki ijkon topan nochijtok. Ipan toyojlo melak titlajyouiyaj aman ika tikchiaj matechselikan kentla ikoneuan toTajtsin. Tikchiaj ijkuak techmakixtiskej itech yejuin totlalnakayo. 24 Otechmakixtijkej pampa tikchiatoyaj tikseliskej yejon. Pero, tla yetikitstokej tlen tikchiaj kijtosneki ika xok tikchiatokej, pampa ¿kenijki tikchias itlaj tlen yetikitstikaj? 25 Pero, tla xetikitaj tlen tikchiaj, xtikajkauaj ika titlaxikouaj niman sa tiknektokej mayejko.

26 Noijki, espíritu santo techuajpaleuiya ijkuak xtikojtikej. Pampa kemantika nion xtikmatij tlenon tiktlajtlaniskej ipan oración, ijkuakon espíritu santo kitlajtlanilia toTajtsin matechpaleui ijkuak xtikmatij tlenon tikijtoskej. 27 Pero, akin kimatstika tlen onka ipan toyojlo, kimati tlenon kineki espíritu santo. Pampa yejuin espíritu, tlajtoua inpampa akin kitekichiuiliaj toTajtsin ijkon ken yejua kineki.

28 ToTajtsin kitekitiltia nochi tlen yokichijchiuj para kinpaleuis akin kitlasojtlaj, akin kinyoltilana para kichiuas tlen kineki. 29 Pampa akin kachtopa okintlapejpenijkej, okintlapejpenijkej para manochiuakan ijkon ken iKoneuj, ijkon yejua akin yekatstos* intech nochimej ikniuan. 30 Noijki, akin kachtopa okintlapejpeni, okinnots; akin okinnots, noijki okimitak ika kipiyaj kuajli inyojlo. Niman sa ika tlami, akin okimitak ika kipiyaj kuajli inyojlo, noijki okichiuj maueyixtokan.

31 Kuakon, ¿tlenon tikijtoskej itech yejuin? Tla toTajtsin touan nemi, ¿akinon uelis techixnamikis? 32 Tla toTajtsin okitekauili makimiktikan iKoneuj niman hasta okitemakak topampa, ¿xtechmakas ika nochi iyojlo nochi on okseki tlen techpoloua? 33 ¿Akinon uelis kintlajtlakoltis akin toTajtsin yokintlapejpeni? ToTajtsin yejua akin kijtoua ika kipiyaj kuajli inyojlo. 34 ¿Akinon kintlajtlakoltis? Cristo Jesús yejua akin omik niman okiyolitijkej,* akin nemi iyekmakopa toTajtsin niman akin topampa kitlajtlanilia toTajtsin.

35 ¿Tlenon uelis techxelos itech itlasojtlalis Cristo? ¿Tlen tikixnamikij? ¿Tlen techajmana? ¿Tlen techtlajyouiltia? ¿Apistli? ¿Tla xtikpiyaj tlen tiknakiskej?* ¿Tlen uelis topan nochiuas? ¿Tlen uelis techmiktis? 36 Ijkin ijkuilijtika: “San mopampa nochipa techmiktijtokej. Techitaj ken borregos akin yokinxelojkej para kinmiktiskej”. 37 Pero, tejuamej titlaxikouaj pampa techkojtilia akin techtlasojtla. 38 Pampa kuajli nikmatstika ika nion mikilistli nion nemilistli, nion ángeles nion gobiernos, nion tlen aman onka nion tlen sakin onias, nion akin kipiyaj poder, 39 nion tlen onka tlakpak, nion tlen onka kampa tlauejkatlan, nion okse tlen toTajtsin okichijchiuj xuelis techxelos itech itlasojtlalis toTajtsin, tlen okiteititi ijkuak okuajtitlan Cristo Jesús toTeko.

9 Nejua nikijtoua tlen melauak pampa niktekichiuilia Cristo; xnitlakajkayaua, niman notlamachilis tlen nikyekana ika espíritu santo, kiteititia 2 ika melak ninajmana niman nochipa ninoyolkokojtok. 3 Pampa nejua niknekiskia manechtlajyouiltikan inpampa nokniuan judíos akin xkitekichiuiliaj Cristo, tla ijkon ueliskia nikinpaleuis. 4 Akin israelitas, yejuamej kinnamiki ika toTajtsin makinseli ken ikoneuan, kinnamiki maueyixtokan, yejuamej akin yokimijlijka itlaj kinmakas, okinmakak Tlanauatijli, okinkauili makitekichiuilikan niman kinnamiki makinmaka tlen yokimijli kiseliskej. 5 Intech yejuamej oualejkej akin okinyekankej familias niman intech oualeuj Cristo. Nochipa makiueyichiuakan toTajtsin akin más ueyixtika. Amén.

6 Pero, xkijtosneki tla itlajtol toTajtsin onopopolo. Pampa xnochimej akin ualeuaj itech israelitas yemelak “israelitas”. 7 Noijki, xnochimej akin ualeuaj itech Abrahán melauak ikoneuan, pampa ijkuilijtika: “Itech Isaac ualeuaskej mokoneuan”. 8 Kijtosneki ika xnochimej ikoneuan Abrahán yemelak ikoneuan toTajtsin. Desde yeuejkaui, toTajtsin okijto ika itlaj kichiuaskia para kintlapejpenis sekimej kentla melauak ikoneuan. 9 Pampa yejuin tlen okijto ika kichiuas: “Niuajlas ipan yejuin tiempo niman Sara kipiyas se ikoneuj”. 10 Niman xsan ijkuakon ijkon onochiuj. Noijki ijkon opanok ijkuak Rebeca okinpix gemelos de Isaac, tochanejkauj akin yeuejkaui onen. 11 Para manoteititi ika toTajtsin tetlapejpenia niman xitlaj san ijkon nochiua, ijkuak ikoneuan Rebeca xeuajnemiyaj niman xekichiuayaj itlaj tlen kuajli nion itlaj tlen xkuajli, 12 okijlijkej: “Akin yakatstiuj* itlakeual yes akin más pitentsin”.* 13 Ijkon ken ijkuilijtika: “Oniktlasojtlak Jacob, pero oniktlauelitak Esaú”.

