SANTIAGO

1 Nejua niSantiago, akin itlakeual toTajtsin niman toTeko Jesucristo. Nimechontlajpaloua niman nimechontlajkuilouilia nemejuamej 12 tribus akin nenxexelijtokej nochiuiyan.

2 Nokniuan, melak xyolpakikan ijkuak tlamantik* tlen nenkijyouiskej. 3 Pampa nenkimatij ika ijkuak tlamantik tlen yokijyoui nemotlaneltok, kichiuas más xtlaxikokan. 4 Pero noneki nochi nenkixikoskej,* ijkon, xok nenkipiyaskej tlajtlakojli, san nenkipiyaskej tlen kuajli niman xtlaj mechpolos.

5 Kuakon, tla yakaj xmás tlamachilise, nochipa makitlajtlanili toTajtsin makipaleui niman toTajtsin kipaleuis matlamachilise, pampa yejua melak techpaleuiya tinochimej niman xtechixkoijlia. 6 Pero ijkuak itlaj kitlajtlanis noneki tlaneltokas niman xkinemilis tla xuelis nochiuas, pampa akin xmás tlaneltoka yeskia kentla iakoxonajlo mar, tlen ajakatl kuika kampa yejua kineki. 7 Akin ijkon kichiua xnoneki kinemilis ika Jehová itlaj kimakas. 8 Akin xmás tlaneltoka san kipapatla tlen kinemilia niman san kipapatla nochi tlen kichiua.

9 Pero tokniuj akin xkipiya tomin, mayolpaki* ika okiueyitenejkej, 10 niman tokniuj akin kipiya tomin, mayolpaki ika okipijpinajtijkej, pampa akin kipiya tomin popoliuis ken se xochitl tlen onka ipan tepetl. 11 Pampa ijkuak tonaltsintli uajkisa niman peua melak tona, xijtli pilini, xochitl uetsi niman xok kualtsin nesi. Noijki ijkon, popoliuis akin kipiya tomin tla melak kitejtemoua kenijki más notomintis.

12 Yolpaki akin tlaxikojtika ijkuak itlaj kijyouijtika, pampa ijkuak kiseliskej, kimakaskej inemilis ken se corona tlen Jehová yokimijli kinmakas akin nochipa kitlasojtlaj. 13 Ijkuak yakaj kixnamikis itlaj tlen xkuajli, maka makijto: “ToTajtsin nechtlajyouiltia”. Pampa xakaj uelis kichiuas ika toTajtsin makichiua tlen xkuajli, nion yejua xkichiua ika oksekimej inpan manochiua tlen xkuajli. 14 Cada se tlajyouiya ipampa tlen kiyoltilana niman tlen kileuiya. 15 Ijkuak yakaj yopeuj itlaj melak kileuiya kichiua matlajtlako, niman yejon tlajtlakojli kichiua mamiki.

16 Noknitsitsinuan, maka xmokajkayauakan. 17 Nochi tetlayokoliltin tlen ualeuaj ne tlakpak, yejon tlen más kuajli. Ualeuaj itech akin okichijchiuj tlauijli tlen onka ipan cielo, yejua xkipapatlatiuj itlaseuil.* 18 Pampa yejua okinek, okitekitilti* itlajtol tlen melauak para kichiuas matiuajnemikan. Yejon okichiuj ika tejuamej kachtopa matechtlapejpeni intech akin okinchijchiuj.

19 Noknitsitsinuan, nikneki xmatikan ika nochimej noneki nenkinektoskej nentekakiskej, pero xnoneki nimantsin nentlajtoskej nion nimantsin nenkualaniskej. 20 Pampa ijkuak yakaj kualani, xkichiua tlen toTajtsin kita ika kuajli. 21 Kuakon, xmokixtilikan nochi tlen xchipauak niman nochi tlen xkuajli, noijki xmochiuakan nenyolyemankej para nemopan manoneluayoti yejon tlajtojli tlen uelis mechmakixtis.

