GÁLATAS

1 Nejua niPablo niman xoninochiuj apóstol san pampa se tlakatl noso tlakamej ijkon okinekkej, oninochiuj apóstol ipampa Jesucristo niman toTajtsin akin iTaj, akin okiyoliti intech akin yomikkej. 2 Nejua niman nochimej tokniuan akin nouan nemij, timechontlajpalouaj nemejuamej akin nennemij ipan tlanechikoltin de Galacia.

3 Niktlajtlani ika toTajtsin akin yejua toTaj, niman noijki toTeko Jesucristo mamechikneli maski xmechnamiki niman mamechyolseui. 4 Yejua onotemakak ipampa totlajtlakoluan para techmakixtis itech tlen aman xkuajli panotika,* ijkon ken kineki toTajtsin, akin toTaj. 5 Nochipa san toTajtsin makiueyiteneuakan. Amén.

6 Nechmojkatlachialtia ika maski nion xeuejkaui, yenenkitlalkauijtokej akin omechnots niman akin omechikneli maski xmechnamiki ipampa Cristo, niman yopeuj nenkikakij okseki kuajli tlajtoltin tlen xtejuamej otimechijlijkej. 7 Xnikijtojtika tla onokej* okseki kuajli tlajtoltin, nikijtojtika ika nemij sekimej akin mechpajsolojtinemij* niman kinekij kipatlaskej kuajli tlajtoltin itech Cristo. 8 Pero, tla yakaj mechijlia itlaj tlen xsan noijki itech kuajli tlajtoltin tlen yotimechijlijkej, makipopolokan. Ijkon makichiuilikan maski se akin touan kistinemi noso se ángel akin ualeua ne cielo. 9 Oksejpa nimechijlia tlen yonimechonijli, ika makipopolokan maski tla san akinon mechijlia tlen xsan noijki itech kuajli tlajtoltin tlen onenkiselijkej.

10 ¿San nikneki manechseli gente noso manechseli toTajtsin? ¿Kanaj nikneki nikyolpaktis gente? Tla ok* nikyolpaktiskia gente, xniktekichiuiliskia Cristo. 11 Pampa nikneki nimechijlis, nokniuan, ika kuajli tlajtoltin tlen onimechijli xualeuaj itech gente. 12 Jesucristo yejua akin onechititi yejuin kuajli tlajtoltin niman xse tlakatl onechititi nion onechmachti.

13 Melauak ika onenkikakkej kenijki nikchiuaya ijkuak ninemiya ipan inreligión judíos. Onenkikakkej ika melak nikintlajyouiltiaya* akin nemiyaj ipan itlanechikol toTajtsin niman ika niknekiya nikpopolos. 14 Itech inreligión judíos, nikintlaniya akin imiuan oninoskalti akin chantij ipan nopueblo, pampa nejua más nikchiuaya tlen onechmachtijkej notajuan. 15 ToTajtsin okichiuj maninemi* niman onechnots ijkuak onechikneli maski xnechnamiki. Ijkuak okitak ika kuajli 16 kiteititis akinon iKoneuj, onechtekitilti* nejua para nikteijlis kuajli tlajtoltin itech yejua ipan okseki pueblos. Ijkuak onikchiuj yejuin tekitl, xoniktlajtoltito se tlakatl.* 17 Noijki xonontlejkok ne Jerusalén onikimitato akin yonochijkaj apóstoles, nejua oniaj Arabia niman satepan oninokuep Damasco.

18 Kuakon, ijkuak yopanoka yeyi año, oniaj Jerusalén oniktlajpaloto Cefas* niman iuan oninokauj 15 tonaltin. 19 Pero xonikimitak on oksekimej apóstoles; san onikitak Santiago, ikniuj toTeko. 20 ToTajtsin kuajli kimatstika ika xnimechkajkayajtok.

