2 CORINTIOS

1 Nejua niPablo, Cristo Jesús onechtlapejpeni para maninochiua iapóstol, pampa toTajtsin ijkon okinek. Nejua iuan tokniuj Timoteo timechontlajkuilouiliaj nemejuamej akin nennemij ipan tlanechikojli tlen onka Corinto niman nochimej tokniuan akin nemij ne Acaya.

2 Niktlajtlanilia toTajtsin, akin toTaj, niman noijki niktlajtlanilia toTeko Jesucristo ika mamechikneli maski xmechnamiki niman mamechyolseui.

3 Makiueyichiuakan toTajtsin, akin iTaj toTeko Jesucristo. Yejua toTaj niman toTajtsin akin melak techiknelia niman techyolseuiya. 4 ToTajtsin techyolseuiya ipan nochi tlen tikixnamikij para ika yolseuilistli tlen yejua techmaka tejuamej uelis tikinyolseuiskej akin kixnamiktokej tlen xkuajli. 5 Pampa ijkon ken tikixnamiktokej miyek tlen techtlajyouiltia ipampa* Cristo, noijki yejua melak techyolseuiya. 6 Tejuamej titlajyouiyaj para uelis timechyolseuiskej niman timechmakixtiskej, niman techyolseuiyaj para noijki uelis timechyolseuiskej. Yejuin yolseuilistli mechpaleuiya para xxikokan tlen san no tejuamej tikijyouiyaj. 7 Kuajli tikmatstokej ika nemejuamej nenmelajkanemiskej,* ijkon ken tikmatstokej ika maski nentlajyouijtokej ijkon ken tejuamej, noijki mechyolseuiskej ijkon ken tejuamej.

8 Nokniuan, tiknekij xmatikan tlen otikixnamikkej ne Asia.* Tejuamej melak otitlajyouijkej niman tikmachiliayaj ika xok tikojtikej, hasta tiknemiliayaj ika timikiskiaj. 9 Niman otikmachilijkej ika yetechmiktiskiaj. Yejuin opanok para matitlaneltokakan itech toTajtsin akin kinkuiteua akin yomikkej niman maka san totech matitlaneltokakan. 10 Melak xkuajli ken timikiskiaj, pero yejua otechmakixti, niman oksejpa techmakixtis. Niman tikchiaj ika yejua nochipa matechmakixti. 11 Nemejuamej noijki uelis nentechpaleuiskej tla miyekpa nenkichiuaj oración topampa. Tla miyekej kichiuaj oración, toTajtsin kinnankilis ijkuak techpaleuis. Yejon kichiuas ika timiyekej matiktlasojkamachilikan pampa techpaleuiya.

12 Melak tiyolpakij pampa totlamachilis techijlia ika yotikchijkej tlen chipauak nemouan niman imiuan akin xkixmatij toTajtsin, niman xtimechkajkayauaj. Ijkon yotikteititijkej ika timechikneliaj maski xmechnamiki, ijkon ken toTajtsin kichiua niman xtitlanemiliaj ijkon ken okseki gente. 13 Pampa xtimechijkuilouilijtokej itlaj tlen xuelis nenkileeroskej nion nenkasikamatiskej. Niman nikneltoka ika kuajli nenkasikamatiskej nochi* yejuin. 14 Nemejuamej nenkasikamatiskej ijkon ken achijtsin yonenkasikamatkej ika noneki nenpakiskej topampa, ijkon ken tejuamej tipakiskej nemopampa ipan itonal toTeko Jesús.

15 Yejua ika, niknekiya kachtopa nimechontlajpalos, para ika okpa xyolpakikan. 16 Nejua niknekiya nimechontlajpalos ijkuak niaskia Macedonia niman noijki ijkuak niuajnokuepaskia. Para sakin nemejuamej noijki nennechpaleuiskiaj ijkuak niaskia Judea. 17 Ijkuak onikijto ika ijkon nikchiuas, xsan onikuajnemilijtiuets. ¿Noso nejua san notech nitlanemilia ijkuak nikijtoua itlaj nikchiuas niman yejua ika nikijtoua “Kema, kema” niman sakin nikijtoua “Ka, ka”? 18 Pampa ijkon ken uelis titlaneltokaskej itech toTajtsin, uelis nenkineltokaskej ika xtikijtouaj itlaj niman sakin tikpatlaj. 19 Nejua, Silvano* niman Timoteo timechnojnotsaj itech iKoneuj toTajtsin, Jesucristo. Niman yejua xkeman okijto itlaj niman sakin okipatlak. 20 Pampa nochi tlen toTajtsin yokijto kichiuas yemelak yonochiuj ipampa Cristo. Ika itoka Cristo tikijliaj amén toTajtsin, niman ijkon kiueyiteneuaj topampa. 21 Pero toTajtsin akin kiteititia ika nemejuamej niman tejuamej tiiyaxkauan* Cristo niman ika toTajtsin yotechtlapejpeni. 22 Yejua noijki otechtlalili se sello niman otechmakak iespíritu santo para techititis ika tikseliskej tlen uajlas.

23 ToTajtsin kuajli kimatstika ika xniauj Corinto pampa xnikneki más nimechyolkokos. 24 Xnikijtoua tla tejuamej noneki timechnauatiskej kenon noneki nentlaneltokaskej, nemejuamej yenenkipiyaj chikauak nemotlaneltok. Tejuamej san titepaleuiyaj para nemejuamej xyolpakikan.

2 Pampa yonikijto ika xnias nimechontlajpalos tla ninoyolkokojtok. 2 Pampa tla nejua nikchiua xmoyolkokokan, ¿akinon kichiuas maniyolpaki? San akin onikchiuj manoyolkoko. 3 Onimechtlajkuilouili para ijkuak nias maka maninoyolkokojto ipampa itlaj tlen nechyolpaktis. Pampa kuajli nikmatstika ika tlen nechyolpaktia noijki mechyolpaktia nochimej nemejuamej. 4 Nejua hasta onichokak ijkuak onimechtlajkuilouili, pampa melak ninajmana niman ninoyolkokoua. Pero xonikchiuj para xmajmanakan, onikchiuj para xmatikan ika melak nimechtlasojtla.

5 Tla yakaj yokichiuj xmajmanakan, xsan okichiuj maninajmana, noijki okichiuj xmajmanakan nochimej nemejuamej. Nejua xnikneki melak niktejteneuas akin ijkon okichiuj. 6 Yejon tlakatl xok noneki kajuaskej pampa miyekej melak yokajuakej. 7 Aman noneki nenkitlapopoluiskej ika nochi nemoyojlo, niman nenkiyolseuiskej para maka melak maajmankamiki. 8 Yejua ika, nimechtlajtlanilia xkititikan ika nenkitlasojtlaj. 9 Noijki onimechtlajkuilouili para nikmatis tla nenkiteititiskiaj ika nochipa nentetlakamatij. 10 Tla nemejuamej yakaj nenkitlapopoluiyaj, nejua noijki niktlapopoluiya. Pampa nejua onikintlapopolui oksekimej para nemejuamej kuajli xnemikan ixpan Cristo. 11 Para Satanás maka matechkajkayaua, pampa tikmatstokej tlenon kineki.