22 Pero xchiuakan tlen kijtoua itlajtol toTajtsin niman maka san xkakikan, tla san nenkikakiskiaj san no nemejuamej nemokajkayajtoskiaj. 23 Pampa, tla yakaj kikaki itlajtol toTajtsin pero xkichiua, yeskia ken se tlakatl akin kita ixayak ipan se espejo. 24 Yejua noita, niman ijkuak yauj, nimantsin kilkaua kenijki nesiya. 25 Pero akin kuajli kita niman xkeman kikajkaua tlanauatijli tlen xnopopoloua* niman kichiua matimakisakan, xsan kikaki niman kilkaua. Yejua kichiua tlen kijtoua tlanauatijli niman melak yolpakis ijkuak ijkon kichiuas.

26 Tla yakaj kinemilia ika kiueyichiua toTajtsin pero xueli kiteltia inenepil, kikajkayajtika iyojlo niman xtlaj ika tepaleui tlen kichiua para teueyichiuas. 27 Para toTajtsin akin noijki toTaj, kuajli niman chipauak ken tikueyichiuaj ijkuak tikchiuaj yejuin: tla tikintlajpiyaj iknotsitsintin niman siuakaualtsitsintin akin kixnamiktokej tlen xkuajli, noijki tla tichipajkanemij ipan yejuin mundo.

2 Nokniuan, ¿tleka nentechikoitaj tla nenkijtouaj ika nentlaneltokaj itech toTeko Jesucristo akin ueyixtika? 2 Tla ipan nemoreuniones yauj se tlakatl akin kinpiya ianillos de oro niman kualtsin itlaken pero noijki yauj se tlakatl akin xkipiya tomin niman itlaken xchipauak, 3 nemejuamej más nenkitlakaitaj akin más kualtsin itlaken niman ijkin nenkijliaj: “Xmotlali nikan kampa más tlakualtsinkan”. Pero, akin xtlaj kipiya ijkin nenkijliaj: “Tejua san xijkato” noso “Xmotlali ne inakastlan banco kampa nikintlalia nokxiuan”. 4 Pampa ijkon nenkichiuaj, ¿xnenkiteititiaj ika nentechikoitaj niman ika nenkichiuaj ken jueces akin xkuajli ken tetlajtlakolmakaj?

5 Xkakikan noknitsitsinuan. ¿Xmelak ika toTajtsin okintlapejpeni para melak matlaneltokakan akin ipan yejuin mundo kimitaj ika xtlaj kipiyaj? Niman, ¿xyejuamej akin toTajtsin okintlapejpeni para makiselikan ken herencia yejon Gobierno tlen yokimijlijka kinmakas akin kitlasojtlaj? 6 Pero, nemejuamej xnenkintlakaitaj akin xtlaj kipiyaj. ¿Xmelauak ika akin ricos yejuamej akin mechtlajyouiltiaj niman mechtlaueltilantiuej imixpan jueces? 7 ToTajtsin omechmakak se tokayotl tlen noneki kitlakaitaskej. Pero, ¿xmelauak ika akin ricos yejuamej akin kuijuikaltiaj* yejon tokayotl? 8 Yejua ika, melak kuajli tla nenkitlakamatij tlanauatijli tlen rey otlanauati ipan Tlajkuiloltin, kampa kijtoua: “Xkintlasojtla oksekimej ijkon ken tejua timotlasojtla”. 9 Pero, tla nemejuamej xnenkikajkauaj ika nentechikoitaj, nentlajtlakojtokej niman tlanauatijli kiteititia ika nemejuamej nenkipiyaj tlajtlakojli.

