COLOSENSES

1 Nejua niPablo, Cristo Jesús onechtlapejpeni para maninochiua iapóstol, pampa toTajtsin ijkon okinek. Nejua iuan tokniuj Timoteo 2 timechontlajkuilouiliaj nemejuamej nokniuan tlapejpeniltin akin nenmelajkanemij niman nenkichiuaj ken Cristo ne Colosas.

Niktlajtlanilia toTajtsin, akin toTaj, ika mamechikneli maski xmechnamiki niman mamechyolseui.

3 Ijkuak tikchiuaj oración nemopampa, nochipa tiktlasojkamachiliaj toTajtsin, iTaj toTeko Jesucristo. 4 Tiktlasojkamachiliaj pampa yotikakkej kenijki nentlaneltokaj itech Cristo Jesús. Noijki, yotikakkej kenijki nenkintlasojtlaj nochimej tokniuan 5 pampa nenkichiatokej nenkiseliskej tlen yomechijlijkej mechmakaskej ne ipan cielo. Nemejuamej yonenkikakkej ika nenkiseliskej yejon ipampa kuajli tlajtoltin tlen kiteijliaj tlen melauak. 6 Yejuin kuajli tlajtoltin tlen yomechijlijkej nomiyekilijtok niman nomoyajtok ipan nochi mundo. Nemejuamej noijki ijkon opeuj nenkichiuaj desde ijkuak onenkikakkej niman kuajli onenkasikamatkej kenijki toTajtsin techiknelia maski xtechnamiki. 7 Yejon tlen nemejuamej onenuelkej itech Epafras, yejua itlakeual Cristo niman tekiti topampa. 8 Yejua noijki yotechijli kenijki yonentetlasojtlakej pampa espíritu santo yomechpaleui.

9 Yejua ika, desde ijkuak otikakkej yejuin nochipa tikchiuaj oración nemopampa. Niman tiktlajtlaniliaj toTajtsin mamechpaleui kuajli xkasikamatikan tlenon kineki, noijki mamechmaka tlamachilistli niman espíritu santo mamechpaleui nochi xkasikamatikan. 10 Ijkon, nennemiskej ken Jehová kineki, nochipa nenkiyolpaktiskej ijkuak nenkichiuaskej tlen kuajli niman más nenkixmatiskej. 11 Noijki, tiktlajtlaniliaj mamechmaka nochi iueyipoder tlen nonekis para uelis nochi nenkixikoskej niman nenyolpakiskej. 12 Xtlasojkamachilikan toTaj, akin yomechmachti para nenkiseliskej herencia imiuan akin yokintlapejpenijkej, akin nemij kampa onka tlauijli.

13 Yejua otechmakixti ijkuak techyekantoya tlayoualyotl niman otechuikak ipan igobierno iKoneuj akin melak kitlasojtla. 14 Ika iKoneuj otechtlaxtlauj niman otechmakixti para techtlapopoluilis totlajtlakoluan. 15 Yejua kiteititia kenijki toTajtsin akin xueli tikitaj niman yejua akin kachtopa okichijchijkej de nochi tlen onka. 16 Ipampa* okichijchijkej nochi tlen onka ne cielo niman nikan ipan yejuin mundo, tlen nesi niman tlen xnesi, akin tlanauatiaj, gobiernos noso akin tlayekanaj. Nochi tlen onka okichijchijkej ipampa yejua niman para yejua. 17 Desde achto ika oniaskia nochi tlen aman onka yejua yenemiya. Niman ipampa okichijchijkej nochi on okseki tlen onka. 18 Yejua akin kiyekana tlanechikojli, yeskia kentla itsontekon tlalnakayotl. Yejua akin kachtopa okichijchijkej, akin kachtopa oyoliuj para yejua achto yes ipan nochi. 19 Yejua ika, toTajtsin okinek ika ipan iKoneuj maonia nochi tlen kuajli. 20 Niman, pampa okitoyauj iyesyo ijkuak okipilojkej ipan kojtli melaktik,* nochimej oksejpa uelis nouikaskej iuan toTajtsin niman yolsejtoskej. Yejua ijkon kichiuas ika tlen onka ipan yejuin mundo niman ne ipan cielo.

