1 TESALONICENSES

1 Nejua Pablo, Silvano* niman Timoteo timechontlajpalouaj nokniuan akin nennemij ipan tlanechikojli de Tesalónica, nemejuamej akin neniyaxkauan* toTeko Jesucristo niman toTajtsin, akin toTaj.

ToTajtsin mamechikneli maski xmechnamiki niman mamechyolseui.

2 Nochipa tiktlasojkamachiliaj toTajtsin ijkuak timechteneuaj ipan tooraciones. 3 Ijkuak tinemij ixpan toTajtsin, akin toTaj, nochipa tikilnamikij nemotekiyo tlen nenkichiuaj, kenon nentetlasojtlaj niman kenon nentlaxikouaj pampa nentlaneltokaj itech toTeko Jesucristo. 4 Nokniuan, toTajtsin melak mechtlasojtla niman tejuamej tikmatstokej ika yejua yomechtlapejpeni. 5 Pampa xsan tejuamej otimechijlijkej kuajli tlajtoltin, otechpaleui espíritu santo. Ijkuak otimechnojnotskej, kuajli tikmatstoyaj ika tlen timechijlijtoyaj yejon tlen melauak. Niman tlen otimechijlijkej melak yomechpaleui. Nemejuamej kuajli nenkimatstokej nochi tlen ononek tikchiuaskej san para timechpaleuiskej. 6 Noijki, onenkichijkej ken tejuamej niman ken toTeko, pampa maski onentlajyouijkej onenkiselijkej itlajtol toTajtsin ika pakilistli tlen ualeua itech espíritu santo. 7 Ijkon, onenkimititijkej tlenon noneki kichiuaskej akin otlaneltokakej itech itlajtol toTajtsin, akin nemij ne Macedonia niman Acaya.

8 Nemejuamej yonentepaleuijkej manoteijli itlajtol Jehová ne Macedonia niman Acaya niman noijki nochiuiyan yekimatij kenon nemejuamej nentlaneltokaj itech toTajtsin, yejua ika, xok noneki más itlaj tikijtoskej. 9 Pampa yejuamej ok* kilnamikij ijkuak kachtopa otoitakej niman kenon nemejuamej xok onenkinueyichijkej nemoimágenes niman onemochijkej itlakeualuan se toTajtsin akin yoltika niman melauak. 10 Noijki para nenkichiaskej iKoneuj, akin nemi ne ipan cielo, akin okikuiteuj itech akin yomikkej. Kema, nenkichiaskej Jesús, akin techmakixtia itech on itlauel toTajtsin tlen uajlauj.*

2 Nokniuan, kuajli nenkimatstokej ika xsan nenka otimechtlajpalotoj. 2 Ken nenkimatij, ne Filipos melak otitlajyouijkej niman otechchiuilijkej tlen xkuajli. Pero, toTajtsin otechyolchikauj para matikteijlikan on kuajli tlajtoltin maski titlajyouijtoyaj. 3 Tejuamej nochipa otimechijlijkej tlen melauak, tlen chipauak niman xotimechkajkayajkej. 4 Pampa toTajtsin yotechseli niman yotechkauili matikteijlikan kuajli tlajtoltin, xtikteijliaj tlen san kiyolpaktia gente. Tejuamej tiknekij tikyolpaktiskej toTajtsin, akin kita tlen onka ipan toyojlo.

5 Noijki, nemejuamej nenkimatij ika tejuamej xtiknekij matechueyiteneuakan, nion xtikchiuaj itlaj para maka manesi ika tikileuiyaj tlen xtoyaxka.* ¡ToTajtsin kuajli kimatstika! 6 Nion xtikchiaj ika on tlakamej nion nemejuamej xtechueyiteneuakan, maski ueliskia timechtlajtlaniliskej tomin pampa tiapóstoles de Cristo. 7 Tejuamej melak timechtlasojtlaj, ijkon ken se nantli kinchichitia niman kualtsin kintlajpiya ikoneuan. 8 Kuakon, pampa melak timechtlasojtlayaj, xsan otiknekkej timechijliskej kuajli tlajtoltin itech toTajtsin, noijki otiknekkej tiktemakaskej tonemilis nemopampa, pampa melak otimechtlasojtlakej.