14 Kuakon, ¿tlenon tikijtoskej? ¿ToTajtsin xkipiya kuajli iyojlo? ¡Ka! 15 Pampa kijlia Moisés: “Niktlasojtlas akin nejua niknekis niktlasojtlas, niman nikiknelis akin nejua niknekis nikiknelis”. 16 Yejua ika, ijkuak toTajtsin yakaj kitlapejpenia, yejua xijkon kichiua pampa akin okitlapejpeni ijkon kinekiya noso onokojtili itlaj kichiuas. 17 Pampa se texto tlen uajlauj* ipan Tlajkuiloltin, ijkin kijlia faraón: “Yonimitskauili xnemi, para motech nikteititis nopoder niman para ipan nochi mundo manoteijli notoka”. 18 Kuakon yejua kititia ika kitlasojtla akin yejua kineki, pero kikauilia mayoltechikaui akin yejua kineki.

19 Pero, tejua tinechijlis: “¿Tleka yejua ok* kintlajtlakolmaka gente? ¿Yakaj uelis kijlis ika xkuajli tlen kichijtika?”. 20 Tejua san se titlakatl, xkinamiki tiknankilis toTajtsin. ¿Uelis se kontli kijlis akin okichijchiuj “¿Tleka ijkon otinechchijchiuj?”? 21 ¿Akin kinchijchiua kontin xuelis kitekitiltis* sokitl para kichijchiuas se kontli tlen kitekitiltiskej ipan se tonajli tlen ueyi kijtosneki niman okse para mojmostla kitekitiltiskej? 22 ¿Niman tlenon mitsimportaroua tla toTajtsin okimijyoui kontin tlen yokinchijchijka para kinpopolos, pampa kinekiya kiteititis itlauel niman ipoder? 23 Ijkon okichiuj para kimititis akin okimikneli ika yejua melak ueyixtika. Yejuamej kiseliskej yejon tetlayokolijli tlen yokimijli kinmakas. 24 Xsan tejuamej akin judíos otechtlapejpeni, noijki okintlapejpeni akin xjudíos. 25 Ijkon ken yejua noijki okijto ipan Oseas: “Nikijlis nopueblo akin xnopueblo, niman nikijlis niktlasojtla akin xkitlasojtlayaj. 26 Niman kampa omechilijkej ‘Nemejuamej xnennopueblo’, ompa mechtokayotiskej ikoneuan toTajtsin akin yoltika”.

27 Noijki Isaías ijkin kijtoua itech Israel: “Maski ikoneuan Israel melak miyekej ijkon ken xajli tlen onka kampa mar, san sekimej kinmakixtiskej. 28 Pampa Jehová nimantsin kinyolkuitis* nochimej akin chantij ipan yejuin mundo”. 29 Niman ken Isaías okijto: “Tla Jehová akin kinyekana ángeles, xkinkauiliskia manemikan sekimej tochanejkauan, tiyeskiaj ken Sodoma niman ken Gomorra”.

30 Kuakon, ¿tlenon tikijtoskej? Ika akin xjudíos, maski xkitejtemojtoyaj kipiyaskej kuajli inyojlo okipixkej kuajli inyojlo, ijkon okichijkej pampa otlaneltokakej. 31 Pero Israel, maski okinek kichiuas tlen kijtoua tlanauatijli, xokichiuj. 32 ¿Tleka? Pampa yejuamej san okichijkej tlen kijtoua tlanauatijli, pero xotlaneltokakej. Ouetsitoj ika “tetl tlen kichiua mauetsikan”; 33 ken ijkuilijtika: “¡Xkitakan! Niktlalia ne Sion se tetl tlen kichiua xuetsikan niman se tetl tlen tetsakuilia, pero akin tlaneltokas itech yejua, xkipinajtiskej”.

10 Nokniuan, ika nochi noyojlo nikneki niman niktlajtlanilia toTajtsin ika yejuamej makinmakixtikan. 2 Pampa nejua kuajli nikmatstika ika yejuamej nokojtiliaj kitekichiuiliskej toTajtsin pero xkixmatij. 3 Yejuamej xokichijkej tlen kineki toTajtsin pampa xkixmatij tlen kineki niman san okichijkej tlen kinekij. 4 Cristo okipopoloko Tlanauatijli tlen okimakakej Moisés, ijkon nochimej akin kiteititiskej ika itech tlaneltokaj, kimitaskej ken akin kipiyaj kuajli inyojlo.

5 Ijkuak Moisés okijto kenijki yakaj kitaj ika kipiya kuajli iyojlo tla kitlakamati tlanauatijli, okijkuilo: “Akin kichiuas yejuin, kipaleuis manemi”. 6 Pero itlajtol toTajtsin noijki kijtoua ika yakaj kitaj ika kuajli kipiya iyojlo ipampa itlaneltok. Ompa kijtoua: “Maka xkijto ipan moyojlo ‘¿Akinon yas ne cielo?’, noso ¿akinon yas ne cielo para kichiuas mauajtemo Cristo? 7 Noijki maka xkijto ‘¿Akinon ontemos kampa uejkatlan?’, noso ¿akinon kichiuas mauajkisa Cristo intech akin yomikkej?”. 8 Kuakon, ¿tlenon kijtoua? “Itlajtol toTajtsin nisiuj onka motech, ipan mokamak niman ipan moyojlo”, yejuin kijtosneki, yejon “tlajtojli” tlen tikneltokaj niman tikteijliaj. 9 Pampa timakisas tla ika mokamak tikteijlia ika Jesús yejua toTeko niman tla ika moyojlo tikteititia ika tikneltoka ika toTajtsin okiyoliti intech akin yomikkej. 10 Pampa ika moyojlo tikteititis ika titlaneltoka, niman yejon motlaneltok kichiuas mamitsitakan ika tikpiya kuajli moyojlo pero ika mokamak tikteijlis tlen kichiuas ika oksekimej mamakisakan.