21 Yeuejkaui, nemejuamej xueliya nenkinisiuiayaj toTajtsin niman xueliya iuan nemouikayaj pampa san nentlanemilijtoyaj itech tlen xkuajli. 22 Pero yejua yokichiuj oksejpa iuan xmouikakan ipampa itlalnakayo akin omik. Ijkon, ixpan toTajtsin nenchipajkej yeskej, xnenkipiyaskej tlen xkuajli niman xakaj uelis itlaj ika mechtlajtlakolmakas. 23 Pero ijkon panos san tla nochipa nentlaneltokaj, kuajli nemajsij itech nemotlaneltok niman nenmelajkanemij. Noijki, tla xnenkikauaj tlen nenkichiaj pampa onenkikakkej kuajli tlajtoltin tlen nochiuiyan ipan yejuin mundo yonoteijli. Nejua, Pablo, noijki onikteijli yejon kuajli tlajtoltin.

24 Niyolpaki ika aman nitlajyouijtika nemopampa. Nikmachilia ika ok* noneki nitlajyouijtos pampa niteuan itech itlalnakayo Cristo. Tlen nikijyouiya kipaleuis itlalnakayo Cristo, yejon itlalnakayo kijtosneki tlanechikojli. 25 Ipampa yejon tekitl tlen toTajtsin onechmakak okichiuj manitlapaleui ipan yejuin tlanechikojli para ika nochi noyojlo nikteijlis itlajtol. 26 Kema, para nikteijlis yejon tlen toTajtsin kiyantoya, tlen kiyanilijtoyaj yejuin mundo niman gente akin yeuejkaui nemiya. Pero aman yokimititi akin yokintlapejpeni. 27 ToTajtsin yokinek kimititis akin xjudíos yejuin tlen iyantikatka, tlen yeskia kentla se kualtsin tesoro. Cristo, yejua akin toTajtsin kiyantoya, akin iuan nennemij niman sa nenkichiatokej iuan mamechueyilikan. 28 Itech yejua akin titenojnotsaj. Ika tlamachilistli, tikijliaj nochi gente tlen panos niman tikinmachtiaj. Para nochimej tlakamej akin tikimixpantiliskej toTajtsin makichiuakan ken Cristo, niman chikauak makipiyakan intlaneltok. 29 Yejua ika, chikauak nitekiti, ninokojtilia ika poder tlen yejua nechmaka.

2 Nikneki xmatikan ika melak ninokojtilia nitekitis para nimechpaleuis, niman para nikinpaleuis akin nemij Laodicea niman nochimej akin xkeman nechitaj. 2 Nikneki nimechyolseuis niman nikneki ika nochimej san sekan xnemikan pampa nemotlasojtlaj. Noijki, nikneki mamechteochiuakan pampa nenkimatij ika melauak tlen nenkasikamatij, para kuajli nenkasikamatiskej tlen toTajtsin kiyantoya, tlen kijtosneki Cristo. 3 Pampa itech yejua onka nochi tlamachilistli niman tlen noneki tikmatiskej, tlen yeskiaj kentla tesoros. 4 Yejuin nimechijlia para maka yakaj mechkajkayauas ika tlen kualtsin kakisti, pero xmelauak. 5 Maski xnemouan ninemi, nemotech nitlanemilia, niman niyolpaki nikmatis ika nenkichiuaj ijkon ken noneki niman ika melak nentlaneltokaj itech Cristo.

6 Yejua ika, ijkon ken yonenkiselijkej Cristo Jesús toTeko, noijki nochipa iuan xnemikan. 7 Ijkon ken yomechmachtijkej, noneki chikauak nentlaneltokaskej itech Cristo niman nenmelajkanemiskej ijkon ken se kojtli tlen kuajli tlaltoktokej* ineluayouan. Noneki melak nentlaneltokaskej ijkuak nenkitlasojkamachiliskej toTajtsin.

