HEBREOS

1 Yeuejkaui toTajtsin okintekitilti* teotlajtojkej para kinnotsas tochanejkauan akin yeuejkaui onenkej, yejua miyekpa niman tlamantik* ken okichiuj. 2 Aman, ipan itlamiyan tonaltin yotechnots ipampa se teKoneuj, akin okichiuj nochi makiseli ken herencia, niman ipampa* akin okichijchiuj nochi tlen onka ipan mundo niman ne ipan cielo.* 3 Yejua kiteititia iueyilis niman kenijki toTajtsin, niman ika itlajtol tlen kipiya poder kichiua nochi maonia. Niman ijkuak yotechchipauili totlajtlakoluan onotlali iyekma akin melak Ueyixtika ne ipan cielo. 4 Yejua más ueyixtika xijkon ken ángeles, niman yejua yokitlalijkej para más matlanauati xijkon ken yejuamej.

5 Se ejemplo, ¿katlejua ángel kemantika toTajtsin ijkin yokijli: “Tejua tinokoneuj; niman aman nejua yoninochiuj motaj”? ¿Noso yakaj yokijli: “Nejua ninochiuas itaj niman yejua nochiuas nokoneuj”? 6 Niman, ijkuak oksejpa kuajtitlanis ipan yejuin mundo iKoneuj akin kachtopa okichijchiuj, kijtoua: “Niman nochimej iángeles toTajtsin ixpan manotlakuantelketsakan”.

7 Noijki, itech ángeles kijtoua: “Yejua kichiua ika iángeles makipiyakan miyek poder, niman akin kitekichiuiliaj, kichiua manochiuakan kentla tlitl”. 8 Pero de teKoneuj kijtoua: “ToTajtsin akin yokichiuj nochipa xtlayekana, niman moGobierno tlayekanas ika melajkayotl. 9 Otiktlasojtlak tlen melajki niman otiktlauelitak tlen xkuajli.* Yejua ika toTajtsin, moTajtsin, omitstlapejpeni ika aceite niman okichiuj más xyolpaki xijkon ken mocompañeros”. 10 Noijki kijtoua: “Ijkuak nochi opeuj, noTeko, tejua otiktlali tlen ika peua mundo niman noijki otikchijchiuj on cielo. 11 Nochi yejon xok onias, pero tejua ok* tinemis, tlamiskej ijkon ken se tlakentli, 12 tejua tikinkuelpachos ijkon ken se patlauak tlakentli niman kinpatlaskej. Pero tejua xtimopatla niman nochipa tinemis”.

13 ¿Katlejua ángel ijkin yokijli: “Xmotlali kampa noyekma hasta ijkuak nikintlalis motlauelikniuan ken se banco kampa tikintlalia mokxiuan”? 14 Pampa nochimej ángeles* kitekichiuiliaj toTajtsin niman kinuajtitlanij para kinpaleuiskej akin kinmakixtiskej.

2 Yejua ika, noneki más kuajli tikakiskej tlen yotikakkaj para maka keman tikisaskej itech ojtli. 2 Tla melauak onochiuj tlen okijtokej ángeles niman akin xokitlakamatkej tlanauatijli okiselijkej tlen kinnamiki, kuakon, 3 ¿kenijki uelis timakisaskej tla san tikauilmatij yejon ueyi temakixtilistli tlen yotikselijkej? Pampa toTeko akin kachtopa okiteijli niman akin okikakkej otechijlijkej ika melauak. 4 Noijki, toTajtsin ijkon kiteititiaya ijkuak kichiuaya tlen temojkatlachialti, ijkuak kichiuaya milagros* niman ijkuak kitemakaya iespíritu santo ijkon ken yejua kinekiya.

5 Pampa yejua xokichiuj ika ángeles makiyekanakan yejon mundo tlen tikteijliaj ika onias. 6 Pero yakaj ijkin teixpan okiteijli: “¿Melak importante se tlakatl para tejua xmajmana ipampa? ¿Noso melak importante ikoneuj tlakatl para xtlajpiya? 7 Otikchiuj maka melak makojtik ijkon ken ángeles; tejua otikchiuj ika makiueyilikan niman makitlakaitakan niman otikchiuj makiyekana nochi tlen otikchijchiuj. 8 Nochi ikxitlan otiktlali”. Ijkuak toTajtsin okichiuj nochi makiyekana, xokikauj itlaj tlen xueliskia kiyekanas. Niman, maski aman xetikitaj tla nochi kiyekantika, 9 yetikitaj Jesús, akin okichijkej maka melak makojtik ijkon ken ángeles. Yetikitaj ika ueyixtika niman kitlakaitaj pampa melak otlajyoui hasta ijkuak omik. Yejua omik ipampa nochimej para noteititis ika toTajtsin techiknelia maski xtechnamiki.

10 Nochi onka para makiueyiteneuakan toTajtsin niman nochi onka ipampa* yejua. Kuakon, para kichiuas maueyixtokan miyekej ikoneuan, kuajli ika okiyektlali ijkuak otlajyoui akin kichiuas mamakisakan. 11 Pampa akin techipaua niman akin kinchipajtokej, san se akin itech ualeuaj. Yejua ika, Jesús xpinaui kijtos ika ikniuan 12 ijkuak kijtoua: “Nikinnojnotsas nokniuan itech motoka; nimitsueyichiuas ipan tlanechikojli ika tlakuikaltin”. 13 Noijki kijtoua: “Itech nitlaneltokas”. Niman kijtoua: “¡Xkakikan! Nejua niman nokoneuan* akin Jehová onechinmakak”.

14 Kuakon, pampa yejuin kokonej kipiyaj innakayo niman inomiyouan,* yejua noijki onochiuj ken yakaj akin kipiya inakayo niman iomiyouan. Ijkon, ijkuak mikiskia ueliskia kipopolos Diablo, akin ueli kichiua matimikikan. 15 Noijki, para kinmakixtis nochimej akin nemiyaj ken tlakeualtin pampa nomojtiayaj mikiskej. 16 Pampa yejua xokinpaleuiko ángeles, okinpaleuiko ichanejkauan Abrahán. 17 Kuakon, yejua ononek nochiuas san noijki ken ikniuan, kitas tlen okitakej niman kijyouis tlen okijyouijkej para uelis yes se ueyi teopixki akin teiknelia ijkuak kichiua itekiyo toTajtsin niman tetlakamati. Ijkon, ueliskia kitemakas se uentli tlen kichiuaskia makintlapopoluikan intlajtlakoluan on gente niman oksejpa mauelikan manouikakan iuan toTajtsin. 18 Yejua uelis kinpaleuis akin kinchiuiliaj tlen xkuajli pampa otlajyoui ijkuak okichiuilijkej tlen xkuajli.

3 Kuakon, nokniuan akin yomechtlapejpenijkej, akin yomechnotskej para nenyaskej ne ipan cielo, xtlanemilikan itech Jesús akin tikitaj ken apóstol niman ueyi teopixki. 2 Yejua omelajkanen itech akin okitlapejpeni, ijkon ken okichiuj Moisés ipan ipueblo* toTajtsin. 3 Jesús noneki más makiueyiteneuakan xijkon ken Moisés, pampa akin kichijchiua kajli más importante xijkon ken kajli. 4 Melauak, se kajli yakaj okichijchiuj, pero nochi tlen onka toTajtsin okichijchiuj. 5 Moisés omelajkanen ijkuak otekichiuj ipan nochi ipueblo toTajtsin niman tlen okichiuj okiteititi tlen sakin noijtoskia, 6 pero Cristo akin teKoneuj, omelajkanen ijkuak okitlalijkej para makiyekana ipueblo toTajtsin. Niman tejuamej melauak tiipueblo* tla nochipa titenojnotsaj niman tikteijliaj tlen tikchiaj.