12 Ijkuak onajsik Troas para nikteijlis kuajli tlajtoltin itech Cristo niman onechkauilijkej más maniktekichiuili toTeko, 13 xika noyojlo ninemiya pampa xoniknexti nokniuj Tito. Yejua ika onikinnauatij* tokniuan niman oniaj Macedonia.

14 ¡Melak tiktlasojkamachiliaj toTajtsin! Yejua techyekana iuan Cristo para kiteititis ika yotitetlankej. Niman techtekitiltia* para nochiuiyan makimatikan tlen toTajtsin temachtia, tlen yeskia ken itlaj tlen ajuiyak. 15 Pampa toTajtsin techita ken itlaj tlen ajuiyak akin kitemachiltiaj akinon Cristo. Yejuin tlen ajuiyak kijnekuij akin kinmakixtiskej niman akin kinpopoloskej. 16 Para akin kinpopoloskej, tlen kijnekuij yeskia ken mikilistli tlen kichiua mamikikan, pero para akin kinmakixtiskej, tlen kijnekuij yeskia ken nemilistli tlen kinmakaskej. ¿Niman akinon uelis kichiuas nochi yejuin? 17 Tejuamej, pampa xtiknemakaj itlajtol toTajtsin ijkon ken miyekej tlakamej kema kichiuaj. Ixpan toTajtsin titlajtouaj ika nochi toyojlo ken akin kichiuaj ken Cristo niman ken akin toTajtsin okintitlan.

3 ¿Noneki oksejpa tikteititiskej tiakinomej? ¿Noneki tikinpiyaskej cartas kampa makijto tiakinomej ijkon ken oksekimej kichiuaj? ¿Noso nemejuamej noneki nenkimijkuiloskej yejon cartas? 2 Nemejuamej nenyeskiaj kentla tocarta, tlen ijkuilijtika ipan toyojlo, tlen nochimej kixmatij niman tlen nochimej yokileerojkej. 3 Pampa kuajli nesi ika nemejuamej incarta Cristo, tlen tejuamej akin otiktekichiuilijkej otikijkuilojkej. Xijkuilijtika ika tinta, ijkuilijtika ika iespíritu toTajtsin akin yoltika. Niman xijkuilijtika ipan temej, ijkuilijtika ipan inyojlo gente.

4 Cristo techpaleuiya matikneltokakan ika toTajtsin otechtlapejpeni para matiktekichiuilikan. 5 Xtiknemiliaj tla itlaj totech ualeua pampa san no tejuamej otomachtijkej. Tiktlasojkamachiliaj toTajtsin pampa yejua otechmachti. 6 Yejua akin yotechmachti para matikteijlikan ken yenkuik yonotlajtolkauj. Xtoyekanaj ika tlanauatijli tlen ijkuilijtika, toyekanaj ika iespíritu. Pampa tlanauatijli tlen ijkuilijtika kichiua matimikikan, pero espíritu kichiua matikpiyakan nemilistli.

7 Ijkuak oyejkok tlanauatijli tlen teuika kampa mikilistli niman tlen okijkuilojkej ipan temej, melak petlantoya. Yejua ika, ikoneuan Israel xueliyaj kitayaj ixayak Moisés pampa yejon ueyilistli nesiya ipan ixayak, se ueyilistli tlen kipopoloskiaj. 8 Kuakon, ¿xnoneki más kiueyiteneuaskej ijkuak notemaka espíritu? 9 Pampa, tla tlanauatijli tlen teuika kampa mikilistli ueyixtoya, kuakon más ueyixtos ijkuak toTajtsin kitas ika gente kipiya kuajli iyojlo. 10 Tlen kachtopa ueyixtoya, aman xok ueyixtika pampa ouajnes itlaj tlen más ueyi. 11 Pampa, tla tlen kipopoloskiaj ueyixtoya ijkuak oyejkok, kuakon más ueyixtok tlen nochipa onias.

12 Pampa tikchiatokej yejuin, titlajtouaj ika nochi toyojlo 13 niman xtitixtlapachouaj ijkon ken Moisés okichiuj. Yejua nixtlapachouaya ika se tlakentli para ikoneuan Israel maka makitakan kanon teuika tlanauatijli tlen popoliuiskia. 14 Pero intlamachilis yoijtlakajka. Niman hasta aman, ijkuak kileerouaj tlen yeuejkaui imiuan onotlajtolkajkaj ok* ixtlapachijtokej ika san no yejua tlakentli. Pampa yejon tlakentli san kisa itechkopa Cristo. 15 Hasta ipan yejuin tonaltin, nochipa ijkuak kileerouaj Tlanauatijli tlen okimakakej Moisés, se tlakentli kitlapachoua inyojlo. 16 Pero, ijkuak yakaj uajnokuepa itech Jehová, kisa yejon tlakentli. 17 Jehová yejua espíritu niman xtlaj kintsakuilia akin kipiyaj iespíritu Jehová. 18 Nochimej tejuamej tiyeskiaj kentla espejos niman xtiktlapachouaj toxayak para tikteititiskej kenon ueyixtika Jehová. Ijkuak ijkon tikchiuaj, topatlatiuej para tinesiskej ken toTajtsin niman más tikteititiskej iueyilis Jehová, akin se Espíritu.*

4 Yejua ika, xtitosiaujkauaj, aman ika toTajtsin yotechkauili matiktekichiuilikan pampa yotechikneli maski xtechnamiki. 2 Yotikajkajkej tlen tepinajti niman tlen san ichtaka nochiua, niman xtitlakajkayauaj nion xtikpapatlaj itlajtol toTajtsin. Tejuamej tiktemachiltiaj tlen melauak niman ipampa yejon, nochimej techixmatij ixpan toTajtsin. 3 Tla kuajli tlajtoltin tlen tikteijliaj iyantokej ika se tlakentli, iyantokej para akin kinpopoloskej,* 4 para akin xtlaneltokaj. Yejuamej akin on dios de yejuin mundo* yokimixtlapacho para maka inpan matlauilo itlauil kuajli tlajtoltin itech Cristo, akin kiteititia kenijki toTajtsin. 5 Pampa xtotech titenojnotsaj, tikteijliaj ika Cristo toTeko niman ika tejuamej yotochijkej nemotlakeualuan ipampa Jesús. 6 Pampa toTajtsin yejua akin okijto: “Maonia tlauijli kampa tlayouatok”. Ipampa ixayak Cristo, toTajtsin kintlauiluiya inyojlo nochimej ika itlauil. Yejuin tlauijli techpaleuiya matikixmatikan toTajtsin.

7 Pero, tikpiyaj yejuin tlen melak patioj ipan kontin de sokitl, para tikteititiskej ika poder tlen xakaj ueli kipiya ualeua itech toTajtsin niman xtotech ualeua. 8 Melak techtepitsmiktiaj,* pero xtechtepitsmiktiaj hasta ijkuak xok ueli titoliniaj;* tikmachiliaj kentla tikaltsauktoskiaj pero tikmatij kenon tikisaskej; 9 techtlajyouiltiaj, pero xsan toselti techkauaj; techtlajkalij pero xtechmiktiaj. 10 Maski san kanon tiauej, tikixnamikij mikilistli ijkon ken Jesús okixnamik. Ijkon oksekimej kitaskej ika titlajyouiyaj ijkon ken Jesús otlajyoui. 11 Tejuamej, pampa tiyoltokej, miyekpa tikixnamikij mikilistli ipampa Jesús, para oksekimej makitakan ika titlajyouiyaj ijkon ken Jesús otlajyoui. 12 Nemejuamej nenyoltoskej, maski tejuamej tikixnamikij mikilistli.

