1 JUAN

1 Timechtlajkuilouiliaj itech akin nemi desde ijkuak nochi opeuj, akin yotikakkej, akin yotikitakej ika tixtololojuan, yotikasikej ika tomauan niman yotikitakej. Timechtlajkuilouiliaj itech akin kuajkui tlajtojli tlen kitemaka nemilistli. 2 Kema, otechititijkej nemilistli, yotikitakej niman itech timechnojnotstokej. Yejuin nemilistli tlen xkeman tlami kitemaka Tajtli, niman yotechititijkej. 3 Tlen yotikitakej niman yotikakkej noijki timechijlijtokej nemejuamej para noijki uelis touan nemosentlaliskej ijkon ken tejuamej yotosentlalijkej iuan toTaj niman iKoneuj, Jesucristo. 4 Timechijkuilouiliaj yejuin para melak tiyolpakiskej.

5 Yejuin tlen yejua otechijli niman timechijlijtokej: toTajtsin tlauijli niman itech yejua xonka kampa tlayouatok. 6 Tla tikijtouaj ika iuan yotosentlalijkej pero ok* tiauej kampa tlayouatok, titekajkayajtokej niman xtikchijtokej tlen otiuelkej itech toTajtsin. 7 Pero san sekan tinemij tla tikistinemij kampa onka tlauijli, ijkon ken yejua nemi kampa tlauijli. Niman iyesyo iKoneuj, Jesús, techchipaua itech nochi totlajtlakoluan.

8 Tla tikijtouaj ika xtikpiyaj tlajtlakojli, san no tejuamej tokajkayajtokej niman xtikijtojtokej tlen melauak. 9 Tla tikteijliaj tlen xkuajli yotikchijkej, yejua techtlapopoluiya niman techchipaua itech nochi tlen xkuajli pampa yolmelajki niman kichiua tlen kuajli. 10 Tla tikijtouaj ika xotikchijkej se tlajtlakojli, tikijtojtokej ika toTajtsin tekajkayaua niman xtikneltokaj tlen kijtoua.

2 Nokonetsitsinuan, nimechijkuilouilia yejuin para maka nenkichiuaskej se tlajtlakojli. Pero, tla yakaj kichiua se tlajtlakojli, Jesucristo uelis techpaleuis. Yejua nemi iuan Tajtli niman kichiua tlen kuajli. 2 Yejua okitemakakej ken uentli* para oksejpa uelis toyolseuiskej iuan toTajtsin, noijki okitemakakej ipampa totlajtlakoluan. Pero, xsan ipampa totlajtlakoluan, noijki ipampa intlajtlakoluan nochimej akin nemij ipan yejuin mundo. 3 Niman tla nochipa tikintlakamatij itlanauatiluan tikteititiskej ika yotikixmatkej. 4 Akin kijtoua: “Nejua yonikixmat”, pero xkintlakamati itlanauatiluan san tlakajkayaua niman xkijtoua tlen melauak. 5 Pero, ijkuak yakaj kitlakamati itlajtol Cristo, kuakon nesis ika yemelak kitlasojtla toTajtsin. Ika yejon, tikmatij ika tejuamej tiiyaxkauan.* 6 Akin kijtoua ika yokinoyaxkatijkej, noneki nochipa kichiuas ijkon ken Jesús okichiuj.

7 Noknitsitsinuan, nimechijkuilouilia se tlanauatijli tlen desde yeuejkaui yenenkipiyaj, yejuin tlanauatijli xyenkuik. Yejuin kijtosneki tlajtojli tlen yeuejkaui onenkikakkej. 8 Maski ijkon, yenkuik yejon tlanauatijli tlen nimechijlijtika, se tlanauatijli tlen yejua okichiuj niman nemejuamej nenkichiuaj. Pampa yepanotika tlayoualyotl niman yepetlantika on melauak tlauijli.

9 Akin kijtoua ika nemi kampa tlauijli pero kitlauelita ikniuj, kijtosneki ika ok* nemi kampa tlayouatok. 10 Akin kitlasojtla ikniuj nemi kampa tlauijli niman ompa xonka itlaj tlen uelis kichiuas mauetsi. 11 Pero, akin kitlauelita ikniuj nemi niman kistinemi kampa tlayouatok. Niman xkimati kanon yauj, pampa on tlayoualyotl yokixtlapacho.