7 Yejua ika, ijkon ken kijtoua espíritu santo: “Tla aman nemejuamej nenkikakij itlajtol, 8 maka xyoltechikauikan ijkon ken okichijkej nemochanejkauan akin yeuejkaui onenkej ijkuak melak otekualanijkej ne ipan tlaluaktli. 9 Ompa, yejuamej kinekiyaj kitaskej tla ueliskia nikinpaleuis noso ka, maski yokitakaj tlen yonikchijka ipan 40 años. 10 Yejua ika, melak onikintlauelitak akin nemiyaj ipan yejon tiempo niman onikijto: ‘Ipan inyojlo nochipa xtetlakamatij niman xnechixmatij’. 11 Pampa melak onikualan, ijkin onikijto: ‘Xnoseuiskej ijkon ken nejua ninoseuijtika’”.

12 Xmotlajpiyakan, nokniuan, maka xtlalkauikan toTajtsin akin yoltika pampa onenkiskaltijkej itlaj tlen xkuajli ipan nemoyojlo noso onenkikajkej nemotlaneltok. 13 Más kuajli tla mojmostla nemoyolchikauaj aman ika xetlami tonajli, ijkon xchiuakan para on tlajtlakojli xmechkajkayauas nion xmechyoltechikauas. 14 San tikseliskej tlen Cristo okiseli, tla titlaneltokaj ijkon ken ijkuak opeuj itech titlaneltokaj. 15 Yejuin ijkon ken noijtoua: “Tla aman nemejuamej nenkikakij itlajtol, maka xyoltechikauikan ijkon ken okichijkej nemochanejkauan akin yeuejkaui onenkej ijkuak melak otekualanijkej”.

16 Pampa ¿akinomej okikakkej pero melak okikualanijkej? Nochimej akin Moisés okinyekan niman ouajkiskej de Egipto. 17 Noijki, ¿akinomej toTajtsin melak okintlauelitak ipan 40 años? Akin otlajtlakojkej niman omikkej ipan tlaluaktli. 18 ¿Niman akinomej okimijli ika xnoseuiskej ijkuak yejua noseuis? Akin xotetlakamatkej. 19 Kuakon, tikitaj ika yejuamej xonoseuijkej ijkon ken toTajtsin noseuijtika pampa xtlaneltokayaj.

4 Kuakon, pampa ok* uelis toseuiskej ijkon ken yejua noseuijtika, matotlajpiyakan para maka se de tejuamej kitaskej ika xuelis noseuis. 2 Pampa tejuamej noijki otechijlijkej kuajli tlajtoltin ijkon ken yejuamej. Pero yejuamej xokinpaleui tlen okikakkej pampa xotlaneltokakej ijkon ken akin otetlakamatkej. 3 Akin yotitlaneltokakej kema uelis toseuiskej ijkon ken yejua noseuijtika, pero yejua ijkin yokijto intech akin xtetlakamatij “Pampa melak onikualan ijkin onikijto: ‘Xnoseuiskej ijkon ken nejua ninoseuijtika’”, maski yejua yotlanka itekiyo desde ijkuak opeuj mundo. 4 Pampa ipan se texto yejua okijto itech ika siete tonajli: “ToTajtsin otlan itekiyo niman onoseui ipan ika siete tonajli”. 5 Niman noijki kijtoua: “Xnoseuiskej ijkon ken nejua ninoseuijtika”.

6 Akin kachtopa okimijlijkej kuajli tlajtoltin, xonoseuijkej ijkuak toTajtsin onoseui pampa xotetlakamatkej. Yejua ika, pampa poliui ika sekimej manoseuikan, 7 ipan isalmo David yejua oksejpa okitlali se tonajli ijkuak okijto “ipan yejuin tonajli” maski yopanoka miyek tiempo. Ijkon ken kemach yonoijto: “Tla aman nemejuamej nenkikakij itlajtol, maka xyoltechikauikan”. 8 Pampa tla Josué kinuikaskia kampa ueliskia noseuiskej, toTajtsin xok tlajtoskia itech okse tonajli. 9 Kuakon, ok onka se tonajli sábado para noseuis ipueblo toTajtsin. 10 Pampa akin noseuijtika ijkon ken toTajtsin, noijki yonoseui itech itekiyo ijkon ken toTajtsin yonoseui itech itekiyo.

11 Yejua ika, matikchiuakan nochi tlen noneki para toseuiskej ijkon ken toTajtsin noseuijtika, para maka yakaj makichiua ijkon ken akin xotetlakamatkej. 12 Pampa itlajtol toTajtsin yoltika niman kipiya poder. Más yokitentijkej xijkon ken se espada tlen okan tlateki, kalaki tlaijtik niman hasta kiteititia tlen yakaj kipiya ipan iyojlo niman tlen san pani kipiya. Yejuin espada kalaki tlaijtik kampa toomiyouan niman hasta kampa tlen chiauak tikpiyaj ijtik toomiyouan, niman ueli kiteititia tlen se kinemilia niman tlen iyojlo kineki kichiuas. 13 Niman xonka itlaj tlen okichijchiuj tlen maiyanto ixpan. Nochi tlen onka xtlapachijtika niman akin noneki techtlajtlakolmakas nochi kitstika.

14 Yejua ika, pampa tikpiyaj Jesús, iKoneuj toTajtsin, akin se ueyi teopixki akin yokalak ipan cielo, matokojtilijtokan titenojnotsaskej itech yejua. 15 Pampa tikpiyaj se ueyi teopixki akin techasikamati maski titlajtlakolejkej, tikpiyaj yakaj akin yokixnamik nochi tlen tikixnamikij, pero xkipiya tlajtlakojli. 16 Kuakon, ika nochi toyojlo matonisiuikan* itech on trono kampa miyek techmakaskej* para techikneliskej. Niman kampa uelis miyek techmakaskej* ijkuak tiknekij matechpaleuikan.

5 Tlakatl akin kitlaliaj ken ueyi teopixki, kitlaliaj para makipaleui gente kuajli makiueyichiua toTajtsin, para matlauentlali niman makiuentlali tlen kinpaleuis makintlapopoluilikan intlajtlakoluan. 2 Yejua ueli kimiknelia akin nopopolouaj pampa xkimatiyaj tlen kichijtoyaj. Pampa yejua noijki nopopoloua 3 noneki kitemakas uentli para makitlapopoluikan, ijkon ken kitemaka uentli ipampa nochi pueblo.

4 Nion se tlakatl xuelis san iselti nochiuas ueyi teopixki, san toTajtsin ueli kitlapejpenia, ijkon ken okichiuj iuan Aarón. 5 Noijki, Cristo xsan no yejua onoueyiteneuj ijkuak onochiuj ueyi teopixki, okiueyiteneuj akin ijkin okijli: “Tejua tinokoneuj; niman aman nejua yoninochiuj motaj”. 6 Yejuin, noijki ijkon ken kijtoua ipan okse texto: “Tejua titeopixki ijkon ken Melquisedec niman nochipa titeopixki yes”.

7 Ijkuak Cristo nemiya ipan yejuin mundo okichiuj oración, miyekpa ochokak niman chikauak okinots akin ueliskia kimakixtis para xmikis, niman okikakkej pampa okimojkaitak toTajtsin. 8 Maski ikoneuj toTajtsin, tlen okijyoui okipaleui más matetlakamati. 9 Niman ijkuak yokichiuj nochi tlen toTajtsin okinauati, okinmakixti nochimej akin kitlakamatij para nochipa manemikan 10 pampa toTajtsin yokitlali ken ueyi teopixki ijkon ken Melquisedec.

11 Tikpiyaj miyek tlen uelis tikijtoskej itech, pero xtikmatij kenijki timechijliskej pampa nemejuamej xnimantsin ueli itlaj nenkasikamatij. 12 Pampa maski aman yenonekiskia nenmaestros yeskej, oksejpa noneki ika yakaj mamechmachti tlen kachtopa onenuelkej itech toTajtsin. Nemejuamej oksejpa noneki nenkoniskej leche kentla konetsitsintin niman xnentlakuaj ken akin yeuejueyimej. 13 Niman akin san koni leche xkixmati itlajtol toTajtsin niman xkimati tlenon kuajli niman tlenon xkuajli. 14 Pero, akin yochikauj intlaneltok ipampa tlen kichiuaj, yekimatij tlenon kuajli niman tlenon xkuajli. Yejuamej, yeskiaj ken akin yeuelij tlakuaj.