8 Xmotlajpiyakan para maka yakaj mechkajkayauas* ika tlen xmelauak temachtiaj oksekimej maski xtlaj ika tepaleui. Yejuamej ijkon kichiuaj pampa ijkon incostumbre niman ijkon tlanemiliaj akin nemij ipan yejuin mundo, pero nochi yejon xualeua itech Cristo. 9 Pampa itech Cristo, onka nochi tlen toTajtsin kuajli kipiya. 10 Yejua kinyekana gobiernos niman akin tlanauatiaj. Nemejuamej xtlaj mechpoloua pampa nennemij iuan Cristo. 11 Pampa iuan nemouikaj, kentla omechchiuilijkej circuncisión, pero yejuin circuncisión xijkon ken tlen gente kinochiuilia. Yejuin circuncisión ualeua itech Cristo niman kijtosneki tikajkauaskej nochi tlen kileuiya totlalnakayo. 12 Ijkuak omechapolaktijkej ijkon ken yejua, yeskia kentla iuan omechtokakej. Noijki, omechyolitijkej* pampa nemouikaj iuan Cristo niman pampa onentlaneltokakej itech ipoder toTajtsin, akin okikuiteuj intech akin yomikkej.

13 Noijki, toTajtsin omechkauili xnemikan iuan Cristo maski nemejuamej yonenmikkaj ipampa nemotlajtlakoluan niman maski xnenkimochiuiliayaj circuncisión. Pampa kipiya kuajli iyojlo, otechintlapopoluili nochi totlajtlakoluan 14 niman okinpopolo tlanauatiltin tlen yokimijkuilojkaj niman techixnamikiyaj. Yejua okipopolo tlanauatijli ijkuak okimiktijkej Cristo ipan kojtli melaktik.* 15 Ijkon, yejua okintlan gobiernos niman akin tlanauatiaj, niman imixpan nochimej okiteititi ika yokintlanka niman okinuikak kentla akin komontsakuaskiaj.

16 Yejua ika, maka yakaj mamechtlajtlakolmaka ipampa tlen nenkikuaj noso nenkonij noso pampa neniluichiuaj, nenkiluichiuiliaj yenkuik metstli noso pampa nemoseuiyaj sábado. 17 Yejon san kiteititiaya tlen nonekiya nochiuas, pero nochi yejuin nochiua ipan Cristo. 18 Xmotlajpiyakan intech akin san yolyemankej ijkuak oksekimej kimitaj niman intech akin kinueyichiuaj ángeles,* pampa yejuamej uelis kichiuaskej maka xselikan tlen yomechijlijkej mechmakaskej. Yejuamej san tlaneltokaj itech tlen kitaj niman noueyimatij ipampa ken tlanemiliaj maski xtlaj ika tepaleui, 19 niman xkinokauiliaj makinyekana Cristo, akin yeskia ken itsontekon tlalnakayotl. Yejua kimaka nochi tlen kipoloua tlalnakayotl niman kichiua kuajli masajsalijto. Niman ipampa* Cristo, toTajtsin kichiua ika nochi tlalnakayotl manoskalti.

20 Tla nemejuamej onenmikkej iuan Cristo niman xok nentlanemiliaj ken akin nemij ipan yejuin mundo, ¿tleka nennemij kentla ok* nenteuan yeskiaj ipan yejuin mundo? ¿Tleka ok nenkintlakamatij itlanauatiluan yejuin mundo? 21 Tlanauatiltin tlen kijtouaj “maka xkajsi, maka xkua, maka xkitski”. 22 Yejuin itlaj tlen san tlakamej tenauatiaj niman temachtiaj itech tlen gente kikua niman koni niman sakin popoliui. 23 Yejuin tlanauatiltin kichiua ika gente manesi kentla tlamachilise, pero xkipaleuiya makitelti tlen xkuajli kileuiya itlalnakayo. Ijkon panoua pampa san no yejuamej kijtouaj kenijki kiueyichiuaskej toTajtsin, nesi kentla yolyemankej maski xmelauak niman kitlajyouiltiaj intlalnakayo.

