1 TIMOTEO

1 Nejua niPablo, Cristo Jesús onechtlapejpeni para maninochiua iapóstol pampa toTajtsin, akin toTemakixtijkauj ijkon otlanauati niman noijki Cristo Jesús, akin tikchiaj matechmaka tlen yotechijli. 2 Nimitstlajkuilouilia tejua Timoteo,* akin tiyeskia kentla tinokoneuj pampa noijki titlaneltoka ken nejua.

Niktlajtlanilia toTajtsin akin toTaj, niman Cristo Jesús akin toTeko, miyek tlemach mamitsmakakan,* mamitsiknelikan niman mamitsyolseuikan.

3 Ijkuak yeniaskia ne Macedonia, onimitsijli xmokaua Éfeso niman aman noijki ijkon nikchiua. Nimitstlajtlanilia xkinnauati oksekimej maka okse itlaj matemachtikan 4 nion maka makinkaktinemikan cuentos tlen xmelajkej niman maka makimitstinemikan intoka tochanejkauan akin yeuejkaui onenkej. Nochi yejuin san tekuilia tiempo. San kichiua makiteneuakan tlen xtlaj ika tepaleui niman tlen xkichikaua totlaneltok, ijkon ken kineki toTajtsin. 5 Yejuin nimechnauatia para tinochimej matotlasojtlakan ika nochi toyojlo, matikpiyakan chipauak totlamachilis niman matitlaneltokakan ika nochi toyojlo. 6 Akin xijkon kichiuaj san teuan nokualanijtinemij. 7 Kinekij temachtiskej itech tlanauatijli pero xkasikamatij tlen kijtouaj nion tlen kitechiualtisnekij makineltokakan.

8 Tejuamej tikmatstokej ika Tlanauatijli tepaleui tla tikchiuaj ken noneki. 9 Niman noijki tikmatstokej ika tlanauatijli xonotlali para akin kipiyaj kuajli inyojlo. Onotlali para akin xkitlakamatij tlanauatijli, akin kichiuaj tlen kinekij, akin xtetlakaitaj, akin kichiuaj tlajtlakojli, akin xyolmelajkej, akin xkiseliaj tlen ualeua itech toTajtsin, akin kinmiktiaj intajuan, akin kinmiktiaj innanuan, akin temiktiaj, 10 tlakamej akin notekaj iuan tlakamej, akin auilnemij,* akin teichtekij, akin tlakajkayauaj, akin itlaj kijtouaj niman xkichiuaj, niman nochi tlen kixnamiki tlen kuajli yotechmachtijkej. 11 Yejuin tlen otechmachtijkej ualeua itech kuajli tlajtoltin tlen otechinmakak toTajtsin akin yolpaki. Yejua onechtlali para manikinteijli yejuin kuajli tlajtoltin.

12 ToTeko Cristo Jesús onechmakak poder niman niktlasojkamachilia pampa okitak ika uelis nikchiuas tekitl tlen onechmakak. 13 Yejua ijkon okichiuj maski nikteijliaya tlen xkuajli, nitetlajyouiltiaya niman xnitetlakaitaya. Pero onechiknelijkej pampa xnikmatiya tlen nikchijtoya niman xnitlaneltokaya. 14 Pero, toTeko melak onechikneli maski xnechnamiki, okichiuj manitlaneltoka niman melak onechtlasojtlak ipampa Cristo Jesús. 15 Nochimej noneki kineltokaskej niman kiseliskej ika Cristo Jesús ouajla ipan yejuin mundo para kinmakixtis akin tlajtlakolejkej. De nochimej yejuamej nejua akin más xnikuajli. 16 Pero onechiknelijkej, nejua, akin más nitlajtlakole. Ijkon onochiuj, para ika tlen nikchiua, Cristo Jesús kiteititis ika kimijyouiya nochimej akin itech tlaneltokaj para kiseliskej nemilistli tlen xkeman tlamis.