6 Yejua ika, pampa yotikakkej tlen kachtopa otiuelkej itech Cristo, nochipa matokojtilijtokan tikchikauaskej totlaneltok. Xnoneki san nochipa tomachtijtoskej tlen kachtopa otiuelkej, kijtosneki ika xnoneki tikchiuaskej tlen xtlaj ika tepaleui. Xnoneki oksejpa tomachtiskej kenijki titlaneltokaskej itech toTajtsin, 2 tlen otiuelkej itech apolaktilistli, kenijki tikintlaliaj tomauan inpan oksekimej, kenijki yoliuiskej akin yomikkej niman kenijki toTajtsin sa ika tlami tetlajtlakolmakas. 3 Yejuin tlen tikchiuaskej tla toTajtsin techkauilia.

4 Akin okintlauiluijkaj okiselijkej tetlayokolijli tlen ualeua ne ipan cielo, okiselijkej espíritu santo, 5 okiselijkej itlajtol toTajtsin tlen kuajli niman okitakej kenijki techteochiuaskiaj ika tlayekapan, 6 pero xok otlaneltokakej. Yejuamej xok uelis kinkuiteuaskej para manoyolkuepakan, pampa kentla oksejpa kipilouaj iKoneuj toTajtsin ipan kojtli melaktik niman kichiuaj makipijpinajtikan. 7 On gente yeskia kentla tlajli tlen toTajtsin kiteochiua, pampa ijkuak miyekpa kiyaui kichichina atl niman kitlakiltia tlen kipaleuiya akin toka. 8 Pero xkiseliskej se tlajli kampa san kisa uitstli niman xkuajli xijtli, noijki sa achijtsin poliui para xtlaj ika tepaleuis niman satepan kitlatiskej.

9 Pero, noknitsitsinuan, maski timechijliaj nochi yejuin, kuajli tikmatstokej ika nemejuamej kentla kuajli tlajli kampa notoka temakixtilistli. 10 Pampa toTajtsin kipiya kuajli iyojlo niman xkilkaua tlen kuajli onenkichijkej nion kenijki onenkititijkej ika nenkitlasojtlaj itoka ijkuak onenkinpaleuijkej tokniuan niman pampa ok* nenkinpaleuijtokej. 11 Pero tiknekij ika cada se de nemejuamej manokojtilijto chikauak tekitis ika nochi iyojlo, para nochipa nenkineltokaskej ika yemelak nenkiseliskej tlen yomechijlijkej mechmakaskej. 12 Ijkon, xnentlatsijkej yeskej niman nenkiseliskej herencia ijkon ken kiseliaj akin tlaneltokaj niman kiteititiaj ika xnosiajkauaj.

13 Pampa ijkuak toTajtsin okijli Abrahán tlenon kichiuas, san no yejua onoteneuj, pampa xnemi yakaj okse akin más ueyixtika ijkon ken yejua. 14 Okijli: “Yemelak nimitsteochiuas niman nikchiuas melak xmiyekiyakan”. 15 Kuakon, sakin ika Abrahán okiteititi ika xnosiajkaua, okiseli yejuin tlen yokijlijkaj kimakaskej. 16 Pampa ijkuak on gente kijtoua ika itlaj kichiuas, kiteneua yakaj akin más ueyixtika xijkon ken yejuamej, niman pampa yokitenejkej yakaj akin más ueyixtika, xok yakaj itlaj kijtoua pampa kinneltokiliaj ika kichiuaskej. 17 Noijki ijkon, ijkuak toTajtsin okinek más kuajli kimititis akin kiseliskej herencia ika xnopatla tlen kineki kichiuas, okiteititi ika yemelak nochiuas ijkuak san no yejua onoteneuj. 18 Pampa toTajtsin xueli tlakajkayaua, xnopatla tlen techmakas niman tlen yokijto. Ijkon okichiuj para akin topaleuiyaj itech toTajtsin matoyolchikauakan, para titlaneltokaskej itech tlen tikchiaj tikseliskej. 19 Tlen tikchiaj kipaleuiya tonemilis, ijkon ken se ancla kipaleuiya se barco. Kuajli tikmatstokej ika tlen tikchiaj yemelak nochiuas niman ijkon ken se ancla, xnolinis. Niman tlen tikchiaj techuikas ikuitlapan cortina,* 20 kampa kachtopa okalak Jesús para techtlapouilis niman techyektlalilis ojtli. Yejua yokitlalijkej para nochipa manemi ken ueyi teopixki ijkon ken Melquisedec.

7 Melquisedec katka rey de Salem niman iteopixkauj toTajtsin akin Ueyixtika. Ijkuak Abrahán yeuajlajtoya pampa okinmiktito seki reyes, Melquisedec okinamikito niman okiteochiuj. 2 Kuakon, Abrahán okimakak* Melquisedec se diezmo de nochi tlen okitlan. Itoka Melquisedec kijtosneki “rey akin kichiua tlen kuajli”. Yejua noijki rey de Salem, tlen kijtosneki, “rey akin teyolseuiya”. 3 Xakaj kimati akinon itaj, akinon inan, kanon oualeuj, kemanon onen niman kemanon omik. Yejua yeskia ken iKoneuj toTajtsin, yokitlalijkej para nochipa manemi ken teopixki.

4 Xkitakan kenon melak ueyixtika yejuin tlakatl, akin Abrahán, akin kinyekana familias, okimakak se diezmo de nochi tlen más kuajli okitlan. 5 Melauak ika Tlanauatijli kijtoua ika ikoneuan Leví, akin kintlaliaj ken teopixkej, noneki kitlajtlaniliskej on pueblo se diezmo, maski yejuamej ikniuan niman ualeuaj itech Abrahán. 6 Pero, yejuin tlakatl akin xualeuaya itech ikoneuan Leví, okiselili idiezmo Abrahán niman okiteochiuj akin yokijlijkaj ika itlaj kimakaskiaj. 7 Niman xakaj uelis kijtos tla xmelauak ika akin más yeueyi kiteochiua akin más pitentsin.* 8 Noijki, levitas akin kiseliaj diezmo ueli mikij, pero yakaj ijkon ken Melquisedec, noteijlia ika ok* yoltika. 9 Niman uelis tikijtoskej ika hasta Leví, akin kiselia diezmo, otlatlaxtlauj ijkuak Abrahán okitemakak diezmo, 10 pampa Leví xeuajnemiya itech ichanejkauj ijkuak Melquisedec okinamikito Abrahán.

11 Tlanauatijli tlen okinmakakej nochimej israelitas kijtouaya ika nochimej teopixkej nonekiya ualeuaskej itech Leví. Tla teopixkej akin ualeuayaj itech Leví ueliskiaj kichiuaskej maka matikpiyakan tlajtlakojli, ¿ok nonekiskia se teopixki ken Melquisedec? ¿Xsan nonekiskia se teopixki ken Aarón? 12 Pampa tla nopatlatika intekiyo teopixkej, noijki noneki nopatlas Tlanauatijli. 13 Pampa tlakatl akin kijtouiliaj yejuin oualeuj itech okse tribu, niman xakaj itech yejon tribu yotlapaleui kampa tlauentlaliaj. 14 Niman kuajli tikmatstokej ika toTeko ualeuaya itech Judá, niman Moisés xtlaj okijto tla itech yejon tribu nemiskej teopixkej.

15 Yejuin más tikasikamatij ijkuak uajnesi se teopixki akin ijkon ken Melquisedec, 16 yejua xonochiuj teopixki ipampa tlen kijtouaj tlanauatiltin tlen okintlalijkej tlakamej, yejua okitlalijkej ken teopixki pampa kipiya poder tlen kichiua maka keman mamiki. 17 Pampa ijkin noijtoua itech: “Tejua titeopixki ijkon ken Melquisedec niman nochipa titeopixki yes”.

