FILIPENSES

1 Nejua Pablo niman Timoteo, akin tiitlakeualuan Cristo Jesús, timechontlajpalouaj nochimej nokniuan akin nenkitekichiuiliaj Cristo Jesús ne Filipos. Noijki tikomontlajpalouaj akin tlayekanaj niman siervos ministeriales.

2 Niktlajtlanilia toTajtsin, akin toTaj, niman noijki toTeko Jesucristo mamechikneli maski xmechnamiki niman mamechyolseui.

3 Nochipa niktlasojkamachilia noTajtsin ijkuak nimechilnamiki, 4 nochipa ijkon nikchiua ijkuak miyekpa niknotsa nemopampa. Nikchiua ika noyojlo 5 pampa hasta aman yonentlapaleuijkej manoteijlikan kuajli tlajtoltin. 6 Nejua kuajli nikmatstika ika akin nemotech okipeualti se kuajli tekitl, nochipa ijkon kichijtos hasta ijkuak kitlamiltis ipan itonal Cristo Jesús. 7 Melak kuajli ika ijkon nitlanemilia nemotech, pampa melak nimechtlasojtla. Nemejuamej nennechpaleuiyaj nikan kampa nitsauktok niman nisalijtok ika cadenas. Niman noijki nennechpaleuiyaj ixpan akin tlayekanaj para maueli manoteijli kuajli tlajtoltin. Ijkon, toTajtsin techititia ika techiknelia maski xtechnamiki.

8 ToTajtsin kimatstika ika melak nimechilnamiki niman melak nimechtlasojtla ijkon ken Cristo Jesús. 9 Niman nochipa niktlajtlani ipan nooraciones ika más xmotlasojtlakan, nochi kuajli xkasikamatikan niman kuajli xtlanemilikan. 10 Xkitakan tlenon más importante para nochi kuajli nenkichiuaskej niman maka xchiuakan ika yakaj maka sa matlaneltoka* hasta ijkuak ajsis itonal Cristo. 11 Niman noijki niktlajtlani xchiuakan tlen kuajli, yejon tlen Cristo kitlajtlani para xueyiteneuakan niman xueyichiuakan toTajtsin.

12 Nokniuan, nikneki xmatikan ika tlen nopan nochijtok más yotepaleui para nochiuiyan manoteijlikan kuajli tlajtoltin, 13 pampa akin kitlajpiyaj rey niman nochimej oksekimej kimatstokej ika nitsauktika pampa niktekichiuilia Cristo. 14 Aman miyekej tokniuan xok nomojtiaj niman yonoyolchikajkej kiteijliskej itlajtol toTajtsin pampa nitsauktika.

15 Melauak ika sekimej tenojnotstinemij itech Cristo pampa tenexikolitaj niman pampa kinekij notlatlaniskej imiuan oksekimej, pero oksekimej tenojnotsaj pampa kipiyaj kuajli inyojlo. 16 Akin kichiuaj ika nochi inyojlo, tenojnotsaj pampa kitlasojtlaj Cristo niman kimatstokej ika onechtlalijkej para manikinmanaui kuajli tlajtoltin. 17 Pero yejon oksekimej san kinekij kipeualtiskej tlauejli. Xkichiuaj pampa kipiyaj kuajli inyojlo, yejuamej kinekij manikpiya tlauejli nikan kampa nitsauktika. 18 ¿Yejuin yotepaleui? Kema, pampa tla maski yejuamej xika inyojlo noso ika inyojlo kichiuaj, noteijlijtika itech Cristo niman yejon nechyolpaktia. Niman niyolpaktos, 19 pampa nikmatstika ika nimakisas tla miyekpa nenkichiuaj oración nopampa niman tla nechpaleuiya iespíritu toTajtsin, tlen Jesucristo kitemaka. 20 Nikneki niman nikchia xtlaj ika nipinauis. Tla niyoltok noso tla nimiki, xnikneki ika itlaj manechtsakuili manitenojnotsa para nikueyiteneuas Cristo ika notlalnakayo, ijkon ken nochipa nikuajchijtiuj.

