TITO

1 Nejua Pablo, niitlakeual toTajtsin niman niiapóstol Jesucristo. Nejua noijki nitlaneltoka ken akin toTajtsin yokintlapejpeni niman nikixmati on tlen melauak, tlen techititia kenon tikueyichiuaskej toTajtsin. 2 Nemilistli tlen xkeman tlamis tlen tikchiaj tikseliskej, yejon noijki tlen melauak. Yejuin itlaj tlen toTajtsin yeuejkaui otechijli techmakas, niman yejua xueli tekajkayaua. 3 Ijkuak oajsik tiempo, toTajtsin akin toTemakixtijkauj onechmakak se tekitl para manikteijli itlajtol. 4 Nimitsontlajkuilouilia tejua Tito, akin kentla tinokoneuj pampa noijki titlaneltoka ken nejua.

Niktlajtlanilia toTajtsin akin toTaj, niman Cristo Jesús akin toTemakixtijkauj, mamitsiknelikan maski xmitsnamiki niman mamitsyolseuikan.

5 Onimitskajteuj ne Creta para xyektlali tlen xkuajli nochijtok ipan tlanechikojli niman, ipan cada ciudad, xkintlali akin tlapaleuiskej ken tlayekankej. Tlayekankej akin tikintlapejpenis noneki kichiuaskej yejuin: 6 xnoneki yes se tlakatl akin kipiya tlen ika kitlajtlakoltiskej niman noneki san se isiuauj kipiyas. Tla se tlayekanketl kinpiya ikoneuan akin tlaneltokaj, yejon ikoneuan xnoneki kichijtinemiskej tlen xkuajli niman xnoneki teixnamikiskej. 7 Pampa, ken imayordomo toTajtsin, akin tlayekana xnoneki itlaj ika kitlajtlakoltiskej, xnoneki noueyimatis, xnoneki nimantsin kualanis, xnoneki tlauanis nion teuijsokis,* nion xnoneki kileuijtos kinoyaxkatis* tomin tlen xiyaxka. 8 Más kuajli tla kuelita kitemakas tlen kipiya, kitlasojtla tlen kuajli, kuajli tlanemilia, kichiua tlen kuajli niman melajkanemi, niman ueli noteltia. 9 Noneki nochipa noyekanas ika itlajtol toTajtsin ijkuak temachtis, ijkon uelis kinyolchikauas oksekimej ika tlamachtiltin tlen tepaleuiyaj niman kimijlis tlen xkuajli kichiuaj akin kixnamikij tlen temachtia.

10 Pampa nemij miyekej tlakamej akin melak kinekij ika oksekimej makinochiuilikan circuncisión. Yejuamej melak teixnamikij, xkinemiliaj tlen kijtouaj niman kinkajkayauaj oksekimej. 11 Yejuin tlakamej noneki makinkamatsakuakan, pampa yejuamej akin kichiuaj ika on familias maka sa matlaneltokakan ijkuak kinmachtiaj tlen xnoneki, para ijkon kitlaniskej tomin tlen kileuiyaj. 12 Niman hasta se inteotlajtojkauj okijto: “Akin chantij ne Creta nochipa san tekajkayauaj, kentla xkuajkualtin yolkamej, san nochipa tlakuajtokej niman xtlaj kichiuaj”.

13 Niman yejuin melauak, yejua ika, maka xkajkaua ika tikimijlia tlen xkuajli kichijtokej para kuajli maonia intlaneltok 14 niman para maka makinkakikan cuentos tlen xmelajkej niman tlen san tenauatiaj tlakamej akin noxelouaj itech tlen melauak. 15 Nochi chipauak para akin chipajkej. Pero para akin xchipajkej niman xtlaneltokaj xtlaj onka tlen chipauak pampa yoijtlakauj ken tlanemiliaj niman intlamachilis. 16 Teixpan kijtouaj ika kixmatij toTajtsin, pero ika tlen kichiuaj kiteititiaj ika xkiseliaj. Pampa yejuamej tekualanijkej, xtetlakamatij niman xkinseliaj para makichiuakan tlen kuajli.

2 Pero tejua xteijlijto tlen tepaleui. 2 Tlakamej akin yeuejueyimej nochi makichiuakan ken kinamiki, makintlakaitakan, kuajli matlanemilikan niman machikajto intlaneltok, matetlasojtlakan niman matlaxikokan. 3 Noijki ijkon, siuamej akin más yeuejueyimej noneki tetlakaitaskej, xnoneki tetlajtolchijchiuiliskej nion melak koniskej vino niman noneki matemachtikan tlen kuajli. 4 Ijkon, uelis kinmachtiskej siuamej akin más ichpokamej para makintlasojtlakan inueuentsitsinuan niman inkoneuan, 5 kuajli matlanemilikan, machipajkanemikan, kuajli makitlajpiyakan infamilia, makichiuakan tlen kuajli niman makintlakamatikan inueuentsitsinuan para xkijtoskej tlen xkuajli itech itlajtol toTajtsin.