17 Nochipa makitlakaitakan niman makiueyiteneuakan san toTajtsin, yejua Rey akin nochipa nemi, akin nochipa yoltika, akin xakaj keman kita. Amén.

18 Timoteo, nokoneuj, tlen nimitsnauatia notlajtolnamiki ika tlen okijtojkej teotlajtojkej ika tikchiuaskia. Yejon mitspaleuis xnemi ken se soldado akin kimati kenijki tlaixnamikis. 19 Nochipa xtlaneltoka niman chipauak xpiya motlamachilis. Sekimej xok ijkon kichiuaj, yejua ika, yokipolojkej intlaneltok ijkon ken se barco tlen yoapolak. 20 Ijkon okichijkej Himeneo niman Alejandro. Nejua onikinmaktili Satanás, para ijkuak tlajyouiskej kimatiskej ika xnoneki kijtoskej tlen xkuajli itech toTajtsin.

2 Kuakon, kachtopa nimechijlia ika melak kuajli tla miyekpa nenkichiuaj oración niman nenkitlasojkamachiliaj toTajtsin inpampa nochimej, 2 inpampa reyes niman inpampa akin tlanauatiaj, ijkon uelis kuajli tiktekichiuiliskej toTajtsin ika nochi toyojlo. 3 ToTajtsin akin toTemakixtijkauj, kita ika yejuin kuajli niman kiyolpaktia. 4 Yejua kineki ika nochimej mamakisakan niman kuajli makixmatikan tlen melauak. 5 Pampa nemi san se toTajtsin, niman nemi san se akin tlapaleuiya itech ken toTajtsin yonotlajtolkauj iuan gente. Yejua okitlapejpeni se tlakatl, Cristo Jesús, 6 akin onotemakak inpampa nochimej. Yejon itlaj tlen noteijlis ijkuak ajsis tiempo. 7 Nejua xnimechkajkayaua ijkuak nimechijlia ika onechtlapejpenijkej ken apóstol niman para manitenojnotsa, para manikinmachti akin xjudíos tlen melauak niman kenijki tlaneltokaskej.

8 Yejua ika, nikneki ika nochiuiyan ijkuak tlakamej kichiuaskej oración manomateketsakan niman mayolchipajkej, maka makualanikan niman maka teuan manajuakan. 9 Noijki, siuamej kuajli manokualnextikan niman kuajli manotlakentikan, niman makitekitiltikan* tlen kiteititis ika kuajli tlanemiliaj, maka melak manajmanakan itech kenijki kikualnextiskej intson, maka melak makitekitiltikan oro noso perlas noso maka makinakikan* intlaken tlen melak patioj. 10 Yejuamej noneki nokojtiliskej kichiuaskej tlen kuajli, ijkon ken kichiuaj siuamej akin kijtouaj ika kiueyichiuaj toTajtsin.

11 Siuamej san matlakaktokan niman mayolyemankej ijkuak kinmachtiskej. 12 Xnikneki ika siuamej makinmachtikan niman makinyekanakan tlakamej, yejuamej san noneki tlakaktoskej. 13 Pampa kachtopa okichijchijkej Adán niman satepan Eva. 14 Noijki, Adán xokikajkayajkej, siuatl yejua akin okikajkayajkej niman onochiuj tlajtlakole. 15 Pero, kuajli tla se siuatl kinpiya ikoneuan pampa yejon kipaleuis maka makichiua tlen xkuajli. Noijki kipaleuis tla nochipa tlaneltoka, tetlasojtla, chipajkanemi niman kuajli tlanemilia.