10 Pampa tla yakaj kitlakamati nochi Tlanauatijli pero nopopoloua niman san se xkitlakamati, kitlajtlakoltiskej pampa xkitlakamati nochi Tlanauatijli. 11 Pampa akin okijto “Maka xmoteka iuan akin xmoixnamik” noijki ijkin okijto “Maka xtemikti”. Kuakon, tla xtimoteka iuan akin xmoixnamik pero titemiktia, kijtosneki ika xtiktlakamatstika tlanauatijli. 12 Nochipa xtlajtokan niman xchiuakan ken kichiuaj akin kintlajtlakolmakaskej ika intlanauatil akin yokinmakixtijkej. 13 Pampa akin xteiknelia, xkikneliskej ijkuak kitlajtlakolmakaskej. Pero, akin teiknelia tetlanis ijkuak kitlajtlakolmakaskej.

14 Nokniuan, ¿tlenon ika kipaleuis yakaj akin kijtoua ika tlaneltoka pero xkichiua tlen kuajli? ¿Xmelak ika yejon itlaneltok xuelis kimakixtis? 15 Matikijtokan ika se tokniuj xkipiya tlen kinakis* niman xkipiya tlen kikuas. 16 Pero, maski ijkon se de nemejuamej ijkin kijlia: “Kuajli xuiya, xmotlapacho niman kuajli xtlakua”. ¿Itlaj ika tepaleuis tla xtlaj kimaka? 17 Noijki ijkon, tla titlaneltokaj pero xtikchiuaj tlen kuajli, totlaneltok kentla miktoskia.

18 Pero, kanaj yakaj kijtos: “Tejua titlaneltoka niman nejua nikchiua tlen kuajli. ¿Kenijki uelis tinechititis ika titlaneltoka tla xtikchiua tlen kuajli? Ika on tlen kuajli nikchiua nejua nimitsititis kenijki nitlaneltoka”. 19 ¿Xmelauak ika tejua tikneltoka ika nemi san se toTajtsin? Kuajli ika ijkon tikchiua. Pero hasta demonios kineltokaj yejon niman nomojtiaj. 20 Tejua, tlakatl akin xtitlamachilise, ¿xtikita ika motlaneltok xtlaj ika tepaleui tla xtikchiua tlen kuajli? 21 ¿Xmelauak ika toTajtsin okitak ika Abrahán kipiya kuajli iyojlo ipampa tlen okichiuj? Kema, toTajtsin okitak ika kipiya kuajli iyojlo satepan ika yejua okiuentlali ikoneuj Isaac ipan tlaixpan. 22 Tikita ika yejua okiteititi ika tlaneltoka niman okichiuj tlen kuajli. Niman itlaneltok xok itlaj okipolo ipampa tlen okichiuj. 23 Ijkon, onochiuj yejon texto tlen uajlauj* ipan Tlajkuiloltin, kampa kijtoua: “Abrahán otlaneltokak itech Jehová niman yejua okitak kentla yakaj akin kipiaya kuajli iyojlo”. Niman Jehová okijto ika Abrahán katka iamigo.

24 Nenkitaj ika se tlakatl kitaskej ika kipiya kuajli iyojlo tla kichiua tlen kuajli niman xsan pampa tlaneltoka. 25 Noijki ijkon, toTajtsin okitak ika Rahab, akin auilnemiya, kipiaya kuajli iyojlo ipampa tlen okichiuj. Yejua okitak ika kipiaya kuajli iyojlo pampa kuajli okinseli akin oichtakatlachiatoj niman okomontitlan ipan okse ojtli. 26 Kema, ijkon ken totlalnakayo miki tla xtitijyotiaj,* totlaneltok noijki miktok tla xtikchiuaj tlen kuajli.

3 Nokniuan, xnemochimej nonekiskia nemochiuaskej maestros pampa nenkimatij ika tejuamej más techtlajtlakolmakaskej xijkon ken oksekimej. 2 Pampa nochimej miyekpa topopolouaj. Pero tla yakaj xkeman nopopoloua ika tlen kijtoua, kijtosneki ika xkipiya tlajtlakojli niman noijki ika ueli kiyekana nochi itlalnakayo. 3 Ijkuak tikintlaliliaj caballos infrenos ipan inkamak para matechtlakamatikan, noijki tikyekanaj nochi intlalnakayo. 4 Noijki, kuajli xkimitakan barcos: maski melak uejueyimej niman ajakatl kinuika ijkuak chikauak ajaka, san kinyekanaj ika se pitentsin* kojtli tlen onka inkuitlapan. Niman barcos yauej kampa kineki akin kiyekantika yejon pitentsin kojtli.