6 Noijki, xkimijli tlakamej akin más telpokamej makichiuakan tlen kuajli para kuajli matlanemilikan. 7 Niman xchiua nochi tlen kuajli para tikimititis makichiuakan ijkon ken tejua. Ijkuak titemachtis, xteititi ika chikauak tikpiya motlaneltok, 8 niman xkintekitilti* tlajtoltin tlen tepaleuiyaj para maka mitstejteneuaskej niman para akin techtlauelitaj pinauiskej pampa xuelis techteneuiliskej itlaj tlen xkuajli. 9 Tlakeualtin makitlakamatikan inteko ipan nochi, makiyejyekokan kinyolpaktiskej, maka san makinnajnankilikan 10 niman maka makintlachtekilikan. Más kuajli tla nokojtiliaj kiteititiskej ika uelis intech tlaneltokaskej para oksekimej kitaskej ika kualtsin tlen toTajtsin techmachtia.

11 Pampa toTajtsin otechititi ika techiknelia maski xtechnamiki ijkuak tinochimej otechmakixti. 12 Teiknelilistli tlen techititia maski xtechnamiki techmachtia ika xnoneki tikchiuaskej tlen toTajtsin kitlauelita, xtikileuiskej tlen onka ipan yejuin mundo, kuajli titlanemiliskej, tikchiuaskej tlen kuajli niman tikueyichiuaskej toTajtsin ipan yejuin tiempo. 13 Matikchiatokan ijkuak nochiuas tlen tikchiatokej niman noijki ijkuak noteititis toTajtsin, akin ueyixtika niman Jesucristo, akin toTemakixtijkauj. 14 Yejua onotemakak topampa para techmakixtis itech nochi tlen xkuajli niman para kichipauas se pueblo tlen kinoyaxkatis.* Yejuin pueblo sa kinektika kichiuas tlen kuajli.

15 Ok* xteijli yejuin, xkimijli oksekimej makichiuakan tlen kuajli niman noijki xkimijli tlen xkuajli kichiuaj, pampa yomitsnauatijkej ika uelis ijkon tikchiuas. Maka xkauili yakaj mamitsita ika xmás titepaleui.

3 Ok* xkimilnamiktijto ika noneki kintlakamatiskej gobiernos niman akin tlanauatiaj, nochipa makinektokan makichiuakan tlen kuajli, 2 maka makijtokan tlen xkuajli itech yakaj, maka teuan manokualanijtinemikan, maka makitejtemokan manochiua san tlen yejuamej kinekij niman nochipa mayolsejtokan imiuan nochimej. 3 Pampa yeuejkaui noijki xtitlamachilisejkej katkaj niman xtitetlakamatiyaj, yotechkajkayajkaj niman tinemiyaj ken tlakeualtin itech tlen kileuiaya totlalnakayo niman tlen kiyolpaktiaya, tikchiuayaj miyek tlen xkuajli niman titenexikolitayaj, titetlauelmiktiayaj niman totlauelitayaj imiuan oksekimej.

4 Pero, ijkuak toTajtsin akin toTemakixtijkauj otechititi ika kipiya kuajli iyojlo niman ika techtlasojtla, 5 otechmakixti pampa otechikneli, xpampa tla otikchijkej itlaj tlen kuajli. Yejua otechmakixti ijkuak otechchipauj, yejon okichiuj matikpiyakan nemilistli, niman ijkuak okitekitilti* iespíritu santo para kichiuas matiyoltokan. 6 Yejua otechmakak miyek espíritu santo ipampa* Jesucristo akin toTemakixtijkauj. 7 Yejua ijkon okichiuj para techmakas nemilistli tlen xkeman tlami ken herencia ijkuak yotechseli ken akin kipiyaj kuajli inyojlo pampa techiknelia maski xtechnamiki.

8 Uelis titlaneltokas itech yejuin tlajtoltin, niman nikneki nochipa xteijlijto yejuin para akin yotlaneltokakej itech toTajtsin ok makichijtokan tlen kuajli. Yejuin melak kuajli niman melak tepaleuiya.

9 Pero, maka xmokualani imiuan akin xtlamachilisejkej, nion maka xmokualani imiuan akin kitejtemouaj intoka inchanejkauan akin yeuejkaui onenkej, noijki maka teuan xmotlatlani, nion maka xmokualani itech Tlanauatijli pampa nochi yejon xtlaj ika tepaleui niman xtlaj kijtosneki. 10 Niman tla sejpa niman okpa yotikijli ika xkuajli tlen kichiua se tlakatl akin kineki kipeualtis se yenkuik religión pero xmitskaki, xtlalkaui. 11 Ijkon xchiua pampa tikmati ika yejon tlakatl yokitlalkaui ojtli niman tlajtlakojtika, niman tlen kichiua san no yejua tlen kitlajtlakolmaka.

12 Ijkuak nimitsontitlanilis Ártemas noso Tíquico, xchiua nochi tlen noneki para tinechontas Nicópolis, pampa yonikijto ika ompa ninokauas ijkuak peuas seuas. 13 Xpaleui Zenas, akin melak kixmati Tlanauatijli, niman Apolos. Xkinmaka nochi tlen noneki para maka itlaj kinpolos ipan ojtli. 14 Pero, xkimijli tokniuan nochipa makichiuakan tlen kuajli para kinpaleuiskej akin yemelak itlaj kinpoloua, ijkon nochipa tlapaleuiskej.*

15 Nochimej akin nouan nikan nemij mitsontlajpalouaj. Xnechintlajpalouili tokniuan akin tlaneltokaj ken tejuamej niman techtlasojtlaj.

Niktlajtlani ika nochimej nemejuamej mamechiknelikan maski xmechnamiki.