21 Pampa, tla niyoltok, niyoltok para Cristo niman tla nimiki, nitetlani. 22 Aman, pampa ninemi ipan yejuin mundo, ueli más kuajli niktekichiuilia Cristo, pero xnimechijlis tlenon niknekiskia. 23 Noneki itlaj niktlapejpenis, nejua niktlapejpeniskia nimakisas niman ninemis iuan Cristo, yejon tlen melak kuajli yeskia. 24 Pero más noneki maniyolto ipan yejuin notlalnakayo para uelis nimechpaleuis. 25 Kuakon, nikmatstika ika niyoltos niman nemouan ninemis para xchikauakan nemotlaneltok niman xyolpakikan, 26 para ijkuak oksejpa nemouan ninemis más nenyolpakiskej pampa nenkitekichiuiliaj Cristo.

27 San xchiuakan ijkon ken noneki kichiuaskej akin kiteijliaj kuajli tlajtoltin itech Cristo. Ijkon, maski tla nimechontas noso xnimechontas, nikakis ika san noijki ken nentlanemiliaj niman nenmelajkanemij, san noijki tekitl nenkichiuaj, san sekan nenmopaleuiyaj pampa nentlaneltokaj itech kuajli tlajtoltin 28 niman nion achijtsin xnenkinmakasij akin mechixnamikij. Yejuin kuajli kiteititia ika yejuamej popoliuiskej pero nemejuamej nenmakisaskej, yejuin itlaj tlen toTajtsin kijtoua. 29 Pampa nemejuamej xsan omechteochijkej para nentlaneltokaskej itech Cristo, noijki para nentlajyouiskej ipampa. 30 Yejua ika, nenkixnamiktokej tlen onenkitakej ika nejua onikixnamik, niman ken nenkimatij ok* nikixnamiktok.

2 Xmokojtilikan nenteyolchikauaskej pampa nennemij iuan Cristo, nenteyolseuiskej ika tlasojtlalistli, nennemiskej imiuan oksekimej tokniuan niman nenkimititiskej ika nenkintlasojtlaj niman nenkimikneliaj. 2 Nemejuamej nennechyolpaktiskej tla nenkiteititiaj ika san noijki ken nentlanemiliaj niman san noijki ken nentetlasojtlaj, tla san sekan nennemij niman tla nenkipiyaj san noijki nemoyojlo. 3 Maka itlaj xchiuakan san para nenkipeualtiskej tlauejli noso nemoueyimatiskej. Más kuajli tla nemejuamej nemoyolyemaniliaj niman nenkinemiliaj ika oksekimej más uejueyixtokej xijkon ken nemejuamej. 4 Maka san xtlanemilikan itech tlen mechpaleuis noijki xtlanemilikan itech tlen kinpaleuis oksekimej.

5 Nochipa xtlanemilikan ijkon ken tlanemilia Cristo Jesús. 6 Maski yejua katka ken toTajtsin, xokinemili nochiuas toTajtsin. 7 Ka, yejua okikauj nochi tlen kipiaya, onochiuj kentla se tlakeuajli niman onochiuj se tlakatl.* 8 Ijkuak yejua ouajla ken se tlakatl,* onoyolyemanili niman nochipa otetlakamat. Kema, yejua otetlakamat maski okimiktijkej ipan se kojtli melaktik.* 9 Yejua ika, toTajtsin okimakak se tekitl tlen más ueyi, niman pampa kitlasojtla, okichiuj ika itoka más maueyixto xijkon ken oksekimej. 10 Ijkon okichiuj para ika itoka Jesús nochimej manotlakuantelketsakan: akin nemij ne ipan cielo, ipan yejuin mundo niman ijtik tlajli.* 11 Niman noijki para nochimej akin tlajtouaj tlatlamantikej* tlajtoltin makasikamatikan ika Jesucristo toTeko, akin kiueyiteneua toTajtsin, akin Tajtli.

