EFESIOS

1 Nejua niPablo, Cristo Jesús onechtlapejpeni para maninochiua iapóstol, pampa toTajtsin ijkon okinek. Nikomontlajpaloua tokniuan de Éfeso akin melajkanemij niman kichiuaj ken Cristo Jesús.

2 Niktlajtlanilia toTajtsin, akin toTaj, niman noijki niktlajtlanilia toTeko Jesucristo ika mamechikneli maski xmechnamiki niman mamechyolseui.

3 Makiueyichiuakan toTajtsin, akin iTaj toTeko Jesucristo. ToTajtsin melak yotechteochiuj ika iespíritu pampa tikchiuaj ijkon ken Cristo. 4 Pampa yejua otechtlapejpeni achto ika oniaskia yejuin mundo para matikchiuakan ijkon ken Cristo, para ixpan matichipajkanemikan, para xok titlajtlakolejkej yeskej niman para matitetlasojtlakan. 5 Kachtopa otechtlapejpeni para techitas ken ikoneuan ipampa* Cristo. Yejua okichiuj ijkon ken kuelita niman ijkon ken kineki. 6 Otechtlapejpeni para tikueyichiuaskej, pampa yejua ika nochi iyojlo otechititi ika melak techiknelia maski xtechnamiki ipampa ikoneuj akin melak kitlasojtla. 7 ToTajtsin otechmakixti ika iyesyo iKoneuj. Kema, yejua yotechintlapopoluilij totlajtlakoluan pampa melak techiknelia maski xtechnamiki.

8 Yejua melak yotechikneli maski xtechnamiki niman okichiuj matitlamachilisejkej niman kuajli matitlanemilikan 9 ijkuak otechititi tlen xakaj kimatiya itech tlen kineki kichiuas. Niman ijkon ken yejua kuelita, okijto 10 ika kiyekanas tlen onka ijkuak ajsis tiempo tlen yokijtojka. Ijkon kichiuas para kisentlalis nochi tlen onka ipan cielo niman ipan yejuin mundo niman para tinemiskej iuan Cristo. Kema, para tinemiskej iuan Cristo. 11 Tejuamej iuan tinemij pampa toTajtsin otechtlapejpeni para tikseliskej herencia. Yejua kachtopa otechtlapejpeni ijkon ken okinek pampa yejua kichiua nochi tlen kijtoua niman kichiua ijkon ken kineki. 12 Tejuamej kachtopa otitlaneltokakej itech Cristo, yejua ika, topampa uelis kiueyiteneuaskej toTajtsin. 13 Pero nemejuamej noijki onentlaneltokakej ijkuak onenkikakkej tlen melauak, yejon kuajli tlajtoltin tlen mechmakixtis. Sakin ika yonentlaneltokakaj omechtlalilijkej se sello ipampa yejua, ika espíritu santo tlen yomechijlijkaj ika mechmakaskej. 14 Yejon kiteititia tlen satepan tikseliskej, ijkon toTajtsin okimakixti ipueblo ipampa iKoneuj para nochimej san toTajtsin makiueyichiuakan.

15 Desde ijkuak onikak ika nemejuamej nentlaneltokaj itech toTeko Jesús niman ika nenkintlasojtlaj nochimej tokniuan, 16 xnikajkaua ika niktlasojkamachilia toTajtsin nemopampa. Nochipa nimechteneua ijkuak nikchiua oración. 17 Niktlajtlanilia iTajtsin toTeko Jesucristo, iTaj akin ueyixtika, mamechmaka poder para xmochiuakan tlamachilisejkej niman xkasikamatikan tlen mechititis ijkuak nemomachtijtoskej itech. 18 Yejua yomechixtlapo para xmatikan tlenon nenkiseliskej pampa omechnots, tlenon kualtsin kinmakas akin yokintlapejpeni 19 niman kenon melak temojkatlachialti ipoder tlen techititia akin titlaneltokaj. Yejuin iueyilis nesi ijkuak kiteititia ipoder, 20 tlen okitekitilti* ijkuak okikuiteuj Cristo intech akin yomikkej niman okitlali iyekma ne ipan cielo. 21 Yejua más ueyixtika xijkon ken se gobierno, akin tlayekana, akin kipiya poder niman yakaj akin ueyixtika. Yejua más ueyixtika xijkon ken nochi tlen aman onka* niman tlen onias. 22 ToTajtsin, noijki nochi ikxitlan okitlali niman okichiuj nochi makiyekana ipan tlanechikojli, 23 tlen yeskia ken itlalnakayo niman tentika ika tlen kuajli, Cristo kichiua nochi kuajli maonia niman maka itlaj mapoliui.