3 Pero tla nemejuamej omechyolitijkej* iuan Cristo nochipa xtejtemojtokan tlen onka tlakpak, kampa Cristo yeuatika iyekma toTajtsin. 2 San xtlanemilikan itech tlen onka tlakpak niman maka itech tlen onka ipan yejuin mundo. 3 Nemejuamej yonenmikkej niman nemonemilis iyantika iuan Cristo, pampa toTajtsin ijkon kineki. 4 Ijkuak kiteititiskej Cristo, akin yeskia kentla tonemilis, nemejuamej noijki mechteititiskej ika ueyilistli.

5 Kuakon, xkixtikan itech nemotlalnakayo tlen kichiua xauilnemikan,* tlen kichiua xchiuakan tlen xchipauak, tlen kichiua sa xnektokan nemotekaskej iuan yakaj niman tlen xkuajli nenkileuiyaj. Noijki, xkixtikan itech nemotlalnakayo tlen kichiua melak xkileuikan tlen xnemoyaxka,* pampa yejon yeskia kentla tikinueyichiuas imágenes. 6 Ipampa yejuin, toTajtsin kualanis imiuan akin ijkon kichiuaj. 7 Yeuejkaui, nemejuamej noijki ijkon nenkichiuayaj. 8 Pero aman maka sa xkualanikan, maka sa xtlauelmikikan, maka sa xchiuakan tlen xkuajli, maka sa xteijlikan tlen teyolkoko niman maka sa xkamanalokan ika tlen xchipauak. 9 Maka sa xmokajkayauakan imiuan oksekimej. Xkajkauakan tlen achto nenkichiuayaj niman ken achto nentlanemiliayaj 10 niman xmoyenkuilikan ijkon ken tla nenkinakiskiaj* se tlakentli. Nemoyenkuilijtiuej ijkuak nemomachtiaj niman nemopatlatiuej para nenkichiuaskej ijkon ken toTajtsin, akin otechchijchiuj. 11 Nochimej uelis kipiyaskej yenkuik nemilistli maski tla griegos noso judíos, tla yokinochiuilijkej circuncisión noso xokinochiuilijkej, tla xchanejkej noso tla chantij ipan tepetl,* tla tlakeualtin noso tla xtlakeualtin, pero ipan nochi niman para nochimej nemi Cristo.

12 Yejua ika, pampa nenyolchipajkej niman toTajtsin mechtlasojtla niman yomechtlapejpeni xteiknelikan, xchiuakan tlen kuajli, xyolyemankej, xyolsejtokan niman xteijyouikan. 13 Xmoxikojtokan imiuan oksekimej niman xmotlapopoluijtokan ika nemoyojlo, maski tla yakaj kinamiki makualanto iuan okse. Jehová omechtlapopolui ika nochi iyojlo, kuakon, nemejuamej noijki ijkon xchiuakan. 14 Pero noijki melak xmotlasojtlakan, pampa yejon kichiuas nochipa san sekan xnemikan.

15 Niman iyolseuilis Cristo mamechyolseui, pampa toTajtsin omechnots para xmochiuakan san se tlalnakayotl niman xyolsejtokan. Noijki, xteititikan ika nentetlasojkamachiliaj. 16 Tlen otemachti Cristo maonia ipan nemoyojlo para nemochiuaskej tlamachilisejkej. Ijkuak nemomachtiskej niman nemoyolchikauaskej imiuan oksekimej xkinkuikan* salmos, xmokuikatikan para nenkiueyichiuaskej toTajtsin niman nenkitlasojkamachiliskej. Xkuikatilikan Jehová ipan nemoyojlo. 17 Maski san tlenon nenkijtoskej noso nenkichiuaskej, xchiuakan ika itoka toTeko Jesús niman ipampa* yejua xtlasojkamachilikan toTajtsin, akin toTaj.