13 Tejuamej noijki tikneltokaj tlen nikan ijkuilijtika: “Onitlaneltokak niman yejua ika, onitlajto”. Kuakon, tejuamej noijki titlaneltokaj niman yejua ika, titlajtouaj, 14 pampa tikmatstokej ika akin okiyoliti* Jesús noijki techyolitis* tejuamej para tinemiskej iuan Jesús niman techuikas kampa yejua nemi. 15 Pampa nochi yejuin mechpaleuis, para miyekej más makimiknelikan maski xkinnamiki. Pampa nemij miyekej akin kitlasojkamachiliaj toTajtsin para nochimej makiueyiteneuakan.

16 Yejua ika, xtitosiaujkauaj. Maski totlalnakayo tlantiuj, kuajli tikmatstokej ika tlen tikpiyaj ipan toyojlo niman totlanemililuan mojmostla noyenkuilijtiuej. 17 Pampa maski tlen tikixnamikij san panotikisa niman xyetik, kichiua matechteochiuakan niman nochipa techteochiuaskej, 18 ijkon panos tla nochipa tikitstokej tlen xnesi niman tla xtikitaj tlen nesi. Pampa tlen nesi san tlamis, pero tlen xnesi nochipa onias.

5 Pampa tikmatstokej ika tla kixojxotoniskej tokal noso tokajkal tlen tikpiyaj ipan yejuin mundo, toTajtsin techmakas se ueyi kajli tlen nochipa onias ne ipan cielo, se kajli tlen xsan tlakamej okichijchijkej. 2 Melak tajmanaj pampa tinemij ipan yejuin kajli. Sa tiknektokej totlaliliskej tlen techmakaskej niman tlen ualeua ne ipan cielo 3 para, ijkuak totlaliliskej, kema tikpiyaskej totlaken. 4 Akin tinemij ipan yejuin kajkajli melak tajmanaj niman melak tajmankamikij. Xijkon tikchiuaj pampa tiknekij tokixtiliskej yejuin kajkaltsintli, tikchiuaj pampa tiknekij totlaliliskej okse, para nemilistli makitolo tlen ueli miki. 5 Pampa toTajtsin yejua akin otechyektlali para yejuin niman yejua akin otechmakak iespíritu para techititis ika yemelak tikseliskej tlen uajlas.

6 Yejua ika, nochipa melak titlaneltokaj niman tikmatstokej ika pampa ok* tinemij* ipan totlalnakayo, uejka tinemiskej itech toTeko. 7 Pampa toyekanaj ika tlen tikneltokaj niman xika tlen tikitaj. 8 Pero tikmachiliaj ika melak titlaneltokaj niman tiknekij tinemiskej iuan toTeko maski xok tinemiskej ipan totlalnakayo. 9 Yejua ika, tla iuan tinemij noso tla uejka tinemij itech yejua, tejuamej nochipa tiknekij tikyolpaktiskej. 10 Pampa nochimej noneki tiaskej kampa Cristo tetlajtlakolmaka, para cada se makiseli tlen kinamiki ipampa tlen kuajli noso tlen xkuajli okichiuj ijkuak nemiya ipan itlalnakayo.

11 Melauak ika pampa tikmatij tlenon kijtosneki tikmojkaitas toTeko, tikimijliaj oksekimej noijki matlaneltokakan. Pero, toTajtsin kuajli techixmati, niman nejua nikchia ika nemejuamej noijki xmatikan kenon tejuamej. 12 Xtiknekij oksejpa nemixpan kuajli titlajtoskej totech, tejuamej timechijliaj tleka uelis kuajli nentlajtoskej totech, ijkon uelis nenkinnankiliskej akin noueyimatij itech tlen kipiyaj niman xika tlen kipiyaj ipan inyojlo. 13 Tla itlaj otikchijkej ken yakaj akin xkipiya itlamachilis, ijkon otikchijkej para tikyolpaktiskej toTajtsin; niman tla itlaj tikchiuaskiaj pampa kuajli titlanemilijtoskiaj, tikchiuaskiaj para timechpaleuiskej. 14 Itlasojtlalis Cristo techchiualtia matiktlakamatikan, pampa yejuin tlen yotikasikamatkej: ika se tlakatl omik inpampa nochimej; pampa nochimej yomikkaj. 15 Yejua omik inpampa nochimej para akin yoltokej maka sa makichiuakan tlen yejuamej kinekij, aman noneki kitlakamatiskej akin omik inpampa niman akin okiyolitijkej.*

16 Kuakon, aman xok yakaj tikitaj san ika tixtololojuan. Tla sekimej otikitakej Cristo san ika tixtololojuan, aman xok ijkon tikitaj. 17 Tla yakaj kichiua ijkon ken Cristo, kijtosneki ika toTajtsin okichijchiuj. Tlen yeuejkaui onkatka yopanok. ¡Xkakikan! Aman onka tlen yenkuik. 18 Pampa nochi ualeua itech toTajtsin, akin okichiuj oksejpa iuan matouikakan ipampa* Cristo, niman san no yejua techontitlani para matikinpaleuikan oksekimej oksejpa iuan manouikakan. 19 Kijtosneki ika toTajtsin, kichijtoya ika akin nemij ipan yejuin mundo oksejpa iuan manouikakan ipampa Cristo. Niman xok kilnamiktok tlen xkuajli kichiuayaj. Yejua otechijli ika tejuamej matikteijlikan ika oksejpa uelis iuan nouikaskej.

20 Yejua ika, kentla toTajtsin otechtitlan tejuamej para matitlajtokan ipampa Cristo, kentla tla toTajtsin miyekpa kinnotstoskia gente topampa. Pampa titlajtouaj ipampa Cristo, timechtlajtlaniliaj: “Xmoyolseuikan iuan toTajtsin”. 21 Akin xokichiuj tlajtlakojli, toTajtsin okiuentlali ipampa totlajtlakoluan, para ipampa, toTajtsin ueliskia kitas ika tikpiyaj kuajli toyojlo.

6 Pampa tikpaleuiyaj toTajtsin, tejuamej noijki timechtlajtlaniliaj ika tla nenkimokauiliaj ika toTajtsin mamechikneli maski xmechnamiki, maka xnemilikan ika yejon xtepaleui. 2 Pampa yejua kijtoua: “Ijkuak nonekiya nimitsteochiuas onimitskak, niman ijkuak nonekiya nimitsmakixtis onimitspaleui”. ¡Xkakikan! ¡Aman tiempo ijkuak toTajtsin techteochiuas! ¡Aman ijkuak toTajtsin techmakixtis!