2 Noijki, toTajtsin omechmakak nemilistli, maski nenmiktoyaj pampa onemopopolojkej niman onentlajtlakojkej. 2 Yeuejkaui onenkichijkej ijkon ken akin nemij ipan yejuin mundo, nenkitlakamatiyaj akin kinauatia ajakatl, yejon espíritu tlen kinyekana akin xtetlakamatij. 3 Kema, yeuejkaui tinochimej tikchiuayaj tlen kileuiaya totlalnakayo ijkon ken yejuamej, tikchiuayaj tlen kinekiya totlalnakayo niman tlen tiknemiliayaj. Desde ijkuak otiuajnenkej kinamiki ika toTajtsin matechititi itlauel, ijkon ken oksekimej. 4 Pero toTajtsin otechtlasojtlak pampa melak techiknelia, niman 5 okichiuj matinemikan iuan Cristo maski yotimikkaj pampa titlajtlakolejkej. Nemejuamej omechmakixtijkej pampa omechiknelijkej maski xmechnamiki. 6 Kema, toTajtsin okichiuj matinemikan* niman matotlalikan inakastlan Cristo Jesús ne ipan cielo pampa tikchiuaj ijkon ken yejua, 7 para ijkuak uajlas yenkuik mundo, techititis ika techiknelia maski xtechnamiki ijkuak miyek tlen techmakas pampa tikchiuaj ijkon ken Cristo Jesús.

8 Pampa omechiknelijkej maski xmechnamiki, omechmakixtijkej pampa onentlaneltokakej. Pero xomechmakixtijkej pampa onenkimotlanilijkej, yejon itlaj tlen toTajtsin omechtlayokoli. 9 Kema, xipampa tlen nenkichiuaj, para ijkon maka yakaj noueyimatis. 10 ToTajtsin otechchijchiuj niman pampa tikchiuaj ken Cristo Jesús, otechchijchijkej para matikchiuakan tlen kuajli, yejon tlen toTajtsin yokijtojka ika tikchiuaskiaj.

11 Yejua ika, xkilnamikikan ika yeuejkaui nemejuamej onennemikoj ken akin xjudíos. Akin kinochiuiliaj “circuncisión” mechixmatiyaj ken akin xkinochiuiliaj “circuncisión”, yejon “circuncisión” tlen san gente kitechiuilia. 12 Yeuejkaui xnennemiyaj iuan Cristo, uejka nennemiyaj itech Israel, xnenkimatiyaj ken toTajtsin yonotlajtolkajka, xtlaj nenkichiayaj niman xnennemiyaj iuan toTajtsin ipan yejuin mundo. 13 Pero aman, pampa nenkichiuaj ken Cristo Jesús, akin yeuejkaui uejka nennemiyaj yonenmonisiuijkej ipampa iyesyo Cristo.* 14 Pampa yejua techyolseuiya, yejua akin okichiuj ika yejon ome grupos manochiuakan san se niman okixoxoton yejon tepantli tlen onkatka intlajkotian niman kinxelouaya. 15 Cristo, ika itlalnakayo okinpopolo Tlanauatiltin tlen kichiuaya manotlauelitakan para kichiuas mauajnemi se yenkuik tlakatl itech yejon ome grupos tlen iuan nemij niman kichiuas manoyolseuikan. 16 Ijkuak okimiktijkej ipan kojtli melaktik,* okinpaleui yejon ome pueblos kuajli manoyolseuikan iuan toTajtsin. Ika itlalnakayo okinpaleui oksejpa kuajli manouikakan. 17 Niman yejua ouajla niman omechijli yejon kuajli tlajtoltin tlen omechyolseui nemejuamej akin uejka nennemiyaj niman nemejuamej akin nisiuj nennemiyaj. 18 Ipampa Jesús, on ome pueblos uelis tajsiskej kampa toTajtsin pampa tinochimej tikseliaj san no yejua espíritu santo.