21 Satepan oniaj ne Siria niman Cilicia. 22 Pero tokniuan akin kichiuayaj ken Cristo niman nemiyaj ipan tlanechikoltin tlen onokej Judea xkeman nechitayaj. 23 San kikakiyaj ika kijtouayaj: “Tlakatl akin techtlajyouiltiaya aman kiteijlijtikaj kuajli tlajtoltin niman kineltoka tlen achto kinekiya kipopolos”. 24 Ika nochi tlen opanok, opeuj kiueyiteneuaj toTajtsin.

2 Kuakon, ijkuak yopanoka 14 años, oksejpa oniaj Jerusalén iuan Bernabé niman noijki onikuikak Tito. 2 Oniaj pampa Jesús itlaj onechititi niman onikimijli tokniuan yejon kuajli tlajtoltin tlen nikimijlijtika akin xjudíos. Pero san ichtaka onikchiuj imixpan yejon tlakamej akin melak kintlakaitayaj para nikitas tla xsan nenka yejon notekiyo tlen yonikuajchijtiaj. 3 Pero nion Tito, akin nouan ompa nemiya, xokichiualtijkej makinochiuili circuncisión maski yejua griego. 4 Yejuin tlauejli opeuj pampa san ichtaka okalakkej sekimej akin xmelauak tokniuan. Yejuamej okalakkej pampa kinekiyaj kimatiskej tla melauak xtiktlakamatij tlanauatijli pampa tinemij san sekan iuan Cristo. Niman noijki kinekiyaj techchiualtiskej para matiktlakamatikan tlanauatijli. 5 Pero tejuamej xotokauilijkej nion xotikchijkej tlen kinekiyaj pampa tiknekij ika nemejuamej maka xkajkauakan ika nenkitlakamatij kuajli tlajtoltin.

6 Yejon tlakamej akin kimitaj ika melak uejueyixtokej niman melak kintlakaitaj xonechijlijkej itlaj tlen yenkuik. Xnechimportaroua tlenon yokichijkej pampa toTajtsin xsan kita kenijki nesi yakaj. 7 Yejuamej kuajli okitakej ika yonechnauatijkaj manikimijli kuajli tlajtoltin akin xjudíos ijkon ken Pedro okinauatijkej makimijli kuajli tlajtoltin akin judíos. 8 Pampa akin okimakak poder Pedro para manochiua apóstol intech akin judíos noijki onechmakak poder nejua para maninochiua apóstol intech akin xjudíos. 9 Niman yejuamej okitakej ika toTajtsin melauak yonechiknelijka maski xnechnamikiya. Kuakon, Santiago, Cefas* niman Juan, akin tlapaleuiayaj kuajli maonia tlanechikojli, otechmakitskijkej ika inyekma nejua niman Bernabé para kiteititiskej ika techpaleuiayaj, para matiuiyan kampa xjudíos niman yejuamej kampa judíos. 10 San otechijlijkej matikimilnamikikan akin xmiyek kipiyaj, yejon itlaj tlen noijki melak ninokojtilia nikchiuas.

11 Pero ijkuak Cefas ouajla Antioquía, onikixnamik pampa xkuajli tlen kichijtoya. 12 Pampa achto ika yejkoskiaj on tlakamej akin Santiago okinuajtitlan, Pedro tlakuaya imiuan akin xjudíos, pero ijkuak oyejkokej, xok ijkon okichiuj niman okintlalkaui pampa kinmakasiya akin yokinochiuilijkaj circuncisión. 13 On oksekimej judíos noijki opeuj kichiuaj ken Pedro para kiteititiskej itlaj tlen xmelauak, niman hasta Bernabé noijki ijkon okichiuj ken yejuamej. 14 Kuakon, ijkuak onikitak ika xkichijtoyaj ijkon ken kijtouaj kuajli tlajtoltin, ijkin onikijli Cefas imixpan nochimej: “Tla tejua akin tijudío tinemi ijkon ken oksekimej* niman xken akin judíos, ¿tleka tikinchiualtia oksekimej makichiuakan ijkon ken kichiuaj akin judíos?”.