3 Xtikchijtokej itlaj tlen makintlajkali oksekimej, para maka yakaj makijto ika xkuajli ken tikchiuaj totekiyo. 4 Tejuamej tikteititiaj ika tiktekichiuiliaj toTajtsin ipan nochi tlen tikchiuaj ijkuak miyek tikxikouaj, ijkuak titlajyouiyaj, ijkuak xtikpiyaj tlen noneki, ijkuak tikixnamikij tlen techtekiyomaka,* 5 ijkuak techuisokij, ijkuak techtsakuaj, ijkuak techixnamikij, ijkuak chikauak titekitij, ijkuak xueli tikochij niman ijkuak xtitlakuaj. 6 Tejuamej noijki tikteititiaj ika tiktekichiuiliaj toTajtsin ijkuak tichipajkanemij, ijkuak tikchiuaj tlen yotechmachtijkej, ijkuak titeijyouiyaj niman tikteititiaj ika tikpiyaj kuajli toyojlo, ijkuak tokauiliaj espíritu santo matechyekana, ijkuak yemelak titetlasojtlaj,* 7 ijkuak tikijtouaj tlen melauak, ijkuak titlaneltokaj itech ipoder toTajtsin, ijkuak tikinpiyaj armas ika toyekma* niman toopochma* para tikchiuaskej tlen kuajli; 8 ijkuak techueyiteneuaj noso xtechtlakaitaj, ijkuak kuajli ken techixmatij noso ijkuak xkuajli ken techixmatij. Techitaj ken akin tekajkayauaj, maski tikijtouaj tlen melauak; 9 ken akin xkimixmatij, maski kuajli techixmatij; ken akin miktokej,* maski tiyoltokej; kentla tla yotechtlajyouiltijkej, maski xetechtemakaj para matechmiktikan; 10 kentla tla tajmanaskiaj, maski nochipa tipaktokej; kentla tla xtikpiyaskiaj tomintsin, maski tikchiuaj ika miyekej manotomintikan; kentla tla xtlaj tikpiyaskiaj, maski nochi tikpiyaj.

11 Corintios, timechmelajkanotstokej niman melak timechtlasojtlaj.* 12 Tejuamej nochipa timechititiaj ika melak timechtlasojtlaj, pero nemejuamej xnentechtlasojtlaj ijkon ken tejuamej. 13 Nimechnotsa kentla tla nenyeskiaj nennokoneuan. Nimechtlajtlanilia ika noijki ijkon xchiuakan topampa, más xtechtlasojtlakan.

14 Maka xmosentlalikan* imiuan akin xtlaneltokaj. Pampa ¿san noijki tlen melajki niman tlen xkuajli?* ¿Noso san noijki tlauijli niman tlayoualyotl? 15 Noijki, ¿Cristo notlajtolnamiki iuan Belial?* ¿Noso akin tlaneltoka* uelis nouikas iuan akin xtlaneltoka? 16 Xuelis nemiskej dioses tlen xmelajkej kampa itemplo toTajtsin. Pampa tejuamej kentla itemplo toTajtsin akin yoltika. Ijkon ken okijto toTajtsin: “Nejua ninemis kampa yejuamej nemij niman nikistinemis kampa yejuamej kistinemij, nejua niyes inTajtsin niman yejuamej yeskej nopueblo”. 17 Yejua ika, Jehová kijtoua: “Xkisakan niman xmoxelokan de yejuamej niman maka xkajsikan tlen xchipauak”, “niman nejua nimechselis”. 18 “Jehová, akin kipiya Nochi poder, kijtoua: ‘Niman nejua niyes nemotaj, niman nemejuamej nenyeskej nennokoneuan’”.

7 Kuakon, noknitsitsinuan, pampa yotechijlijkej ika techmakaskej nochi yejuin, matochipauakan itech nochi tlen kijtlakoua totlalnakayo niman espíritu.* Niman pampa tikmojkaitaj toTajtsin, más matochipauakan.

2 Nemejuamej más xtechtlasojtlakan. Tejuamej xakaj tikchiuiliaj itlaj tlen xkuajli, xakaj tikijtlakouaj nion xakaj tikajkayauaj para topaleuiskej. 3 Xnimechijlia yejuin para nimechtlajtlakolmakas. Pampa yonimechijli ika maski san tlenon mapano, tejuamej nochipa timechtlasojtlaskej. 4 Nejua nimechnotsa ika nochi noyojlo. Nemejuamej nenkichiuaj ika melak maniyolpaki. Niyolseui niman melak niyolpaki maski titlajyouiyaj.

5 Manimechonijli ika ijkuak otajsikej Macedonia, xtiyolsejtoyaj, pampa ok* melak titlajyouijtoyaj: sekimej techixnamikiyaj niman noijki tajmanayaj ipampa tokniuan akin nemij ipan tlanechikoltin. 6 Pero toTajtsin, akin kinyolseuiya akin noyolajmanaj, otechyolseui ijkuak oyejkok Tito. 7 Xsan otiyolsejkej ijkuak oyejkok, noijki otiyolsejkej ika yejon yolseuilistli tlen okiseli nemotech. Niman más oniyolpak ijkuak otechijli ika melak nenkinekiyaj nennechitaskej, ika nemoyolkokouaj niman melak nenmajmanaj nopampa.

8 Yejua ika, xninoyolkuepa tla ika nocarta onikchiuj xmajmanakan. Maski kachtopa oninoyolkoko ijkuak onikitak ika nocarta omechajman, xouejkauj ijkon ninoyolkokojtoya. 9 Aman xniyolpaki pampa tla onikchiuj xmajmanakan, niyolpaki pampa onemoyolkuepkej. Onenmajmankej ijkon ken toTajtsin kuelita, kuakon, xonentlajyouijkej san topampa. 10 Pampa ijkuak yakaj najmana ijkon ken toTajtsin kuelita, kichiua manoyolkuepa niman mamakisa, niman xakaj kajmana yejon. Pero mikij akin najmanaj ijkon ken oksekimej gente. 11 ¡Xkitakan kenon melak yomechpaleui pampa yonenmajmankej ijkon ken toTajtsin kuelita! Yokichiuj oksejpa kuajli mamechitakan, xpinauikan, xmomojtikan, yokichiuj xnekikan nenkichiuaskej tlen kuajli, xmokojtilikan niman xyektlalikan tlen xkuajli onenkichijkaj. Ipan yejuin, yonenkiteititijkej ika melak nenchipajkanemij. 12 Nejua xonimechtlajkuilouili ipampa akin okichiuj tlajtlakojli noso ipampa akin okichijkej matlajyoui. Onimechtlajkuilouili para nemejuamej niman toTajtsin xkitakan kenon yonenmokojtilijkej nentechtlakamatiskej. 13 Yejon tlen yotechyolseui.

Pero xsan otechyolseui, noijki más otechyolpakti ijkuak otikitakej kenon Tito pakiya pampa nemejuamej onenkiyolchikajkej. 14 Pampa xonennechpinajtijkej ixpan Tito ijkuak onikijli tlen kuajli nenkichiuaj. Melauak nochi tlen otimechijlijkej niman noijki yonoteititi ika melauak nochi tlen Tito otikijlijkej nemotech. 15 Noijki, Tito más mechtlasojtlatiuj ijkuak kilnamiki kenon nochimej nemejuamej onentetlakamatkej niman melak onenkitlakaitakej ijkuak onenkiselijkej. 16 Niyolpaki pampa ueli nochipa nemotech nitlaneltoka.

