2 TESALONICENSES

1 Nejua Pablo, Silvano* niman Timoteo, timechontlajpalouaj nokniuan akin nennemij ipan tlanechikojli de Tesalónica, nemejuamej akin neniyaxkauan* toTeko Jesucristo niman toTajtsin, akin toTaj.

2 Niktlajtlanilia toTajtsin, akin Tajtli, niman noijki toTeko Jesucristo ika mamechikneli maski xmechnamiki niman mamechyolseui.

3 Nokniuan, nochipa tikmachiliaj ika noneki tiktlasojkamachiliskej toTajtsin nemopampa. Melak kuajli tla ijkon tikchiuaj, pampa nemotlaneltok melak noskaltijtiuj niman pampa más nemotlasojtlatiuej imiuan oksekimej. 4 Yejua ika, melak tiyolpakij ijkuak tikimijliaj okseki tlanechikoltin kenijki nemejuamej nentlaxikojtokej niman kenijki nentlaneltokaj, maski mechtlajyouiltiaj niman nenkixnamikij tlen xkuajli. 5 Nochi yejuin kiteititia ika toTajtsin xtechikoita ijkuak tetlajtlakolmaka. Niman kichiua mamechnamiki xselikan iGobierno, tlen ipampa nentlajyouijtokej.

6 Noijki, kinamiki ika toTajtsin makintlajyouilti akin mechtlajyouiltijtokej. 7 Pero, nemejuamej akin nentlajyouijtokej, mechyolseuiskej ijkon ken tejuamej, ijkuak toTeko Jesús uajnonextis ne ipan cielo iuan iángeles akin melak kojtikej. 8 Kema, uajnonextiskej ipan se ueyi tlitl. Jesús notlakuepiltis inpan akin xkixmatij toTajtsin niman inpan akin xkitlakamatij kuajli tlajtoltin itech yejua. 9 ToTeko kintlajtlakolmakas. Kinpopoloskej para nochipa. Kuakon, xok kimitas niman xok kinpaleuis ika iueyipoder. 10 Ijkon panos ijkuak akin yejua yokintlapejpeni kiueyiteneuaskej niman ijkuak akin yokiteititijkej ika tlaneltokaj, kitlakaitaskej. Ijkon nemopan nochiuas pampa nemejuamej onenkineltokakej tlen otimechijlijkej.

11 Yejua ika, nochipa tikchiuaj oración nemopampa. Tiktlajtlaniliaj toTajtsin mamechseli ken akin kinnamiki makintlapejpeni, niman noijki tiktlajtlaniliaj ika ipoder makichiua nochi tlen kuajli kinekis niman makitlamilti tekitl tlen nenkichiuaj pampa nentlaneltokaj. 12 Ijkon, itoka toTeko Jesús kiueyiteneuaskej ika tlen nemejuamej nenkichiuaj niman pampa iuan nemouikaj, yejon kiteititis ika toTajtsin niman toTeko Jesucristo mechikneliaj maski xmechnamiki.

2 Nokniuan, nemejuamej nenkimatij ika toTeko Jesucristo yetouan nemis niman ika iuan tosentlaliskej. Yejua ika, timechtlajtlaniliaj ika 2 nochipa kuajli xtlanemilikan niman maka xmomojtikan tla tlen kijtoua yakaj nesi kentla toTajtsin okijli. Noijki, maka xmomojtikan tla yakaj itlaj mechijlia noso kijtoua ika ipan se tocarta otikijtojkej ika yoyejkok itonal Jehová.

3 Maka yakaj mamechkajkayaua. Pampa achto ajsis yejon tonajli sekimej kixnamikiskej toTajtsin, noijki uajnonextis yejon tlakatl akin kixnamiki tlanauatijli niman kipopoloskej. 4 Yejua teixnamiki niman kinemilia ika más ueyixtika xijkon ken okseki dioses niman okseki tlen kiueyichiuaj. Yejua ika, noseuiya ipan itemplo toTajtsin niman san no yejua noteititia kentla se dios. 5 ¿Xnenkilnamikij ika nejua nimechijliaya yejuin ijkuak ok* nemouan ninemiya?

6 Aman yenenkimatij akinon kitsakuilijtok yejon tlakatl akin kixnamiki tlanauatijli para maka manoteititi achto ajsis tonajli. 7 Yejon tlakatl san ichtaka kichijtok tlen xkuajli. Pero, san ijkon kichijtos hasta ijkuak xok nemis akin aman kitsakuilijtika. 8 Ijkuakon, noteititis yejon tlakatl akin kixnamiki tlanauatijli, pero toTeko Jesús kipopolos ika itlajtoluan tlen kipiyaj poder. Jesús ijkon kichiuas ijkuak yetouan nemis. 9 Pero, yejon tlakatl akin kixnamiki tlanauatijli uajnesi pampa Satanás kipaleuiya. Kichiua miyek tlen kiteititia ika kipiya poder niman tlen temojkatlachialti niman milagros* para tekajkayaua. 10 Yejua kinkajkayaua akin kinpopoloskej, ijkon, kiseliskej tlen kinnamiki pampa xokiselijkej tlamachtijli tlen melauak, tlen ueliskia kinpaleuiskia mamakisakan. 11 Yejua ika, toTajtsin kitekauilia makinkajkayauakan para makineltokakan tlen xmelauak. 12 Ijkon, nochimej yejuamej kintlajtlakolmakaskej pampa xotlaneltokakej itech tlen melauak niman onoyolpaktijkej ika tlen xkuajli.