15 Tejuamej akin tijudíos desde ijkuak otiuajnenkej xtitlajtlakolejkej ijkon ken akin xjudíos. 16 Tikmatstokej ika toTajtsin kita ika kipiya kuajli iyojlo se tlakatl akin tlaneltoka itech Jesucristo, xkita tla kipiya kuajli iyojlo akin kichiua tlen kijtoua tlanauatijli. Yejua ika, tejuamej yotitlaneltokakej itech Cristo Jesús para toTajtsin matechita ken akin kipiyaj kuajli inyojlo pampa tlaneltokaj itech Cristo niman xpampa kichiuaj tlen kijtoua tlanauatijli. Pampa xakaj kitaskej tla kipiya kuajli iyojlo san tla kichiua tlen kijtoua tlanauatijli. 17 Tla tokojtilijtokej matechitakan ken akin kipiyaj kuajli inyojlo ipampa Cristo niman maski ijkon tikitaj ika ok* titlajtlakolejkej, ¿kijtosneki ika Cristo kichiua matitlajtlakokan? ¡Ka! 18 Tla nejua oksejpa nikchijchiua tlen yonikxoxotonijka, nikteititiskia ika xniktlakamati tlanauatijli. 19 Yejua ika, nejua kentla yonimik para xok nikchiuas tlen kijtoua tlanauatijli niman aman ninemi para niktlakamatis toTajtsin. 20 Nejua nipilkatika ipan kojtli melaktik iuan Cristo. Aman xok niyoltok san para nikchiuas tlen nejua nikneki pampa Cristo nouan nemi. Kema, niyoltok ipan yejuin notlalnakayo pampa nitlaneltoka itech iKoneuj toTajtsin, akin onechtlasojtlak niman onotemakak nopampa. 21 Nejua nikselia ika toTajtsin nechiknelia maski xnechnamiki. Pampa tla nechitaskiaj ika nikpiya kuajli noyojlo san pampa nikchiua tlen kijtoua tlanauatijli, kuakon xtlaj ika otepaleui ika Cristo omikiko.

3 Nemejuamej gálatas akin xnentlamachilisejkej, ¿akinon omechkajkayauj maski kuajli yomechijlijkaj kenon okimiktijkej Jesucristo ipan kojtli melaktik? 2 San nikneki nimechtlajtoltis* yejuin: ¿onenkiselijkej espíritu santo pampa nenkitlakamatij tlanauatijli noso pampa onentlaneltokakej itech tlen onenkikakkej? 3 Melak xnentlamachilisejkej. Kachtopa nentlaneltokayaj itech espíritu santo, ¿niman aman nentlanemiliaj ken tlakamej? 4 ¿San nenka yonentlajyouijkej? Kuajli nikmatstika ika xsan nenka. 5 Kuakon, akin mechmaka espíritu santo niman nemotsajlan* kinchiua milagros,* ¿kichiua pampa nenkitlakamatij tlanauatijli noso pampa nenkineltokaj tlen onenkikakkej? 6 Yejon tlen ipan onochiuj Abrahán: “otlaneltokak itech Jehová niman yejua okitak kentla yakaj akin kipiaya kuajli iyojlo”.

7 Nemejuamej kuajli nenkimatstokej ika akin tlaneltokaj yejuamej ikoneuan Abrahán. 8 Desde yeuejkaui, Tlajkuiloltin kijtouayaj ika toTajtsin kinseliskia akin xjudíos ipampa intlaneltok. Yejua ika, toTajtsin okijli Abrahán yejuin kuajli tlajtoltin: “Mopampa, nochi pueblos kinteochiuaskej”. 9 Yejua ika, akin tlaneltokaj kinteochiuaj iuan Abrahán, akin otlaneltokak.