11 Pampa Tlajkuiloltin kijtouaj: “Nochi akin itech tlaneltokas xkipinajtiskej”. 12 Nochimej san se inTeko kipiyaj maski tla judíos noso griegos. Yejua kinteochiua nochimej akin kinotsaj. 13 Pampa “nochimej akin kitekitiltiaj* itoka Jehová ijkuak kichiuaj oración kinmakixtiskej”. 14 Pero, ¿kenijki kinotsaskej ika itoka tla xitech tlaneltokaj? ¿Niman kenijki itech tlaneltokaskej tla xkeman kikakij itech yejua? ¿Niman kenijki kikakiskej tla xakaj kiminnojnotsa? 15 ¿Niman kenijki tenojnotsaskej tla xakaj komontitlani? Ijkon ken ijkuilijtika: “¡Melak kualtsitsintin ikxiuan akin kiteijliaj kuajli tlajtoltin!”.

16 Pero, xnochimej okuelkakkej kuajli tlajtoltin, pampa Isaías kijtoua: “Jehová, ¿akinon yotlaneltokak itech tlen tikteijliaj?”.* 17 Se tlakatl tlaneltoka ijkuak kikaki tlen kijliaj, niman kikaki tlen kijliaj ijkuak kikaki tlajtojli tlen noteijlia itech Cristo. 18 Pero nejua nitetlajtoltia: ¿xokikakkej? Kema, pampa “ipan nochi yejuin mundo okakistik, niman hasta kampa más tlaiyankan onoteijli”. 19 Pero nejua nitetlajtoltia: ¿Israel xkimatiya? Pampa Moisés kijtoua: “Nikchiuas xkualanikan pampa nikinpaleuis akin xisraelitas. Nikchiuas melak xkualanikan pampa nikinpaleuis akin xtlamachilisejkej”. 20 Pero Isaías noyolchikaua niman kijtoua: “Akin xnechtejtemojtoyaj onechnextijkej. Akin xotetlajtoltijkej nopampa, onechixmatkej”. 21 Pero israelitas ijkin kimijlia: “Nochi tonajli niktlajtlanilia notech mauajnokuepa se pueblo akin xtetlakamati niman yoltechikauak”.

11 Kuakon, nitetlajtoltia: ¿kijtosneki ika toTajtsin xokiseli ipueblo? ¡Ka! Pampa nejua noijki niisraelita, niualeua itech Abrahán, itech itribu Benjamín. 2 ToTajtsin okiseli ipueblo akin kachtopa okinots. ¿Xnenkimatij tlen kijtoua itlajtol toTajtsin ipan Tlajkuilojli itech Elías ijkuak okijli toTajtsin itlaj tlen xkuajli itech Israel? 3 “Jehová, yokinmiktijkej moteotlajtojkauan niman yokixoxotonijkej kampa mitstlauentlaliliayaj; sa nejua ninokaua niman aman kinekij nechmiktiskej”. 4 ¿Pero tlenon okijto toTajtsin? “Ok* nemij 7,000 tlakamej akin xnotlakuantelketsaj itech Baal”. 5 Noijki ijkon, ipan yejuin tiempo nemij sekimej akin toTajtsin yokintlapejpeni pampa yokimikneli maski xkinnamiki. 6 Yejuamej okintlapejpenijkej pampa okimiknelijkej maski xkinnamiki, niman xpampa itlaj okichijkej. Pampa tla kintlapejpeniskiaj ipampa tlen kichiuaj, kijtosneki ika toTajtsin xokintlapejpeni pampa kimititia ika kimiknelia maski xkinnamiki.

7 Kuakon, ¿tlenon tikijtoskej? Israel xokiseli tlen melak kitejtemoua, pero akin okintlapejpenijkej kema okiselijkej. On oksekimej onoyoltechikajkej, 8 ijkon ken ijkuilijtika: “Hasta ipan yejuin tonajli, toTajtsin kichijtika kentla melak makochikan, maka matlachiakan niman maka matlakakikan”. 9 David noijki kijtoua: “Iluitl* tlen kichiuaj, manochiua kentla se mekatl tlen kichiuas mauetsikan niman matlajyouikan. 10 Maixtlapachiuikan para maka matlachiakan. Niman xchiua nochipa makimamajtokan tlen yetik”.

11 Kuakon, nejua nitetlajtoltia: ¿kijtosneki ika yejuamej ouetskej niman xok keman uelis nokuiteuaskej? ¡Ka! Pero, pampa akin xjudíos onopopolojkej uelis makisaskej, yejuin opanok para makualanikan judíos. 12 Aman, pampa tla onopopolojkej okichiuj makinteochiuakan akin xjudíos, ¡xkonnemilikan kenijki más kinteochiuaskej ijkuak kinsentlaliskej!