12 Kuakon, noknitsitsinuan, ijkon ken nochipa yonentetlakamatkej xmokojtilijtokan nenkichiuaskej nochi tlen noneki para nenmakisaskej pampa nenkimakasij niman nenkitlakaitaj toTajtsin. Maka xchiuakan san ijkuak ompa ninemi, noijki ijkon xchiuakan ijkuak xompa ninemi. 13 ToTajtsin techmaka poder para matikchiuakan tlen yejua kuelita. Yejua kichiua matiknekikan ijkon tikchiuaskej niman techmaka poder para matikchiuakan. 14 Ijkuak itlaj nenkichiuaskej, maka xtetejteneuakan nion maka teuan xmokualanikan 15 para maka mechtlajtlakoltiskej. Niman para mechitaskej ken ikoneuan toTajtsin, ken akin xkipiyaj itlaj tlen xkuajli ipan yejuin mundo kampa nochiua tlen melak xkuajli. Nemejuamej nenyeskiaj kentla tlauijli tlen melak petlani ipan yejuin mundo. 16 Nemejuamej nochipa xmelajkanentokan itech itlajtol toTajtsin, tlen kitemaka nemilistli. Ijkon, niyolpakis ijkuak ajsis itonal Cristo, pampa nikmatis ika xsan nenka oninotlalo nion xsan nenka chikauak onitekit. 17 Pero, maski nejua nechtoyajtokej kentla vino kampa tlauentlaliaj, melak niyolpaki pampa nimechpaleuiya chikauak xtekichiuilikan toTajtsin. 18 Noijki ijkon, nemejuamej noneki nenyolpakiskej para san sekan tiyolpakiskej.

19 Nikchia ika toTeko Jesús manechkauili nimechontitlanilis Timoteo para niyolchikauis ijkuak nikakis tlen nechijliskej nemotech. 20 Pampa xnemi okse yakaj ken yejua, yakaj akin melak kineki kimatis kenijki nennemij. 21 Pampa oksekimej kichiuaj san tlen yejuamej kinpaleuiya niman xkichiuaj tlen Jesucristo kineki. 22 Pero nemejuamej nenkimatij ika Timoteo kuajli tlen kichiua pampa nouan otekit ken se tlakeuajli ijkuak otikteijlijkej kuajli tlajtoltin, ijkon ken se tekoneuj iuan itaj. 23 Yejua ika, ijkuak nikmatis tlenon nechchiuiliskej, yejua akin nikontitlanis. 24 Nejua nikneltoka ika toTeko nechkauilis noijki nemouan ompa maninemi.

25 Pero aman nikita ika noneki nimechontitlanilis tokniuj Epafrodito, akin chikauak nouan yotekit, niman nemejuamej onenkuajtitlankej para manechpaleuiki. 26 Yejua sa kinektika oksejpa nochimej mechitas niman melak najmana pampa okimat ika onenkikakkej ika kualouaya. 27 Yejua melak kualouaya niman hasta yemikiya. Pero toTajtsin okikneli niman noijki onechikneli para maka oksejpa melak maninoyolkoko. 28 Yejua ika, nimantsin nimechontitlanilia para ijkuak nenkitaskej nenyolpakiskej niman nejua más ika noyojlo ninemis. 29 Xselikan ika nochi nemoyojlo, ijkon ken nenkinseliaj akin kichiuaj ken toTeko. Niman nochipa xkintlakaitakan tlakamej akin kichiuaj ijkon ken yejua. 30 Yejua yemikiya pampa kichijtoya itekiyo Cristo. Maski yejua ueliskia mikis, okinek nechpaleuis pampa nemejuamej xnikan nennemij para nennechpaleuiskej.

3 Nokniuan, sa ika tlami nikneki nimechtlajtlanilis ika nochipa xyolpaktokan ipampa toTeko. Nejua, ika nochi noyojlo oksejpa nimechijkuilouilia yejuin pampa nikmatstika ika mechpaleuis.

2 Xmotlajpiyakan intech chichimej; xmotlajpiyakan intech akin kitechiuiliaj tlen xkuajli; xmotlajpiyakan intech akin kinekij xmochiuilikan circuncisión. 3 Pampa san tejuamej tikpiyaj melauak circuncisión, tiktekichiuilijtokej toTajtsin ipampa iespíritu, tikchiuaj makiueyiteneuakan Jesús niman xsan titlaneltokaj itech tlen kichiua gente. 4 Nejua akin ueliskia nikijtos ika más nitlaneltoka itech tlen kichiua gente.