8 Nokniuan, aman tiknekij xmatikan kenon toTajtsin yokimikneli maski xkinnamiki tlanechikoltin tlen onokej* Macedonia. 2 Ijkuak okixnamikkej itlaj tlen okichiuj melak matlajyouikan, yejuamej ika nochi inyojlo okitemakakej tlen kipiayaj maski xmiyek tomin kipiayaj. Tlen okichijkej okiteititi ika kuelitayaj kitemakaskej. 3 Nejua nikneltoka ika yejuamej okitemakakej nochi tlen ouelkej, hasta más de tlen ueliskia kitemakaskej. 4 Miyekpa, yejuamej akin techtlajtlaniliayaj matikinkauilikan makitemakakan tlen kipiyaj niman ijkon uelis kinpaleuiskej tokniuan. 5 Niman yejuamej okichijkej más de on tlen tikchiayaj, pampa onokojtilijkej ika nochi inyojlo kitekichiuiliskej toTeko niman otechpaleuijkej ijkon ken kineki toTajtsin. 6 Kuakon otikyolchikajkej Tito ika matlami makisentlali tomin tlen nemejuamej ika nemoyojlo nenkitemakaskiaj, pampa yejua akin okipeualtijka yejuin tekitl. 7 Nochi kuajli tlen nenkichijtokej. Nenkipiyaj chikauak nemotlaneltok, nenuelij nentlajtouaj, melak nentlaixmatij, melak nemokojtiliaj kuajli nenkichiuaskej nemotekiyo niman nenkintlasojtlaj oksekimej ijkon ken timechtlasojtlaj. Pero noijki xmokojtilijtokan más nenkitemakaskej tlen nenkipiyaj.

8 Xnimechmakatika se tlanauatijli, nimechijlia yejuin para xkitakan kenon oksekimej melak yolpakij niman para nikitas tla yemelak nentetlasojtlaj. 9 Pampa nemejuamej nenkimatij kenon toTeko Jesucristo techiknelia maski xtechnamiki. Maski yejua katka rico, onochiuj ken yakaj akin xtlaj kipiya, yejua okipolo nochi tlen kipiaya para nemejuamej miyek xpiyakan.

10 Manimechijli tlenon niknemilia itech yejuin. Tlen nimechijlis mechpaleuis pampa yekipiya se año ika onenkipeualtijkej yejuin tekitl. Hasta onenkiteititijkej ika nenkinekiyaj nenkichiuaskej. 11 Yejua ika, xtlamikan tekitl tlen onenkipeualtijkej. Ijkon, tlen ueli nenkitemakaj kiteititis ika nenkichiuaj ika nemoyojlo. 12 Pampa teyolpakti ijkuak yakaj kitemaka itlaj ika nochi iyojlo, ijkuak kitemaka tlen kipiya niman xkitemaka tlen xkipiya. 13 Xnikneki xkitakan ika nimechtekiyomaka* niman oksekimej ka. 14 Pero, para nochi san noijki yes, xchiuakan ika tlen mechsobraroua makinpaleui akin xkinmajxilia, para tlen yejuamej kinsobraroua mechpaleuis ijkuak itlaj mechpoloua, ijkon nochi san noijki yes. 15 Ijkon ken ijkuilijtika: “Akin miyek kipiaya xokisobraro, niman akin xmiyek kipiaya xtlaj okipolo”.

16 Tiktlasojkamachiliaj toTajtsin pampa okichiuj ika Tito manajmana nemopampa ijkon ken tejuamej titajmanaj nemopampa. 17 Yejua xsan yonoyolchikauj, noijki melak yolpaki niman sa kinektika mechontlajpalos. 18 Iuan otikontitlankej, tokniuj akin kiueyiteneuaj ipan nochi tlanechikoltin itech tlen kichiua ipampa kuajli tlajtoltin. 19 Niman xsan yejon, tokniuan ipan tlanechikoltin okitlapejpenijkej para matechuika ijkuak tikxejxeloskej tomin tlen onenkitemakakej ika nemoyojlo para manoueyiteneua toTeko. Niman, ijkon noijki tikteititiskej ika tiknekij titepaleuiskej. 20 Ijkon, xakaj techtejteneuas ipampa ken tikxejxelouaj tomin tlen onenkitemakakej ika nemoyojlo. 21 Pampa tokojtiliaj xtitekajkayauaskej ika nochi tlen tikchiuaj xsan ixpan Jehová, noijki imixpan nochimej tlakamej.

22 Noijki, iuan otikontitlankej okse tokniuj, akin miyekpa yotikitakej tla kuajli tlen kichiua niman akin yokiteititi ika kuajli tekiti ipan miyek tlemach. Pero, aman más kuajli kichiuas itekiyo pampa melak tlaneltoka nemotech. 23 Tla yakaj xtlaneltoka itech Tito, xmatikan ika yejua nechpaleuiya niman tekiti para mechpaleuis. Niman tla yakaj xtlaneltoka intech tokniuan, xmatikan ika yejuamej apóstoles itech tlanechikoltin niman kiueyiteneuaj Cristo. 24 Yejua ika, xkimititikan ika nenkintlasojtlaj niman xkimititikan tlanechikoltin tleka melak nentechyolpaktiaj.

9 Xnoneki nimechtlajkuilouilis itech yejuin tekitl tlen kinpaleuiya tokniuan. 2 Pampa nikmatstok ika nenkinektokej nentepaleuiskej niman nikimijlia tokniuan akin nemij Macedonia ika akin nemij Acaya yekipiya se año ika sa kinektokej tepaleuiskej. Manimechonijli ika tlen nemejuamej nenkichiuaj yokinyolchikauj miyekej de yejuamej. 3 Pero nikomontitlani tokniuan para manoita ika yemelak nenkinekij nentepaleuiskej, ijkon ken onikijto ika nenkichiuaskiaj, ijkon xkijtoskej tla xmelauak ijkuak otikijtojkej ika nemejuamej sa nenkinektokej nentepaleuiskej. 4 Pampa, tla akin nemij Macedonia nouan yaskiaj niman kitaskiaj ika xnennemij listos, nentechpinajtiskiaj pampa tejuamej nemotech otitlaneltokakej, pero, más nenpinauiskiaj nemejuamej. 5 Yejua ika, achto onikomontitlan sekimej tokniuan para mauiyan kampa nemejuamej nennemij para makisentlalikan tomin tlen yonenkijtojkaj ika nenkitemakaskiaj. Ijkon xnenkitemakaskej nemotomintsin san pampa noneki ijkon nenkichiuaskej, nenkitemakaskej pampa kisa itech nemoyojlo.

6 Xkilnamikikan ika akin achijtsin kitoka, achijtsin kipixkas niman akin miyek kitoka miyek kipixkas. 7 Ijkuak yakaj ipan iyojlo yokijto itlaj kitemakas, ijkon makichiua, pero maka san ika itlauel noso san pampa kichiualtiaj, pampa toTajtsin kitlasojtla akin kitemaka ika nochi iyojlo.