18 Yejua ika, Tlanauatijli tlen achto onkatka, okipopolojkej pampa xtlaj ika tepaleui niman xok kuajli. 19 Pampa Tlanauatijli xouel okichiuj maka matikpiyakan tlajtlakojli, pero toTajtsin okichiuj matikchiakan itlaj tlen más kuajli. Yejon techpaleuiya matonisiuikan* itech toTajtsin. 20 ToTajtsin okijto ika ijkon kichiuas ijkuak okitlali Jesús ken teopixki. 21 Nemij sekimej tlakamej akin onochijkej teopixkej maski toTajtsin xtlaj okijto itech yejuamej, pero, yejuin tlakatl yonochiuj teopixki ipampa tlen okijto akin ijkin okijli “Jehová ijkin yokijto niman xkipatlas: ‘Tejua nochipa titeopixki yes’”. 22 Jesús yejua akin más kuajli yotechititi ika toTajtsin más kuajli touan yonotlajtolkauj. 23 Noijki, teopixkej xnochipa ueliyaj kichiuayaj intekiyo pampa mikiyaj. Yejua ika, miyekej teopixkej ononek nopatlatiaskej. 24 Pero, pampa yejua nochipa nemi, xkipiya yakaj akin makitekipatla. 25 Kuakon, Jesús noijki ueli kinmakixtia akin nonisiuiyaj itech toTajtsin ipampa yejua, niman ueli ijkon kichiua pampa nochipa yoltika para tlajtos inpampa.

26 Noneki matikpiyakan se ueyi teopixki ken yejua: akin yolmelajki, xkichiua tlen xkuajli, chipauak, xnouika imiuan akin tlajtlakolejkej, niman okichijkej más maueyixto ne ipan cielo. 27 Yejua xijkon ken oksekimej uejueyimej teopixkej, akin mojmostla tlauentlalijtokej ipampa intlajtlakoluan niman ipampa itlajtlakoluan on pueblo, xok noneki ijkon kichiuas pampa yejua ijkon yokichiuj san sejpa niman para nochipa ijkuak san no yejua onotemakak. 28 Tlanauatijli kintlaliaya ken uejueyimej teopixkej, tlakamej akin kipiyaj tlajtlakojli, pero satepan ika otechmakak on Tlanauatijli, toTajtsin okijto ika techmakaskia iKoneuj ken ueyi teopixki, yejua nochipa okichiuj tlen toTajtsin okijli.

8 Tejuamej tiknekij tikijtoskej ika tikpiyaj se ueyi teopixki akin yonotlali iyekma itech akin melak Ueyixtika ne ipan cielo. 2 Yejua tlapaleuiya kampa tlachipajkan* niman kampa kajkajli tlen melauak tlen okichijchiuj Jehová niman tlen xokichijchijkej tlakamej. 3 Pampa nochimej uejueyimej teopixkej okintlalijkej para makintemakakan tetlayokoliltin niman matlauentlalikan, yejua ika, yejuin ueyi teopixki noijki nonekiya itlaj kitemakas. 4 Tla yejua nemiskia nikan ipan mundo xteopixki yeskia, pampa yenemij tlakamej akin tlauentlaliaj ijkon ken kijtoua Tlanauatijli. 5 Ken yejuin tlakamej kitekichiuiliaj toTajtsin, kiteititia tlen onka ne ipan cielo. Yejua ika, ijkuak Moisés yekichijchiuaskia kajkajli, toTajtsin ijkin okijli: “Xmokojtili tikchiuas nochi ijkon ken omitsititijkej ne ipan tepetl”. 6 Pero aman Jesús yokiseli se más kuajli tekitl, niman yejua akin techpaleuiya ika toTajtsin más kuajli touan manotlajtolkaua* xijkon ken achto, yejuin yokichiuj matechijlikan ika techmakaskej itlaj tlen más kuajli xijkon ken tlen achto techmakaskiaj.

7 Tla ken toTajtsin onotlajtolkauj kachtopa iuan ipueblo xkipiyaskia itlaj tlen xkuajli, xok nonekiskia oksejpa manotlajtolkaua. 8 Kuajli nesi ika yejua kita kenijki nopopoloua ipueblo, pampa “Jehová kijtoua: ‘Pampa sa achijtsin poliui ijkuak yenkuik ninotlajtolkauas iuan pueblo de Israel niman de Judá’. 9 Jehová noijki kijtoua: ‘Xyes ijkon ken ijkuak imiuan oninotlajtolkauj nemochanejkauan akin yeuejkaui onenkej, ijkuak onikimajsik ipan inma para nikinuajkixtis de Egipto. Yejuamej xomelajkanenkej itech tlen onikijtojka, yejua ika xok oninajman inpampa’.

10 ”Jehová noijki kijtoua: ‘Satepan, ijkin ninotlajtolkauas iuan nopueblo. Nikintlalis notlanauatiluan ipan intlamachilis niman nikimijkuilos ipan inyojlo. Nejua niyes inTajtsin niman yejuamej yeskej nopueblo.

11 ”’Niman xok yakaj ijkin kijlis ipaisano nion ikniuj para kimachtis: “¡Xkixmati Jehová!”. Pampa nochimej nechixmatiskej, desde akin más pitentsin* hasta akin más yeueyi. 12 Niman nejua nikimiknelis ijkuak kichiuaskej itlaj tlen xkuajli, niman xok nikimilnamikis intlajtlakoluan’”.

13 Ijkuak toTajtsin okijto “yenkuik ninotlajtolkauas” okichiuj matlami ken achto yonotlajtolkajka, pampa ijkuak itlaj youejkauj, yetlamis niman yepopoliuis.

9 Ijkuak toTajtsin kachtopa onotlajtolkauj iuan ipueblo, okinmakak tlanauatiltin. Niman kajkajli kampa kiueyichiuayaj onkatka ipan yejuin mundo. 2 Yejuin kajkajli okitlajkoxelojkej ika cortina ijkuak okichijchijkej. Ipan kachtopa cuarto kitokayotiayaj Santo niman ompa onkatka candelabro, mesa niman pan tlen kiuentlaliayaj. 3 Pero, ikuitlapan okse cortina, onkatka cuarto tlen noixmatiya ken Santísimo. 4 Ompa onkatka tlen ika kitlatiayaj tlen ajuiyak niman arca tlen ika yonotlajtolkajkaj, nochi yejuin tlachijchijtin katkaj ika oro. Ijtik onkatka se jarra de oro tlen kipiaya maná, ivara Aarón tlen oxochipon niman tablas de tetl kampa nestoyaj itlanauatiluan toTajtsin. 5 Niman ikuatipan nemiyaj uejueyixtokej querubines, akin ika inmastlakapaluan kitlapachojtoyaj itapa* arca, niman yejuin querubines kiteititiayaj ika toTajtsin ompa nemiya. Pero, aman xnoneki nimechijlis nochi yejuin.

6 Ijkuak nochi ijkon yokichijchijkej, teopixkej miyekpa kalakij ipan kachtopa cuarto de yejon kajkajli para kichiuaskej tekitl tlen ika kiueyichiuaj toTajtsin. 7 Pero, ipan ika ome cuarto ueyi teopixki san iselti ompa kalaki sejpa ipan se año. Yejua nochipa kitki yestli tlen kitemaka ipampa niman ipampa pueblo para makintlapopoluilikan intlajtlakoluan pampa xkimatij tlen kichiuaj. 8 Ijkin, espíritu santo kiteasikamachiltia ika ijkuak ok* onkatka achto kajkajli, xeyakaj kikauiliayaj makalaki kampa tlachipajkan.* 9 Yejuin kajkajli se ejemplo itech tlen nochijtika ipan yejuin tonaltin, yejua ika, notemakaj uentin niman tetlayokoliltin. Pero, yejuin xkichiua ika itlamachilis se tlakatl akin kitekichiuilia toTajtsin maka makipiya tlajtlakojli. 10 Nochi yejuin san kiteneuaya tlenon kikuaskej, tlenon koniskej niman kenijki kichipauaskej seki tlemach. Yejuin kitlajtlaniya tlanauatijli niman san kiteneuaya tlen onka ipan yejuin mundo, niman nonekiya ijkon kichiuaskej hasta ipan tiempo tlen yonoijtojka para nochi kiyektlaliskej.