18 Tesiuatsitsinuan, xmokauilikan ika nemoueuentsin mamechyekana, ijkon ken kineki toTeko. 19 Teueuentsitsinuan, xtlasojtlakan nemosiuatsin niman maka ipan xmotlauelkixtikan. 20 Tekoneuan, nochipa xkintlakamatikan nemotajuan pampa yejon kuelita toTeko. 21 Tajtin,* maka xkintlauelmiktikan nemokoneuan para yejuamej maka najmanaskej. 22 Tlakeualtin, nochipa xkintlakamatikan nemotekouan, maka xchiuakan san ijkuak oksekimej mechitstoskej para nenkinyolpaktiskej on gente, xchiuakan ika nochi nemoyojlo niman pampa nenkimojkaitaj Jehová. 23 Nochi tlen nenkichiuaskej, xchiuakan ika nochi nemoalma,* kentla tla nenkichiuaskiaj para Jehová niman maka para gente. 24 Ijkon xchiuakan pampa nenkimatij ika Jehová yejua akin mechmakas herencia. Xmochiuakan itlakeualuan toTeko, Cristo. 25 Akin kichiuas itlaj tlen xkuajli kitlajyouiltiskej ipampa tlen okichiuj. ToTajtsin tetlajtlakolmakas niman xakaj kichikoitas.

4 Akin nenkinpiyaj tlakeualtin, maka xkinchikoitakan nemotlakeualuan, pampa nemejuamej nenkimatij ika noijki nenkipiyaj se nemoTeko ne ipan cielo.

2 Nochipa xchiuakan oración niman ijkuak nenkichijtoskej, xtlatlachixtokan niman xtetlasojkamachilikan. 3 Noijki, xchiuakan oración topampa niman xtlajtlanilikan toTajtsin matechkauili matikteijlikan itlajtol para uelis tikteijliskej tlen iyantoya itech Cristo, ipampa akin nitsauktika. 4 Xtlajtlanikan manikteijli ijkon ken noneki para nochimej makasikamatikan.

5 Xkimititikan akin xtlaneltokaj itech toTajtsin ika nentlamachilisejkej niman kuajli xtekitiltikan* nemotiempo. 6 Ijkon ken istatl kichiua mauelik comida, nochipa kualtsin xtenotsakan para kuelkakiskej tlen nenkijtouaj niman para nenkimatiskej kenijki nentenankiliskej.

7 Tíquico, nokniuj akin melak niktlasojtla, akin melajkanemi niman nouan chikauak kitekichiuilia toTeko, mechijlis kenijki ninemi. 8 Nimechontitlanilia para xmatikan kenijki tinemij niman para mamechyolseui. 9 Onésimo, tokniuj akin melajkanemi, akin melak niktlasojtla niman nemouan nemiya, iuan yas. Yejuamej mechijliskej nochi tlen nikan panotika.

10 Aristarco, akin iuan onechtsaukkej mechontlajpaloua niman noijki Marcos, iprimo Bernabé. Tla Marcos mechonta, noneki nenkiseliskej ika nemoyojlo ijkon ken yomechijlijkej. 11 Noijki mechontlajpaloua Jesús akin kijliaj Justo, yejua teuan intech akin yokinochiuilijkej circuncisión. San yejuamej nouan tlapaleuijtokej para tikteijliskej iGobierno toTajtsin* niman melak yonechyolseuijkej. 12 Noijki mechontlajpaloua Epafras, akin nemouan nemiya niman itlakeual Cristo Jesús. Yejua nochipa miyekpa kichiua oración nemopampa, kitlajtlanilia toTajtsin machikajto nemotlaneltok para nenmelajkanemiskej niman kuajli nenkimatstoskej tlenon kineki toTajtsin. 13 Kuajli nikmatstika ika yejua chikauak tekiti para mechpaleuis niman para kinpaleuis akin nemij Laodicea niman Hierápolis.

14 Lucas, on doctor akin melak tiktlasojtlaj mechontlajpaloua, niman noijki Demas. 15 Xnechintlajpalouilikan tokniuan de Laodicea, noijki tokniuj Ninfa niman tokniuan de tlanechikojli akin nosentlaliaj ichan. 16 Ijkuak yotlan nenkileerouaj yejon carta noijki xkitakan makileerokan ipan intlanechikol tokniuan de Laodicea. Niman nemejuamej noijki xkinleerouilikan carta tlen okomontitlanilijkej akin chantij Laodicea. 17 Noijki xkijlikan Arquipo: “Kuajli xchiua tekitl tlen omitsmakak toTeko”.

18 Nejua, Pablo, nikijkuiloua yejuin ika noma. Xkilnamikikan ika nitsauktika. Nikchia ika nochipa mamechiknelikan maski xmechnamiki.