13 Aman nimechnotsa nemejuamej akin xnenjudíos. Pampa onechtlalijkej ken apóstol ipan nochi pueblos, nikueyiteneua notekiyo 14 para nikitas tla ueli nikinkualania akin nemij ipan nopueblo niman nikchiuas ika sekimej mamakisakan. 15 ToTajtsin okinkauj judíos para opeuj nouika imiuan oksekimej. Tla toTajtsin oksejpa kinseliskia judíos, yeskia kentla tla oksejpa yoliuiskiaj. 16 Noijki, tla yejon achijtsin pan tlen kiuentlaliliaj toTajtsin tlateochijtli, kijtosneki ika kampa okikixtijkej yejon pan noijki tlateochijtli, niman tla ineluayo se kojtli melak kuajli noijki melak kuajkualtin imakojyouan.*

17 Pero, toTajtsin okintsontek seki imakojyouan olivokojtli niman ompa omitstlasalolti* maski tiimakojyo olivokojtli tlen noskaltia kampa kojyo, tejua noijki mitspaleuiya ineluayo yejon kojtli. 18 Maka xnemili tla más tiueyixtika xijkon ken okseki imakojyouan olivo. Niman tla timoueyimati, xkilnamiki ika xtejua akin tikchijtok mayolto yejon kojtli, tejua akin tiyoltika ipampa.* 19 Kuakon tikijtos: “Sekimej imakojyouan okintsontekkej para nejua ompa nechtlasaloltiskej”. 20 ¡Melauak! Yejuamej okintsontekkej pampa xotlaneltokakej, pero tejua timotelketstok* pampa titlaneltoka. Maka xmoueyimati, xmojkaita toTajtsin. 21 Pampa tla toTajtsin xokintlapopolui uan melauak imakojyouan olivokojtli, noijki xmitstlapopoluis tejua. 22 Kuakon, xnemili kenijki toTajtsin kipiya kuajli iyojlo niman kenijki tetlajyouiltia. Yejua kintlajyouiltia akin ouetskej pero mitsititis ika kipiya kuajli iyojlo tla tikchiua tlen kiyolpaktia. Tla xijkon tikchiua, tejua noijki mitstsontekis. 23 Niman yejuamej noijki, tla kiteititiaj ika oksejpa tlaneltokaj, kintlasaloltiskej, pampa toTajtsin uelis oksejpa kintlasaloltis. 24 Pampa tla tejua omitstsontekkej itech se olivokojtli tlen noskaltia kampa kojyo niman omitstlasaloltijkej ipan se olivokojtli tlen okitokakej,* ¿xtiknemilia ika imakojyouan yejon olivokojtli tlen okitokakej niman okintsontekkej más kinamiki oksejpa ipan makintlasaloltikan?

25 Nokniuan, nikneki xmatikan yejuin tlen toTajtsin xekiteijlia para maka xnemilikan ika nentlamachilisejkej: sekimej israelitas yoyoltechikajkej niman nochipa ijkon nemiskej hasta ijkuak toTajtsin yokinsentlali nochimej yejon akin xjudíos niman yokintlapejpeni, 26 niman nochi israelitas kinmakixtiskej. Ijkon ken ijkuilijtika: “Akin temakixtis uajkisas itech Sion niman kichiuas ika Jacob maka sa makichiua tlen xkuajli. 27 Niman niktlamiltis tlen yonikimijlijka ijkuak nikintlapopoluilis intlajtlakoluan”. 28 Melauak, yejuamej onochijkej intlauelikniuan toTajtsin pampa xokiselijkej kuajli tlajtoltin, niman yejon mechpaleuiya nemejuamej; pero toTajtsin okintlapejpeni niman kintlasojtla pampa ijkon okimijli inchanejkauan akin yeuejkaui onenkej. 29 Pampa toTajtsin xnoyolkuepas tla itlaj kintlayokolis noso kintlapejpenis. 30 Seki tiempo nemejuamej xonenkitlakamatkej toTajtsin, pero aman yomechiknelijkej pampa yejuamej xotetlakamatkej. 31 Aman yejuamej xok tetlakamatij, yejua ika, nemejuamej yomechiknelijkej para ijkon yejuamej noijki uelis kimikneliskej. 32 Noijki, toTajtsin okichiuj ika nochimej kentla matsauktokan pampa xtlaneltokaj, ijkon, nochimej uelis kimititis ika kimiknelia.

33 ¡Melak techteochiua toTajtsin, niman melak ueyi itlamachilis niman itlaixmatilis! ¡Xakaj kimati kenijki tetlajtlakolmaka niman xakaj uelis kasikamatis nochi tlen kichiua! 34 Pampa, “¿akinon yokixmat itlamachilis Jehová? ¿Noso akinon yokijli tlenon kichiuas?”. 35 “¿Noso akinon kachtopa itlaj okimakak toTajtsin para yejua makikuepili?”. 36 Pampa nochi itech ualeua, nochiua ipampa yejua niman para yejua. Nochimej nochipa san yejua makiueyiteneuakan. Amén.

12 Yejua ika, nokniuan, pampa toTajtsin mechiknelia, nimechtlajtlanilia ika xtemakakan nemotlalnakayo ken uentli tlen yoltok, tlen chipauak niman tlen makiyolpakti toTajtsin; ijkon nenkitekichiuiliskej ika nochi nemotlamachilis. 2 Niman maka sa xchiuakan ken akin nemij ipan yejuin tiempo; nochipa xyenkuilijtokan nemotlamachilis para nenkitaskej tlenon kuajli, tlenon kuelita niman tlenon kineki toTajtsin.

