1 PEDRO

1 Nejua niPedro, iapóstol Jesucristo. Nimechontlajkuilouilia nemejuamej akin onenyajkej ne Ponto, Galacia, Capadocia, Asia niman Bitinia. Kema, nimechontlajkuilouilia nemejuamej akin xnenchanejkej ipan yejuin mundo, akin yomechtlapejpenijkej 2 pampa toTajtsin akin toTaj ijkon yokijtojka. Yomechchipajkej ika espíritu santo para xtetlakamatikan niman nemopan makajuachikan iyesyo Jesucristo.

Niktlajtlani más mamechiknelikan maski xmechnamiki niman mamechyolseuikan.

3 Makiueyichiuakan toTajtsin, akin iTaj toTeko Jesucristo. Yejua melak techiknelia niman yokichiuj oksejpa matiuajnemikan pampa okiyoliti Jesucristo intech akin yomikkej. Yejon kichiua matikchiakan itlaj tlen xkeman tlamis. 4 Niman kichiuas matikselikan herencia tlen xueli ijtlakaui, tlen chipauak niman tlen xpilini. Yejon herencia yonoyejyeuj ne ipan cielo para nemejuamej 5 akin nentlaneltokaj itech toTajtsin. Ika yejon, yejua mechtlajpiya ika ipoder para uelis nenmakisaskej ipan sa ika tlami tiempo. 6 Ika yejon, nemejuamej melak nenyolpakij maski noneki miyek nenkijyouiskej ipan seki tiempo. 7 Ijkuak nenkiteititiskej ika melauak nentlaneltokaj, mechpaleuis mamechueyichiuakan, mamechueyitlalikan niman mamechtlakaitakan ipan yejon tiempo ijkuak Jesucristo noteititis. Yejuin nemotlaneltok tlen yokiteititi ika tlaxikoua, más patioj xijkon ken oro tlen ueli ijtlakaui maski yokipanoltijkej ipan tlitl. 8 Maski nemejuamej xkeman onenkitakej, nenkitlasojtlaj. Maski aman xnenkitaj, itech nentlaneltokaj niman melak nenyolpakij 9 ijkuak nenkitaj ika nemotlaneltok mechmakixtia.

10 Teotlajtojkej akin desde yeuejkaui yokijtojkaj kenijki mechikneliskiaj maski xmechnamiki, melak okitejtemojkej niman kinekiyaj kimatiskej kenijki mechmakixtiskiaj. 11 Desde yeuejkaui toTajtsin okitekitilti* espíritu santo para kimijlis ika Cristo tlajyouiskia niman satepan kichiuaskej maueyixto. Yejua ika, onokojtilijkej kimatiskej tlenon ipan nochiuaskia Cristo niman kemanon ijkon ipan nochiuaskia. 12 Pero toTajtsin okimititi teotlajtojkej ika tlen kiteijliayaj xpara yejuamej katka, kiteijliayaj para nemejuamej mechpaleuis. Noijki, akin yomechijlijkej kuajli tlajtoltin yomechnojnotskej itech tlen teotlajtojkej okiteijlijkej. Yejuamej onoyekankej ika espíritu santo tlen ualeua ne cielo. Yejuin noijki tlen ángeles melak kinekij kimatiskej.

13 Kuakon, xnemikan listos para itlaj nenkichiuaskej, kuajli xnemilikan tlen nenkichiuaskej niman xneltokakan ika mechikneliskej maski xmechnamiki ijkuak noteititis Jesucristo. 14 Xchiuakan ijkon ken tekoneuan akin tetlakamatij. Maka xkauilikan mamechyekana tlen yeuejkaui nenkileuiayaj ijkuak xtlaj nenkimatiyaj. 15 Más kuajli tla nenchipajkanemij itech nochi tlen nenkichiuaj pampa toTajtsin akin omechnots chipauak. 16 Pampa ijkuilijtok: “Noneki nenchipajkej yeskej pampa nejua nichipauak”.