9 Kanaj nenkilnamikij, nokniuan, kenijki chikauak otitekitkej niman melak otokojtilijkej. Ijkuak otimechijlijkej kuajli tlajtoltin itech toTajtsin, otitekitkej ika tonajli niman ika yeuajli para xtimechtlajtlaniliskej tomintsin. 10 ToTajtsin niman nemejuamej akin nentlaneltokaj, nenkimatstokej ika nemotech otimelajkanenkej, otikchijkej tlen kuajli niman xtlaj ika otechtlajtlakoltijkej. 11 Kuajli nenkimatstokej ika timechijliayaj tlen nonekiya nenkichiuaskej, timechyolseuiayaj niman timechnojnotsayaj itech toTajtsin, ijkon ken se tajtli kichiua iuan ikoneuan. 12 Ijkon otikchijkej para nochipa xchiuakan tlen kineki toTajtsin, akin mechnotstika ipan iGobierno niman iueyilis.

13 Yejua ika, tejuamej noijki nochipa tiktlasojkamachiliaj toTajtsin, pampa ijkuak nemejuamej onenkikakkej itlajtol toTajtsin tlen otimechijlijkej, xonenkiselijkej ken itlajtol on tlakamej, onenkiselijkej ken noneki nenkiseliskej, ken itlajtol toTajtsin. Itlajtol toTajtsin mechpaleuijtika nemejuamej akin nentlaneltokaj. 14 Nokniuan, nemejuamej yonenkichijkej ijkon ken akin kichiuaj ken Cristo Jesús, akin nemij ipan itlanechikoluan toTajtsin ne Judea. Yejua ika, nemejuamej noijki yomechtlajyouiltijkej akin nemij ipan nemopaís, ijkon ken judíos noijki kintlajyouiltijtokej akin nemij ne Judea. 15 Yejuamej hasta okimiktijkej toTeko Jesús niman teotlajtojkej, niman noijki otechtlajyouiltijkej. Xkiyolpaktijtokej toTajtsin, niman tlen kichiuaj kimijtlakoua nochimej. 16 Ijkon tikijtouaj pampa xtechkauiliaj matikinnojnotsakan akin xjudíos para uelis makisaskej. Yejuamej nochipa kinmiyekilijtokej intlajtlakoluan. Pero itlauel toTajtsin inpan youajla.

17 Nokniuan, ijkuak otechxelojkej se tiempo nemotech, tejuamej xotimechilkajkej. Sa tiknektoyaj timechitaskej* niman otokojtilijkej ijkon tikchiuaskej. 18 Yejua ika, tiknekiyaj timechontlajpaloskej. Kema, san no nejua, Pablo, hasta okpa onikyejyeko. Pero, Satanás xotechkauili. 19 Pampa nemejuamej akin timechchiaj, akin kichiuaj matipakikan, akin nenyeskej kentla tocoronas tlen techyolpaktiaj ixpan toTeko Jesús ijkuak yetouan nemis. 20 Kema, nemejuamej nenkichiuaj matechueyiteneuakan niman matiyolpakikan.

3 Yejua ika, ijkuak xok otitlaxikojkej, otiknemilijkej toselti tokauaskej ne Atenas. 2 Tejuamej otimechontitlanilijkej tokniuj Timoteo, akin kitekichiuilia toTajtsin pampa kiteijlia kuajli tlajtoltin itech Cristo. Otikontitlankej para mamechyolchikaua niman mamechyolseui. Yejon mechpaleuis machikaui nemotlaneltok 3 niman ok* xtlaneltokakan maski nenkixnamiktokej tlen xkuajli. Nemejuamej kuajli nenkimatstokej ika nochimej noneki titlajyouiskej. 4 Ijkuak nemouan tinemiyaj, timechijliayaj ika titlajyouiskiaj, niman, ken nenkimatij, ijkon opanok. 5 Nejua melak niknekiya nikmatis kenijki nennemij. Yejua ika, onikontitlan Timoteo para nikmatis tla ok nenmelajkanentoyaj noso tla Diablo yokichijka xtlajtlakokan, pampa tla ijkon yeskia, tekitl tlen yotikchijkaj xtlaj ika tepaleuiskia.

6 Pero, Timoteo yonokuepato niman otechijli ika nemejuamej nenmelajkanemij niman nemotlasojtlaj. Noijki kijtoua ika nochipa nentechilnamikij niman ika sa nenkinektokej nentechitaskej, ijkon ken tejuamej. 7 Yejua ika, nokniuan, pampa nemejuamej nenmelajkanemij, melak yonentechyolseuijkej maski miyek tikijyouiyaj niman tikixnamikij. 8 Pampa tejuamej tikmachiliaj ika tiyolpakij* tla nemejuamej nenmelajkanemij itech toTeko. 9 ¿Kenijki uelis tiktlasojkamachiliskej toTajtsin pampa nemejuamej nenkichiuaj matiyolpakikan ixpan? 10 Ika tonajli niman ika yeuajli, miyekpa melak tiktlajtlaniliaj toTajtsin para uelis timechitaskej* niman timechpaleuiskej machikaui nemotlaneltok.