8 Manimechonijli ika toTajtsin uelis mechiknelis maski xmechnamiki para maka keman itlaj mamechpolo niman noijki nenkipiyaskej miyek para nenkichiuaskej tlen kuajli. 9 Ijkon ken ijkuilijtika: “Yejua kuajli yokitexejxelouili; yokinmakak akin xtlaj kipiyaj. Nochipa kiteititia ika melajki”. 10 Akin kimaka miyek xinachtli niman noijki kimaka pan para makikua akin toka, mechmakas niman kimiyekilis nemoxinach para nemejuamej xtokakan niman kimiyekilis tlen nenkipixkaskej pampa nenkipiyaj kuajli nemoyojlo.* 11 Nemejuamej miyek mechmakatokej para noijki ijkon miyek xtemakakan, niman pampa tiktemakaskej tlen onenkitemakakej kichiuas ika oksekimej makitlasojkamachilikan toTajtsin. 12 Pampa yejuin tekitl xsan nochijtok para kinmakaskej tlen kinpoloua oksekimej, nochijtok para miyekej makitlasojkamachilikan toTajtsin. 13 Ijkon, yejuamej kitlasojkamachiliskej toTajtsin. Pampa yejuin tekitl tlen nochiua para nenkinpaleuiskej oksekimej kiteititia ika nemejuamej nemokojtiliaj nenkichiuaskej tlen kijtouaj kuajli tlajtoltin tlen nenkiteijliaj itech Cristo. Niman noijki kiteititia ika nenkinekij nenkinpaleuiskej yejuamej niman oksekimej ika tlen nenkipiyaj. 14 Niman noijki, kichiuaskej oración nemopampa niman mechtlasojtlaskej pampa kitaskej ika toTajtsin yomechikneli maski xmechnamiki.

15 Tiktlasojkamachiliaj toTajtsin ipampa tlen techtlayokolia.

10 Pampa Cristo yolsejki niman kipiya kuajli iyojlo, nejua Pablo, nikneki itlaj nimechtlajtlanilis. Kema, nejua, akin ijkuak nemouan ninemi nesi kentla tla xniyolchikauak pero ijkuak xnemouan ninemi kema. 2 Nikchia ika ijkuak najsis yonopatlakej akin kijtouaj ika tejuamej titlanemiliaj ken akin xkitekichiuiliaj toTajtsin, para maka nonekis nikinmajuas. 3 Maski tinemij ipan yejuin mundo, xtitlaixnamikij ken akin nemij ipan yejuin mundo. 4 Pampa tejuamej xtitlaixnamikij ika armas tlen kintekitiltiaj* gente. Tejuamej tiktekitiltiaj ipoder toTajtsin para tikxoxotoniskej tlen melak kojtik ijkon ken se torre. 5 Pampa tikpopolojtokej on tlen gente kinemilia niman nochi tlen kichiua ika oksekimej maka mauelikan makixmatikan toTajtsin. Yeskia kentla tla tikajsiskiaj niman tikchiuaskiaj ika on tlen gente kinemilia makitlakamati Cristo. 6 Ijkuak nemejuamej nenkiteititiskej ika nentetlakamatij, ijkuakon tejuamej uelis tikinyektlaliskej akin xtetlakamatij.

7 Nemejuamej san nentetlajtlakolmakaj ipampa tlen nenkitaj. Tla yakaj kuajli kimatstika ika tlaneltoka* itech Cristo, oksejpa makinemili ika tejuamej noijki titlaneltokaj itech Cristo, ijkon ken yejua. 8 Xnipinaui tla achijtsin más ninoueyimati pampa toTeko yotechkauili matimechyekanakan para timechyolchikauaskej niman xpara timechyolkokoskej. 9 Pero xnikneki manesi kentla tla nikneki nimechmojtis ika nocartas. 10 Sekimej kijtouaj: “Ipan icartas kakisti kentla tla melak tlauele niman tlajtolkojtik, pero ijkuak nikan nemi nesi kentla se tlakatl akin xueyixtika niman xtlaj ika tepaleuiyaj itlamachtiluan”. 11 Akin kijtos yejon, makimatsto ika tlen tikijtouaj ipan cartas ijkuak ximiuan tinemij, yejon tlen noijki tikchiuaskej ijkuak imiuan tinemiskej. 12 Tejuamej xtiknekij tiyeskej ken akin noueyimatij nion xtiknekij tikchiuaskej ken yejuamej. San no yejuamej notlajtlakolmakaj ika tlen kijtouaj ika kuajli niman ijkon kiteititiaj ika xtlamachilisejkej.

13 Tejuamej xok toueyiteneuaskej hasta kampa xok kinamiki ipampa itlaj tlen yonochiuj kampa toTajtsin xotechnauati matitekitikan. Tejuamej titoueyiteneuaskej ipampa tlen nochiua kampa toTajtsin yotechnauati matiktekichiuilikan. Niman yejuin totekiyo ajsi hasta kampa nemejuamej nennemij. 14 Ijkuak otimechitatoj, tejuamej xotikchijkej itlaj tlen toTajtsin xotechnauati. Tejuamej kachtopa otimechijlitoj kuajli tlajtoltin itech Cristo. 15 Tejuamej xtoueyimatij ika tlen toTajtsin yotechnauati matikchiuakan. Yejuin kijtosneki ika xtoueyimatij ika intekiyo oksekimej. Pero ijkuak más noskaltis nemotlaneltok tikchiaj manomiyekili tekitl tlen otikchijkej kampa otitenojnotskej, para uelis más titlapaleuiskej. 16 Uelis tikteijliskej kuajli tlajtoltin más uejka xijkon ken kampa yejuamej yokiteijlijkej. Ijkon, xtoueyimatiskej ika on tekitl tlen yejuamej yokichijkej. 17 “Pero akin noueyimati, manoueyimati pampa kixmati Jehová”. 18 Pampa toTajtsin xkiselia akin san no yejua noueyiteneua, Jehová yejua akin kitlapejpenia akinon kiselis.

11 Nimechtlajtlanilia xnechijyouikan ijkon ken yenenkuajchijtiuej maski nesi kentla san xnitlamachilise. 2 Nejua ninajmana nemopampa ijkon ken toTajtsin kichiua. Pampa nejua onikijto nimechtemakas itech Cristo para manochiua nemoueuentsin, niman nikneki ixpan nimechonteititis kentla se ichpochtli akin chipajkanemi. 3 Pero nechmojtia ika ijkon nemopan manochiua ken ipan onochiuj Eva, akin kouatl okitejtemo kenon kikajkayauas. Xnikuelitaskia makijtlakokan ken nentlanemiliaj, maka ok* ika nemoyojlo xtekichiuilikan toTajtsin niman maka ok xchipajkanemikan ken Cristo kitlajtlani. 4 Ijkon nimechijlia pampa nemejuamej kuajli nenkiseliaj tla yakaj yauj niman mechnojnotsa itech okse Jesús akin xotimechteneuilijkej. Noijki, kuajli nenkiseliaj espíritu tlen xijkon ken espíritu tlen yomechmakakaj, niman nenkinseliaj kuajli tlajtoltin tlen xijkon ken tlen kachtopa yonenkiselijkaj. 5 Niknemilia ika yonikteititi ika nejua san noijki ken yejon uejueyixtokej apóstoles akin nemejuamej nenkinpiyaj. 6 Pero, maski nejua xmás niueli nitlajtoua, kema nixtlamatki niman ijkon miyekpa yotimechititijkej.