Tla yakaj kinemilia ika más tlaneltoka itech tlen kichiua gente, nejua akin más kinamikiskia ijkon manikchiua. 5 Ijkon nikijtoua pampa onechchiuilijkej circuncisión ijkuak onikajxilti chikueyi tonajli, niualeua Israel itech itribu Benjamín, nihebreo niman notajuan hebreos, nejua melak niktlakamatiya tlanauatijli ijkon ken fariseos. 6 Pampa melak nitlaneltokaya onikintlajyouilti akin nemiyaj ipan tlanechikojli niman onikteititi ika nikchijtoya nochi tlen kijtoua tlanauatijli. 7 Pero nochi tlen nikitaya ika ueyi kijtosneki, aman san no nejua nikaua ipampa Cristo. 8 Pero, nejua nikita ika xtlaj ika tepaleui nochi tlen onka, pampa más ueyi kijtosneki tla tikixmatij Cristo Jesús, akin toTeko. Ipampa yejua, nochi yejon nikita ken tlasojli niman yonikauj para uelis nechselis Cristo. 9 Ijkon, nochimej kimatiskej ika iuan ninemi. Pero, xiuan ninemi san pampa tla onikchiuj tlen kijtoua Tlanauatijli, iuan ninemi pampa onikchiuj tlen kuajli niman pampa onitlaneltokak itech Cristo. ToTajtsin kita ika kichiuaj tlen kuajli akin tlaneltokaj itech Cristo. 10 Nejua nikneki nikixmatis, nikixmatis ipoder tlen ika teyolitia, nitlajyouis ijkon ken yejua niman hasta nimikis ijkon ken yejua. 11 Ijkon uelis nikitas tla uelis nechyolitiskej imiuan akin achto kinyolitiskej.

12 Xnikijtojtika tla yonikseli yejon tetlayokolijli noso tla xok nikpiya tlajtlakojli, nejua ninokojtilijtika para nikitas tla uelis nikselis yejon tlen Cristo Jesús onechijli nechmakas pampa onechtlapejpeni.* 13 Nokniuan, nejua xniknemilia tla yenikpiya yejon tlen yonechijlijkej nechmakaskej. Pero kema nikmatstok ika xsan nikilnamiktok tlen opanok niman ninokojtilia nikselis tlen uajlas. 14 Nejua ninokojtilia para nikselis tlen nechtlayokoliskej, para uelis ninemis ne ipan cielo imiuan akin toTajtsin yokinnots ipampa* Cristo Jesús. 15 Kuakon, tejuamej akin tikpiyaj chikauak totlaneltok nochipa ijkon matitlanemilikan, niman tla nemejuamej okse tlamantik* nentlanemiliaj, toTajtsin mechititis kenijki noneki nentlanemiliskej. 16 Maski tla yotikchikajkej totlaneltok, nochipa matikchiuakan ijkon ken tikuajchijtiuej.

17 Nokniuan, nochimej xchiuakan ijkon ken nejua niman xkitakan tlen kichiuaj akin nemij* ijkon ken yotikimititijkej. 18 Pampa nemij miyekej akin kinemiliaj ika xtlaj ika tepaleui ika Cristo omik ipan kojtli melaktik.* Kachtopa, melak nikinteneuaya akinomej, pero aman nichoka ijkuak nikinteneua. 19 Yejuamej popoliuiskej pampa tlen kileuiyaj yeskia kentla indios, noueyimatij ika tlen nonekiskia pinauiskej niman san tlanemilijtokej itech tlen onka ipan yejuin mundo. 20 Pero tejuamej, tochan onka ne ipan cielo niman sa tikchiatokej matechmakixti toTeko Jesucristo, akin nemi ne ipan cielo. 21 Ika ipoder, kichiuas ika yejuin totlalnakayo tlen xtlaj ika tepaleui maueyixto ijkon ken yejua itlalnakayo. Ika yejon ipoder kichiua ika nochi tlen onka makitlakamati.

4 Nokniuan, melak nimechtlasojtla niman sa niknektika nimechitas. Nemejuamej nenkichiuaj ika maniyolpaki niman nenyeskiaj kentla se corona. Noknitsitsinuan, nimechtlajtlanilia ika xyolmelajkanemikan itech toTeko, ijkon ken yonimechijlijka.