12 Nokonetsitsinuan, nimechtlajkuilouilia pampa yomechintlapopoluilijkej nemotlajtlakoluan ipampa itoka. 13 Tajtin, nimechtlajkuilouilia pampa nemejuamej yonenkixmatkej akin nemi desde ijkuak nochi opeuj. Telpokamej niman ichpokamej, nimechtlajkuilouilia pampa nemejuamej yonenkitlankej Satanás.* Konetsitsintin, nimechtlajkuilouilia pampa yonenkixmatkej on Tajtli. 14 Tajtin, nimechtlajkuilouilia pampa yonenkixmatkej akin nemi desde ijkuak nochi opeuj. Telpokamej niman ichpokamej, nimechtlajkuilouilia pampa melak nenkojtikej, nenkineltokaj itlajtol toTajtsin niman yonenkitlankej Satanás.*

15 Maka xnekikan nenyeskej ijkon ken akin xkitekichiuiliaj toTajtsin nion maka xnekikan tlen onka ipan yejuin mundo. Tla nemejuamej nenkuelitaj yejon, nenkiteititiskej ika xnenkitlasojtlaj Tajtli. 16 Pampa nochi tlen onka ipan yejuin mundo xualeua itech Tajtli. Tlen kileuiya totlalnakayo, tlen kileuiyaj toixtololojuan niman ijkuak toueyimatij ipampa tlen tikpiyaj, tikchijtokej tlen ualeua intech akin xkitekichiuiliaj Tajtli. 17 Akin xkitekichiuiliaj toTajtsin san panouaj niman noijki tlen kileuiyaj. Pero, akin kichiuaj tlen toTajtsin kineki nemij para nochipa.

18 Konetsitsintin, yejuin sa ika tlami hora. Nemejuamej onekikakkej ika uajlauj* akin kixnamiki Cristo. Niman aman miyekej nemij akin kixnamikij Cristo, yejua ika tikmatij ika tinemij ipan sa ika tlami hora. 19 Yejuamej otechkajtejkej pampa xijkon ken tejuamej. Pampa touan nokauaskiaj tla yeskiaj ijkon ken tejuamej. Pero, okiskej para manoteititi ika xnochimej ijkon ken tejuamej. 20 Nemejuamej yomechtlapejpeni akin chipauak niman nenkixmatij tlen melauak. 21 Xonimechtlajkuilouili pampa xnenkimatij tlen melauak, onimechtlajkuilouili pampa nenkixmatij tlen melauak. Niman itech tlen melauak xuelis kisas tlen xmelauak.

22 ¿Akinon tekajkayaua? Tekajkayaua akin kijtoua ika Jesús xyejua Cristo. Akin xkiselia Tajtli niman teKoneuj, yejua akin kixnamiki Cristo. 23 Nochimej akin xkiseliaj teKoneuj, noijki xkiseliaj Tajtli. Pero, akin kijtoua ika kuajli nouika iuan teKoneuj noijki kiyolpaktia Tajtli. 24 Niman nemejuamej nochipa xchiuakan tlen desde yeuejkaui onenkikakkej. Tla ijkon nenkichiuaj, nochipa nenteyaxkauan yeskej itech on teKoneuj niman Tajtli. 25 Noijki, yejua otechijli techmakas nemilistli tlen xkeman tlami.

26 Yonimechijkuilouili yejuin pampa sekimej kinekij mechkajkayauaskej. 27 Xnoneki yakaj mamechmachti pampa toTajtsin yomechtlapejpenijka ika espíritu santo niman yejon espíritu nemopan onka. Pero, toTajtsin kitekitiltia* yejon espíritu para nochi mechmachtis. Tlen mechijlia melauak niman xtekajkayaua. Kuakon, nochipa iuan xnemikan ijkon ken espíritu yomechmachti. 28 Yejua ika, nokonetsitsinuan, nochipa iuan xnemikan. Para ijkuak noteititis uelis titlajtoskej ika nochi toyojlo niman ijkuak oksejpa touan nemis xtiktlalkauiskej niman xtipinauiskej. 29 Tla nemejuamej nenkimatij ika yejua kichiua tlen kuajli, noijki nenkimatij ika itech ualeuaj akin kichiuaj tlen kuajli.

3 ¡Xkitakan kenijki toTaj melak techtlasojtla niman hasta techijlia ika tiikoneuan! Niman melauak, tejuamej tiikoneuan. Ika yejon, akin xkitekichiuiliaj toTajtsin xtechixmatij, pampa yejuamej xkixmatij akinon yejua. 2 Noknitsitsinuan, aman tiikoneuan toTajtsin, pero, xetikmatij kenijki yemelak tiyeskej. Tikmatij ika ijkuak noteititis tiyeskej ken yejua pampa kuajli tikitaskej. 3 Niman nochimej akin kichiatokej yejon, san no yejuamej nochipauaj pampa yejua chipauak.