19 Kuakon, nemejuamej xok mechitaj ken akin xmechixmatij noso xchanejkej, aman mechitaj ken nenchanejkej imiuan akin chipajkanemij niman noijki nenichanejkauan toTajtsin. 20 Nemejuamej yopeuj mechchijchiuaj ipan apóstoles niman teotlajtojkej ijkon ken ijkuak kichijchiuaj se kajli, niman Cristo Jesús yejua tetl tlen onka ipan esquina kampa nochi peua. 21 Niman pampa Cristo teuan iuan yejon kajli, nochi kajli kuajli sajsalijtok niman más ueyixtiuj hasta nochiuas se chipauak templo para Jehová. 22 Pampa nemejuamej nennemij iuan Cristo, toTajtsin omechsentlali imiuan oksekimej ipan se kajli kampa yejua nemi pampa iespíritu ompa onka.

3 Yejua ika, nejua, Pablo, akin nitsauktika pampa niktekichiuilia Cristo Jesús niman pampa nikchiua tlen kuajli para nimechpaleuis nemejuamej akin xnenjudíos...* 2 Kuajli nikmatstika ika yenenkimatij ika onikseli tekitl para nimechpaleuis, ijkon toTajtsin mechiknelis maski xmechnamiki. 3 Nenkimatij ika toTajtsin onechititi itlaj tlen iyantika, ijkon ken yonimechijkuilouilijka. 4 Ijkon, ijkuak nenkileeroskej yejuin, nenkimatiskej tlen nikasikamati itech tlen xakaj kimati itech Cristo. 5 Yeuejkaui xakaj kititiayaj tlen iyantika ijkon ken aman yokimititijkej ika espíritu on apóstoles akin yokintlapejpenijkej niman teotlajtojkej. 6 Xeyakaj kijliayaj ika tla akin xjudíos nemij iuan Cristo Jesús niman kikakij on kuajli tlajtoltin tlen tikteijliaj, ueliskia touan kiseliskej herencia, touan nemiskej ipan san se tlalnakayotl niman noijki kiseliskej tlen yotechijlijkej techmakaskej. 7 Pampa toTajtsin melak teiknelia niman ueyixtika onechkauili manikteijli yejuin tlen xakaj kimati. Yejua onechtlayokoli yejuin ika ipoder.

8 Nejua, akin xmás niueyixtika de nochimej akin yokintlapejpenijkej, onechiknelijkej maski xnechnamiki para nikimijlis akin xjudíos yejon kuajli tlajtoltin tlen kiteititiaj kenijki Cristo melak techteochiuas. 9 Noijki, para nikinpaleuis nochimej makitakan kenijki nochijtiuj tlen melak yeuejkaui kiyantoya toTajtsin, akin okichijchiuj nochi tlen onka. 10 Yejuin opanok para gobiernos niman akin tlanauatiaj* ne ipan cielo makitakan kenijki toTajtsin miyek ken kiteititia ika tlamachilise ika tlen nochiua ipan tlanechikojli. 11 Yejuin notlajtolnamiki ika tlen desde yeuejkaui toTajtsin yokijtojka kichiuas iuan Cristo Jesús, toTeko. 12 Ipampa yejua, xtomojtiaj titlajtoskej niman kuajli tikmatstokej ika uelis tiknisiuiskej* toTajtsin pampa titlaneltokaj itech Cristo.* 13 Yejua ika, nimechtlajtlanilia maka xmoyolkokokan ika tlen nikixnamiki nemopampa. Nochi yejuin tlen nikixnamiki kichiuas mamechueyiteneuakan.

14 Ipampa yejuin, ninotlakuantelketsa ixpan toTaj, 15 akin kichiua manemikan nochi familias ne ipan cielo niman nikan ipan yejuin mundo. 16 Niktlajtlani ika toTajtsin, akin melak ueyixtika, mamechyolchikaua ika iespíritu 17 niman para Cristo manemi ipan nemoyojlo pampa itech nentlaneltokaj. Noijki niktlajtlanilia toTajtsin ika xmelajkanentokan ijkon ken se ueyi kojtli kuajli toktika.* 18 Ijkon, nemejuamej imiuan nochimej akin tlapejpeniltin, kuajli nenkasikamatiskej kech patlauak, kech ueyak, tlen onka tlakpak niman tlen onka kampa tlauejkatlan. 19 Noijki nenkasikamatiskej kenijki tetlasojtla Cristo, pampa yejon más ueyi kijtosneki xijkon ken tla miyek tikmatis, para nenkipiyaskej nochi tlen kuajli kitemaka toTajtsin.