5 Noijki ijkon nochiua ika tonenepil. Maski melak pitentsin ipan totlalnakayo, melak noueyimati ika tlen kijtoua. ¡Xkitakan kenijki achijtsin tlitl ueli miyek kitlatia kampa melak kojyo! 6 Tonenepil noijki se tlitl. Tonenepil tlen tikpiyaj ipan totlalnakayo kentla se mundo tlen tentika ika tlen xkuajli pampa kijtlakoua nochi totlalnakayo. Uelis kijtlakos yakaj inemilis niman tepopoloua ijkon ken Gehena.* 7 Pampa nochimej tepeyolkej, yolkamej uan uelij patlanij, yolkamej uan notilanaj niman yolkamej uan nemij ijtik atl uelij kinyekanaj, niman gente yokinmansojtili. 8 Pero xakaj ueli kichiualtia inenepil makitlakamati. Xakaj ueli kiyekana, teijtlakoua niman tentika ika veneno tlen temiktia. 9 Ika tonenepil tikueyichiuaj toTaj Jehová. Pero noijki tikinuijuikaltiaj* gente, akin toTajtsin okinchijchiuj ijkon ken yejua. 10 Ika tokamak tikueyichiuaj toTajtsin niman tikinuijuikaltiaj oksekimej.

Nokniuan, xkuajli ika ijkon manochiua. 11 ¿Xmelak ika kampa meya atl xueli uajkisa atl tsopelik niman noijki atl chichik? 12 Nokniuan, ¿xmelak ika higokojtli xuelis kintlakiltis aceitunas niman ikojyo uvas xuelis kintlakiltis higos? Noijki, kampa meya atl poyek xuelis meyas atl tsopelik.

13 ¿Akinon de nemejuamej tlamachilise niman nochi kasikamati? Makiteititi ika tlen kichiua. Tla ika tlen kichiua kiteititia ika yolsejki, kiteititis ika melauak tlamachilise. 14 Pero tla ipan nemoyojlo melak nentenexikolitaj niman san teuan nenkinekij nemokualanijtinemiskej, maka xmoueyimatstinemikan niman maka xkijtokan tlen kixnamiki tlen melauak. 15 Yejuin tlamachilistli xualeua itech toTajtsin. Ualeua itech yejuin mundo, itech gente niman intech demonios. 16 Pampa ijkuak yakaj tenexikolita niman san kineki teuan nokualanis, yejon kichiua maka itlaj kuajli maonia niman manochiua tlen xkuajli.

17 Akin noyekanaj ika tlamachilistli tlen ualeua itech toTajtsin, chipauak tlen kichiuaj niman tlen kinemiliaj, yolsejkej, teasikamatij, nochipa tetlakamatij, teikneliaj, kichiuaj tlen kuajli, xtechikoitaj niman xtekajkayauaj. 18 Niman akin teuan kuajli nouikaj, kichiuaj ika oksekimej mayolsejtokan, niman yejuin kichiua makichiuakan tlen kinamiki.

4 ¿Tleka nemoixnamikij niman nemokualaniaj imiuan oksekimej? ¿Xijkon nenkichiuaj pampa nemoyekanaj ika tlen kileuiya nemotlalnakayo, tlen iuan nemoixnamikij ipan nemoyojlo? 2 Nemejuamej miyek tlen nenkinekij pero xnenkipiyaj. Xnenkikajkauaj ika nentemiktiaj niman nenkinekij nenkipiyaskej tlen xnemoyaxka,* pero maski ijkon xueli nenkipiyaj tlen nenkinekij. Xnenkikajkauaj ika nemokualaniaj niman nemoixnamikij. Xnenkipiyaj pampa xnenkitlajtlanij, 3 niman ijkuak kema nenkitlajtlanij, xnenkiseliaj. Pampa tlen nenkitlajtlanij, nenkitlajtlanij para nenkichiuaskej tlen xkuajli, tlen kileuiya nemotlalnakayo.