7 Ijkuak onimechmachti kuajli tlajtoltin tlen kichiua xmakisakan, xtlaj onennechtlaxtlauilijkej. Noijki oninoyolyemanili para nemejuamej xnesikan ika nenuejueyixtokej, ¿xkuajli ika ijkon onikchiuj? 8 Ijkuak onikseli on tlen okitemakakej tokniuan ipan tlanechikoltin para nimechtekichiuilis, yeskia kentla onikinkuili* tlen kipiayaj. 9 Maski ijkon, ijkuak nemouan ninemiya niman xnikpiaya tlenon ika ninopanoltis, xonimechchiualti xnechpaleuikan. Pampa tokniuan akin oualejkej de Macedonia ika nochi inyojlo onechmakakej tlen ika ninopanoltis. Kema, nejua oninokojtili xnimechchiualtis xnechpaleuikan niman nochipa ijkon nikchiuas. 10 Pampa nikchiua ken Cristo, xnikajkauas ika nikijtos yejuin nochiuiyan ne Acaya. 11 ¿Niman tleka? ¿Kanaj pampa xnimechtlasojtla? ToTajtsin kimatstika ika kema nimechtlasojtla.

12 Nejua nochipa nikchiuas tlen nikuajchijtiuj para xnikinkauilis manoueyimatikan akin kijtouaj ika yejuamej apóstoles ken tejuamej. 13 Pampa yejon tlakamej xmelauak apóstoles. San tekitij para kinkajkayauaskej oksekimej niman nochiuaj kentla iapóstoles Cristo. 14 Niman xtechmojkatlachialtia, pampa Satanás noijki nochiua kentla se kuajli ángel.* 15 Yejua ika, xtemojkatlachialti ika itekitkauan manochiuakan kentla akin kipiyaj kuajli inyojlo. Pero kiseliskej tlen kinnamiki ipampa tlen kichiuaj.

16 Oksejpa nimechijlia ika maka yakaj makinemili tla xnitlamachilise. Pero, maski tla ijkon nenkinemiliaj, xnechselikan ken yakaj akin xtlamachilise para nejua noijki uelis achijtsin ninoueyiteneuas. 17 Aman xnimechnotsa ken kichiuaskia toTeko, nimechnotsa ken yakaj akin xtlamachilise, akin san itech tlaneltoka niman noueyiteneua. 18 Nejua noijki ninoueyiteneuas ijkon ken miyekej noueyiteneuaj ika tlen kipiyaj ipan yejuin mundo. 19 Pampa nemejuamej nenkijtouaj ika nentlamachilisejkej, nenkimijyouiyaj akin xtlamachilisejkej. 20 Hasta nenkimijyouiyaj akin mechpiyaj ken tlakeualtin, akin mechkualiaj tlen nenkipiyaj, akin mechtlachtekiliaj, akin noueyimatij niman mechpijpinajtiaj niman akin mechxayakauitekij.

21 Tipinauij tikijtoskej yejuin, pampa ueliskia nesis ika xtikojtikej ipampa tlen tikchiuaj.

Pero tla sekimej xpinauij noueyiteneuaskej, nejua noijki xnipinauis maski sekimej manechitakan ken yakaj akin yokipolo itlamachilis. 22 ¿Yejuamej hebreos? Nejua noijki. ¿Yejuamej israelitas? Nejua noijki. ¿Ualeuaj itech ichanejkauan Abrahán? Nejua noijki. 23 ¿Kitekichiuiliaj Cristo? Nimechnankilia ken yakaj akin yokipolo itlamachilis, nejua más yonikchiuj xken yejuamej. Más yonitekit, más miyekpa yonechtsaukkej, miyekpa yonechuijuisokkej* niman hasta más miyekpa yokinekkej nechmiktiskej. 24 Makuilpa, judíos onechuijuitekkej 39 veces, 25 yexpa onechuijuitekkej ika tlakotl, sejpa onechtemojmotlakej, yexpa oapolak barco kampa niaya niman se yeuajli iuan se tonajli ninemiya itlajkotian mar. 26 Miyekpa oksekan yoniaj, yenimikiya kampa ríos, yenechmiktiskiaj akin tlachtekkej, yenechmiktiskiaj akin nemij ipan nopueblo niman akin xjudíos. Yenimikiya ipan ciudad, ipan tlaluaktli niman ipan mar, noijki yenechmiktiskiaj akin kijtouayaj ika tokniuan pero xmelauak. 27 Chikauak yonitekit niman xninoseuiya, miyekpa xonikoch, miyekpa onapismik niman xnikpiaya tlen nikonis, miyekpa xonitlakuaj, oniseuk niman xonikpix tlen ika ninotlakentis.*

28 Niman xsan yejon, noijki mojmostla ninajmana ipampa tlanechikoltin. 29 Tla yakaj xkojtik, nejua noijki xnikojtik. Niman tla yakaj kitlajkalij, melak nechkualania.

30 Tla nonekis ninoueyiteneuas, ninoueyiteneuas ipampa tlen kiteititia ika xnikojtik. 31 Akin toTeko Jesús iTajtsin niman iTaj, akin noneki nochipa kiueyichiuaskej, kimatstika ika xnitekajkayajtok. 32 Ne Damasco, akin rey Aretas okitlali ken gobernador, onechpijpiak* ipan ciudad para nechajsis. 33 Pero ouel onimakis pampa onechontemoltijkej ika se chikijtli ipan se ventana tlen kipiaya itepan on ciudad.

12 Noneki ninoueyimatis. Nimechnojnotsas itech tlen toTeko onechijli niman onechititi ijkuak kentla onitlatemik, maski xtlaj ika tepaleui tla nimechijlia. 2 Nikixmati se tlakatl akin tlaneltoka itech Cristo, yekipiya 14 años ika okuikakej ipan ika yeyi cielo. Xnikmati tla okuikakej ika itlalnakayo noso tla xika itlalnakayo. Yejon san toTajtsin kimati. 3 Kema, nikixmati yejon tlakatl. Xnikmati tla oyaj ika itlalnakayo noso xika itlalnakayo. Yejon san toTajtsin kimati. 4 Yejua okuikakej ipan paraíso niman okikak tlen xakaj ueli kiteijlia ika tlajtoltin niman tlen nion se tlakatl xkikauiliaj makijto. 5 Nikueyiteneuas yejon tlakatl, pero nejua san nikueyiteneuas tlen kichiua manesi ika xnikojtik. 6 Xnesiskia tla xnitlamachilise tla ninoueyimatiskia pampa nikijtoskia tlen melauak. Pero xijkon nikchiua pampa xnikneki manechueyiteneuakan ika tlen kitaj noso ika tlen kikakij notech 7 san pampa yonechititijkej tlen temojkatlachialti.