3 Uelis tikneltokaskej ika melak kuajli tla se tlakatl nokojtilijtika pampa kineki tlayekanketl yes. 2 Kuakon, akin tlayekanas xnoneki kichiuas itlaj tlen ika uelis kixkoijliskej, noneki san se isiuauj kipiyas niman nochi kichiuas ken kinamiki, noneki kuajli tlanemilis, nochi kichiuas ken noneki, kuajli teselis niman noijki uelis temachtis. 3 Xnoneki tlauanis nion teuijsokis,* noneki teasikamatis, xnoneki nokalaktis ipan tlauejli nion kitlasojtlas tomin. 4 Noneki yes se tlakatl akin kuajli kiyekana ifamilia, niman ikoneuan makitlakamatikan niman makichiuakan tlen kuajli. 5 Pampa tla se tlakatl nion xueli kiyekana ifamilia, ¿kenijki kintlajpiyas akin nemij ipan tlanechikojli? 6 Xnoneki yes se tlakatl akin kemach opeuj tlaneltoka itech Cristo para maka noueyimatis niman kitlajtlakolmakaskej ijkon ken okitlajtlakolmakakej Diablo. 7 Noijki, noneki kuajli itech matlajtokan nochimej akin xkixmatij toTajtsin, para xakaj itlaj kixkoijlis niman xuetsis ipan se itrampa Diablo.

8 Noijki, siervos ministeriales noneki yeskej akin kintlakaitaj, xnoneki tlakajkayauaskej nion koniskej miyek vino nion xnoneki yeskej akin kitlasojtlaj tomin niman san kinekij kichiuaskej tlen kinpaleuis. 9 Noneki nochipa tlaneltokaskej itech tlen toTajtsin kiyantoya pero aman yotechijli niman noneki chipauak kipiyaskej intlamachilis.

10 Noijki, kachtopa noneki kitaskej tla kema uelis kichiuaskej tekitl tlen kinmakaskej. Tla xonka itlaj tlen ika kimixkoijliskej, matlapaleuikan.

11 Siuamej noneki kichiuaskej tlen kinpaleuis makintlakaitakan niman xnoneki tetlajtolchijchiuiliskej, nochi makichiuakan ken kinamiki niman mamelajkanemikan.

12 Akin siervos ministeriales noneki san se insiuauj kipiyaskej niman kuajli kinyekanaskej inkoneuan niman noijki infamilia. 13 Pampa tlakamej akin kuajli kichiuaj intekiyo kuajli intech tlajtouaj niman xtlaj kintsakuilia kiteijliskej ika tlaneltokaj itech Cristo Jesús.

14 Maski nikchia nimantsin nimitsontas, nimitsijkuilouilia yejuin 15 para tla niuejkaui, tikmatis kenijki tinemis ken akin teuan itech ifamilia toTajtsin, yejuin itlanechikol toTajtsin akin yoltika, tlen kimanauiya niman kipaleuiya tlen melauak. 16 Kema, melak kuajli iyantoya niman xakaj kimatiya akinon melajkanemiskia itech toTajtsin: ‘Jesús onochiuj tlakatl, toTajtsin okitak ika kipiya kuajli iyojlo niman okichiuj oksejpa manemi ne ipan cielo, ouajnonexti imixpan ángeles, nochi pueblos okinnojnotskej itech yejua, itech otlaneltokakej ipan yejuin mundo, ne tlakpak okiselijkej ika ueyilistli’.

4 Pero, itlajtol toTajtsin* kuajli kijtoua ika nemiskej sekimej akin xtlaneltokaskej pampa kinkakiskej akin tekajkayauaj niman kikakiskej tlen temachtiaj demonios. 2 Yejuamej kinkakiskej akin tlakajkayauaj niman akin xok itlaj kimachiliaj ipan intlamachilis pampa kentla yokintlalilijkej se marca ika se tepostli totonki. 3 Yejuamej xkitekauiliaj manonamiktikan niman kinnauatiaj on gente maka makikuakan tlen toTajtsin yokichijchiuj. Pero, toTajtsin nochi yokichijchiuj para makikuakan akin tlaneltokaj pampa kixmatij tlen melauak niman uelij tetlasojkamachiliaj. 4 Pampa nochi tlen toTajtsin yokichijchiuj melak kuajli, niman noneki tikseliskej tla melauak tiktlasojkamatij. 5 Nochi yejon nochipaua ika itlajtol toTajtsin niman ika oración.