10 Nochimej akin tlaneltokaj itech tlen kichiuaj ipampa tlanauatijli, kintlajyouiltiskej. Pampa ijkin ijkuilijtika: “Makitlajyouiltikan akin xnokojtilia kichiuas nochi tlen kijtoua Tlanauatijli”. 11 Noijki, kuajli tikmatstokej ika xakaj uelis kitaskej ika kipiya kuajli iyojlo ixpan toTajtsin san pampa kitlakamati tlanauatijli. Pampa ijkuilijtika: “Akin kichiua tlen kuajli yoltos pampa tlaneltoka”. 12 Akin kitlakamati Tlanauatijli xok noneki tlaneltokas, pampa san no yejua tlanauatijli kijtoua ika “akin kichiuas yejuin, kipaleuis manemi”. 13 Cristo otechkouj niman otechmakixti para maka matechtlajyouiltikan ijkon ken kijtoua Tlanauatijli. Yejua topampa okitlajyouiltijkej, pampa ijkin ijkuilijtika: “Makitlajyouiltikan akin kipiloskej ipan kojtli melaktik”. 14 Yejuin opanok para itlateochiualis Abrahán noijki makiselikan akin xjudíos ipampa Cristo Jesús. Para ika totlaneltok, matikselikan espíritu santo tlen yotechijlijkaj techmakaskej.

15 Nokniuan, manimechonijli itlaj tlen nochimej uelis kasijkamatiskej: ijkuak yakaj notlajtolkaua iuan okse, xakaj uelis kipopolos nion itlaj konajxiltilis. 16 ToTajtsin okijto ika itlaj kimakaskia Abrahán niman ikoneuj. Xkijtoua “ikoneuan”, kentla tla miyekej yeskiaj, san kijtoua “ikoneuj”, niman kitenejtika san se: Cristo. 17 Noijki nimechijlia yejuin: Tlanauatijli tlen onotemakak ijkuak yopanoka 430 años, xkichiua ika toTajtsin maka makichiua tlen yokijtojka kichiuas. 18 Pampa tla toTajtsin kimakaskia herencia Abrahán san tla kitlakamatiskia tlanauatijli, kijtosneki ika xkimakaskia herencia san pampa yokijlijka kimakas. Pero tikmatstokej ika pampa toTajtsin kipiya kuajli iyojlo, okimakak Abrahán tlen yokijlijka kimakas.

19 Kuakon, ¿tleka okitemakakej Tlanauatijli? Okitemakakej para manesi tlenon xkuajli hasta ijkuak yejkoskia tekoneuj, akin yokijlijkaj tlen panoskia. ToTajtsin okinmakak tlanauatijli ángeles niman yejuamej okijlijkej Moisés. 20 Pero, tla yakaj san iselti yokijto itlaj kichiuas, xnoneki yakaj kipaleuis ika tlen yokijto kichiuas. Noijki ijkon, toTajtsin san iselti okijto tlenon kichiuas. 21 ¿Kijtosneki ika Tlanauatijli kixnamiki tlen toTajtsin yokijto kichiuas? ¡Ka! Pampa tla oniaskia se tlanauatijli tlen ueliskia kitemakas nemilistli, toTajtsin ueliskia techitas ika tikpiyaj kuajli toyojlo san ipampa tlanauatijli. 22 Pero, Tlajkuiloltin okiteititijkej ika nochi okitemakakej itech tlajtlakojli. Ijkon, akin tlaneltokaj uelis kiseliskej tlen toTajtsin yokijto kinmakas akin tlaneltokaj itech Jesucristo.

23 Pero, ijkuak xetitlaneltokayaj itech Cristo, tlanauatijli techpijpiaya* niman techyekanaya. Tejuamej tikchiatoyaj tlen toTajtsin sakin kiteititiskia. 24 Yejua ika, Tlanauatijli onochiuj kentla yakaj akin otechyekan hasta Cristo, ijkon ueliskia techitaskej ika tikpiyaj kuajli toyojlo pampa titlaneltokaj. 25 Pero, aman ika yetitlaneltokaj, xok noneki yakaj matechyekana.