Para xninoueyimatis onikseli se uitstli ipan notlalnakayo. Yeskia kentla se iángel Satanás akin nochipa nechxayakauijuiteki para maka maninoueyimati. 8 Yexpa melak oniktlajtlanili toTeko manechkixtili. 9 Pero yejua onechijli: “Nejua melak yonimitsititi ika nimitsiknelia maski xmitsnamiki, pampa nopoder más kuajli noteititia ijkuak yakaj xkojtik”. Yejua ika, ika nochi noyojlo ninoueyimatis pampa xnikojtik, para ipoder Cristo nochipa nopan maonia.* 10 Yejua ika, niyolpaki maski xnikojtik, maski nechuijuikaltiaj niman maski xnikpiya tlen ika ninopanoltis, maski nechtlajyouiltiaj niman maski miyek nikixnamiki ipampa Cristo. Pampa ijkuak xnikojtik, ijkuakon más nikojtik.

11 Nemejuamej yonenkichijkej manitlajto ken yakaj akin xtlamachilise. Maski nejua xniueyixtika, nonekiya kuajli nentlajtoskej notech pampa yonikteititi ika noijki niueyixtika ijkon ken yejon tlakamej akin nemejuamej nenkimijliaj ika uejueyixtokej apóstoles. 12 Kuajli nesi ika melauak niapóstol pampa yonitlaxiko, yonikinchiuj milagros* niman yonikchiuj tlen temojkatlachialti. 13 Kuakon, ¿tleka nenkijtouaj ika nemejuamej xmás nenuejueyixtokej ken okseki tlanechikoltin? ¿Kanaj pampa xonimechchiualti xnechpaleuikan? Xnechtlapopoluikan tla xijkon onikchiuj.

14 ¡Xkakikan! Nejua ninemi listo para ika yexpa nimechontlajpalos niman xnimechchiualtis xnechpaleuikan. Pampa nejua xniktejtemoua tlen nenkipiyaj, nimechtejtemoua nemejuamej. Tajtin noneki kisentlaliskej tomin para inkoneuan, xnoneki ika kokonej makisentlalikan tomin para intajuan. 15 Nejua, ika nochi noyojlo niktlamis nochi tlen nikpiya niman hasta niktemakas nonemilis para nimechpaleuis. Tla nejua melak nimechtlasojtla, ¿tleka nemejuamej xmás nennechtlasojtlaj? 16 Maski ijkon, xonimechchiualti xnechpaleuikan. Pero nemejuamej nenkijtouaj ika san ichtaka onimechkajkayauj. 17 ¿Kanaj onimechkajkayauj ijkuak onimechintitlanili sekimej tokniuan? 18 Oniktlajtlanili Tito niman okse tokniuj mamechtlajpalotij. ¿Omechkajkayauj Tito ijkuak omechitato? ¿Xmelak ika otikteititijkej ika san noijki ken titlanemiliaj niman tlen tikchiuaj?

19 ¿Nemejuamej nenkinemiliaj ika titomanauisnekij nemixpan? ¡Yejon xmelauak! Pampa tejuamej tikchiuaj ken Cristo, tikijtouaj tlen melauak ixpan toTajtsin. Maski ijkon, nochi tlen tikchiuaj, noknitsitsinuan, tikchiuaj para timechyolchikauaskej. 20 Pampa ninomojtia ika ijkuak nimechontlajpalos xnimechonnextis ijkon ken nikuelitaskia niman nemejuamej xnennechitaskej ken nenkuelitaskiaj. Nechmojtia ika ijkuak najsis nikitas ika nemouijsokij,* nemonexikolitaj, nimantsin nenkualanij, nemixnamikij, nemoijtouiliaj tlen xkuajli, nentetejteneuaj, nemoueyimatij niman san nenkipeualtiaj tlauejli. 21 Ijkuak oksejpa nias, kanaj toTajtsin kichiuas manipinaui niman manichoka ijkuak nikitas ika nemejuamej ok* nenkichijtokej tlen xkuajli, xnenchipajkanemij, nenauilnemij* niman xnenkikajkauaj ika nenkichiuaj tlen tepinajti.*

13 Aman yeninemi listo para ika yexpa nimechontlajpalos. “Nochi tlen panos, nonekis ika ome noso yeyi testigo makijto* tla melauak”. 2 Maski aman xompa ninemi, yeskia kentla tla ika okpa ompa nemouan ninemiskia. Yejua ika, desde aman nikimijlia akin yotlajtlakojkej niman nochimej on oksekimej ika xnikintlapopoluis tla oksejpa niauj. 3 Ijkon nikchiuas pampa nemejuamej nenkinekij nenkitaskej tla yemelak nechtekitiltijtika* Cristo, akin omechititi ika kipiya poder niman xomechititi tla xkojtik. 4 Melauak ika yejua okipilojkej ipan kojtli melaktik ijkuak xkojtik katka, pero toTajtsin okiyoliti ika ipoder. Niman melauak ika aman tejuamej noijki xtikojtikej ken yejua xkojtik katka, pero toTajtsin noijki kichiuas matiyoliuikan. Yejua kitekitiltis ipoder tlen nemejuamej mechpaleuiya.

5 San no nemejuamej xmoitakan, xkitakan tla melauak nentlaneltokaj itech toTajtsin. ¿Noso xnenkitaj ika Jesucristo nemouan nemi? Pero, tla toTajtsin xmechselia, kijtosneki ika Jesucristo xnemouan nemi. 6 Nikchia xkitakan ika toTajtsin kema techselia tejuamej.

7 Tiktlajtlaniliaj toTajtsin ika nemejuamej maka xchiuakan tlen xkuajli. Xtiktlajtlanij yejuin para manesi ika toTajtsin techselia. Tiktlajtlanij para xchiuakan tlen kuajli, maski tla oksekimej kinemiliskej ika toTajtsin xtechselia. 8 Pampa tejuamej xueli tikchiuaj itlaj tlen makixnamiki tlen melauak, san ueli tikchiuaj itlaj tlen makipaleui tlen melauak. 9 Melak tipakij ijkuak tejuamej xtikojtikej niman nemejuamej nenkojtikej. Tiktlajtlanij ipan oración ika nemejuamej oksejpa kuajli xtlanemilikan. 10 Yejua ika, achto najsis nimechijkuilouilia yejuin, para ijkuak nemouan ninemis xnonekis nimechajuas. Ijkon, nimechyolchikauas niman xnimechajuas, maski toTajtsin yonechkauili ijkon manikchiua.

11 Nokniuan, yejuin tlen sa ika tlami nikneki nimechijlis. Nochipa xyolpaktokan, xyektlalijtokan tlen noneki, xselikan ijkuak mechyolseuiskej, xmokojtilikan san noijki xtlanemilikan niman xyolsejtokan imiuan oksekimej. Ijkon, toTajtsin akin melak techtlasojtla niman kichiua matiyolsejtokan nemouan nemis. 12 Xmotlajpalokan ika se beso kentla nemikniujtin yeskiaj. 13 Nochimej tokniuan mechontlajpalouaj.

14 Niktlajtlani ika toTeko Jesucristo mamechititi ika mechiknelia maski xmechnamiki. Noijki, ika toTajtsin mamechititi ika mechtlasojtla niman mamechmaka iespíritu santo.