6 Tla ijkon tikimijlia tokniuan, melak kuajli tiktekichiuilis Cristo Jesús. Noijki tikchikajtos motlaneltok ika itlajtol toTajtsin niman ika tlen tikuajchijtiuj pampa ijkon omitsmachtijkej. 7 Pero, maka xkinkaki cuentos tlen xmelajkej niman kixnamikij toTajtsin ijkon ken kijtojtinemij sekimej lamajtsitsintin. Niman noijki xmokojtili chikauak tiktekichiuilis toTajtsin ika nochi moyojlo. 8 Melauak ika tikchiuas ejercicio achijtsin mitspaleuis, pero tla tikchiua tlen kineki toTajtsin ika nochi moyojlo, más tepaleui. Pampa mitspaleuis kuajli xnemi aman niman ika tlayekapan. 9 Yejuin tlen nikijtoua uelis tikneltokas niman noneki nochimej kiseliskej. 10 Yejua ika, melak chikauak titekitij niman tokojtiliaj, pampa titlaneltokaj itech se toTajtsin akin yoltika, akin nochimej kinmakixtia, más akin itech melajkanemij.

11 Nochipa xteijli niman xtemachti yejuin. 12 Maka xkauili yakaj mamitsita ika xmás titepaleui san pampa titelpochtli. Xkimititi akin tlaneltokaj itech toTajtsin makichiuakan ken tejua, makitakan kenijki titlajtoua, kenijki tinemi, kenijki titetlasojtla, kenijki titlaneltoka niman kenijki tichipajkanemi. 13 Aman ika xenajsi, xmokojtilijto teixpan titlaleeros, xteyolchikaua niman xtemachti. 14 Nochipa xtlajpiya yejon tekitl tlen omitsmakakej, tlen otikselij ipan se teotlajtojli ijkuak tlayekankej mopan okintlalijkej inmauan. 15 Nochipa xtlanemili itech yejuin niman xchiua, para nochimej kitaskej ika chikajtiuj motlaneltokil. 16 Nochipa kuajli xkita tlenon tikchiua niman kenon titemachtia. Tla nochipa ijkon tikchiua, timomakixtis tejua niman noijki akin mitskakiskej.

5 Maka chikauak xkajua se tlakatl akin yeueyi. Ijkuak tikijlis tlen xkuajli kichiua, xnotsa kentla tla motaj yeskia; akin más telpokamej xkinnotsa kentla mokniuan; 2 siuamej akin más yeuejueyimej, xkinnotsa kentla monanuan, niman akin ichpokamej, kentla mokniuan, niman maka xnemilijto itlaj tlen xchipauak.

3 Xkintlakaita siuakaualtsitsintin akin yemelak noneki makinpaleuikan.* 4 Pero, tla se siuakaualtsintli kinpiya ikoneuan noso ixuiuan, yejuamej noneki kachtopa inchan kiteititiskej ika kiyolpaktiaj toTajtsin niman kinmakaskej intajuan niman inabuelos tlen noneki pampa okintlajpixkej, yejon tlen kuelita toTajtsin. 5 Siuakaualtsintli akin yemelak noneki makipaleuikan niman xtlaj kipiya, tlaneltoka itech toTajtsin niman ika tonajli niman ika yeuajli miyekpa kichiua oración. 6 Pero, siuakaualtsintli akin san kichiua tlen kileuiya itlalnakayo yeskia kentla yomik maski yoltika. 7 Kuakon, tejua xkimijli tlen noneki kichiuaskej para xakaj uelis itlaj ika kixkoijliskej. 8 Pampa, tla yakaj xkintlajpiya akin ken kimita, niman más akin imiuan chanti, kiteititia ika xtlaneltoka niman hasta más xkuajli kichiua ken se akin xtlaneltoka.

9 Ipan lista san xkijkuilo siuakaualtsintli akin kipiya más de 60 años, san se iueuentsin yokipix 10 niman makixmatikan ipampa tlen kuajli kichiua, pampa kuajli okimiskalti ikoneuan, kuajli oteseli, okinpajpakili ikxiuan tokniuan, okinpaleui akin tlajyouiyaj niman onokojtili kichiuas nochi tlen kuajli.