20 Niman aman matikueyiteneuakan toTajtsin, akin ika ipoder ueli kichiua hasta más de yejon tlen tejuamej tiktlajtlaniliaj noso tiknemiliaj. Yejon poder tlen topan onka. 21 Cristo Jesús niman tlanechikojli nochipa makiueyiteneuakan. Amén.

4 Kuakon, nejua, akin nitsauktika pampa niktekichiuilia toTeko, nimechtlajtlanilia xchiuakan ijkon ken noneki kichiuaskej akin yokintlapejpenijkej: 2 xmochiuakan yolyemankej, xyolsejtokan niman xteijyouikan; xmoxikokan ika tlasojtlalistli; 3 xchiuakan nochi tlen nenuelij para xyolsejtokan niman ijkon nochipa mechsentlalis espíritu santo. 4 Ijkon ken san se tlalnakayotl niman san se espíritu onka, noijki san se tlen nenkiseliskej akin yomechnotskej. 5 San se toTeko nemi, san se tlaneltokijli onka niman san se apolaktilistli. 6 San se toTajtsin nemi niman nochimej inTaj, akin nochimej kinyekana, nochimej kiteititiaj tlen yejua kimati niman yejua nochimej kintekitiltia* para itlaj makichiuakan.

7 Tinochimej yotechiknelijkej maski xtechnamiki niman Cristo yejua akin yotechtlayokoli nochi yejuin. 8 Pampa Tlajkuiloltin kijtouaj: “Ijkuak yejua oyaj tlakpak, okinmakixti akin tsauktoyaj; okintemakak tlakamej ken tetlayokoliltin”. 9 Pero ¿tlenon kijtosneki ijkuak kijtoua “oyaj tlakpak”? Kijtosneki ika achto ouajtemok ipan yejuin mundo. 10 Akin ouajtemok san no yejua akin otlejkok hasta kampa más tlakpak de nochi cielos, para kichiuas nochi manochiua.

11 Niman sekimej okintlali ken apóstoles, ken teotlajtojkej, oksekimej ken akin kiteijliaj kuajli tlajtoltin, oksekimej ken tlajpixkej niman ken maestros. 12 Okintlali para makinmachtikan tokniuan, para makinpaleuikan oksekimej niman para makinyolchikauakan akin iyaxkauan* Cristo, akin yeskiaj kentla itlalnakayo. 13 Yejuamej techpaleuijtoskej hasta ijkuak tinochimej san se tlaneltokijli tikpiyaskej niman tinochimej kuajli tikixmatiskej iKoneuj toTajtsin. Techpaleuijtoskej hasta ijkuak tinochimej titlanemiliskej ken se tlakatl akin yeueyi niman hasta ijkuak tikchiuaskej nochi ijkon ken Cristo okichiuj. 14 Maka sa matikchiuakan ken kokonej, maka matokauilikan matechkajkayauakan yejon tlakamej akin kintekitiltiaj trampas niman melak uelij tekajkayauaj. Yejuamej yeskiaj kentla se barco tlen ajakatl niman mar san kanon kuikatinemij. 15 Noneki tikijtoskej tlen melauak niman tikteititiskej ika titetlasojtlaj para toskaltiskej niman tinemiskej ken Cristo. 16 Tejuamej tiyeskiaj ken se tlalnakayotl, niman Cristo kipaleuiya san sekan maonia tlen ika sajsalijtok para tlalnakayotl kuajli maonia. Tla cada se kichiua itekiyo tlen kipiya, tlapaleuiya nochi kuajli manoskalti niman nochimej manotlasojtlakan.

17 Yejua ika, nimechijlia niman nimechtlajtlanilia ipampa itoka toTeko, ika maka xnemikan ken akin xkitekichiuiliaj toTajtsin, akin noyekanaj ika intlamachilis tlen xtlaj ika tepaleuij. 18 Yejuamej nemij kampa tlayouatok niman xkiseliskej yejon nemilistli tlen toTajtsin kitemakas, pampa xkixmatij niman pampa yoyoltechikajkej. 19 Pampa xok kimatij tlen kuajli niman tlen xkuajli, kichiuaj tlen tepinajti* niman miyekpa kichiuaj miyek tlen xchipauak.