3 Pampa toTajtsin melak yonechikneli maski xnechnamiki, nimechtlajtlanilia maka xnemilikan tla nemejuamej más nenuejueyixtokej, san xnemilikan tlen makiteititi ika kuajli nenkipiyaj nemotlamachilis. Pampa toTajtsin kipaleuiya cada se para itech matlaneltoka. 4 Ijkon ken totlalnakayo miyek tlemach kipiya niman yejon tlen kipiya xsan noijki tlen kichiua, 5 noijki tejuamej, tochiuaj san se tlalnakayotl iuan Cristo maski timiyekej, pampa ijkon ken se tlalnakayotl nochimej noneki topaleuiskej. 6 Kuakon, pampa toTajtsin yotechititi ika techiknelia maski xtechnamiki, yokichiuj matiuelikan matikchiuakan tlatlamantik* tlemach. Tla tikimijtouaj teotlajtoltin, matikteijlikan ijkon ken toTajtsin yokichiuj matitlaneltokakan; 7 tla yakaj kintekichiuilia oksekimej, manokojtili kuajli makichiua itekiyo; tla yakaj kuajli temachtia, matemachti; 8 akin ueli teyolchikaua, mateyolchikaua; akin ueli kitemaka, makitemaka ika nochi iyojlo; akin tlayekana, manokojtili kuajli matlayekana; akin teiknelia, mayolpaki ijkuak ijkon kichiuas.

9 Maka xtekajkayauakan ijkuak nenkijtoskej ika nentetlasojtlaj. Xtlauelitakan tlen xkuajli niman xnektokan nenkichiuaskej tlen kuajli. 10 Xmotlasojtlakan ken ikniujtin niman xmoititikan ika nemoikneliaj. Nemejuamej achto xkimititikan oksekimej ika nenkintlakaitaj. 11 Xtekitikan, maka san xtlatsiuikan. Xkauilikan ika espíritu santo mamechyekana. Xmochiuakan itlakeualuan Jehová. 12 Xyolpakikan ipampa tlen nenkiseliskej. Xtlaxikokan ijkuak nenkixnamikiskej tlen xkuajli. Nochipa xchiuakan oración. 13 Xkinmakakan nemokniuan* tlen kinpoloua. Nochipa kuajli xkinselikan oksekimej. 14 Nochipa xkinteochiuakan akin mechtlajyouiltiaj. Xkinteochiuakan niman maka xnekikan inpan manochiua tlen xkuajli. 15 Xpakikan iuan akin pakij; xchokakan iuan akin chokaj. 16 Xkimitakan oksekimej ijkon ken nemejuamej nemoitaj; maka xmoueyimatikan, xmochiuakan yolyemankej. Maka xnemilikan ika melak nentlamachilisejkej.

17 Maka xmotlakuepiltikan tla yakaj mechchiuilia tlen xkuajli. Xtlanemilikan itech tlen gente kinemilia ika kuajli. 18 Xchiuakan nochi tlen nenueliskej para nenyolsejtoskej imiuan nochimej. 19 Noknitsitsinuan, maka xmotlakuepiltikan, xkauilikan ika toTajtsin manotlauelkixti. Pampa ijkuilijtika: “‘Nejua ninotlakuepiltis; nejua nikinmakas tlen kinnamiki’, kijtoua Jehová”. 20 Kuakon, “tla motlauelikniuj apismiki, xtlakualti; tla amiki, xkatliti; pampa tla ijkon tikchiua tikpaleuis mayemania iyojlo”.* 21 Maka xmokauili mamitstlani tlen xkuajli, xtlani tlen xkuajli ika tlen kuajli.

13 Nochimej makintlakamatikan gobiernos akin uejueyixtokej, pampa nion se gobierno xoniaskia tla toTajtsin xkinekiskia. Nochimej akin tlanauatiaj toTajtsin okintlali. 2 Kuakon, tla yakaj kimixnamiki akin tlanauatiaj, kixnamiki tlen toTajtsin yokitlali. Akin xkitlakaitaj tlen toTajtsin yokitlali, tlajyouiskej. 3 Akin kichiuaj tlen kuajli xkinmakasij gobiernos, pero akin kichiuaj tlen xkuajli, kema. Yejua ika, tla xtikneki tikinmakasis akin tlayekanaj, kuakon, nochipa xchiua tlen kuajli niman mitsueyiteneuaskej. 4 Pampa akin tlayekanaj kichiuaj tlen toTajtsin kineki para mitspaleuiskej. Pero, tla tikchijtika tlen xkuajli, xmomojti, pampa akin tlayekanaj xsan tetlajyouiltiaj* pampa kinekij. Yejuamej kipaleuiyaj toTajtsin para manotlakuepilti niman makintlajyouilti akin kichiuaj tlen xkuajli.

5 Kuakon, noneki nenkintlakamatiskej para chipauak nenkipiyaskej nemotlamachilis niman xsan pampa uelis mechtlajyouiltiskej. 6 Yejua ika, nemejuamej noijki nenkitlaxtlauiliaj gobierno. Yejuamej nochipa kinpaleuiyaj oksekimej niman ijkon kichiuaj tlen toTajtsin kineki. 7 Nochimej xkinmakakan tlen kinnamiki: tla yakaj mechijlia xtlatlaxtlauakan, nochi xtlaxtlauakan; tla yakaj kineki xtlakamatikan, xtlakamatikan; niman tla yakaj kineki xtlakaitakan, kuakon xtlakaitakan.

8 Maka itlaj xteuikilikan, san xmotlasojtlakan imiuan oksekimej; pampa akin kintlasojtla oksekimej kichijtika tlen kijtoua tlanauatijli. 9 Tlanauatijli kijtoua: “Maka xmoteka iuan akin xmoixnamik, maka xtemikti, maka xtlachteki, maka xkileui tlen xmoyaxka”. Yejuin tlanauatijli niman okseki tlanauatiltin nochiuaskiaj kentla san se tlanauatijli: “Xkintlasojtla oksekimej ijkon ken tejua timotlasojtla”. 10 Akin tetlasojtla xkinchiuilia tlen xkuajli oksekimej. Kuakon, akin tetlasojtla, kichiua tlen kijtoua tlanauatijli.