26 Nochimej nemejuamej nenikoneuan toTajtsin pampa nentlaneltokaj itech Cristo Jesús. 27 Nemejuamej yenenkichiuaj ken Cristo pampa omechapolaktijkej para san sekan iuan xnemikan. 28 Nochimej nemejuamej yonemochijkej san se iuan Cristo Jesús maski tla nenjudíos noso nengriegos, tla nentlakeualtin noso xnentlakeualtin, tla nentlakamej noso nensiuamej. 29 Noijki, tla neniyaxkauan* Cristo, kijtosneki ika nenikoneuan Abrahán niman ika nenkiseliskej yejon herencia tlen yokijlijkaj kimakaskej.

4 Nikneki nimechijlis ika tla akin kiselis herencia ok* konetl, san noijki ken se tlakeuajli maski yejua iyaxka* nochi tlen onka. 2 Pampa ok konetl, yejua ok kitlajpiyaj niman nemis inmak mayordomos hasta ipan tonajli tlen itaj yokijto. 3 Noijki, tejuamej titlanemiliayaj niman tikchiuayaj ken akin nemij ipan yejuin mundo ijkuak tikokonej katkaj. 4 Pero, ijkuak oajsik tonajli, toTajtsin okuajtitlan iKoneuj, akin ouajnen itech se siuatl niman ononek kitlakamatis tlanauatijli, 5 para makinkoua niman makinmakixti akin kitlakamatij tlanauatijli, niman ijkon tejuamej ueliskia techseliskej ken ikoneuan toTajtsin.

6 Pero aman, pampa nenikoneuan toTajtsin, yejua yomechtlalili ipan nemoyojlo iespíritu tlen okimakak iKoneuj, niman yejuin kichiua xkijtokan: “¡Abba,* noTaj!”. 7 Kuakon, xok titlakeuajli, aman titekoneuj. Niman tla titekoneuj, noijki tikselis herencia tlen toTajtsin yokijto kitemakas.

8 Pero, ijkuak nemejuamej xnenkixmatiyaj toTajtsin, nentlakeualtin katkaj itech akin xyemelak dioses. 9 Pero, aman ika yenenkixmatij toTajtsin noso aman ika yejua mechixmati, ¿tleka oksejpa nenkinekij nenkichiuaskej tlen xtlaj ika tepaleui ipan yejuin mundo? 10 Nemejuamej ok neniluipanouaj pampa nenkinemiliaj ika ueyi kijtosnekij seki tonaltin, metstin, tiempos niman años. 11 Melak nechmojtia nikmatis ika tla on tekitl tlen onikchiuj nemopampa san nenka onikchiuj.

12 Nokniuan, nimechtlajtlanilia xchiuakan ken nejua, pampa nejua noijki onikchiuj ken nemejuamej. Nemejuamej kuajli onennechselijkej. 13 Pero xkilnamikikan ika ijkuak onimechtlajpaloto, oniaj pampa nikualouaya, niman ijkuakon onimechijli kuajli tlajtoltin. 14 Niman, maski onimechtekiyomakak pampa nikualouaya, nemejuamej kuajli onennechselijkej niman xonennechtlauelitakej.* Nemejuamej onennechselijkej ken se iángel toTajtsin, onennechselijkej ken Cristo Jesús. 15 ¿Tleka aman xok nenyolpakij? Nejua kuajli nikmatstok ika, tla nenueliskiaj nenkinmokixtiliskiaj nemixtololojuan niman nennechinmakaskiaj. 16 ¿Aman nennechtlauelitaj san pampa nimechijlia tlen melauak? 17 Yejuamej kinekij mechyoltilanaskej, pero xkichiuaj pampa melauak kinekij mechpaleuiskej. Kinekij xnechkauakan para imiuan xuiyan. 18 Kuajli yeskia ika manemi yakaj akin mamechyoltilana pampa yemelak kineki mechpaleuis, niman maka makichiua san ijkuak nejua nikan ninemi. 19 Nokonetsitsinuan, nejua nitlajyouijtika ken se siuatl akin kinemitijtika ikonetsin, niman ijkon nitlajyouijtos hasta ijkuak nemejuamej nemochiuaskej ken Cristo. 20 Amantsin nikuelitaskia nemouan ninemis niman okse tlamantik nimechnotsas, pampa xnikmati tleka ijkon nenkichiuaj.

