2 PEDRO

1 Nejua niSimón Pedro, niitlakeual niman niiapóstol Jesucristo. Nimechtlajkuilouilia nemejuamej akin noijki nenkipiyaj nemotlaneltok tlen melak ueyi kijtosneki. Yejuin totlaneltok tikpiyaj pampa toTajtsin niman Jesucristo akin otechmakixti, kipiyaj kuajli inyojlo.

2 Kuajli xkixmatikan toTajtsin niman toTeko Jesucristo para más mechikneliskej maski xmechnamiki, niman mechyolseuiskej. 3 Ika ipoder, yejua techmaka nochi tlen noneki para tiktekichiuiliskej toTajtsin. Nochi tikpiyaj pampa tikixmatij akin otechnots, akin ueyixtika niman kipiya kuajli iyojlo. 4 ToTajtsin yotechmakak nochi tlen tlasojti niman tlen ueyi kijtosneki. Ipampa yejon, uelis nemochiuaskej espíritus ken toTajtsin. Ijkon yokichiuj pampa yotikajkej tlen xkuajli kichiuaj akin nemij ipan yejuin mundo. Yejuamej ijkon kichiuaj, ipampa tlen xkuajli kileuiyaj.

5 Ika yejon, tla yenentlaneltokaj, aman melak xmokojtilikan nenkichiuaskej tlen kuajli; tla yenenkichiuaj tlen kuajli, aman xkixmatikan toTajtsin; 6 tla yenenkixmatij toTajtsin, aman san nemoselti xmoteltikan; tla yenemoselti nemoteltiaj, aman xtlaxikokan; tla yenentlaxikouaj, aman xueyichiuakan toTajtsin; 7 tla yenenkiueyichiuaj toTajtsin, aman xmotlasojtlakan ken nemikniujtin; niman, tla yenemotlasojtlaj ken nemikniujtin, aman xkintlasojtlakan nochimej. 8 Xchiuakan nochi yejuin niman miyekpa xteititikan. Tla ijkon nenkichiuaj, nenkitekitiltiskej* tlen nenkixmatij itech toTeko Jesucristo para nenkichiuaskej tlen kuajli niman nenkipiyaskej tlen nenkichiuaskej.

9 Pampa akin xkineki kichiuas nochi yejuin, xtlachia, xkineki kitas tlauijli, niman yokilkauj ika yokitlapopoluilijkej itlajtlakoluan tlen youejkauj okichiuj. 10 Nokniuan, nemejuamej yomechnotskej niman yomechtlapejpenijkej. Yejua ika, xmokojtilijtokan para maka nenkipoloskej yejon. Tla ijkon nenkichiuaj, nochipa nentlaneltokaskej. 11 Niman kuajli mechseliskej ipan iGobierno toTeko niman toTemakixtijkauj Jesucristo. Yejuin Gobierno nochipa onias.

12 Ika yejon, nikneki nochipa nimechilnamiktis yejuin, maski nikmatstika ika nemejuamej yenenkimatij, niman ika kuajli nentlaneltokaj itech yejon tlen melauak tlen omechmachtijkej. 13 Aman ika ok* ninemi ipan yejuin notlalnakayo,* nikita kuajli tla nimechilnamiktia yejuin tlajtlamach, 14 pampa nikmati ika nikauas notlalnakayo ijkon ken onechijli toTeko Jesucristo. 15 Nochipa nikchiuas nochi tlen niuelis para ijkuak xok nikan ninemis, san nemoselti uelis nenkilnamikiskej yejuin.

16 Tejuamej otimechnojnotskej itech ipoder toTeko Jesucristo niman otimechijlijkej kemanon yetouan nemiskia pampa otikitakej kenijki opetlan, xotimechnojnotskej san ika cuentos tlen xmelajkej. 17 Pampa toTajtsin, akin toTaj, okichiuj makitlakaitakan niman makiueyiteneuakan. Yejuin ijkin onochiuj ijkuak akin itech ualeua ueyilistli, ijkin okijli: “Yejuin noKoneuj akin melak niktlasojtla; yejua nechyolpaktia”. 18 Kema, tejuamej otikakkej yejuin tlajtoltin tlen ualeuayaj ne ipan cielo ijkuak iuan tinemiyaj ipan tepetl tlen toTajtsin yokitlapejpeni.