11 Ijkon xchiuakan pampa nemejuamej nenkimatij ipan tlen tiempo tinemij. Nenkimatij ika yenoneki nentlachiaskej.* Pampa más yenonisiuijtika* on tonajli ijkuak techmakixtiskej, xijkon ken ijkuak kemach opeuj titlaneltokaj. 12 Yetlantika yeuajli, niman yeuajtlanestiuj. Kuakon, maka sa matikchiuakan tlen kichiuaj akin nemij kampa tlayouatok. Niman matotlalilikan armas tlen nokuij kampa onka tlauijli. 13 Matikchiuakan tlen kuajli kentla tla tinemiskiaj kampa yotlanes; maka matiakan ipan iluimej kampa kichiuaj tlen xkuajli, maka matitlauanikan,* maka matiauilnemikan, maka matikchiuakan tlen tepinajti,* maka teuan matouisokikan nion maka matitenexikolitakan. 14 Xchiuakan ijkon ken okichiuj toTeko Jesucristo niman maka xnemilijtokan nenkichiuaskej tlen kileuiya nemotlalnakayo.

14 Kuajli xkinselikan akin xmás chikauak kipiyaj intlaneltok, pero maka xkintlajtlakolmakakan akin xtlanemiliaj ijkon ken nemejuamej. 2 Kanaj se tlakatl akin kipiya chikauak itlaneltok ueli nochi kikua, pero okse akin xmás chikauak kipiya itlaneltok san kinkua verduras. 3 Akin tlakua maka makichikoita akin xtlakua, niman akin xtlakua maka makitlajtlakolmaka akin tlakua, pampa toTajtsin nochimej kuajli yokinseli. 4 ¿Akinon tejua para tiktlajtlakolmakas akin yakaj okse itlakeual? San iteko uelis kitlajtlakolmakas tla kichiua tlen kuajli noso ka, pampa san Jehová uelis kipaleuis makichiua itekiyo.

5 Yakaj uelis kitas ika se tonajli más ueyi kijtosneki xijkon ken okse, pero yakaj okse kita ika nochi tonaltin san noijki. Cada se noneki kimatstos tleka ijkon tlanemilia. 6 Akin kita ika se tonajli más ueyi kijtosneki xijkon ken okse, ijkon kichiua pampa kineki kitlakaitas Jehová. Noijki ijkon, akin tlakua kichiua ipampa Jehová, pampa kitlasojkamachilia, niman akin xtlakua noijki kichiua ipampa Jehová, niman noijki kitlasojkamachilia. 7 Kuakon nion se de tejuamej xtiyoltokej san para tejuamej, nion xtimikij san para tejuamej. 8 Pampa tla tiyoltokej, tiyoltokej para Jehová, niman tla timikij, timikij para Jehová. Kuakon tla tiyoltokej noso tla timikij, tiiyaxkauan* Jehová. 9 Pampa Cristo omik niman oyoliuj para nochiuas inTeko akin yomikkej niman akin yoltokej.

10 Pero, ¿tleka tiktlajtlakolmaka mokniuj? ¿Noso tleka noijki tikchikoita mokniuj? Nochimej tinemiskej ixpan toTajtsin para matechtlajtlakolmaka. 11 Pampa ijkuilijtika: “Kijtoua Jehová: ‘Ijkon ken nejua niyoltok, nikchiuas ika nochimej nixpan manotlakuantelketsakan niman nochimej kimatiskej ika san nejua nitoTajtsin’”. 12 Kuakon, cada se de tejuamej noyolkuitis ixpan toTajtsin.

13 Yejua ika, maka matotlajtlakolmakakan se iuan okse. Xmokojtilikan maka nenkichiuaskej itlaj tlen makitsakuili noso makitlajkali se tokniuj. 14 Pampa nitlaneltoka itech toTeko Jesús, nejua kuajli nikmatstika ika nochi tlen tikuaj chipauak. San ijkuak se tlakatl kita ika itlaj xchipauak, nochiua xchipauak para yejua. 15 Yejua ika, tla tikyolkokoua mokniuj ipampa tlen tikua, xok tikteititia ika titetlasojtla. Maka xkijtlako ika tlen tikua akin Cristo omik ipampa. 16 Kuakon, maka xtekauilikan ika makijtokan tlen xkuajli itech tlen kuajli nenkichiuaj. 17 Pampa se tlakatl xkalakis kampa iGobierno toTajtsin* san ipampa tlen kikua noso tlen koni. Espíritu santo kichiua ika yakaj makichiua tlen kuajli, mayolsejto niman mayolpaki. 18 Akin ijkon kitekichiuilia Cristo ken se tlakeuajli, kiyolpaktia toTajtsin niman kichiua ika oksekimej makitlakaitakan.

19 Kuakon, matokojtilikan matikchiuakan tlen techpaleuis matiyolsejtokan imiuan oksekimej niman tlen techpaleuis san sekan matoyolchikauakan. 20 Maka sa xxoxotoni tlen toTajtsin yokichijchiuj san ipampa tlen tikua. Uelis tikuaskej nochi, pero xuelis tikuaskej tla yejuin kichiua yakaj mauetsi. 21 Más kuajli tla xtikua nakatl, xtikoni vino nion xtikchiua itlaj tlen uelis kitlajkalis mokniuj. 22 San tejua niman toTajtsin xmatstokan tlen tikneltoka. Uelis yolpakis se tlakatl akin itlaj kichiua niman xkipasoloua* itlamachilis. 23 Pero, tla yakaj kitlapejpenia itlaj xkikuas niman kikua, yejua yotlajtlako pampa yokikua pero xokichiuj pampa tlaneltoka. Pampa, se tlajtlakojli tla yakaj itlaj kichiua pero xtlaneltoka.