4 Nochimej akin kichiuaj tlajtlakojli xkitlakamatij tlanauatijli pampa tlajtlakojli kijtosneki xtiktlakamatis tlanauatijli. 5 Nemejuamej noijki nenkimatij ika yejua onoteititiko para techinkixtilis totlajtlakoluan, niman yejua xkipiya tlajtlakojli. 6 Nochimej akin yejua yokinnoyaxkati* xkichiuaj tlajtlakojli. Nochimej akin kichiuaj tlajtlakojli xkeman kitaj nion xkixmatij. 7 Nokonetsitsinuan, maka yakaj mamechkajkayaua. Akin kichiua tlen kuajli, yolmelajki, ijkon ken Jesús yolmelajki. 8 Akin kichiua tlajtlakojli ualeua itech Diablo, pampa Diablo desde yeuejkaui* kuajchijtiuj tlajtlakojli. IKoneuj toTajtsin onoteititi para kipopolos tlen Diablo kichiua.

9 Akin ikoneuan toTajtsin xkichiuaj tlajtlakojli, pampa iespíritu santo inpan onka.* Niman yejuamej xueli kichiuaj tlajtlakojli pampa ikoneuan toTajtsin. 10 Nimantsin nesi akinomej ikoneuan toTajtsin niman akinomej ikoneuan Diablo. Pampa akin kichiua tlen xkuajli niman xkitlasojtla ikniuj, xikoneuj toTajtsin. 11 Niman desde yeuejkaui nemejuamej yonenkikakkej ika noneki totlasojtlaskej imiuan oksekimej. 12 Maka matikchiuakan ken Caín, akin oualeuj itech on Satanás* niman okimikti ikniuj. ¿Niman tleka okimikti? Pampa xkuajli tlen kichiuaya pero ikniuj kichiuaya tlen kuajli.

13 Nokniuan, maka xmojkatlachiakan pampa mechtlauelitaj akin xkitekichiuiliaj toTajtsin. 14 Tejuamej tikmatij ika timiktoyaj, pero aman yotiyolijkej pampa tikintlasojtlaj tokniuan. Akin xtetlasojtla ok* miktok. 15 Nochimej akin kintlauelitaj imikniuan kentla temiktiskiaj. Niman nemejuamej nenkimatij ika akin temiktiaj xuelis kipiyaskej nemilistli tlen xkeman tlami. 16 Tejuamej tikmatij tlenon kijtosneki titetlasojtlas pampa Jesús okitemakak inemilis topampa. Niman tejuamej noneki tiktemakaskej tonemilis inpampa tokniuan. 17 Pero tla yakaj miyek kipiya niman kita ika ikniuj itlaj kipoloua pero xkiknelia, ¿kenon uelis kijtos ika kitlasojtla toTajtsin? 18 Nokonetsitsinuan, maka san matikijtokan ika titetlasojtlaj. Matikteititikan ika tlen tikchiuaj niman melauak matitetlasojtlakan.

19 Ijkon tikmatiskej ika tikpiyaj tlen melauak, niman tikchiuaskej ika toyojlo makineltoka ika toTajtsin techtlasojtla. 20 Maski toyojlo techtlajtlakoltis itech seki tlemach, matikilnamikikan ika toTajtsin más ueyixtika xijkon ken toyojlo niman yejua nochi kimati. 21 Noknitsitsinuan, tla toyojlo xtechtlajtlakoltia, uelis tiknotsaskej toTajtsin ika nochi toyojlo. 22 Niman yejua techmaka nochi tlen tiktlajtlaniliaj pampa tikintlakamatstokej itlanauatiluan niman tikchijtokej tlen yejua kuelita. 23 Yejua otechnauati matitlaneltokakan itech itoka iKoneuj, Jesucristo. Niman noijki otechnauati matikintlasojtlakan oksekimej. 24 Noijki, akin kitlakamati itlanauatiluan ok iyaxka toTajtsin niman toTajtsin iuan nemi. Pampa yejua techmaka iespíritu, tikmatij ika ok touan nemi.

4 Noknitsitsinuan, maka xneltokakan san katlejua teotlajtojli, más kuajli tla nenkitaj tla yemelak ualeua itech toTajtsin, pampa ipan yejuin mundo youajneskej miyekej teotlajtojkej akin kijtouaj tlen xmelauak.