11 Pero, Cristo ouajla ken ueyi teopixki para techmakas tlen kuajli aman tikpiyaj. Yejua okalak ipan se kajkajli tlen más importante niman xkipiya tlen xkuajli. Yejuin kajkajli xokichijchiuj gente, kijtosneki ika xde yejuin mundo. 12 Yejua san sejpa niman para nochipa okalak kampa tlachipajkan. Xokichiuj ika iyesyo chivos niman uakaxkokonej, yejua okikuik iyesyo, niman ika tlen okichiuj otechmakixti para nochipa. 13 Teopixkej kikuij inyesyo chivos, uakaxtin niman itlikojnexyo becerrita para kinchipauaskej on gente akin xchipajkej niman ijkon toTajtsin makimita ika chipajkej. 14 Nochi yejuin otepaleui, pero iyesyo Cristo más tepaleuiya. Yejua xkipiya tlajtlakojli niman espíritu santo tlen nochipa onka okipaleui manotemaka ixpan toTajtsin. Iyesyo kichipaua totlamachilis niman xok tikchiuaj tlen xtlaj ika tepaleui, ijkon ueli tiktekichiuiliaj toTajtsin akin yoltika.

15 Yejua ika, Cristo otlapaleui oksejpa yenkuik manotlajtolkauakan* para akin toTajtsin yokintlapejpeni makiselikan nemilistli tlen xkeman tlami ijkon ken yokimijlijkaj. Nochi yejuin ouel onochiuj pampa yejua omik niman okinmakixti itech intlajtlakoluan tlen kichiuayaj ijkuak nonekiya kitlakamatiskej tlen toTajtsin kachtopa imiuan onotlajtolkajkaj. 16 Ijkuak se tlakatl notlajtolkaua iuan toTajtsin, yejon tlakatl noneki mikis. 17 Pampa se tlajtolkaualistli san peua tepaleuiya tla yakaj miki, niman xtlaj ika tepaleuis tla akin teuan onotlajtolkauj ok yoltika. 18 Yejua ika, para tepaleuiskia ken toTajtsin kachtopa yonotlajtolkajka nonekiya toyauis yestli. 19 Moisés okimijli nochimej akin nemiyaj ipan pueblo tlen kijtouaya tlanauatijli. Sakin, okinelo inyesyo uakaxkokonej niman chivos iuan atl, okajsik se ichkatl tlen melak chichiltik iuan se tlakotl niman ika okajuachi libro niman nochimej akin nemiyaj ipan on pueblo. 20 Niman ijkin okijto: “Yejuin yestli tlen kiteititia ika toTajtsin nemouan yonotlajtolkauj niman ika noneki nenkitlakamatiskej”. 21 Ika yejon yestli noijki okajuachi kajkajli niman nochi tlen kitekitiltiayaj* para nochiuas tekitl. 22 Kema, Tlanauatijli kijtoua ika xnochi nochipaua ika yestli, niman tla xnotoyaua yestli xtechtlapopoluiskej.

23 Yejua ika, ononek makinuentlalikan yolkamej para kichipauaskej tlen san kiteititia tlen onka ne ipan cielo. Pero, para machipaui tlen onka ne ipan cielo noneki kiuentlaliskej itlaj tlen más kuajli. 24 Pampa Cristo okalak ne ipan cielo, xokalak kampa tlachipajkan tlen san gente yokichijchiuj. Yejua ika, aman topampa noteititia ixpan toTajtsin. 25 Yejua, xmiyekpa onotemakak. Xokichiuj ken ueyi teopixki, akin san cada año kalakiya kampa Santísimo para kitemakas yestli tlen xiyaxka.* 26 Tla ijkon yeskia, nonekiskia miyekpa tlajyouis desde ijkuak okichijchijkej yejuin mundo. Pero, aman ika yetlamis tlen onka,* yejua san sejpa onoteititi niman xok nonekis oksejpa noteititis, ijkon kipopolos tlajtlakojli pampa onotemakak ken uentli. 27 Nochimej san sejpa mikij niman satepan kintlajtlakolmakaj. 28 Noijki ijkon, Cristo san sejpa onotemakak para miyekej kinkixtilis* intlajtlakoluan. Ijkuak yejua oksejpa noteititis, xkichiuas para kipopolos tlajtlakojli. Ijkuak noteititis, kitaskej akin ika nochi inyojlo kichiatokej makinmakixtikan.

10 Tlanauatijli xkeman ueli kichiua ika akin kinekij kinisiuiskej* toTajtsin maka ok* makipiyakan tlajtlakojli san ipampa yejon uentin tlen cada año kintemakaj. Pampa, Tlanauatijli yeskia kentla itlaseuijlo tlen kuajli techmakaskej tlayekapan, pero xkiteititia itlaj tlen melauak. 2 Pampa tla yejon uentin tlen kintemakayaj ijkuak kitekichiuiliayaj toTajtsin kinchipauaskia, ¿xajsiskia se tonajli ijkuak xok kinpajsoloskia* intlamachilis ipampa intlajtlakoluan? 3 Pero xijkon, pampa cada año kimilnamikij intlajtlakoluan ika uentin tlen kintemakaj, 4 niman xuelis kinpopoloskej totlajtlakoluan ika inyesyo toros niman chivos.

5 Kuakon, ijkuak yejua kalaki ipan yejuin mundo, kijtoua: “‘Xotiknek uentin nion tetlayokoliltin, pero otinechmakak se notlalnakayo. 6 Xotikinseli uentin tlen tlatlaj nion uentin para tlajtlakoltin’. 7 Kuakon onikijto: ‘Xkita noTajtsin, yoniuajla para nikchiuas tlen tejua tikneki. Ipan amatl mimiltik ijkon ijkuilijtika notech’”. 8 Kachtopa kijtoua: “Xotiknek nion xotikinseli uentin de yolkej nion uentin tlen tlatlaj nion uentin para tlajtlakoltin”, ijkon ken kijtoua Tlanauatijli ika noneki notemakaskej. 9 Niman satepan kijtoua: “Xkita, yoniuajla para nikchiuas tlen tejua tikneki”. Yejua kipopoloua tlen achto yonoijtojka para kitlalis tlen ika okpa onoijto. 10 Pampa toTajtsin okinek, yotechchipajkej ipampa itlalnakayo Jesucristo, tlen san sejpa niman para nochipa onotemakak.

11 Noijki, nochimej teopixkej mojmostla yauej para kichiuaskej intekiyo tlen ika kiueyichiuaj toTajtsin niman para miyekpa kintemakaskej san no yejua uentin tlen xkeman uelis kinpopoloskej totlajtlakoluan para nochipa. 12 Pero yejuin tlakatl, san sejpa onotemakak para nochipa ipampa totlajtlakoluan niman onotlali iyekma toTajtsin. 13 Niman desde ijkuakon kichiatika makintlalikan itlauelikniuan ken se banco para ikxiuan. 14 Pampa, san ika se uentli, yejua yokichiuj maka sa makipiyakan tlajtlakojli akin kinchipajtokej. 15 Noijki, espíritu santo ijkon techajsikamachiltia pampa kachtopa ijkin yokijto: 16 “Jehová kijtoua: ‘Satepan ijkin ninotlajtolkauas imiuan. Nikintlalis notlanauatiluan ipan inyojlo niman nikimijkuilos ipan intlamachilis’”. 17 Sakin kijtoua: “Niman xok nikimilnamikis intlajtlakoluan nion tlen xkuajli* okichijkej”. 18 Ijkuak yotechintlapopoluilijkej totlajtlakoluan, xok noneki itlaj tiktemakaskej ipampa totlajtlakol.

19 Nokniuan, tejuamej kuajli tikmatstokej ika uelis tiktekitiltiskej* ojtli, tlen ipampa iyesyo Jesús teuika kampa tlachipajkan. 20 Yejuin ojtli tlen yenkuik niman yoltika otechtlapouili ijkuak opanok kampa onka cortina, tlen kijtosneki itlalnakayo. 21 Pampa tikpiyaj se teopixki akin ueyixtika, akin kitlajpiya ikal toTajtsin, 22 itech matonisiuikan ika nochi toyojlo niman itech matitlaneltokakan. Pampa, yokichipajkej toyojlo niman ken xkuajli onkatka totlamachilis niman totlalnakayo yokichipajkej ika atl tlen chipauak. 23 Matikneltokakan niman maka matikajkauakan ika tikteijliaj tlen tikchiaj tikseliskej, pampa akin otechijli ika techmakas yejuin, yolmelajki. 24 Matitlanemilikan intech oksekimej para san sekan toyolchikauaskej tikteititiskej ika titetlasojtlaj niman tikchiuaskej tlen kuajli. 25 Maka matikajkauakan ika tosentlaliaj ijkon ken sekimej yonomatkej kichiuaj, matoyolchikauakan imiuan oksekimej, más aman ika tikitaj ika yeyejkotika itonal toTajtsin.