2 Nikintlajtlanilia Evodia niman Síntique ika san noijki matlanemilikan ken toTeko. 3 Niman tejua, nokniuj akin nouan titlapaleuiya, nimitstlajtlanilia ika nochipa xkinpaleui yejuin siuamej akin nouan yonokojtilijkej kiteijliskej kuajli tlajtoltin, noijki iuan Clemente niman oksekimej akin nouan tlapaleuiyaj. Yejuamej akin intoka ijkuilijtok ipan libro kampa kijtoua akinomej kiseliskej nemilistli.

4 Nochipa xyolpakikan pampa nenkitekichiuiliaj toTeko. Oksejpa nimechijlia: ¡xyolpakikan! 5 Nochimej makimatikan ika xsan nenkitejtemouaj manochiua tlen nenkinekij. ToTeko xuejka nemi. 6 Maka melak xmajmanakan. Ijkuak itlaj nenkixnamikiskej, miyekpa xchiuakan oración niman xtlasojkamachilikan toTajtsin. Xkijlikan tlenon mechpoloua, 7 niman toTajtsin mechmakas yejon yolseuilistli tlen xakaj ueli kasikamati. Yejon yolseuilistli kitlajpiyas nemoyojlo niman nemotlamachilis ipampa* Cristo Jesús.

8 Sa ika tlami nokniuan, nochipa xtlanemilikan itech tlen melauak, tlen importante, tlen kipaktia toTajtsin, tlen chipauak, tlen kichiua matitetlasojtlakan, tlen kitlakaitaj, tlen kuajli niman nochi tlen oksekimej kitaj ika kuajli. 9 ToTajtsin kichiuas xyolsejtokan tla nenkichiuaj tlen onimechmachti niman onimechititi. Noijki, tla nenkichiuaj tlen onenkikakkej ika onimechijli niman tlen onenkitakej ika onikchiuj.

10 Melak niktlasojkamachilia toTeko pampa aman nemejuamej oksejpa nenmajmanaj nopampa. Maski nemejuamej nenmajmanayaj nopampa, xueliya nenkiteititiayaj. 11 Xnikijtoua yejuin pampa itlaj nechpoloua. Maski san tlenon nikixnamikis, yonikitak kenijki niyolpakis. 12 Nikmatstok kenijki ninemis san ika achijtsin niman kenijki ninemis ijkuak miyek nikpiya. Nejua nikmati tlen miyekej xkimatij: nikmati kenijki niyolpakis ijkuak nikpiya tlen nikuas niman ijkuak xnikpiya, ijkuak miyek nikpiya niman ijkuak xtlaj nikpiya. 13 Nochi ueli nikchiua pampa toTajtsin nechmaka poder.

14 Pero nemejuamej kuajli tlen onenkichijkej pampa onennechpaleuijkej ijkuak xkuajli tlen nikixnamiktoya. 15 Filipenses, nemejuamej noijki nenkimatij ika sakin ika onenkikakkej kuajli tlajtoltin niman oniuajkis de Macedonia, nion se tlanechikojli xokinek nechpaleuis maski yonikinpaleuijka, san nemejuamej. 16 Pampa ijkuak ninemiya Tesalónica nemejuamej okpa onennechtitlanilijkej tlen ika ninopanoltis. 17 Nejua xnikneki itlaj manechtlayokolikan, san nikneki xkitakan kenijki mechteochiuaskej tla itlaj nenkitemakaj. 18 Pero nikpiya nochi tlen nechpoloua, niman hasta más. Nikpiya nochi tlen noneki pampa Epafrodito onechmakak tlen onennechuajtitlanilijkej. Tlen yeskia kentla se uentli tlen melak ajuiyak niman tlen toTajtsin melak kiyolpaktia. 19 Niman pampa ijkon onenkichijkej, noTajtsin, ipampa Cristo Jesús, mechmakas nochi tlen mechpoloua pampa yejua melak teteochiua. 20 Nochipa makiueyiteneuakan toTajtsin akin toTaj. Amén.

21 Xnechintlajpalouilikan nochimej tokniuan akin iyaxkauan* Cristo Jesús. Tokniuan akin nouan nemij mechontlajpalouaj. 22 Nochimej tokniuan mechontlajpalouaj. Pero más mechontlajpalouaj akin nemij ichan César.

23 ToTeko Jesucristo mamechikneli maski xmechnamiki ipampa tlen kuajli nenkichiuaj.