21 Xnechijlikan, nemejuamej akin nenkinekij nenkitlakamatiskej tlanauatijli, ¿xnenkimatij tlen kijtoua Tlanauatijli? 22 Ompa ijkuilijtika ika Abrahán okipix ome ikoneuj: se iuan itlakeual niman okse iuan isiuauj akin xitlakeual. 23 Yejon siuatl akin tlakeuajli okipix ikoneuj ijkon ken nochimej kokonej uajnemij. Pero, ikoneuj yejon siuatl akin xtlakeuajli ouajnen pampa toTajtsin ijkon yokijlijka Abrahán. 24 Nochi yejon okse itlaj kijtosneki, pampa yejuin siuamej kiteititiaj kenijki toTajtsin okpa teuan onotlajtolkauj. Agar kijtosneki ijkuak toTajtsin teuan onotlajtolkauj ne ipan tepetl Sinaí, niman akin ompa teuan nemij ken tlakeualtin. 25 Agar kijtosneki on tepetl Sinaí tlen onka Arabia niman Jerusalén tlen aman onka. Pampa Jerusalén ken se nantli akin tlakeuajli, niman akin ompa chantij yeskiaj kentla ikoneuan akin noijki nemij ken tlakeualtin. 26 Pero, Jerusalén tlen onka ipan cielo xtlakeuajli, niman yejua tonan.

27 Pampa ijkuilijtika: “Xyolpaki, tejua siuatl akin xueli tikinpiya mokoneuan. Xtsajtsi pampa melak tiyolpaki, tejua siuatl akin xkeman tikmati kenon tekoko ijkuak yakaj kipiya ikoneuj. Pampa ikoneuan siuatl akin yokikajkej más miyekej xijkon ken ikoneuan siuatl akin kipiya iueuentsin”. 28 Nokniuan, nemejuamej nentekoneuan akin toTajtsin yokijtojka ika nemiskiaj, ijkon ken Isaac. 29 Pero, aman panotika ken yeuejkaui opanok, konetl akin ouajnen ijkon ken uajnemij oksekimej kokonej opeuj kitlajyouiltia konetl akin ouajnen ipampa espíritu santo. 30 Pero, ¿tlenon kijtouaj Tlajkuiloltin? “Xchiualti ika yejon siuatl akin tlakeuajli niman ikoneuj mauiyan. Ikoneuj siuatl akin xtlakeuajli xkixelos iherencia iuan ikoneuj siuatl akin tlakeuajli”. 31 Kuakon, nokniuan, tejuamej xtiikoneuan se siuatl akin tlakeuajli, tejuamej tiikoneuan se siuatl akin xtlakeuajli.

5 Cristo otechmakixti para maka matinemikan ken tlakeualtin. Kuakon, xmokojtilikan para maka oksejpa mechchiualtiskej xtekitikan ken tlakeualtin.