26 Tla tikchiuaj se tlajtlakojli maski yekuajli tikixmatij tlen melauak, xok onka nion se uentli tlen uelis kichiuas matechintlapopoluilikan totlajtlakoluan. 27 Sa tomojtitoskej ijkuak tikchiatoskej matechtlajyouiltikan niman topan mauajla itlauel toTajtsin, tlen yeskia kentla tlitl niman kinmiktis akin kixnamikij. 28 Akin xkitlakamatiya Tlanauatijli tlen okimakakej Moisés xkikneliayaj ijkuak kimiktiayaj ipampa tlen kijtouayaj omemej noso yeyimej testigos. 29 Kuakon, ¿xnenkinemiliaj ika noneki más makitlajyouiltikan akin ipan yochojcholo iKoneuj toTajtsin niman kita ika xmás importante yejon yestli tlen ika onotlajtolkajkej niman tlen ika okichipajkej? ¿Xnenkinemiliaj ika noneki más xkuajli makichiuilikan akin yokuijuikalti* niman kita ika xtepaleui espíritu santo tlen kichiua matechiknelikan maski xtechnamiki? 30 Pampa tikixmatij akin ijkin okijto: “Nejua ninotlakuepiltis; nejua nikinmakas tlen kinnamiki”. Niman noijki: “Jehová kitlajtlakolmakas ipueblo”. 31 Melak temojti tiuetsis imak* toTajtsin akin yoltika.

32 Pero nochipa xkilnamikikan kenijki yeuejkaui onentlaxikojkej ijkuak melak onentlajyouijkej sakin ika yonenkixmatkaj tlen melauak. 33 Kemantika, teixpan omechuijuikaltijkej niman omechtlajyouiltijkej, niman kemantika onennenkej imiuan akin kixnamikiyaj nochi yejon. 34 Pampa, nemejuamej onenkimiknelijkej akin tsauktoyaj niman onenyolpakkej ijkuak omechkuilijkej tlen nenkipiyaj, pampa nenkimatij ika nenkipiyaj itlaj tlen más kuajli niman uejkauis.

35 Kuakon, maka xkajkauakan ika nentlajtouaj, pampa nenkimatstokej ika itlaj mechmakaskej. 36 Pampa nemejuamej noneki nentlaxikoskej, ijkon nenkiseliskej tlen toTajtsin yomechijli mechmakas ijkuak yonenkichijkej tlen yejua kineki. 37 Pampa, “xok miyek tiempo poliui” para “yejkos akin uajlauj,* niman xuejkauis”. 38 “Pero akin kichiua tlen kuajli, yoltos pampa tlaneltoka”, niman, “tla yejua nechkaua pampa nomojtia, xnechyolpaktis”. 39 Pero tejuamej xtikchiuaj ijkon ken akin kikauaj pampa nomojtiaj niman kinpopolouaj, tejuamej tikchiuaj ijkon ken akin tlaneltokaj niman xkipolouaj innemilis.

11 Titlaneltokas kijtosneki kuajli tikmatstos ika nochiuas tlen tikchia, itlaj tlen kiteititia ika yemelak onka tlen xnesi. 2 Ipampa yejuin, toTajtsin okimititi ika kinselia akin yeuejkaui onenkej.

3 Ipampa totlaneltok, ueli tikitaj ika nochi onka ken noneki onias pampa toTajtsin ijkon okijto. Kuakon, tlen tikitaj, onka ipampa tlen xtikitaj.

4 Ipampa itlaneltok, Abel okimakak toTajtsin se uentli tlen más kuajli xijkon ken de Caín. Ipampa itlaneltok ouel okijlijkej ika kipiaya kuajli iyojlo, pampa toTajtsin okiseli tlen Abel okiuentlali. Niman maski omik, itlaneltok ok* techmachtia.

5 Ipampa itlaneltok, Enoc oksekan okuikakej para maka tlajyouiskia ijkuak mikiskia niman xakaj ouel okinexti pampa toTajtsin oksekan okuikak. Achto ika kuikaskiaj oksekan, okijlijkej ika yokiyolpaktijka toTajtsin. 6 Noijki, tla xtitlaneltokaj xuelis tikyolpaktiskej toTajtsin, pampa akin kinisiuiya toTajtsin noneki kineltokas ika yejua nemi niman ika kinteochiua akin nokojtiliaj kitejtemoskej.

7 Ipampa itlaneltok, Noé okiteititi ika kimojkaita toTajtsin niman okichijchiuj se arca para kimakixtis ifamilia. Yejua ijkon okichiuj satepan ika toTajtsin yokijlijka ika kichiuaskia tlen xkeman noitaya. Ipampa itlaneltok, okiteititi ika on gente akin nemi ipan yejuin mundo kinamiki makipopolokan niman yejua okitakej ken akin kipiya kuajli iyojlo pampa otlaneltokak.

8 Ipampa itlaneltok, Abrahán otetlakamat ijkuak okinotskej niman oyaj kampa okijlijkej ika yeskia iherencia, yejua oyaj maski xkimatiya kanon yaya. 9 Ipampa itlaneltok, ochantik ipan tlajli tlen okijlijkej kimakaskej maski xompa ualeuaya. Ochantik ipan kajkaltsitsintin iuan Isaac niman Jacob, akin san noijki herencia kiseliskiaj. 10 Pampa yejua kichiaya se ciudad tlen kuajli okichijchijkej, tlen toTajtsin okinemili kenijki kichijchiuas niman okichijchiuj.

11 Ipampa itlaneltok, Sara noijki ouel okinpix ikoneuan maski yeueyi* katka pampa otlaneltokak itech akin okijli ika itlaj kimakas. 12 Yejua ika, itech se tlakatl akin kentla yomikka onenkej miyekej. Ikoneuan omiyekiyakej ijkon ken sitlalimej ne ipan cielo niman xuelis tikmatis kechmej pampa melak miyekej ijkon ken xajli tlen onka itenko mar.

13 Maski nochimej yejuamej xokiselijkej tlen yokimijlijkaj kinmakaskej, omelajkanenkej hasta ijkuak omikkej. Yejuamej desde uejka okitakej tlen yokimijlijkaj kinmakaskej niman ika nochi inyojlo okiselijkej. Niman teixpan okiteijlijkej ika xchanejkej katkaj niman ika xnochipa nemiskiaj ipan tlajli kampa chantiyaj. 14 Akin ijkon tlajtouaj kiteititiaj ika nokojtiliaj kitejtemoskej kanon chantiskej. 15 Niman, tla yejuamej san tlanemilijtoskiaj itech tlajli kampa ouajkiskej, ueliskia oksejpa nokuepaskej. 16 Pero, aman yejuamej nokojtiliaj kiseliskej kampa más kuajli chantiskej, kijtosneki tlen ualeua ne ipan cielo. Yejua ika, toTajtsin xintech pinaui nion xpinaui makijtokan ika yejua inTajtsin pampa yokinchijchiuili se ciudad.

17 Ipampa itlaneltok, Abrahán okitemakak Isaac ijkuak toTajtsin okichiuj makiteititi tla melauak itech tlaneltokaya. Kema, yejon tlakatl akin ika nochi iyojlo okiseli tlen toTajtsin yokijlijka kimakas, okiyejyeko kiuentlalis isentekoneuj. 18 Yejua okinek ijkon kichiuas maski ijkin yokijlijkaj: “Itech Isaac ualeuaskej mokoneuan”. 19 Pero yejua okasikamat ika toTajtsin ueliskia kiyolitis hasta intech akin yomikkej. Niman kema, okiseli intech akin yomikkej, niman yejuin okiteititi tlen satepan panoskia.

20 Ipampa itlaneltok, Isaac noijki okiteochiuj Jacob niman Esaú niman okimijli tlenon nochiuaskia satepan.

21 Ipampa itlaneltok, ijkuak Jacob yemiktoya, okiteochiuj cada se de ikoneuan José niman onopaleui ipan ibastón ijkuak okiueyichiuj toTajtsin.