15 Tejuamej akin tikpiyaj chikauak totlaneltok, noneki tikinpaleuiskej matlaxikokan akin xkipiyaj chikauak intlaneltok, niman xnoneki san no tejuamej toyolpaktiskej. 2 Cada se de tejuamej noneki kichiuas tlen uelis kinpaleuis oksekimej para tikinyolchikauaskej. 3 Pampa, nion Cristo xsan no yejua onoyolpakti. Onochiuj ijkon ken ijkuilijtok: “Nochi tlen xkuajli omitsijlijkej nejua noijki yonechijlijkej”. 4 Pampa nochi tlen yeuejkaui okijkuilojkej, okijkuilojkej para techmachtis. Ijkon, ijkuak titlaxikoskej niman techyolseuis Tlajkuiloltin, techpaleuis matikchiakan tlen tikseliskej. 5 Niktlajtlanilia toTajtsin akin techpaleuiya matitlaxikokan niman techyolseuiya, mamechpaleui nochimej nemejuamej noijki xtlanemilikan ijkon ken Cristo Jesús 6 para san sekan niman ika san se nemotlajtol xueyiteneuakan iTajtsin niman iTaj toTeko Jesucristo.

7 Kuakon, ika nochi nemoyojlo xmoselikan, ijkon ken Cristo ika nochi iyojlo omechseli nemejuamej para makiueyiteneuakan toTajtsin. 8 Pampa nimechijlia ika Cristo okintekichiuiliko akin yokinochiuilijkaj circuncisión para kiteititis ika toTajtsin xtlakajkayaua, ika melauak tlen yokimijlijka inchanejkauan akin yeuejkaui onenkaj 9 niman para akin xjudíos makiueyiteneuakan toTajtsin pampa teiknelia. Ijkon ken ijkuilijtika: “Yejua ika, nimitsueyiteneuas kampa nemij miyekej akin xjudíos niman ninokuikatis para nikueyiteneuas motoka”. 10 Niman yejua noijki kijtoua: “Xyolpakikan iuan ipueblo nemejuamej akin xnenjudíos”. 11 Ipan Tlajkuiloltin noijki kijtoua: “Xueyichiuakan Jehová nochimej akin xjudíos. Nochimej pueblos makiueyichiuakan”. 12 Noijki Isaías kijtoua: “Uajnesis ineluayo Jesé, akin uajlas para kinyekanas akin xjudíos; niman akin xjudíos itech tlaneltokaskej”. 13 ToTajtsin akin yomechijli ika itlaj mechmakas mamechpaleui xyolpaktokan niman xyolsejtokan pampa itech nentlaneltokaj. Para espíritu santo mamechpaleui xchiatokan tlen yomechijli mechmakas.

14 Nokniuan, nejua kuajli nikmatstika ika nemejuamej nenkipiyaj kuajli nemoyojlo, miyek tlen nenkimatij niman uelis nenkinmachtiskej oksekimej. 15 Pero yonimechijkuilouili yejuin para oksejpa xkilnamikikan. Nikchiua pampa toTajtsin yonechikneli maski xnechnamiki 16 para niktekichiuilis Cristo Jesús niman nikinpaleuis akin xjudíos. Nejua nikchijtok tekitl tlen onechmakak toTajtsin para yejua uelis kinselis akin xjudíos. Ijkon, yejuamej uelis nochiuaskej kentla se uentli tlen kiyolpaktia toTajtsin niman tlen yokichipauj ika iespíritu santo.

17 Nipaki pampa nikchiua ken Cristo Jesús niman nikchiua tekitl tlen toTajtsin onechmakak. 18 Nejua san nikijtos tlen Cristo yonechpaleui manikchiua para nikinpaleuis akin xjudíos matetlakamatikan. Ijkon yokichiuj ika tlen nikijtoua niman tlen nikchiua, 19 ika milagros,* ika tlen temojkatlachialti niman ika ipoder iespíritu toTajtsin. Ijkon, ouel onikinnojnots nochimej akin chantij Jerusalén hasta ne Ilírico. Onikimijli kuajli tlajtoltin itech Cristo. 20 Onikijto ika xnikteijliskia kuajli tlajtoltin itech Cristo kampa yonotenojnotska para maka nikchiuas itekiyo tlen okipeualti okse tlakatl. 21 Ijkon ken ijkuilijtika: “Akin xokinnojnotskej kitaskej niman akin xekikakij kasikamatiskej”.

22 Yejon noijki tlen miyekpa okichiuj maka manimechitati. 23 Pero ipan yejuin pueblos nochiuiyan yonitenojnots niman yekipiya miyek* años ika nikneki nimechontas. 24 Yejua ika, ijkuak nias España nikneki nimechitas. Seki tonaltin nemouan ninokauas niman nikneki xnechkauatij ijkuak nias. 25 Pero aman yenias Jerusalén para nikomonpaleuis tokniuan. 26 Pampa tokniuan de Macedonia niman de Acaya ika nochi inyojlo yokitemakakej tlen kipiyaj para kinpaleuiskej tokniuan de Jerusalén akin xmás itlaj kipiyaj. 27 Melauak ika yejuamej okitemakakej ika nochi inyojlo, pero ijkon okichijkej pampa nonekiya tepaleuiskej. Pampa judíos okinmachtijkej akin xjudíos nochi tlen toTajtsin kitemaka. Yejua ika, akin xjudíos noneki kinmakaskej judíos tlen kinpoloua. 28 Kuakon, ijkuak yonitlan yejuin tekitl niman yonikitak ika yokiselijkej tlen kinmakaskej, nias España niman nipanos kampa nemejuamej. 29 Nikmatstika ika Cristo yonechteochiuj ika miyek tlemach tlen kuajli, niman ijkuak nias ne kampa nennemij nimechinmakas.