20 Pero nemejuamej xonenuelkej ika Cristo ijkon kichiuaya. 21 Jesús otemachti tlen melauak, niman nemejuamej kuajli nenkixmatij nochi yejuin pampa onenkikakkej niman omechmachti. 22 Nemejuamej onenuelkej ika noneki nenkikajkauaskej tlen yeuejkaui nenkichiuayaj niman ken nentlanemiliayaj. Pampa yejon tlen yeuejkaui nenkichiuayaj ijtlakajtiuj ipampa tlen xkuajli kileuiya. 23 Noneki nenkiyenkuilijtiaskej ken nentlanemiliaj, 24 niman noneki nenpeuaskej nennemiskej* ken toTajtsin kineki para nenkichiuaskej tlen melajki niman nenmelajkanemiskej.

25 Yejua ika, aman ika yonenkitlalkauijkej tlen xmelauak xkimijlikan oksekimej tlen melauak, pampa nochimej tinemij ipan san se tlalnakayotl. 26 Ijkuak nenkualantoskej maka xtlajtlakokan, maka xkualantokan nochi tonajli. 27 Maka xkauilikan Diablo makichiua xtlajtlakokan. 28 Akin tlachteki maka sa ijkon makichiua. Chikauak matekiti para san no yejua kinextis tlen ika nopaleuis niman para uelis itlaj kinmakas akin kinpoloua. 29 Maka xkimijtokan xkuajli tlajtoltin, kuajli tla nenkijtouaj tlen uelis kinyolchikauas oksekimej niman tlen kinpaleuis akin mechkakij. 30 Noijki, maka xyolkokokan iespíritu santo toTajtsin tlen ika yomechtlalilijkej se sello para mechmakixtiskej ijkuak ajsis on tonajli.

31 Maka sa xkilnamiktokan tlen omechchiuilijkej, maka xtlauelmikikan, maka xkualantokan, maka xtetsajtsajtsilikan niman maka xteijlikan tlen teyolkoko niman noijki xkauakan nochi tlen xkuajli. 32 Xmochiuilikan tlen kuajli, kualtsin xmonotsakan niman xmoiknelikan, xmotlapopoluikan ika nochi nemoyojlo ijkon ken toTajtsin omechtlapopolui ika nochi iyojlo ipampa* Cristo.

5 Yejua ika, xchiuakan ken toTajtsin, pampa nenikoneuan akin melak mechtlasojtla. 2 Niman nochipa xmotlasojtlakan ijkon ken Cristo noijki otechtlasojtlak,* niman onotemakak topampa* ken se uentli tlen melak ajuiyak para toTajtsin.

3 Ijkon ken kichiuaj akin chipajkanemij, nemejuamej maka nion achijtsin nentlajtoskej itech auilnemilistli,* itech tlen tsokuiltik nion itech tlen kichiuas xkileuikan tlen xnemoyaxka.* 4 Noijki, kuajli xnemilikan tlen nenkijtoskej, maka xchiuakan tlen tepinajti nion maka xkamanalokan ika tlen xchipauak, pampa nochi yejon xkuajli. Más kuajli, tla nenkitlasojkamachiliaj toTajtsin. 5 Pampa nemejuamej nenkimatij niman kuajli nenkasikamatij ika akin auilnemij,* akin kichiuaj tlen tsokuiltik niman akin melak kileuiyaj tlen xinyaxka, tlen san noijki yeskia ken tikinueyichiuas imágenes, xkiseliskej herencia ipan iGobierno Cristo niman toTajtsin.

6 Maka yakaj mamechkajkayaua ika tlen xmelauak, pampa toTajtsin kintlajyouiltis akin ijkon kichiuaj niman akin xtetlakamatij. 7 Yejua ika, maka imiuan xchiuakan tlen xkuajli. 8 Nemejuamej nenkatkaj tlayoualyotl, pero aman yonemochijkej tlauijli pampa neniyaxkauan toTeko. Nochipa xchiuakan ken ikoneuan tlauijli, 9 pampa akin nemij ipan tlauijli, kichiuaj tlen kuajli, tlen melajki, niman kijtouaj tlen melauak. 10 Kuajli xkitakan tlen kiyolpaktia toTeko. 11 Maka sa xchiuakan tlen xtlaj ika tepaleui, tlen kichiuaj akin nemij kampa tlayouatok. Más kuajli tla nenkinteixpantiaj tlen xkuajli kichiuaj. 12 Pampa tepinajti tikteneuas tlen san ichtaka kichiuaj. 13 Aman, tlauijli petlani ipan nochi tlen xkuajli, para kiteititis on tlen xkuajli. 14 Yejua ika, noijtoua: “Xtlatlachia,* tejua akin tikochi, niman xmokuiteua intech akin yomikkej, niman Cristo mopan petlanis”.