22 Ipampa itlaneltok, José okijto kenijki kinmakixtiskiaj* israelitas, niman ijkuak yemiktoya, okimijli makimitkikan iomiyouan.

23 Ipampa intlaneltok, itajuan Moisés okiyankej yeyi metstli ijkuak ouajnen pampa okitakej ika melak kualtsin katka niman xokinmojti tlen rey yotenauatijka. 24 Ipampa itlaneltok, ijkuak Moisés yeueyi katka, xokinek makixmatikan ken ikoneuj ichpoch faraón. 25 Okinek tlajyouis iuan ipueblo toTajtsin niman xokinek noyolpaktis ika tlajtlakojli tlen xuejkaui ika teyolpaktia. 26 Yejua ijkon okichiuj pampa kitaya ika más patioj katka tlajyouis ijkon ken Cristo xijkon ken nochi tesoros tlen onkatkaj ne Egipto. Yejua nochipa tlanemilijtoya itech tlen kichiaya kiselis. 27 Ipampa itlaneltok, oyaj de Egipto niman xokimojti tla kualaniskia rey pampa yejua nochipa omelajkanen kentla tla kitstoskia akin xueli tikitaj. 28 Ipampa itlaneltok, okipanolti Pascua niman okajuachi inajnakastlan puertas ika yestli para iángel toTajtsin maka kinmiktis ikoneuan akin kachtopa ouajnenkej.

29 Ipampa intlaneltok, israelitas opanokej itlajkotian mar Rojo kentla tla panoskiaj kampa tlauakkan. Pero egipcios oamimikkej ijkuak okiyejyekojkej noijki ijkon kichiuaskej.

30 Ipampa intlaneltok, israelitas siete tonaltin okiyeualojkej itepanuan Jericó, niman sakin ouajxinkej itepanuan. 31 Ipampa itlaneltok, Rahab, akin auilnemiya, xomik imiuan akin xotetlakamatkej pampa kuajli okinseli akin oichtakatlachiatoj.

32 ¿Niman tlenon más nikijtos? Pampa xnechmakaskia tiempo nitlajtos itech Gedeón, Barac, Sansón, Jefté niman David niman noijki Samuel niman oksekimej teotlajtokej. 33 Pampa otlaneltokakej okimixnamikkej niman okintlankej reyes, okichijkej manochiua tlen kuajli, okikakkej tlenon kinmakaskiaj, okinkamatsaukkej leones, 34 xokintlatij tlitl, ocholojkej ijkuak kinmiktiskiaj, ijkuak xok kojtikej katkaj okiselijkej kojtilistli, xonomojtijkej ijkuak otlaixnamikitoj ipan guerra niman okichijkej macholokan akin kimixnamikiyaj. 35 Ipampa intlaneltok, sekimej siuamej oksejpa okinselijkej inchanejkauan akin yomikkaj ijkuak okinyolitijkej. Pero, maski oksekimej akin kitekichiuiliaj toTajtsin okintlajyouiltijkej, xokikajkajkej ika melajkanemij maski ijkon ueliskia kinmakauaskej. Ijkon okichijkej pampa kimatiyaj ika oksejpa kinyolitiskiaj niman más kuajli nemiskiaj. 36 Kema, oksekimej okintlajyouiltijkej ijkuak okinpijpinajtijkej niman okinuijuitekkej niman noijki okinsasalojkej* ika cadenas niman okintsaukkej. 37 Sekimej okintemojmotlakej, kinekiyaj makiteititikan tla melauak tlaneltokaj, okintsojtsontekkej, niman okinmiktijkej ika espada, nochiuiyan kistinemiyaj ika intlaken de incuero borregos niman incuero chivos. Yejuamej miyek tlen kinpolouaya, melak otlajyouijkej niman okinchiuilijkej tlen xkuajli. 38 Niman akin nemiyaj ipan yejuin mundo xkinamikiya imiuan manemikan. Okistinenkej kampa tlaluaktli, kampa tepemej, kampa teostomej niman kampa teostomej tlen onokej* ijtik tlajli.

39 Yejuamej xokiselijkej tlen yokimijlijkaj kinmakaskiaj maski toTajtsin yokimititijka ika kinseliaya. 40 Pampa toTajtsin yokijtojka ika kachtopa techmakaskia tejuamej itlaj tlen más kuajli, ijkon, kachtopa tejuamej techinkixtiliskiaj totlajtlakoluan niman satepan yejuamej.

12 Yejuamej testigos akin techyeualojtokej ijkon ken se ueyi moxtli, yejua ika, noijki matokixtilikan tlen yetik, niman yejon tlajtlakojli tlen kichiua nimantsin matiuetsikan, niman matokojtilikan matotlalokan ipan ojtli tlen onka toyekapan. 2 Nochipa matikonitstokan Jesús, akin techyekana kampa techmakixtiskej niman akin kichiua maka itlaj makipolo totlaneltok. Pampa otlanemili itech kenon sakin yolpakiskia, yejua otlaxiko ijkuak okipilojkej ipan kojtli melaktik* maski okipijpinajtijkej, niman yonotlali iyekmakopa itrono toTajtsin. 3 Para maka nensiauiskej niman nemosiajkauaskej, kuajli xtlanemilikan itech akin otlaxiko ijkuak okuijuikaltijkej* tlakamej tlajtlakolejkej akin san no yejuamej noijtlakojtoyaj.

4 Maski nenkixnamiktokej yejon tlajtlakojli, nentlaxikojtokej niman xemechmiktia. 5 Nemejuamej yonenkilkajkej yejuin tlen mechijliaj pampa nentekoneuan: “Nokoneuj, maka xkauilmati ijkuak Jehová mitsyektlalia niman maka xmosiajkaua, 6 pampa Jehová kinyektlalia akin kintlasojtla. Yejua, hasta kikui tlakotl tlen ika teyektlaliaj para kinyektlalis akin kinselia ken ikoneuan”.

7 Nemejuamej noneki nentlaxikoskej pampa nenkimatij ika toTajtsin mechyektlalijtikaj. ToTajtsin mechchiuilia ijkon ken ikoneuan. ¿Niman xmelauak ika nochi tajtin kinyektlaliaj inkoneuan? 8 Pero tla nemejuamej xomechyektlalijkej ijkon ken nochimej otechyektlalijkej kijtosneki ika xmelauak nenikoneuan, nemejuamej nenikoneuan yakaj okse. 9 Noijki, totajuan otechyektlalijkej niman tejuamej tikintlakaitayaj. Kuakon, ¿xnonekiskia más tiknekiskej tiktlakamatiskej toTaj akin kiyekana tonemilis ika iespíritu santo? 10 Pampa ipan san achijtsin tiempo, yejuamej otechyektlalijkej ijkon ken kitayaj ika kuajli, pero toTajtsin techyektlalia pampa kineki techpaleuis niman para matichipajkej ijkon ken yejua. 11 Melauak ika xkualtsin niman techyolkokoua ijkuak techyektlaliaj. Pero, tla tikseliaj matechyektlalikan, techpaleuis matikchiuakan tlen kuajli niman kuajli matinemikan.

12 Kuakon, xkinchikauakan nemomauan niman nemoteteponuan* tlen xkojtikej, 13 niman ok* xkinmelajtokan ojtin para nemokxiuan, para mapajti akin kikokoua ikxi niman ijkon xok kikokos. 14 Pampa tla yakaj xkitejtemoua yolsejtos imiuan nochimej niman xchipajkanemi, xuelis kitas toTeko. 15 Xmotlajpiyakan para toTajtsin nochimej mechititis ika mechiknelia maski xmechnamiki, niman xmotlajpiyakan para maka nenkichiuaskej kentla ineluayo se planta tlen kipiya veneno, tlen noskaltia niman kichiua maonia tlauejli niman kimijtlakoua miyekej. 16 Niman xmotlajpiyakan para maka yakaj akin nemouan nemi maauilnemi* nion maka makita ika xtlaj ika tepaleui tlen ualeua itech toTajtsin. Maka matikchiuakan ken Esaú, akin san ipampa se comida okipatlak tlen kimakaskiaj pampa yejua akin kachtopa ouajnen. 17 Pampa nemejuamej nenkimatij ika ijkuak okinek makiteochiuakan,* xokiselijkej. Maski melak ochokak niman onokojtili kipatlas tlen yonotlapejpenijka,* xtlaj ika okipaleui.