17 Nemejuamej nemonisiuiyaj itech Tajtli, akin xtechikoita ijkuak kitlajtlakolmaka cada se ipampa tlen okichiuj. Ika yejon, xmojkaitakan nochi yejon tiempo tlen nennemiskej ipan yejuin mundo. 18 Pampa nemejuamej nenkimatij ika omechmakixtijkej para maka ok* xueyichiuakan toTajtsin* ijkon ken omechmachtijkej nemochanejkauan akin yeuejkaui onenkej. Xomechmakixtijkej ika itlaj tlen ijtlakaui ken plata noso oro. 19 Omechmakixtijkej ika iyesyo Cristo, yejuin yestli tlen melak patioj tlen yeskia kentla iyesyo se borreguito tlen chipauak niman xkipiya tlen xkuajli. 20 Melauak ika yejua okitlapejpenijkej achto kipeualtiskiaj yejuin mundo, pero onoteititi ipan sa ika tlami tiempo para mechpaleuis. 21 Ipampa* yejua, nemejuamej nentlaneltokaj itech toTajtsin, akin okikuiteuj itech akin yomikkej. Niman okichiuj maueyixto para nemejuamej uelis nentlaneltokaskej itech toTajtsin niman itech nentlamachiaskej.

22 Aman, nemejuamej yonemochipajkej pampa nenkitlakamatij tlen melauak, niman yejon yokichiuj melauak xmotlasojtlakan ken ikniujtin. Yejua ika, xmotlasojtlakan imiuan oksekimej ika nochi nemoyojlo. 23 Pampa yejua xokitekitilti se xinachtli* tlen ijtlakaui para kichiuas oksejpa xuajnemikan, yejua okitekitilti se xinachtli tlen xijtlakaui. Onenuajnenkej ipampa itlajtol toTajtsin, tlen nochipa yoltika niman nochipa onka. 24 Pampa “nochimej yeskiaj ken xijtli, niman nochi inueyilis yeskia ken se xochitl tlen onka ipan tepetl; xijtli pilini niman xochitl uetsi, 25 pero itlajtol Jehová nochipa onka”. Yejuin “tlajtojli” tlen nikan noteneua, kijtosneki yejon kuajli tlajtoltin tlen yomechijlijkej.

2 Kuakon, maka xchiuakan tlen xkuajli, nochipa xkijtokan tlen melauak, maka xtekajkayauakan, maka xtenexikolitakan niman maka xtetlajtolchijchiuilikan. 2 Itlajtol toTajtsin yeskia kentla leche tlen xtlaj ika kinelouaj, melak xnekikan nenkikakiskej itlajtol toTajtsin ijkon ken se konetsintli akin melak kineki chichis. Yejon mechpaleuis xmoskaltikan para nemakisaskej 3 tla yonenkitakej kenon toTeko kichiua tlen kuajli.

4 Xnisiuikan* yejua, yejon tetl tlen yoltika tlen xokiselijkej tlakamej, pero toTajtsin okitlapejpeni niman okitak ika melak ueyi kijtosneki. 5 Nemejuamej nenyeskiaj ken temej tlen yoltokej, kentla se kajli tlen iespíritu toTajtsin kichijchijtok para xmochiuakan teopixkej akin toTajtsin yokinxelo. Pampa toTajtsin yomechxelo ken teopixkej, xkinmakakan uentin tlen yejua kinselia ipampa Jesucristo. 6 Pampa Tlajkuiloltin kijtouaj: “¡Xkitakan! Ne Sion, niktlalia se tetl tlen yoniktlapejpeni, se tetl tlen ueyi kijtosneki tlen onka ipan esquina kampa nochi peua, niman akin itech tlaneltokas xkeman kipinajtiskej”.

7 Yejua ika, nemejuamej melak nenkipatiojkaitaj pampa nentlaneltokaj. Pero, para akin xkineltokaj, “tetl tlen xokinekkej akin kalchijchiuaj aman yejua kachtopa tetl tlen onka ipan esquina”, 8 niman “se tetl tlen kichiua xuetsikan niman se tetl tlen tetsakuilia”. Yejuamej uetsij pampa xkitlakamatij itlajtol toTajtsin. Pampa ijkon yonoijtojka ika inpan nochiuaskia. 9 Pero nemejuamej “se pueblo tlen yokitlapejpenijkej, neniteopixkauan rey, se pueblo tlen yokixelojkej para toTajtsin, se pueblo tlen yokinoyaxkatijkej,* para nochiuiyan xteijlikan nochi tlen melak kuajli kichiua” akin omechnots xuiyan kampa tlauilpan pampa nennemiyaj kampa tlayouatok. 10 Kachtopa nemejuamej xnenkatkaj se pueblo, pero aman nemejuamej yonemochijkej ipueblo toTajtsin. Kachtopa xmechikneliayaj, pero aman yomechiknelijkej.