4 Nemejuamej akin yonenkikajkej toTajtsin, ¿xnenkimatij ika tla nemouikaj imiuan akin nemij ipan yejuin mundo nemochiuaj itlauelikniuj toTajtsin? Kuakon, tla yakaj kineki nochiuas iamigo akin nemij ipan yejuin mundo, nochijtika itlauelikniuj toTajtsin. 5 ¿Noso nenkinemiliaj ika Tlajkuiloltin san nenka ijkin kijtouaj: “Toyojlo techchiualtia matitenexikolitakan niman yejon kichiua melak matiknekikan tlatlamantik* tlemach”? 6 Pero, tejuamej ueli tikixnamikij tlen tikileuiyaj pampa yejua techititia ika techiknelia maski xtechnamiki. Yejua ika, Tlajkuiloltin ijkin kijtouaj: “ToTajtsin kimixnamiki akin noueyimatij, pero, kimititia ika kimiknelia maski xkinnamiki akin yolyemankej”.

7 Yejua ika, xmokauilikan mamechyekana toTajtsin. Pero xkixnamikikan Diablo niman yejua mechtlalkauis. 8 Xnisiuikan* toTajtsin niman yejua mechnisiuis. Nemejuamej akin nentlajtlakolejkej, xkinchipauakan nemomauan. Niman nemejuamej akin xnenkimatij tlenon nenkichiuaskej, xchipauakan nemoyojlo. 9 Xmoyolkokokan, xmajmanakan niman xchokakan. Noneki xmajmanakan niman maka sa xuetskakan. Xajmankamikikan niman maka sa xpakikan. 10 Xmoyolyemanilikan ixpan Jehová niman yejua mechueyilis.

11 Nokniuan, maka xmotejteneuakan. Akin kitejteneua se tokniuj noso kitlajtlakolmaka, kitejteneua tlanauatijli niman kijtoua ika tlanauatijli xkuajli. Kuakon, tla tejua tikijtoua ika xkuajli tlanauatijli, timochijtok se juez, xok timochijtok ken akin kitlakamati tlanauatijli. 12 San toTajtsin kintemaka tlanauatiltin niman san yejua juez. San yejua ueli temakixtia niman tepopoloua. Pero ¿tejua tiakinon para tiktlajkakolmakas mokniuj?

13 Aman xkakikan, nemejuamej akin ijkin nenkijtouaj: “Amanin noso mostla tiaskej ipan yejuin ciudad, ompa tinemiskej se año, titlasemanaskej niman titlanemakaskej niman melak totomintiskej”. 14 Ijkon nenkijtouaj maski nemejuamej xnenkimatij tlenon nemopan panos mostla. Pampa nemejuamej kentla ayaujtli,* tlen xuejkaui niman san uajpopoliui. 15 Más kuajli tla ijkin nenkijtoskiaj: “Tla Jehová kineki, tiyoltoskej niman tikchiuaskej yejuin niman yejon”. 16 Pero nemejuamej nemoueyimatij niman melak nemoueyiteneuaj. Yejon melak xkuajli. 17 Kuakon, tla yakaj kimati kenijki kichiuas tlen kuajli pero xkichiua, yejua tlajtlakojtika.