15 Kuakon, xchiuakan ken akin tlamachilisejkej niman melak xmotlajpiyakan para xnenkichiuaskej ken akin tontos. 16 Ijkon ken kichiuaj akin tlamachilisejkej, kuajli xtekitiltikan* nemotiempo,* pampa yejuin tonaltin xkuajkualtin. 17 Yejua ika, kuajli xtlanemilikan niman xkasikamatikan tlen kineki Jehová. 18 Noijki, maka xtlauanikan, pampa yejon kichiuas xchiuakan tlen xkuajli; más kuajli, tla nochipa nenkitaj tla nenkipiyaj iespíritu toTajtsin. 19 Xmonotsakan ika salmos niman xueyichiuakan toTajtsin ika tlakuikaltin; ika nochi nemoyojlo xkuikatilikan niman xtlatsotsonilikan Jehová. 20 Nochipa xtlasojkamachilikan toTajtsin, akin toTaj, ipampa nochi tlen techmaka ika itoka toTeko Jesucristo.

21 Xmokauilikan oksekimej mamechyekanakan pampa nenkitlakaitaj Cristo. 22 Tesiuatsitsinuan makinokauilikan makinyekanakan inueuentsitsinuan ijkon ken kinokauiliaj makinyekana toTeko. 23 Pampa teueuentsin kiyekana isiuatsin, ijkon ken Cristo kiyekana tlanechikojli. Niman tlanechikojli yeskia ken yejon tlalnakayotl tlen yejua okimakixti. 24 Ijkon ken tlanechikojli kinokauilia makiyekana Cristo, tesiuatsitsinuan noijki noneki kinokauiliskej ika inueuentsitsinuan nochipa makinyekanakan. 25 Teueuentsitsinuan, nochipa xkintlasojtlatokan nemosiuatsitsinuan ijkon ken Cristo noijki okitlasojtlak tlanechikojli niman ipampa onotemakak. 26 Yejua ijkon okichiuj para kichipauas tlanechikojli ika itlajtol toTajtsin, ijkon ken kichipauaskia ika atl. 27 Ijkon, tlanechikojli kuajli nesis ixpan yejua, xkipiyas tlen tsokuiltik nion xkipiyas tlen xoxolochtik niman xkipiyas okse itlaj ken yejon, chipauak yes niman xkipiyas itlaj tlen xkuajli.

28 Noijki, teueuentsitsinuan noneki kintlasojtlaskej insiuatsitsinuan ken san no yejuamej notlasojtlaj. Tlakatl akin kitlasojtla isiuatsin san no yejua notlasojtla. 29 Xkeman yakaj yokitlauelitak itlalnakayo. Pampa kitlasojtla, kitlakualtia niman kitlajpiya, ijkon ken Cristo kichiua iuan tlanechikojli, 30 pampa tejuamej titeuan itech itlalnakayo. 31 “Yejua ika, tlakatl kikauas itaj niman inan, nosetilis iuan isiuatsin niman on omemej nochiuaskej san se”. 32 Yejuin tlen iyantika ueyi. Aman nitlajtojtika itech Cristo niman tlanechikojli. 33 Kuakon, cada se noneki kitlasojtlas isiuatsin, ijkon ken san no yejua notlasojtla. Noijki, tesiuatsin noneki melak kitlakaitas iueuentsin.

6 Nemejuamej, akin nentekoneuan, xkintlakamatikan nemotajuan ijkon ken kineki toTeko pampa yejon tlen kuajli. 2 “Xtlakaita motaj niman monan”. Yejuin kachtopa tlanauatijli tlen kichiua xseli yejuin tlateochiualistli: 3 “Para kuajli tlen mopan nochiuas niman uejkauis tinemis ipan yejuin mundo”. 4 Tajtin,* maka xkintlauelmiktikan nemokoneuan. Más kuajli tla nenkintlajpiyaj, nenkinmachtiaj niman nenkinyekanaj* ijkon ken Jehová kijtoua.