11 Noknitsitsinuan, nimechnotsa ken akin xchanejkej niman ken akin san achijtsin tiempo nemij ipan yejuin mundo, ika maka xchiuakan tlen kileuiya nemotlalnakayo tlen mechixnamiki. 12 Xchiuakan tlen kuajli imixpan akin xkitekichiuiliaj toTajtsin, para maka kijtoskej tla nenkichiuaj itlaj tlen xkuajli. Ijkuak yejuamej kitaskej on tlen kuajli nenkichiuaj, kiueyichiuaskej toTajtsin ipan tonajli ijkuak yejua tetlajtlakolmakas.

13 Ipampa toTeko, xkintlakamatikan nochimej akin tlayekanaj, maski tla se rey akin ueyixtika 14 noso gobiernos, pampa rey kintitlani makintlajyouiltikan akin kichiuaj tlen xkuajli niman makinueyiteneuakan akin kichiuaj tlen kuajli. 15 Pampa toTajtsin kineki ika ijkuak nenkichiuaskej tlen kuajli, xkinkamatsakuakan* akin xtlamachilisejkej niman xkimatij tlenon kijtouaj. 16 Xnemikan ken akin yokinmakajkej, pero maka xnemilikan ika pampa yomechmakajkej aman uelis nenkichiuaskej tlen xkuajli, más kuajli tla nemochiuaj itlakeualuan toTajtsin. 17 Nochimej xkintlakaitakan, xkintlasojtlakan nochimej tokniuan, xmojkaitakan toTajtsin, xtlakaitakan rey.

18 Nemejuamej akin nentlakeualtin, xkintlakamatikan nemotekouan niman nochipa xkintlakaitakan. Maka san xkintlakamatikan akin kipiyaj kuajli inyojlo niman teasikamatij, noijki xkintlakamatikan akin xnimantsin ueli kinyolpaktiaj. 19 Pampa toTajtsin melak kiyolpaktia ijkuak yakaj kixikoua tlen xkuajli niman kitlajyouiltiaj san pampa kineki kitlakamatis. 20 Pampa, ¿tlenon ika mechpaleuis tla nenkixikouaj ijkuak mechuijsokij pampa onenkichijkej itlaj tlen xkuajli? Pero tla nemejuamej nentlaxikouaj ijkuak nentlajyouiyaj pampa nenkichiuaj tlen kuajli, yejon melak kiyolpaktia toTajtsin.

21 Nemejuamej para yejuin omechnotskej, pampa Cristo otlajyoui nemopampa para mechititis kenon nenkichiuaskej ken yejua. 22 Yejua xotlajtlako nion xotekajkayauj. 23 Ijkuak kuijuikaltijtoyaj,* yejua xoteuijuikaltij. Ijkuak tlajyouijtoya, xokimijli tla noijki kinchiuiliskia tlen xkuajli. Yejua nochi okikauili imak* juez akin kuajli tetlajtlakolmaka. 24 Okinnomamalti nochi totlajtlakoluan ijkuak itlalnakayo okipilojkej ipan kojtli melaktik. Ijkon, otechmakixti itech tlajtlakojli niman otechpaleui para matikchiuakan tlen kuajli. Niman “pampa okikojkokojkej nemejuamej onenpajtikej”. 25 Pampa nemejuamej nenkatkaj kentla borreguitos tlen yopolijkaj, pero aman yonenuajmokuepkej itech nemotlajpixkauj niman akin mechyekana.