13 Nokniuan, Jehová melak mechtlasojtla. Tejuamej nochipa tikmachiliaj ika noneki tiktlasojkamachiliskej toTajtsin nemopampa. Ijkon tikmachiliaj pampa, desde ijkuak nochi opeuj, toTajtsin omechchipauj ika iespíritu niman pampa onentlaneltokakej itech tlen melauak para mechmakixtis. 14 Yejua omechnots ika yejon kuajli tlajtoltin tlen tejuamej otimechijlijkej para noijki xselikan yejon ueyilistli tlen kipiya toTeko Jesucristo. 15 Kuakon, nokniuan, xmelajkanemikan niman maka xkajkauakan tlen omechmachtijkej. Ijkon xchiuakan maski tla san omechijlijkej noso omechleerouilijkej ipan se tocarta. 16 ToTeko Jesucristo niman toTajtsin akin toTaj, otechtlasojtlak niman nochipa otechyolseui niman otechijli ika itlaj techmakas pampa otechikneli maski xtechnamiki. 17 Tiktlajtlanij ika mamechyolseuikan niman mamechkojtilikan para nenkijtoskej niman nenkichiuaskej nochi tlen kuajli.

3 Sa ika tlami, nokniuan, xtlajtlanilikan Jehová topampa para ijkon más miyekan noteijlis itlajtol niman miyekej kuajli kiseliskej, ijkon ken nemejuamej onenkiselijkej. 2 Noijki, xtlajtlanilikan matechmakixtikan intech akin xkuajkualtin niman tetlajyouiltiaj, pampa xnochimej tlaneltokaj. 3 Pero, toTeko yolmelajki niman mechyolchikauas niman mechmakixtis itech Satanás.* 4 Noijki, pampa kuajli touikaj iuan toTeko, kuajli tikmatstokej ika nenkitlakamatij niman ika nochipa nenkichiuaskej tlen timechijliaj. 5 ToTeko mamechyekana para mamechtlasojtla toTajtsin niman xtlaxikokan para uelis nenkitekichiuiliskej Cristo.

6 Aman, nokniuan, ika itoka toTeko Jesucristo timechnauatiaj xmoxelokan intech tokniuan akin xtetlakamatij niman xkitlakamatij tlen otimechmachtijkej.* 7 Nemejuamej kuajli nenkimatij kenijki noneki nenkichiuaskej ken tejuamej, pampa nochipa otitetlakamatkej ijkuak nemouan tinemiyaj 8 niman ototlanilijkej tlen tikuaskej. Tejuamej ika tonajli niman ika yeuajli, xotoseuijkej niman chikauak otitekitkej para xakaj tiktlajtlanilijtoskej tomin. 9 Niman ueliskia timechtlajtlaniliskej tomin, pero tiknekiyaj timechititiskej tlen noneki nenkichiuaskej. 10 Ijkuak nemouan tinemiyaj, ijkon otimechnauatijkej: “Tla yakaj xkineki tekitis, noijki maka matlakua”. 11 Yotiktekakilijkej ika sekimej xtetlakamatij, pampa xtekitij niman nokalaktiaj kampa xkinnotsaj. 12 Akin ijkon kichiuaj tikinnauatiaj niman tikintlajtlaniliaj ika itoka toTeko Jesucristo maka manokalaktikan kampa xnoneki niman san no yejuamej makinotlanilikan tlen kikuaskej.

13 Nemejuamej, nokniuan, nochipa xchiuakan tlen kuajli. 14 Pero, tla yakaj xkichiua tlen tikijtouaj ipan yejuin carta, kuajli xkitakan akinon niman maka ok* iuan xmouikakan, para mapinaui. 15 Pero, maka xtlauelitakan. Nochipa xkijlijtokan tlen noneki kichiuas, kentla nemokniuj yeskia.

16 Tiktlajtlaniliaj toTeko akin teyolseuiya ika nochipa mamechyolseuijto. ToTeko nemouan manemi.

17 Nejua, Pablo, nikijkuiloua yejuin ika noma, yejuin itlaj tlen nochi nocartas kipiyaj. Ijkon nitlajkuiloua.

18 ToTeko Jesucristo mamechikneli nochimej nemejuamej maski xmechnamiki.