5 Aman xkakikan nemejuamej akin nenricos, xchokakan niman xmajmanakan ipampa on tlen xkuajli tlen nemopan uajlauj.* 2 Tlen patioj nenkipiyaj yopoxkauj niman nemotlaken yokikuajkuajkej okuilintsitsintin.* 3 Oro niman plata tlen yonenkejyejkej yoteposkis,* niman yejon tlen yoteposkis kiteititis ika xkuajli tlen nenkichiuaj niman kikuas nemonakayo. Tlen nemejuamej yonenkisentlalijkej yes ken se tlitl ipan itlamiyan tonaltin. 4 Xkitakan, tlakeualtin akin otekitkej ipan nemotlal tsajtsitokej pampa xonenkintlaxtlauilijkej. Niman Jehová, akin kinyekana ángeles, yokikak kenijki chikauak tsajtsij para makinpaleuikan. 5 Ipan yejuin mundo, nemejuamej yonennenkej ken akin ricos niman melak yonemoyolpaktijkej. Nemoyojlo ijkon ken yolkamej tlen kintomauaj para kinmiktiskej. 6 Yonenkiyolkuitijkej niman yonenkimiktijkej akin kipiya kuajli iyojlo. ¿Xmelauak ika yejua* mechixnamiki?

7 Yejua ika, nokniuan, xtlaxikokan hasta ijkuak ajsis tonajli ijkuak toTeko yetouan nemis. Xkitakan, akin toka xnosiajkaua niman kichia matlaki tlen yokitokak hasta ijkuak peua kiyaui niman ijkuak tlami kiyaui. 8 Nemejuamej noijki maka xmosiajkauakan; xmoyolchikauakan pampa yeajsitika tonajli ijkuak toTeko yetouan nemis.

9 Nokniuan, maka xmokualanijtinemikan imiuan oksekimej para maka mechtlajtlakolmakaskej. Xkitakan, akin tetlajtlakolmaka yenemi kampa puerta. 10 Nokniuan, xchiuakan ijkon ken teotlajtojkej akin Jehová okintlapejpeni para matlajtokan ipampa, yejuamej otlaxikojkej ijkuak okixnamikkej tlen xkuajli niman xonosiajkajkej. 11 Tikitaj ika yolpakij akin yotlaxikojkej. Nemejuamej yonenkikakkej kenijki otlaxiko Job niman tlenon okichiuj Jehová ipampa, kuakon nenkimatij ika Jehová melak tetlasojtla niman teiknelia.

12 Nokniuan, maka xteneuakan on cielo nion mundo ijkuak itlaj nenkijtoskej nenkichiuaskej nion maka xteneuakan okse itlaj ijkuak nenkijtoskej itlaj nenkichiuaskej. Más kuajli tla nenkijtouaj “kema”, tla kema, niman “ka”, tla ka, para maka mechtlajtlakolmakas toTajtsin.

13 ¿Nemi yakaj akin tlajyouijtika? Makichijto oración. ¿Nemi yakaj akin yolpaki? Manokuikati salmos para kiueyichiuas toTajtsin. 14 ¿Nemi yakaj akin kualo? Makinnotsa tlayekankej akin nemij ipan tlanechikojli niman yejuamej makichiuakan oración ipampa, makitlalilikan aceite ijkon ken Jehová kineki. 15 Niman oración tlen kichiuaskej tlayekankej pampa tlaneltokaj, kichiuas ika akin kualo mapajti, niman Jehová kikuiteuas. Noijki tla akin kualo yokichiuj se tlajtlakojli, kitlapopoluiskej.

16 Ika yejon, xmoijlikan nemotlajtlakoluan imiuan oksekimej niman xchiuakan oración inpampa oksekimej, para ijkon nenpajtiskej. Tlen kitlajtlani akin kipiya kuajli iyojlo kipiya poder niman melauak uelis kinpaleuis oksekimej. 17 Elías noijki nomachiliaya ijkon ken tejuamej, maski ijkon, ijkuak okichiuj oración ika nochi iyojlo para maka makiyaui, xokiyauj ipan yejuin mundo yeyi año uan tlajko. 18 Kuakon oksejpa okichiuj oración, niman melak okiyauj niman tlajli melak otlatlakilti.

19 Nokniuan, tla yakaj kikaua tlen melauak niman yakaj okse kichiua mauajnokuepa, 20 xmatstokan ika akin kipaleuis makikajkaua tlen xkuajli kichiua, kimakixtis niman toTajtsin kitlapopoluilis nochi itlajtlakoluan akin yotlajtlako.