2 Xkakikan, nejua Pablo, nimechijlia ika tla nenkimochiuiliaj circuncisión, xtlaj ika mechpaleuis tlen okichiuj Cristo. 3 Oksejpa nikneki nikimijlis nochimej akin kinochiuiliaj circuncisión ika nonekis kitlakamatiskej nochi Tlanauatijli. 4 Nemejuamej, akin nenkinekij mamechitakan ken akin nenkipiyaj kuajli nemoyojlo, yonemoxelojkej itech Cristo san pampa nenkichiuaj tlen kijtoua tlanauatijli. Xonenkinekkej mamechikneli maski xmechnamiki. 5 Tejuamej tikchiaj matechitakan ken akin kipiyaj kuajli inyojlo pampa techpaleuiya espíritu santo niman pampa titlaneltokaj. 6 Tla san sekan tinemij iuan Cristo Jesús, xtlaj kijtosneki tla tochiuiliaj circuncisión noso ka. Más ueyi kijtosneki tla titlaneltokaj niman tla totlaneltok kichiua más matitetlasojtlakan.

7 Nemejuamej kuajli tlen nenkichijtoyaj. ¿Akinon okichiuj maka sa xtlakamatikan tlen melauak? 8 Akin mechnotstika xyejua kichijtika ijkon xtlanemilikan. 9 San achijtsin levadura kichiua manajkokui nochi harina. 10 Kuajli nikmatstika ika nemejuamej akin neniyaxkauan* Cristo noijki ijkon nentlanemiliaj. Pero, maski san akinon ijkon mechpajsolojtika,* kitlajtlakolmakaskej ken kinamiki. 11 Nokniuan, tla nejua nitemachtiskia ika noneki kinochiuiliskej circuncisión, ¿tleka nechtlauelitaj? Tla nikchijtoskia yejon, noijki xnoyolkokoskiaj pampa nitemachtia ika Jesús okipilojkej ipan kojtli melaktik.* 12 Más kuajli tla kinochiuiliaj tlen melak xkuajli* yejon tlakamej akin kinekij mechkajkayauaskej.

13 Nokniuan, nemejuamej omechnotskej para mechmakixtiskej. Pero maka xnemilikan ika pampa yomechmakixtijkej, aman uelis nenkichiuaskej nochi tlen kileuiya nemotlalnakayo, más kuajli tla san sekan nemopaleuiyaj pampa nemotlasojtlaj. 14 Pampa tikchiuaj nochi tlen kijtoua Tlanauatijli ijkuak tiktlakamatij yejuin tlanauatijli: “Xkintlasojtla oksekimej ijkon ken tejua timotlasojtla”. 15 Pero tla nemejuamej ok nemokualanijtokej, xmotlajpiyakan para maka nenkichiuaskej ika oksekimej maka ok matlaneltokakan.

16 Kuakon, yejuin tlen nimechijlia: nochipa xmoyekanakan ika espíritu niman ijkon xnenkichiuaskej tlen kileuiya nemotlalnakayo. 17 Pampa totlalnakayo kixnamiki espíritu ipampa tlen tikileuiyaj niman espíritu kixnamiki totlalnakayo. Pampa ijkon noixnamikij, nemejuamej xnenkichiuaj tlen nenkinekij nenkichiuaskej. 18 Tla nemoyekanaj ika espíritu, xnoneki nenkichiuaskej tlen kijtoua tlanauatijli.

19 Akin noyekanaj ika tlen kileuiya intlalnakayo auilnemij,* xchipajkanemij, kichiuaj tlen tepinajti,* 20 kinueyichiuaj imágenes, kichiuaj naualyotl,* notlauelitaj, nouijsokij,* tenexikolitaj, nimantsin kualanij, kipeualtiaj tlauejli, texejxelouaj, kinpeualtiaj okseki religiones, 21 kileuiyaj tlen xinyaxka, tlauanij, noyolpaktiaj hasta kampa xok kinamiki niman kichiuaj okseki ken yejuin. Oksejpa nimechijlia ika akin kichiuaj yejuin xkiseliskej iGobierno toTajtsin.*

22 Pero akin noyekanaj ika espíritu tetlasojtlaj, yolpakij, yolsejtokej, teijyouiyaj, kuajli tenotsaj, kichiuaj tlen kuajli, tlaneltokaj, 23 xnimantsin kualanij, ueli noteltiaj. Xonka tlanauatijli tlen makixnamiki yejuin. 24 Akin iyaxkauan Cristo yokipopolojkej nochi tlen kimachilia niman kileuiya intlalnakayo.