18 Pampa nemejuamej xnemonisiuiyaj* itech itlaj tlen ueli nenkasij niman tlen tlatlatika, nion kampa onka moxtli tlen kapotstik nion kampa melak tlayouatok nion kampa chikauak ajaka, 19 nion kampa kakisti trompeta nion itech itlajtol toTajtsin. Ijkuak israelitas okikakkej yejon tlajtojli, okitlajtlankej maka sa itlaj makimijlikan. 20 Pampa yejuamej melak onomojtijkej ijkuak ijkin okinnauatijkej: “Hasta tla se yolki kinisiuiya tepetl, noneki nenkitemojmotlaskej”. 21 Tlen kitstoyaj melak temojmojti, niman hasta Moisés okijto: “Nikuekuetlakatika pampa melak ninomojtia”. 22 Pero nemejuamej yonemonisiuijkej itech se tepetl Sion niman itech se ciudad, tlen toTajtsin akin yoltika yokitlali, kijtosneki Jerusalén tlen onka ne cielo. Niman yonemonisiuijkej itech melak miyekej ángeles 23 akin yonosentlalijkej. Yonemonisiuijkej itech intlanechikol akin achto yokintlapejpenijkej para yaskej ne cielo. Yonenkinisiuijkej toTajtsin akin nochimej kintlajtlakolmakas, niman itech akin kipiyaj kuajli inyojlo akin noyekanaj ika espíritu santo niman xok tlajtlakolejkej. 24 Noijki, yonemonisiuijkej itech Jesús, akin tlapaleuiya oksejpa kuajli manotlajtolkauakan* niman itech yestli tlen topan okajuachijkej, tlen más kuajli xijkon ken iyesyo Abel.

25 Kuajli xkakikan akin tlajtojtika. Pampa tla xomakiskej akin xokikakkej akin kiteijliaya ipan yejuin mundo tlen ualeua itech toTajtsin, tejuamej noijki xtimakisaskej tla tikauaj akin uajtlajtoua desde ne ipan cielo. 26 Ijkuakon, itlajtol okitsejtselo mundo, pero aman yejua ijkin yokijto: “Oksejpa niktsejtselos mundo, niman xsan mundo, noijki cielo”. 27 Ijkuak kijtoua “oksejpa”, kijtosneki ika popoliuis nochi tlen notsejtseloua, tlen toTajtsin xokichijchiuj. Ijkon, san nokauas tlen xnotsejtseloua. 28 Tejuamej tikseliskej se Gobierno tlen xueli kitsejtselouaj. Yejua ika, maka keman matikauakan toTajtsin, para yejua nochipa techiknelis maski xtechnamiki. Yejon techpaleuis matikueyichiuakan ijkon ken yejua kuelita, tikmojkaitaskej niman melak tiktlakaitaskej. 29 Pampa toTajtsin ken se tlitl tlen nochi kitlatia.

13 Xmotlasojtlatokan ken ikniujtin. 2 Nochipa kuajli xkinselikan oksekimej, pampa sekimej akin ijkon okichijkej okinselijkej ángeles maski xkimatiyaj. 3 Xkimilnamikikan akin tsauktokej,* kentla tla noijki imiuan nentsauktoskiaj, niman akin kintlajyouiltiaj, kentla tla imiuan nentlajyouijtoskiaj. 4 Nochimej makitlakaitakan tlen toTajtsin yokitlali para akin yononamiktijkej. Teueuentsin niman tesiuauj xnoneki nokajkayauaskej, pampa toTajtsin kintlajtlakolmakas akin auilnemij* niman akin notekaj imiuan akin ximixnamik. 5 Maka xnekikan melak nemotomintiskej niman xpakikan san ika tlen nenkipiyaj, pampa yejua yokijto: “Xkeman nimitskauas niman xkeman nimitstlalkauis”. 6 Kuakon, maka matomojtikan niman matikijtokan: “Jehová yejua akin nechpaleuiya. Xninomojtis. ¿Tlenon uelis nechchiuiliskej?”.

7 Xkimilnamikikan akin mechyekanaj, akin yomechnojnotskej itech itlajtol toTajtsin, niman xkitakan kenon yokinpaleui tlen yokichijkej akin mechyekanaj para xtlaneltokakan ken yejuamej.

8 Yaloua, aman niman nochipa, Jesucristo san no yejua.

9 Maka xmokauilikan mamechkajkayauakan ika tlatlamantikej* tlamachtiltin niman tlen xnenkixmatij. Akin noyolchikauaj pampa kitaj ika comida* más importante, xtlaj ika kinpaleuiya, yejua ika, más kuajli tla toyolchikauaj pampa tikmatij ika toTajtsin techtlasojtla.

10 Tikpiyaj se tlaixpan kampa xuelis tlakuaskej akin kitekichiuiliaj toTajtsin ipan kajkajli, 11 pampa intlalnakayo yolkamej uejka kontlatiayaj kampa xok yakaj chantiya. Inyesyo yejuin yolkamej tlen ueyi teopixki kitkiya ijtik Santo para kiuentlalis ipampa tlajtlakojli. 12 Yejua ika, Jesús noijki otlajyoui itenko on ciudad* para kichipauas pueblo ika iyesyo. 13 Kuakon, iuan matiakan kampa xok yakaj chanti niman iuan matikxikokan tlen okijyoui ijkuak okipijpinajtijkej, 14 pampa nikan tejuamej xtikpiyaj se ciudad tlen nochipa onias. Ika yejon, tokojtiliaj tiktejtemoskej yejon ciudad tlen sakin kitlaliskej. 15 Ipampa yejua, nochipa matikueyichiuakan toTajtsin, kijtosneki matiktekitiltikan* tokamak para tikteijliskej itoka. 16 Noijki, maka xkilkauakan nenkichiuaskej tlen kuajli niman xkinmakakan oksekimej tlen nenkipiyaj, pampa yejuin uentin melak kiyolpaktiaj toTajtsin.

17 Xkintlakamatikan akin mechyekanaj niman xmoyolyemanilikan para nenkichiuaskej tlen kijtouaj, pampa yejuamej mechtlajpixtokej niman kintlajtlakolmakaskej ipampa ken mechtlajpiyaj. Tla ijkon nenkichiuaj, yejuamej ika inyojlo mechyekanaskej niman xonsiauiskej. Ijkon, nemejuamej xnentlajyouiskej.

18 Topampa xchiuakan oración, tejuamej kuajli tikmatstokej ika chipauak tikpiyaj totlamachilis pampa tiknekij nochipa tikijtoskej tlen melauak. 19 Pero más miyekpa nimechtlajtlanilia xchiuakan oración para nimantsin uelis nias kampa nennemij.

20 ToTajtsin akin kichiua matiyolsejtokan, okikuiteuj intech akin yomikkej toTeko Jesús, akin kintlajpiya borreguitos niman ueyixtika. Yejua okimakak toTajtsin yejon yestli tlen ika touan onotlajtolkauj para nochipa. 21 Niktlajtlani ika toTajtsin mamechmaka nochi tlen noneki para nenkichiuaskej tlen yejua kineki. Niman ipampa* Jesucristo, topan makichiua tlen yejua kuelita. Nochipa san yejua makiueyiteneuakan. Amén.

22 Nokniuan, aman miyekpa nimechtlajtlanilia kuajli xkakikan yejuin tlen nimechijlia para nimechyolchikauas, pampa yonimechijkuilouili se pitentsin* carta. 23 Nikneki xmatikan ika tokniuj Timoteo yokimakajkej. Tla nimantsin uajlauj,* san sekan timechonitaskej.

24 Xnechintlajpalouilikan nochimej akin mechyekanaj niman nochimej tokniuan. Tokniuan de Italia mechontlajpalouaj.

25 Niktlajtlani ika nochimej nemejuamej mamechiknelikan maski xmechnamiki.