19 Kuakon, más tikneltokaj ika nochiuas tlen okijtojkej teotlajtojkej, niman nemejuamej kuajli nenkichiuaj pampa nemokojtiliaj nenkikakiskej. Yejon tlen okijtojkej teotlajtojkej, yeskia ken se lámpara tlen tetlauiluiya kampa tlayouatok, hasta ijkuak tlanesi niman uajkisa sitlalin para kitlauiluis nemoyojlo. 20 Nemejuamej kuajli nenkimatij ika nion se teotlajtojli tlen onka ipan Tlajkuiloltin xualeua itech gente. 21 Xkeman onoijto se teotlajtojli san pampa gente ijkon okinek, ijkon opanok pampa tlakamej otlajtojkej ipampa toTajtsin ijkuak okinyekan* ika espíritu santo.

2 Pero, ijkon ken ipan pueblo yeuejkaui nemiyaj teotlajtojkej akin okijtojkej tlen xmelauak, nemotsajlan* nemiskej akin temachtiskej tlen xmelauak. Yejuamej ijkon kichiuaskej para kijtlakoskej nemotlaneltok, niman hasta xkiseliskej inteko akin okinkouj. Niman pampa ijkon kichiuaj, san no yejuamej kinotejtemouiliaj nimantsin makinpopolokan. 2 Noijki, miyekej kichiuaskej tlen tepinajti* ijkon ken yejuamej, niman xkuajli tlajtoskej itech iojui toTajtsin san inpampa. 3 Pampa melak kinekiskej kinoyaxkatiskej* tlen xinyaxka, mechkajkayauaskej. Pero, desde yeuejkaui yonoijtoka ika kintlajtlakolmakaskej, niman yejon xuejkauis niman yemelak ijkon nochiuas.

4 ToTajtsin xokintlapopolui ángeles akin otlajtlakojkej, yejua okomonxini ipan Tártaro,* okinsajsalo ika cadenas ne kampa melak tlayouatok. Yejuamej sa kichiatokej makintlajtlakolmakakan. 5 Noijki xokintlapopolui nochimej akin xotetlakaitakej ijkuak okichiuj ika chikauak inpan makiyaui. Pero okimakixti Noé, akin okiteijli tlen kuajli, noijki okinmakixti oksekimej siete. 6 Niman toTajtsin okintlajyouilti akin chantiyaj Sodoma niman Gomorra ijkuak okintlati hasta otlikojnextiajkej. Ijkon okimititi akin xtetlakaitaj tlenon inpan nochiuas. 7 Noijki, okimakixti Lot, se tlakatl akin yolmelajki. Yejua melak najmanaya ijkuak kitaya kenon tlakamej akin xkuajkualtin kichiuayaj tlen tepinajti.* 8 Ijkuak imiuan nemiya, yejuin tlakatl akin yolmelajki mojmostla melak najmanaya ijkuak kitaya niman kikakiya nochi tlen xkuajli kichiuayaj. 9 Yejuin kiteititia ika Jehová, ueli kinmakixtia itech tlen xkuajli kixnamikij akin kiueyichiuaj, niman kinxeloua akin xkuajkualtin para kinpopolos ijkuak tetlajtlakolmakas. 10 Yejua kinpopolos akin kinekij notekaskej imiuan oksekimej niman xkintlakaitaj akin tlayekanaj.