2 Nemejuamej uelis ijkin nenkimatiskej tla tlen noijtoua ualeua itech toTajtsin: tla kiteititia ika Jesucristo ouajla ipan yejuin mundo ken se tlakatl. 3 Pero tla se teotlajtojli kijtoua ika Jesús xouajla ken se tlakatl, kijtosneki ika xmelauak ualeua itech toTajtsin. Yejuin tlen temachtia akin kixnamiki Cristo niman onenkikakkej ika uajlaskia, aman yejua yenemi ipan yejuin mundo.

4 Nokonetsitsinuan, nemejuamej nenualeuaj itech toTajtsin niman yonenkintlankej* pampa akin mechpaleuiya más kojtik xijkon ken Diablo, akin kinpaleuiya akin xkitekichiuiliaj toTajtsin. 5 Teotlajtojkej akin xmelajkej kijtouaj tlen kinpaleuiya akin xkitekichiuiliaj toTajtsin niman yejuamej kinkakij. Ijkon panoua pampa teotlajtojkej akin xmelajkej nemij ijkon ken akin xkitekichiuiliaj toTajtsin. 6 Tejuamej tiualeuaj itech toTajtsin. Akin kixmati toTajtsin, techkaki; pero akin xualeua itech toTajtsin, xtechkaki. Ijkon uelis tikitaskej katlejua teotlajtojli melauak niman katlejua xmelauak.

7 Noknitsitsinuan, nochipa matotlasojtlakan iuan oksekimej, pampa tlasojtlalistli ualeua itech toTajtsin, niman nochimej akin tetlasojtlaj, ikoneuan toTajtsin niman kixmatij toTajtsin. 8 Akin xtetlasojtla xkixmati toTajtsin, pampa toTajtsin yejua tlasojtlalistli. 9 ToTajtsin ijkin okiteititi ika techtlasojtla: ijkuak okuajtitlan isenteKonetsin ipan yejuin mundo para matikselikan nemilistli ipampa.* 10 Tlasojtlalistli kijtosneki ika toTajtsin okuajtitlan iKoneuj ken uentli* para oksejpa uelis iuan toyolseuiskej. Okichiuj pampa techtlasojtla, xokichiuj pampa tejuamej tiktlasojtlaj.

11 Noknitsitsinuan, tla toTajtsin ijkon otechtlasojtlak, kuakon tejuamej noijki noneki tikintlasojtlaskej oksekimej. 12 Xakaj keman kita toTajtsin. Tla nochipa tikintlasojtlaj oksekimej, toTajtsin touan nemi niman kuajli techititia ika techtlasojtla. 13 Pampa yejua techmaka iespíritu, tejuamej tikmatij ika tiiyaxkauan* niman ika touan nemi. 14 Noijki, tejuamej otikitakej ika Tajtli okuajtitlan iKoneuj para makinmakixti nochimej akin nemij ipan yejuin mundo, niman yejon tlen tikteijliaj. 15 Tla yakaj kiteititia ika Jesús iKoneuj toTajtsin, toTajtsin ok* iuan nemi niman yejua ok iyaxka toTajtsin. 16 Niman tejuamej yetikmatij kenijki toTajtsin techtlasojtla niman titlaneltokaj itech ken techtlasojtla.

ToTajtsin yejua tlasojtlalistli. Niman akin nochipa kiteititia ika tetlasojtla, toTajtsin ok iuan nemi niman yejua ok iyaxka toTajtsin. 17 Ijkon, uelis kuajli titetlasojtlaskej para ika nochi toyojlo titlajtoskej ipan tonajli ijkuak tetlajtlakolmakaskej, pampa ipan yejuin mundo tejuamej tikchiuaj ijkon ken Jesucristo. 18 Akin kitlasojtla toTajtsin xnomojtia. Akin kuajli tetlasojtla xnomojtia, pampa ijkuak yakaj nomojtia xueli ika iyojlo itlaj kijtoua noso kichiua. Ijkuak yakaj tetlasojtla pero nomojtia, kijtosneki ika xekuajli tetlasojtla. 19 Tejuamej titetlasojtlaj pampa yejua kachtopa otechtlasojtlak.

20 Tla yakaj kijtoua “Nejua niktlasojtla toTajtsin” pero kitlauelita ikniuj, san tlakajkayaua. Pampa akin xkitlasojtla ikniuj, akin ueli kita, xuelis kitlasojtlas toTajtsin, akin xueli kita. 21 Yejua ijkin otechnauati: akin kitlasojtla toTajtsin noijki makitlasojtla ikniuj.