11 Tikchiaj ika toTajtsin, akin toTaj niman toTeko Jesús matechpaleuikan para uelis timechontaskej. 12 Niman tikchiaj ika toTeko mamechpaleui más xmotlasojtlakan imiuan oksekimej, ijkon ken tejuamej timechtlasojtlaj. 13 Ijkuak toTeko Jesús yetouan nemis imiuan nochimej ikniuan tlapejpeniltin, yejua kichiuas xyolmelajkanemikan niman maka xpiyakan tlajtlakojli para nenchipajkanemiskej ixpan toTajtsin.

4 Nokniuan, yotimechititijkej kenijki noneki nennemiskej para nenkiyolpaktiskej toTajtsin, niman ijkon nenkichijtokej. Pero, aman miyekpa timechtlajtlaniliaj ipampa toTeko Jesús, ika más xmokojtilikan ijkon nenkichiuaskej. 2 Nemejuamej yenenkimatij tlen otechijli toTeko Jesús matimechnauatikan.

3 ToTajtsin kineki ika xchipajkanemikan niman maka xauilnemikan.* 4 Cada se de nemejuamej noneki kimatis kenijki kiyekanas itlalnakayo* para makitakan ika chipauak niman makitlakaitakan. 5 Maka melak xnektokan nemotekaskej iuan yakaj niman maka xkileuijtokan yejon, ijkon ken kichiuaj akin xkixmatij toTajtsin. 6 Xakaj noneki kichiuilis tlen xkuajli ikniuj para kikajkayauas, pampa ijkon ken yotimechijlijkej, Jehová kintlajyouiltis akin ijkon kichiuaj. 7 Pampa toTajtsin otechnots para matichipajkanemikan, maka para matikchiuakan tlen xchipauak. 8 Kuakon, akin chipajkanemij, xkintlakamatij tlakamej, kitlakamatstokej toTajtsin akin kinmaka espíritu santo.

9 Nokniuan, xnoneki timechijliskej kenijki noneki nenkintlasojtlaskej oksekimej pampa toTajtsin yemechmachtijtika kenijki nemotlasojtlaskej imiuan oksekimej. 10 Nemejuamej yenenkintlasojtlaj tokniuan de Macedonia. Pero, timechyolchikauaj, nokniuan, ika más xkintlasojtlakan oksekimej. 11 Ijkon ken yotimechnauatijkej, xmokojtilikan para nenyolsejtoskej imiuan oksekimej, para maka nemokalaktiskej kampa xnoneki niman para xtekitikan. 12 Ijkon, akin xkichiuaj ken Cristo, kitaskej ika nenchipajkanemij niman xtlaj mechpoloua.

13 Nokniuan, maka xkilkauakan tlen inpan nochiuas akin yomikkej para maka nenmajmanaskej ijkon ken akin xtlaj kichiaj kiseliskej. 14 Pampa tla tikneltokaj ika Jesús omik niman okiyolitijkej* noijki tikneltokaskej ika toTajtsin kinyolitis para nemiskej iuan Jesús, akin okichijkej ken yejua niman itech omelajkanenkej. 15 Ika tlen kijtoua itlajtol Jehová timechijliaj ika akin tiyoltoskej ijkuak toTeko yetouan nemis, tiaskej ne cielo. Pero kachtopa kinyolitiskej akin yomikkej, niman sakin tejuamej techyolitiskej. 16 Pampa toTeko uajtemos de ne ipan cielo. Yejua chikauak tlajtos ken se arcángel niman ompa kipixtos itrompeta toTajtsin, niman kachtopa kinyolitiskej* akin okichijkej ken Cristo. 17 Satepan, akin tiyoltoskej niman timakisaskej imiuan tiaskej ipan moxtli para tonamikiskej iuan toTeko ipan ajakatl, niman ijkon nochipa tinemiskej iuan toTeko. 18 Kuakon, xmoyolchikajtokan imiuan oksekimej ika yejuin tlajtoltin.