3 Noijki, nemejuamej siuamej akin yonemonamiktijkej, xmokauilikan ika nemoueuentsin mamechyekana. Ijkon, tla sekimej xkitlakamatij itlajtol toTajtsin, kinekiskej kitlakamatiskej ipampa tlen nenkichiuaj maski xtlaj nenkimijliskej. 2 Yejuamej noijki ijkon kinekiskej kichiuaskej pampa kitaskej ika nemejuamej nenchipajkanemij niman melak nentetlakaitaj. 3 Maka san pani xmokualtsintilikan. Maka melak xmajmanakan itech kenon nenkikualnextiskej nemotson, maka melak xtekitiltikan* oro nion tlakentli tlen melak patioj. 4 Más kuajli tla nenkikualtsintiliaj tlen onka ipan nemoyojlo. Ijkon nenkichiuaskej tla nenteijyouiyaj niman nenyolsejkej, pampa nochi yejon toTajtsin melak kipatiojkaita. 5 Pampa ijkon nokualtsintiliayaj siuamej akin melajkanemiyaj* niman tlamachiayaj itech toTajtsin. Yejuamej kinokauiliayaj ika inueuentsin makinyekana, 6 ijkon ken Sara kitlakamatiya Abrahán niman kijliaya noteko. Nemejuamej nenyeskej ichpochuan, tla nochipa nenkichiuaj tlen kuajli niman xnenmomojtiaj.

7 Noijki, teueuentsitsinuan, nochipa xkimasikamatikan nemosiuauan niman xkintlakaitakan ken se kontli tlen nimantsin ueli tlapani, pampa yejuamej noijki kiseliskej nemilistli ken herencia tlen yomechijlijkej mechmakaskej maski xmechnamiki. Tla ijkon nenkichiuaj, toTajtsin nochipa mechkakis.

8 Sa ika tlami, xmokojtilikan san noijki ken nentlanemiliskej niman xteititikan ika nenteasikamatij, xmotlasojtlakan ken nemikniujtin, xteiknelikan niman xteititikan ika nenyolyemankej. 9 Maka xmotlakuepiltikan tla mechchiuiliaj tlen xkuajli nion maka xteuijuikaltikan* tla mechuijuikaltiaj. Noneki nenkitechiuiliskej tlen kuajli, pampa para yejon omechnotskej. Tla ijkon nenkichiuaj, mechteochiuaskej pampa nenkiseliskej on herencia.

10 Pampa “akin kineki nemis niman yolpakis noneki kitlajpiyas ikamak para xkijtos tlen xkuajli niman xtekajkayauas. 11 Makikajkaua tlen xkuajli niman makichiua tlen kuajli; niman nochipa makitejtemo kenijki yolsejtos imiuan oksekimej. 12 Pampa Jehová kimitstika akin kipiyaj kuajli inyojlo niman kinkaki ijkuak miyekpa kinotsaj, pero Jehová kintlauelita akin kichiuaj tlen xkuajli”.

13 ¿Akinon kinekis mechchiuilis tlen xkuajli tla nochipa nenkichiuaj tlen kuajli? 14 Pero, maski mechtlajyouiltiaj pampa nenkipiyaj kuajli nemoyojlo, nemejuamej nenyolpakij. Kuakon, maka xmakasikan tlen yejuamej kimakasij nion maka san xtlanemilijtokan itech yejon. 15 Más kuajli tla, ipan nemoyojlo, nenkineltokaj ika Cristo yejua toTeko niman ika kinamiki makitlakaitakan. Nochipa xnemikan listos para nenkinnankiliskej nochimej akin mechtlajtoltiskej itech tlen nenkineltokaj. Pero, xyolsejtokan niman melak xkintlakaitakan ijkuak nenkinnankiliskej.

16 Nochipa xchiuakan tlen mechpaleuis nenkipiyaskej chipauak nemotlamachilis. Ijkon, akin mechtejteneuaskej pampa nentlaneltokaj itech Cristo, pinauiskej ika tlen kijtouaj. 17 Tla toTajtsin kitekauilia xtlajyouikan, más kuajli tla nentlajyouiyaj pampa nenkichiuaj tlen kuajli xken tla pampa nenkichiuaj tlen xkuajli. 18 Pampa Cristo omik ken yakaj akin kipiya kuajli iyojlo, san sejpa omik inpampa akin xkipiyaj kuajli inyojlo para kinmakixtis itech intlajtlakoluan niman kinpaleuis manouikakan iuan toTajtsin. Yejua okimiktijkej itlalnakayo, pero toTajtsin okiyoliti ken espíritu. 19 Niman ijkon ouel okinnojnotsato xkuajkualtin espíritus akin tsauktoyaj. 20 Yeuejkaui, yejuamej xotetlakamatkej ijkuak toTajtsin xonosiaujkauj ika tlamachixtoya* ipan itonaluan Noé. Ijkuakon kichijchijtoyaj arca kampa san achijtsitsintin okinmakixtijkej, san ocho akin omakiskej ijkuak oapachiuilok.