11 Pero, maka xkimijkuilo ipan lista siuakaualtsitsintin akin xmás uejueyimej, pampa, satepan yejuamej kinekij nonamiktiskej ijkuak kinekij notekaskej iuan yakaj, niman xok kitekichiuiliaj Cristo. 12 San no yejuamej kichiuaskej makintlajtlakolmakakan pampa xokichijkej tlen okijtojkaj. 13 Nomatij xtlaj kichiuaskej niman san techan kajkalaktinemij. Kema, xtlaj kichiuaj niman noijki san tetejteneuaj niman nokalaktiaj kampa xkinnamiki ijkuak kiteijliaj tlen xnoneki. 14 Yejua ika, nikneki ika siuakaualtsitsintin akin xmás uejueyimej manonamiktikan, makinpiyakan inkoneuan niman makitlajpiyakan inchan. Tla ijkon kichiuaj, xkinkauiliskej matechtejteneuakan akin techixnamikij. 15 Pampa, manimechonijli ika sekimej yonoxelojkej niman yopeuj kichiuaj ken Satanás. 16 Tla se siuatl akin tlaneltoka kinpiya ichanejkauan akin siuakaualtin, makinpaleui para tlanechikojli xnonekis kinpaleuis, niman ijkon tlanechikojli san kinpaleuis akin yemelak noneki makinpaleuikan.*

17 Noneki melak makintlakaitakan tlayekankej akin kuajli kiyekanaj tlanechikojli, más akin nokojtiliaj kiteijliskej itlajtol toTajtsin niman kuajli temachtiaj. 18 Pampa Tlajkuiloltin kijtouaj: “Maka xtenbozalti uakax ijkuak papanos ipan trigo para kitejteinis”. Niman noijki kijtoua: “Akin tekiti kinamiki makitlaxtlauilikan”. 19 Maka xkijto tla yakaj akin yeueyi* okichiuj itlaj tlen xkuajli, tla xnemij omemej noso yeyimej testigos para kijtoskej tla melauak. 20 Teixpan xteititi ika xkuajli tlen kichijtokej akin kichiuaj tlajtlakojli, para oksekimej maka ijkon makichiuakan.* 21 Nimitsnauatia ixpan toTajtsin, ixpan Cristo Jesús niman imixpan ángeles akin yokintlapejpenijkej ika xchiua tlen yonimitsnauati niman maka xtechikoita.

22 Maka nimantsin xkintlali momauan ipan se tlakatl.* Noijki maka xkinpaleui akin kichiuaj tlajtlakojli. Tejua xchipajkanemi.

23 Maka san xkoni atl; tla mitskokoua mojti* niman tla san tikuajkualo, xkoni achijtsin vino.

24 Intlajtlakoluan sekimej tlakamej nimantsin nochimej kimatij niman kintlajtlakolmakaj, pero intlajtlakoluan oksekimej tlakamej satepan kimatij. 25 Noijki ijkon, tlen kuajli nochiua nochimej kimatij niman tlen xkuajli nochiua xuelis iyantos.

6 Akin tlakeualtin noneki nochipa kintlakaitaskej intekouan para maka keman xkuajli tlajtoskej itech itoka toTajtsin niman itech tlen yejua temachtia. 2 Niman tla intekouan tlaneltokaj, tlakeualtin maka makinemilikan ika xnoneki kintlakaitaskej san pampa intekouan tokniuan. Noneki más kuajli kintekichiuiliskej pampa akin kinpaleuijtokej tlaneltokaj niman kintlasojtlaj.