30 Nokniuan, nimechtlajtlanilia ipampa toTeko Jesucristo niman pampa espíritu santo techtlasojtla, ika xmokojtilikan xchiuakan oración nopampa, ijkon ken nejua nikchiua. 31 Xtlajtlanilikan manechmakixti intech akin xtlaneltokaj ne Judea niman para tokniuan de Jerusalén kuajli makiselikan tlen nikchiua inpampa. 32 Ijkon, tla toTajtsin kineki, nimechontlajpalos ika nochi noyojlo niman san sekan toyolchikauaskej. 33 ToTajtsin akin kichiua matiyolsejtokan nemouan manemi. Amén.

16 Nikneki xkixmatikan Febe, se tokniuj akin tlapaleuijtika ipan tlanechikojli tlen onka Cencreas, 2 kuajli xselikan ika itoka toTeko, ijkon ken noneki tikinseliskej tokniuan akin tlaneltokaj. Xpaleuikan ika tlen nonekis, pampa yejua noijki yokiteititi ika yokinpaleui miyekej, hasta nejua noijki yonechpaleui.

3 Xnechintlajpalouilikan Prisca niman Áquila, akin nouan kitekichiuiliaj Cristo Jesús, 4 yejuamej onechpaleuijkej maski ueliskia kinmiktiskej. Yejua ika, nejua niman nochi tlanechikoltin kampa nosentlaliaj akin xjudíos melak tikintlasojkamachiliaj. 5 Noijki xnechintlajpalouilikan akin nosentlaliaj ichan Prisca niman Áquila. Xnechtlajpalouilikan Epéneto, akin melak niktlasojtla, yejua akin kachtopa opeuj kitekichiuilia Cristo ne Asia. 6 Xnechtlajpalouilikan María, akin chikauak yotekit nemopampa. 7 Xnechintlajpalouilikan Andrónico niman Junias, akin nochanejkauan niman akin imiuan onechtsaukkej, yejuamej más youejkauj kitekichiuiliaj Cristo xken nejua niman apóstoles kuajli kimixmatij.

8 Xnechtlajpalouilikan Ampliato, akin niktlasojtla niman noijki kitekichiuilia toTeko. 9 Xnechtlajpalouilikan Urbano, akin touan kitekichiuilia Cristo, niman Estaquis, akin melak niktlasojtla. 10 Xnechtlajpalouilikan Apeles, akin Cristo yokiseli. Xnechintlajpalouilikan akin nemij ichan Aristóbulo. 11 Xnechtlajpalouilikan nochanejkauj Herodión. Xnechintlajpalouilikan akin nemij ichan Narciso, akin noijki tlaneltokaj itech toTeko. 12 Xnechtlajpalouilikan Trifena niman Trifosa, yejuin siuamej chikauak kitekichiuilijtokej toTeko. Xnechtlajpalouilikan Pérsida, akin melak tiktlasojtlaj pampa yejua chikauak yokitekichiuili toTeko. 13 Xnechtlajpalouilikan Rufo, akin toTeko yokitlapejpeni, niman noijki xnechtlajpalouilikan inan, akin yeskia ken nonan. 14 Xnechtlajpalouilikan Asíncrito, Flegonte, Hermes, Patrobas, Hermas niman tokniuan akin imiuan nemij. 15 Xnechtlajpalouilikan Filólogo, Julia, Nereo niman ikniuj, noijki xnechtlajpalouilikan Olimpas niman nochimej tokniuan akin imiuan nemij. 16 Xmotlajpalokan ika se beso kentla nemikniujtin yeskiaj. Nochi tlanechikoltin akin tlaneltokaj itech Cristo, mechontlajpalouaj.

17 Nokniuan, aman nimechtlajtlanilia kuajli xkitakan akinomej texejxelouaj niman akinomej temachtiaj tlen kixnamikij tlen nemejuamej yonenuelkej, niman maka imiuan xmouikakan. 18 Yejon tlakamej xkitekichiuiliaj toTeko Cristo, yejuamej kichiuaj san tlen kileuiyaj. Kualtsin niman yemanki tenotsaj para kinkajkayauaskej akin nimantsin nochi kineltokaj. 19 Nochimej yokikakkej ika nemejuamej melak nentetlakamatij niman yejon melak nechyolpaktia. Nikneki xmochiuakan tlamachilisejkej para xchiuakan tlen kuajli niman xchipajkanemikan para maka nenkichiuaskej tlen xkuajli. 20 ToTajtsin akin teyolseuiya, yokijto ika sa achijtsin poliui para kipatlachos Satanás nemokxitlan. Niktlajtlani ika toTeko Jesús mamechikneli maski xmechnamiki.

21 Timoteo, akin nouan tlapaleuiya, mechontlajpaloua. Noijki mechontlajpalouaj nochanejkauan Lucio, Jasón niman Sosípatro.

22 Nejua, Tercio, akin yonikijkuilo yejuin carta, nimechontlajpaloua nemejuamej akin touan nenkitekichiuiliaj toTeko.

23 Noijki mechontlajpaloua Gayo, akin nechkauilia niman kinkauilia tokniuan akin nemij ipan tlanechikojli manokauakan ichan. Noijki mechontlajpaloua Erasto, akin tesorero ipan ciudad niman ikniuj Cuarto. 24 ——

25 ToTajtsin uelis kichiuas xmelajkanemikan ika kuajli tlajtoltin tlen nikteijlia niman ika tlen kiteijlia Jesucristo, yejon kuajli tlajtoltin tepaleuiya matikmatikan tlen miyek años toTajtsin kiyantoya, 26 pero aman yetechititijtokej niman kiteijlijtokej ipan nochi pueblos, ijkon ken yokijtojkaj teotlajtojkej, toTajtsin akin nochipa nemi otlanauati manoteititi para nochimej makitlakamatikan niman itech matlaneltokakan. 27 ToTajtsin akin san yejua tlamachilise, kinamiki nochipa makiueyiteneuakan ipampa* Jesucristo. Amén.