5 Nokniuan, xnoneki timechtlajkuilouiliskej itech tlen hora noso tlen tonajli yokitlapejpeni toTajtsin. 2 Pampa nemejuamej kuajli nenkimatstokej ika itonal Jehová yejkos ijkon ken ijkuak yakaj ontlachteki ika tlayoua. 3 Ijkuak yejuamej kijtojtoskej “¡Aman kuajli tinemij niman xtlaj techajmana!”, nimantsin kinpopoloskej, xakaj uelis makisas. Yejuin nochiuas kentla ijkuak se siuatl san nimantsin peua nokokoua pampa kipiyas ikonetsin. 4 Pero nemejuamej nokniuan, xnennemij kampa tlayouatok, yejua ika, itonal toTajtsin xnemopan yejkotiuetsis ken ijkuak yakaj akin tlachteki ipan yejkotiuetsi itlauil tonajli. 5 Nochimej nemejuamej nennemij kampa tlauijli niman nennemij kampa tonajli. Tejuamej xtiiyaxkauan* tlayoua nion tlayoualyotl.

6 Kuakon, maka matikochikan ijkon ken kichiuaj oksekimej. Matitlatlachixtokan niman kuajli matikpiyakan totlamachilis. 7 Akin kochij, kochij ika tlayoua, niman akin tlauanij, tlauanij ika tlayoua. 8 Pero tejuamej akin tiiyaxkauan tonajli kuajli matikpiyakan totlamachilis, matitlaneltokakan niman matitetlasojtlakan ijkon ken tla tiktsakuiliskiaj toyelpan ika se ueyi tepostli. Niman matitlanemilikan itech tlen tikseliskej ijkon ken tla tomaniltiskiaj se casco. 9 Pampa toTajtsin xotechtlapejpeni para tikseliskej itlauel, otechtlapejpeni para techmakixtis ipampa* toTeko Jesucristo. 10 Yejua omik topampa para iuan tinemiskej maski tla tiyoltokej noso yotimikkej. 11 Kuakon, xmoyolseuijtokan niman xmoyolchikajtokan imiuan oksekimej, ijkon ken yenenkichijtokej.

12 Aman, nokniuan, timechtlajtlaniliaj xkintlakaitakan akin chikauak tekitij nemopampa, akin mechyekanaj ipan itekiyo toTeko niman akin mechijliaj tlenon nenkichiuaskej. 13 Xkimititikan ika nenkitlasojkamatij tlen kichiuaj niman xkintlasojtlakan ipampa intekiyo. Xyolsejtokan imiuan oksekimej. 14 Noijki, nokniuan, timechtlajtlaniliaj xkinpaleuikan akin xtetlakamatij, xkinyolchikauakan akin noyolajmanaj, xkinpaleuikan akin xkojtikej niman nochimej xkimijyouikan. 15 Xkitakan ika maka yakaj manotlakuepilti, más kuajli tla nemokojtiliaj nenkinchiuiliskej tlen kuajli akin tokniuan niman noijki oksekimej.

16 Nochipa xyolpakikan. 17 Miyekpa xchiuakan oración. 18 Nochi xtlasojkamatikan. Yejuin tlen toTajtsin kineki xchiuakan nemejuamej akin nenkichiuaj ken Cristo Jesús. 19 Xkauilikan iespíritu santo toTajtsin mamechyekana, maka xteltikan.* 20 Xtlakaitakan tlen kijtouaj teotlajtoltin. 21 Nochipa xkitakan tla melauak tlen mechijliaj niman xmokojtilikan nenkichiuaskej tlen kuajli. 22 Xkajkauakan nochi tlen xkuajli.

23 Niktlajtlanilia toTajtsin, akin kichiua matiyolsejtokan, kuajli mamechchipaua. Nokniuan, noijki niktlajtlani ika ijkuak yetouan nemis toTeko Jesucristo, kuajli maonia nemotlamachilis,* nemoyojlo* niman nemotlalnakayo machipauak. 24 Akin mechnotstika xkeman tlakajkayaua niman kichiuas ijkon ken yomechijli.

25 Nokniuan, nochipa xchiuakan oración topampa.

26 Xkintlajpalokan nochimej tokniuan ika se beso kentla nemikniujtin yeskiaj.

27 Ipampa itoka toTeko, nimechnauatia xkinleerouilikan yejuin carta nochimej tokniuan.

28 Niktlajtlani ika toTeko Jesucristo mamechikneli maski xmechnamiki.