Pampa yejuamej xpinajkayojkej niman xtlakakij, xnomojtiaj kintejteneuaskej akin toTajtsin yokichiuj maueyixtokan. 11 Pero, ángeles, maski más uejueyixtokej niman kipiyaj poder, xkintlateluiliaj niman xkinuijuikaltiaj* pampa kitlakaitaj Jehová. 12 Pero yejuin tlakamej xkuajli tlajtouaj itech tlen nion xkimatij, kichiuaj ken yolkamej akin xtlanemiliaj niman uajnemij para kinmasiskej niman kinpopoloskej. Yejuin tlakamej kinpopoloskej ipampa tlen xkuajli kichiuaj. 13 Yejuamej melak tlajyouiskej ipampa tlen xkuajli kichiuayaj.

Kuelitaj kichiuaskej tlen kileuiyaj maski ika tonajli. Yejuamej kentla itlaj tlen kitsokuilotia tlanechikojli, melak kuelitaj kinmachtiskej tlen xmelauak oksekimej ijkuak nemouan iluichiuaj. 14 Melak kinekij notekaskej imiuan akin ximixnamik, xueli kikajkauaj tlajtlakojli niman kinyoltilanaj akin xchikauak kipiyaj intlaneltok. Yejuamej kentla yokimajmachtijkej inyojlo para kileuiskej tlen xinyaxka niman kinpopoloskej. 15 Yejuamej okinkajkayajkej pampa okikajkajkej ika kichiuaj tlen kuajli. Yokichijkej ijkon ken Balaam ikoneuj Beor. Balaam okinek makitlaxtlauilikan para kichiuas tlen xkuajli. 16 Pero okijlijkej ika kichiuaskia tlen xkuajli pampa tlajtlakoskia. Se yolki akin kitlamamaltiaj niman xueli tlajtoua, otlajto ken se tlakatl niman xokikauili teotlajtojketl makichiua tlen xkuajli kinemilijtoya.

17 Yejon akin temachtiaj tlen xmelauak, yeskiaj ken ameyaltin tlen xkipiyaj atl. Yejuamej ijkon ken moxtli tlen kuika ajakatl niman yejuamej yaskej kampa xtlaj nesi niman kampa melak tlayouatok. 18 Kijtouaj tlen temojkatlachialti pero xtlaj ika tepaleuij. Kitekitiltiaj* tlen kileuiya intlalnakayo niman tlen tepinajti,* para kinkajkayauaskej akin kemach yonoxelojkej intech akin kichiuaj tlen xkuajli. 19 Yejuin akin temachtiaj tlen xmelauak kimijliaj ika uelis kichiuaskej tlen yejuamej kinekij, pero san no yejuamej nemij ken tlakeualtin itech tlen xkuajli. Pampa tla yakaj tetlani, akin kitlanij nochiua tlakeuajli. 20 Yejuamej xok kichiuaj tlen xkuajli ijkon ken kichiuaj akin nemij ipan yejuin mundo, pampa yokixmatkej toTeko niman akin yotechmakixti, Jesucristo. Pero tla maski ijkon oksejpa peuaj kichiuaj tlen xkuajli, más xkuajli yeskia xijkon ken ijkuak xkixmatiyaj tlen melauak. 21 Más kuajli yeskia xkixmatiskiaj ojtli tlen melauak niman xkiseliskiaj itlanauatil toTajtsin pampa satepan okikajkej. 22 Inpan onochiuj ijkon ken kijtouaj yejuin tlajtoltin: “Chichi oksejpa yokikua tlen okijsotlak, niman pitsotl akin yokaltijkej oksejpa onomimiloto ipan sokitl”.

3 Noknitsitsinuan, ijkon ken ipan kachtopa carta, aman ika okpa nimechontlajkuilouilia para nimechilnamiktis ika noneki kuajli nentlanemiliskej, 2 para nimechilnamiktis tlen yokijtojkaj teotlajtojkej akin oyolmelajkanenkej niman tlen ipampa apóstoles* otemachti toTeko akin toTemakixtijkauj. 3 Pero noneki nenkimatiskej ika ipan itlamiyan tonaltin uajnesiskej akin tepijpinajtiskej niman san kichiuaskej tlen kileuiyaj, 4 niman kijtoskej: “¿Kanon nemi aman akin okijto ika oksejpa touan nemiskia? Pampa desde ipan on tonajli ijkuak omikkej tochanejkauan akin youejkauj onenkej, nochi san noijki ken onka desde ijkuak nochi okichijchijkej”.