25 Tla toyekanaj ika espíritu, kuakon noijki nochipa matikchiuakan ken kineki espíritu. 26 Maka matoueyimatikan niman maka matikchiuakan ika oksekimej manotlatlanikan niman manonexikolitakan.

6 Nokniuan, tla se tlakatl okichiuj itlaj tlen xkuajli niman xokitak, nemejuamej akin nemoyekanaj ika espíritu xyejyekokan nenkipaleuiskej yejon tlakatl, pero maka nimantsin xkualanikan. Pero, nochimej noneki nemotlajpiyaskej para maka noijki nenkichiuaskej tlen xkuajli. 2 Xmopaleuikan ijkuak nentlajyouiskej niman ijkon nenkichiuaskej tlen Cristo otechnauati. 3 Pampa tla yakaj kinemilia ika ueyixtika maski xmelauak, san no yejua nokajkayajtok. 4 Pero, cada se makita tlen san no yejua kichiua, niman ijkuakon yolpakis ipampa tlen okichiuj, niman maka san makitsto tlen okse kichiua. 5 Pampa cada se noneki kichiuas itekiyo.

6 Noijki, akin kimachtijtokej itlajtol toTajtsin makimaka nochi tlen kuajli kipiya akin kimachtia.

7 Maka xnemilikan ika uelis nenkikajkayauaskej toTajtsin, pampa tlen se kitoka yejon kipixkas. 8 Akin noyekana ika tlen kileuiya itlalnakayo kipixkas mikilistli, pero akin noyekana ika espíritu santo kipixkas nemilistli tlen xkeman tlami. 9 Kuakon, nochipa matikchiuakan tlen kuajli, pampa tla xtosiaujkauaj, tipixkaskej ijkuak ajsis tiempo. 10 Yejua ika, nochipa ijkuak tiueliskej* matikinpaleuikan nochimej, pero más matikinpaleuikan tokniuan akin noijki tlaneltokaj.

11 Xkitakan kenijki melak uejueyimej letras yonimechijkuilouili.

12 Akin mechchiualtiaj xmochiuilikan circuncisión san kinekij kinyolpaktiskej oksekimej. Ijkon kichiuaj san para maka makintlajyouiltikan pampa kichiuaj ken Cristo, akin okimiktijkej ipan kojtli melaktik.* 13 Pampa nion akin kinochiuiliaj circuncisión xkitlakamatij Tlanauatijli, pero kinekij ika nemejuamej xmochiuilikan circuncisión para noueyimatiskej itech tlen yonenkichiuilijkej nemotlalnakayo. 14 Pero nejua xkeman niknekiskia ninoueyimatis, san nikneki ninoueyimatis pampa toTeko Jesucristo okimiktijkej ipan kojtli melaktik. Ipampa Cristo nejua nikita ika akin nemij ipan yejuin mundo kentla tla yomikkej, niman yejuamej noijki nechitaj kentla tla yonimik. 15 Pampa xtlaj ika tepaleui tla se kinochiuilia circuncisión noso xkinochiuilia circuncisión, más tepaleui tla techyenkuilia toTajtsin. 16 Mayolsejtokan nochimej akin nemij itech Israel tlen iyaxka* toTajtsin, niman makimiknelikan pampa yejuamej noyekanaj ijkon ken noneki.

17 Aman nikchia ika maka yakaj sa manechpajsolo,* pampa ipan notlalnakayo nestok ika niitlakeual Jesús.

18 Nokniuan, toTeko Jesucristo mamechikneli maski xmechnamiki pampa nenkiteititiaj ika nenkichiuaj tlen kuajli. Amén.