21 Uelis tikijtoskej ika yejon tlen opanok ipan itonaluan Noé yeskia ken ijkuak se noapolaktia. Yejon aman mechmakixtijtikaj pampa nenkineltokaj ika Jesucristo okiyolitijkej. Ijkuak se noapolaktia xkijtosneki tla kichipaua itlalnakayo, kijtosneki ika kitlajtlanilia toTajtsin se itlamachilis chipauak. 22 Yejua nemi kampa iyekma toTajtsin, pampa oyaj ne cielo, niman okichijkej makinyekana ángeles, akin tlayekanaj niman akin kipiyaj poder.

4 Cristo otlajyoui ijkuak kipiaya itlalnakayo, ika yejon, nemejuamej xmokojtilikan noijki nentlanemiliskej ken yejua. Yakaj akin tlajyouiya kikajkaua itlajtlakol 2 pampa kineki kichiuas tlen toTajtsin kuelita aman ika ok* yoltok, niman xok kichiua tlen xkuajli kileuiya. 3 Nemejuamej melak ouejkauj nenkichiuayaj tlen kinekij akin xkitekichiuiliaj toTajtsin. Youejkauj nenkichiuayaj tlen tepinajti,* melak nenkinekiyaj nemotekaskej iuan yakaj, melak nentlauaniyaj, nenyayaj iluimej kampa nochiua tlen xkuajli, nenyayaj iluimej para nentlauaniskej niman nenkinueyichiuayaj ídolos maski tlanauatijli xkitekauiliaya. 4 Oksekimej mechtejteneuaj pampa xkasikamatij tleka xok imiuan nenyauej ijkuak kichiuaj tlen xkuajli. 5 Pero akin ijkon kichiuaj tenankiliskej ixpan akin yenemi listo para kintlajtlakolmakas akin yoltokej niman akin yomikkej. 6 Yejua ika, noijki okinnojnotskej itech kuajli tlajtoltin akin yomikkej para uelis noyekanaskej ika iespíritu toTajtsin maski kintlajtlakolmakaskej ken kintlajtlakolmakaj gente.

7 Pero yononisiui ijkuak nochi tlamis. Yejua ika, kuajli xtlanemilikan niman nochipa xnemikan listos para nenkichiuaskej oración. 8 Pero noneki xmotlasojtlakan imiuan oksekimej. Pampa tla nentetlasojtlaj, nenkinekiskej nentetlapopoluiskej. 9 Kuajli xkinselikan oksekimej niman maka xkijtojtokan tlen xnenkuelitaj. 10 ToTajtsin yokichiuj tlatlamantik* xuelikan xchiuakan, kuakon, xtekitiltikan yejon para nenkinpaleuiskej oksekimej. Xchiuakan ijkon ken mayordomos akin kinpaleuiyaj oksekimej ika toTajtsin makimikneli maski xkinnamiki. 11 Tla yakaj tlajtoua, makichiua para kijtos tlen toTajtsin kineki niman tla yakaj kintekichiuilia oksekimej, makiteititi ika toTajtsin kikojtilijtika. Ijkon, kiueyiteneuaskej toTajtsin ipan nochi ipampa* Jesucristo. ToTajtsin akin ueyixtika niman kipiya poder para nochipa. Amén.

12 Noknitsitsinuan, maka mamechmojkatlachialti pampa nenkixnamiktokej tlen xkuajli, tlen yeskia kentla tlitl. 13 Nemejuamej xyolpaktokan pampa nentlajyouiyaj ijkon ken Cristo, para noijki uelis melak nenyolpakiskej ijkuak kiteititiskej ika ueyixtika. 14 Tla mechuijuikaltiaj* pampa nenkichiuaj ken Cristo, nenyolpakij. Pampa nemopan onka iespíritu toTajtsin, tlen melak ueyixtika.