5 Yejuamej xkinekij kilnamikiskej ika on cielos yeonkatkaj desde yeuejkaui niman ika toTajtsin okijto manoxelo tlajli itech atl niman tlajli manokaua itlajkotian atl. 6 Yejua ika, ipampa yejon okinpopolojkej akin ijkuakon nemiyaj. Yejon opanok ijkuak otlaapachiuj ipan yejuin mundo. 7 Noijki, ijkuak toTajtsin kijtos, tlanauatis matlatlakan on cielo niman mundo tlen aman onka. Tlatlaskej ipan tonajli ijkuak toTajtsin tetlajtlakolmakas niman ijkuak kinpopoloskej akin xtetlakaitaj.

8 Pero, noknitsitsinuan, maka xkilkauakan ika para Jehová se tonajli kentla mil años niman mil años kentla se tonajli. 9 Sekimej kinemiliaj ika Jehová uejkaui niman xkichiua tlen yokijtojka, pero yejon xmelauak. ToTajtsin xnosiajkaua pampa kineki nochimej manoyolkuepakan niman xkineki nion se mapopoliui. 10 Pero, itonal Jehová uajlas ken yakaj akin tlachteki. Ipan yejon tonajli, kakistis itlaj melak chikauak* niman cielo popoliuis. Niman patis nochi tlen onka ipan on cielo niman ipan yejuin mundo pampa melak totonki yes. Niman mundo niman nochi tlen ompa onochiuj, kintlatiskej.

11 Pampa nochi yejon tlajtlamach ijkon patiskej, ¡kuajli xnemilikan tlen noneki nenkichiuaskej! Noneki nenchipajkanemiskej niman nenkiueyichiuaskej toTajtsin 12 aman ika sa nenkichiatokej itonal Jehová tlen uajlauj.* Ipan yejon tonajli, cielo popoliuis pampa tlatlas niman patis nochi tlen onka ipan on cielo niman ipan yejuin mundo pampa melak totonki yes. 13 Pero onka yenkuik cielo niman se yenkuik mundo tlen sa tikchiatokej pampa yotechijli techmakas, niman ompa nochiuas nochi tlen kuajli.

14 Yejua ika, noknitsitsinuan, pampa nenkichiatokej mapano nochi yejuin, melak xmokojtilikan para ijkuak yejkos, kitas ika nenchipajkej, xnenkipiyaj itlaj tlen xkuajli niman iuan nenyolsejtokej. 15 Noijki, xnemilikan kenijki pampa toTeko xnosiajkaua, mechmakixtis, ijkon ken omechijkuilouili tokniuj Pablo, akin melak tiktlasojtlaj. Yejua okijkuilo yejuin pampa toTajtsin okichiuj melak matlamachilise. 16 Yejua otlajto itech yejon ipan nochi icartas. Pero ipan icartas, onka seki tlen xmás nasikamati. Akin xkasikamatij yejon niman xchikauak intlaneltok kipapatlaj tlen kijtosneki niman kipapatlaj tlen kijtouaj Tlajkuiloltin, yejon kichiuas makinpopolokan.

17 Yejua ika, noknitsitsinuan, pampa yenenkimatij yejuin, nochipa xtlatlachixtokan para maka mechkajkayauaskej ken yejuamej okinkajkayajkej niman para maka nenkikajkauaskej ika nentlaneltokaj. Yejuamej okineltokakej tlen xmelauak, tlen temachtiaj akin xkuajkualtin. 18 Más kuajli, tla melak nemokojtiliaj para más mechikneliskej maski xmechnamiki niman nenkixmatiskej toTeko niman toTemakixtijkauj Jesucristo. Yejua makiueyiteneuakan aman niman nochipa. Amén.