5 Tlakeualtin, ika nochi nemoyojlo xkintlakamatikan niman xkintlakaitakan nemotekouan, kentla nenkitlakamatiskiaj Cristo. 6 Maka xchiuakan san ijkuak oksekimej mechitaskej para nenkinyolpaktiskej gente. Xchiuakan ken itlakeualuan Cristo, akin ika nochi inyojlo kichiuaj tlen kineki toTajtsin. 7 Xkintekichiuilikan nemotekouan ika nochi nemoyojlo, kentla tla nenkitekichiuiliskiaj Jehová niman xnenkitekichiuiliskiaj gente. 8 Nemejuamej nenkimatij ika Jehová kitlaxtlauilis cada se tlen kuajli kichiua, maski tla tlakeuajli noso xtlakeuajli. 9 Niman nemejuamej, akin nenkinpiyaj tlakeualtin, maka xkinchikoitakan nemotlakeualuan niman maka xkinmojmojtikan. Ijkon xchiuakan pampa nenkimatij ika yejuamej niman nemejuamej nenkipiyaj san no yejua nemoTeko ne ipan cielo, niman yejua xtechikoita.

10 Para nitlamis, nikneki nimechtlajtlanilis ika xmokauilikan ika toTeko mamechyolchikajto ika ipoder. 11 Xmotlalilikan nochi tlen ika nemomanauiskej, tlen toTajtsin mechmaka para uelis nenmelajkanemiskej ijkuak Diablo kinekis mechkajkayauas ika itrampas. 12 Tejuamej xtoixnamikij iuan yakaj akin kipiya inakayo niman iyesyo. Toixnamikij iuan gobiernos, iuan akin tlanauatiaj, iuan akin tlayekanaj ipan yejuin mundo kampa tlayouatok, yejuin kijtosneki espíritus xkuajkualtin akin nemij ipan cielo. 13 Yejua ika, xmotlalilikan tlen ika nemomanauiskej, tlen toTajtsin techmaka para uelis nentlaxikoskej ipan tonajli ijkuak nenkixnamikiskej tlen xkuajli. Nemejuamej uelis nenmelajkanemiskej tla nenkichiuaj nochi tlen noneki.

14 Yejua ika, xmotlajkosalokan ika on tlen melauak kentla nemotlajkosaloskiaj ika se cinturón, xchiuakan tlen kuajli para kentla nenkitlapachoskiaj nemoyelpan ika se tepostli, 15 niman xkintlalikan nemokakuan* para xnemikan listos niman nenkiteijliskej kuajli tlajtoltin tlen kitemakaj yolseuilistli. 16 Niman noijki xkajsikan ueyi escudo, tlen kijtosneki nemotlaneltok para nenkinseuiskej flechas tlen tlikuitokej tlen mechinuajtlajkalilia akin Xkuajli. 17 Noijki xmomaniltikan casco tlen temakixtia niman xtekitiltikan iespada espíritu, tlen kijtosneki itlajtol toTajtsin. 18 Noijki, mamechyekana espíritu santo nochipa ijkuak nenkichiuaskej oración, nochi xkijlikan toTajtsin niman miyekpa xnotsakan. Tla ijkon nenkichiuaj, nentlatlachixtoskej niman miyekpa nenkitlajtlaniskej inpampa nochimej tokniuan. 19 Xchiuakan oración nopampa. Xtlajtlanilikan toTajtsin manechpaleui maka maninomojti ijkuak nikteijlis kuajli tlajtoltin tlen iyantokej. 20 ToTajtsin onechtitlan para manikteijliti kuajli tlajtoltin, yejua ika, nitsauktika niman nisajsalijtika ika cadenas.

21 Tíquico, se tokniuj akin tiktlasojtlaj niman akin melajkanemi itech toTeko, mechnotsas notech niman mechijlis kenijki ninemi. 22 Nimechontitlanilia para xmatikan kenijki tinemij niman para mamechyolseui.

23 ToTeko Jesucristo niman toTajtsin, akin toTaj, makinpaleui tokniuan mayolsejtokan, mateiknelikan niman matlaneltokakan. 24 ToTajtsin mamechikneli maski xmechnamiki, nochimej nemejuamej akin nochipa nenkitlasojtlaj toTeko Jesucristo.