15 Kuakon, maka yakaj matlajyoui pampa temiktia, pampa tlachteki, pampa kitechiuilia tlen xkuajli noso pampa nokalaktia kampa xkinotsaj. 16 Pero tla yakaj tlajyouiya pampa kichiua ken Cristo maka mapinaui. Más kuajli tla kiueyiteneua toTajtsin pampa kichiua ken Cristo. 17 Pampa aman yejuin tiempo tlen yokitlalijkej para peuas kitlajtlakolmakaskej ipueblo toTajtsin. Pero, tla kachtopa tejuamej peua techtlajtlakolmakaj, ¿kenijki ontlamiskej akin xkintlakamatij kuajli tlajtoltin tlen ualeuaj itech toTajtsin? 18 Niman tla akin kipiya kuajli iyojlo trabajo* kita makisas, ¿tlenon ipan nochiuas akin xtetlakaita niman kichiua tlajtlakojli? 19 Kuakon, akin tlajyouijtokej pampa toTajtsin kitekauilia, makinokauilikan ika akin otlachijchiuj makintlajpiya, niman makichiuakan tlen kuajli.

5 Nejua noijki nitlayekanketl, teuan onikitak kenon otlajyoui Cristo niman noijki nikselis ueyilistli tlen sakin noteititis, ika yejon, miyekpa ijkin nikintlajtlanilia tlayekankej akin nemouan nemij: 2 ken akin tlayekanaj xkintlajpiyakan iborreguitos toTajtsin akin yomechinmaktili; maka xchiuakan pampa yakaj mechchiualtia, xchiuakan ika nochi nemoyojlo ken kineki toTajtsin; noijki maka xchiuakan pampa nenkinekij itlaj nenkitlaniskej, xchiuakan pampa nenkinekij nenkinpaleuiskej oksekimej. 3 Niman maka xchiuakan kentla tla nemejuamej nenyeskiaj inteko iherencia toTajtsin, xchiuakan tlen kuajli para yejuamej kichiuaskej ijkon ken nemejuamej. 4 Niman ijkuak totlajpixkauj akin ueyixtika yonoteititi, mechmakas se corona tlen mechueyilis, tlen xpilini.

5 Noijki, nemejuamej tlakamej akin xemás nenuejueyimej, xmokauilikan mamechyekanakan tlakamej akin más yeuejueyimej. Nochimej xmochiuakan yolyemankej imiuan oksekimej, pampa toTajtsin kimixnamiki akin noueyimatij, pero, kimititia ika kimiknelia maski xkinnamiki akin yolyemankej.

6 Yejua ika, xkauilikan mamechyekana toTajtsin akin melak kipiya poder,* para yejua mechueyilis ijkuak ajsis on tiempo. 7 Xmaktilikan nochi tlen mechajmana, pampa yejua najmana nemopampa. 8 ¡Nochipa kuajli xpiyakan nemotlamachilis niman xtlatlachixtokan! Pampa Diablo akin nemotlauelikniuj, kistinemi nemoyeualiyan ken se león akin nanalkatinemi pampa kineki yakaj kikuas. 9 Pero xkixnamikikan on Diablo, maka keman xkauakan nemotlaneltok, pampa nenkimatij ika nochimej tokniuan ipan yejuin mundo noijki tlajyouijtokej ken nemejuamej. 10 Pero ijkuak yonentlajyouijkej ipan san achijtsin tiempo, yejua tlamis mechmachtis. Yejua kichiuas xmelajkanemikan, mechkojtilis, yejua mechpaleuis para maka xuetsikan. Ijkon kichiuas toTajtsin akin techiknelia maski xtechnamiki, akin omechnots para kichiuas nochipa xueyixtokan pampa neniyaxkauan* Cristo. 11 Yejua nochipa iyaxka on poder. Amén.

12 Pampa Silvano* se tokniuj akin yolmelajki, oniktlajtlanili manechpaleui manimechijkuilouili tlen mechyolchikauas niman para nimechititis ika melauak ken toTajtsin yomechikneli maski xmechnamiki. Itech xmelajkanemikan. 13 Mechontlajpaloua akin nemi Babilonia, akin yokitlapejpenijkej ijkon ken nemejuamej. Noijki mechontlajpaloua Marcos, nokoneuj. 14 Xmotlajpalokan ika se beso kentla nemikniujtin yeskiaj.

Xyolsejtokan nochimej nemejuamej akin neniyaxkauan Cristo.