Tejua ok* xtemachtijto niman xteijlijto yejuin. 3 Tla se tlakatl temachtia tlen xmelauak niman xkuelita kuajli tlamachtijli tlen toTeko Jesucristo yotechmakak nion tlamachtiltin kampa kijtouaj tlen kineki toTajtsin, 4 melak noueyimati niman xtlaj kasikamati. San kineki teuan nokualanis ika tlajtoltin. Yejuin kichiua ika oksekimej matenexikolitakan, teuan manouijsokikan,* makijtokan tlen teyolkoko, makinemilikan tlen xkuajli 5 niman kichiua manokualanikan ipampa itlaj tlen nion ximportante. Ijkon kichiuaj tlakamej akin xkuajli tlanemiliaj niman xkixmatij tlen melauak pampa yejuamej kinemiliaj ika tla tikueyichiua toTajtsin itlaj tiktlanis. 6 Niman melauak, miyek tiktlanij pampa tikueyichiuaj toTajtsin tla tiyolpakij ika tlen tikpiyaj. 7 Pampa ijkuak otiuajnenkej ipan yejuin mundo xtlaj otikuajkuikej, niman xuelis itlaj tikitkiskej. 8 Kuakon, matiyolpakikan tla tikpiyaj tlen tikuaskej niman totlaken.

9 Pero akin san kinektokej ricos yeskej peua kichiuaj tlajtlakojli. Yejuamej san kileuijtokej tlen xkuajli niman tlen kimijtlakoua, nochi yejuin kichiua matlajyouikan niman satepan mamikikan. 10 Pampa miyek tlen xkuajli peuas mopan nochiuas tla tikneki timochiuas rico. Niman pampa miyekej kinekij ricos yeskej, xok tlaneltokaj niman melak yonotlajyouiltijkej.

11 Pero tejua, tlakatl akin tiktekichiuilia toTajtsin, xtlalkaui nochi yejon, xmokojtili tikchiuas tlen kuajli, xtekichiuili toTajtsin, xteititi ika titlaneltoka, ika titetlasojtla, ika titlaxikoua niman ika tiyolsejki. 12 Xtlauijsoki ijkon ken se soldado para tikmanauis motlaneltok. Xmokojtili tikselis nemilistli tlen xkeman tlami tlen omitsijlijkej mitsmakaskej niman tlen teixpan otikteijli.

13 Ixpan toTajtsin, akin kichiua nochi mayolto niman ixpan Cristo Jesús, akin kuajli otlajto ixpan Poncio Pilato ken se testigo, nimitsnauatia yejuin: 14 kuajli xtlakamati tlanauatijli para maka yakaj itlaj mitsixkoijlis hasta ijkuak uajlas toTeko Jesucristo. 15 Yejon kiteititis akin yolpaki niman melak Kojtik ijkuak ajsis tiempo tlen yokitlalijkej. Yejua Rey intech akin tlanauatiaj ken reyes niman inTeko akin tlanauatiaj ken tetekouan. 16 San yejua akin xkeman uelis mikis, akin nemi kampa tlauijli kampa xakaj uelis kalakis, akin nion se tlakatl xkita nion xuelis kitas. Yejua makitlakaitakan niman nochipa makipiya poder. Amén.

17 Akin ricos ipan yejuin tiempo* xkinnauati ika maka manoueyimatikan niman maka matlaneltokakan itech tomin tlen san ontlami. Más kuajli tla tlaneltokaj itech toTajtsin, akin techmaka miyek tlen techyolpaktia. 18 Xkimijli makichiuakan tlen kuajli, manochiuakan ricos ika tlen kuajli kichiuaj, makitemakakan niman makixelokan tlen kipiyaj. 19 Ijkon, kiseliskej se tesoro. Yejuin kijtosneki ika kuajli nemiskej ika tlayekapan niman kichiuaskej nochi tlen noneki para kiseliskej nemilistli tlen xkeman tlamis.

20 Timoteo, xtlajpiya tlen yomitsmaktilijkej. Maka xkaki tlen xtlaj ika tepaleui niman kixnamiki toTajtsin niman maka xkinkaki akin kinemiliaj ika ixtlamatkej pero tlen temachtiaj kixnamiki tlen melauak. 21 Miyekej okineltokakej yejon, niman okikajkajkej ika tlaneltokaj.

Niktlajtlani mamechiknelikan maski xmechnamiki.