5 Akin ikoneuan toTajtsin, kineltokaj ika Jesús yejua Cristo, niman akin kitlasojtla toTajtsin noijki kintlasojtla ikoneuan toTajtsin. 2 Tla tiktlasojtlaj toTajtsin niman tikchiuaj tlen kijtouaj itlanauatiluan, tikmatstoskej ika tikintlasojtlaj ikoneuan. 3 Tla tiktlasojtlaj toTajtsin, tikintlakamatiskej itlanauatiluan, niman itlanauatiluan xtetekiyomakaj.* 4 Pampa, ikoneuan toTajtsin kitlanij tlen xkuajli nochiua ipan yejuin mundo. Niman totlaneltok yotechpaleui matitetlanikan.

5 ¿Akinon uelis kitlanis tlen xkuajli nochiua ipan yejuin mundo? Tetlanis akin kineltoka ika Jesús yejua iKoneuj toTajtsin. 6 Ijkuak Jesucristo ouajla, onkatka atl niman yestli.* Xsan ouajla ika atl, ouajla ika atl niman yestli. Espíritu santo okiteititi yejuin pampa kijtoua tlen melauak. 7 Pampa yejuin yeyi tlemach kiteititiaj akinon Jesús: 8 on espíritu, atl niman yestli, niman yejuin yeyi tlemach san noijki tlen kiteititiaj.

9 Tla tikseliaj tlen kijtoua on gente, más noneki tikseliskej tlen toTajtsin kijtoua. Pampa toTajtsin kijtoua ika Jesús iKoneuj. 10 Akin tlaneltoka itech iKoneuj toTajtsin, ipan iyojlo kipiya tlen toTajtsin okijto. Akin xitech tlaneltoka, kentla kijtojtoskia ika toTajtsin san tlakajkayaua, pampa xkineltoka tlen yokiteijli itech iKoneuj. 11 Niman yejuin tlen kiteijlia: ika toTajtsin otechmakak nemilistli tlen xkeman tlami niman yejon nemilistli tikseliaj ipampa iKoneuj. 12 Akin kichiua ijkon ken teKoneuj kipiya yejon nemilistli; akin xkichiua ijkon ken iKoneuj toTajtsin xkipiya yejon nemilistli.

13 Nimechijkuilouilia yejuin, akin nentlaneltokaj itech itoka iKoneuj toTajtsin para xmatikan ika nenkipiyaj nemilistli tlen xkeman tlami. 14 Niman tejuamej kuajli tikmatstokej ika techkakis maski san tlenon tiktlajtlaniliskej, tla tlen tiktlajtlaniliaj yejon tlen yejua kineki. 15 Niman tla tikmatstokej ika yejua techkaki maski san tlenon tiktlajtlaniliaj, tikmatstokej ika tikpiyaskej tlen tiktlajtlanij pampa yejua akin otiktlajtlanilijkej.

16 Tla yakaj kita ika ikniuj kichijtika se tlajtlakojli tlen xkichiuas mamiki, makichiua oración ipampa niman toTajtsin kimakas nemilistli yejuin tokniuj.* Yejuin san para akin xkichiuaj se tlajtlakojli tlen kichiua mamikikan. Onka se tlajtlakojli tlen kema kichiua matimikikan. Xnimechijlia xchiuakan oración ipampa akin kichiua yejon tlajtlakojli. 17 Nochi tlen xkuajli, tlajtlakojli, pero onka se tlajtlakojli tlen xteuika kampa mikilistli.

18 Tikmatstokej ika nochimej akin ikoneuan toTajtsin xkichiuaj tlajtlakojli, pampa iKoneuj* toTajtsin kintlajpiya, niman Satanás* xueli kimajsi. 19 Tejuamej tikmatstokej ika tiualeuaj itech toTajtsin, pero nochimej akin xkitekichiuiliaj kinyekana Satanás.* 20 Niman tikmatij ika iKoneuj toTajtsin youajla, niman yotechmakak tlamachilistli para matikixmatikan akin yemelak toTajtsin. Yejua akin melauak toTajtsin niman akin kitemaka nemilistli tlen xkeman tlami. Ipampa* Jesucristo, akin yejua iKoneuj, tejuamej tiiyaxkauan.* 21 Nokonetsitsinuan, xmotlajpiyakan para maka nenkinueyichiuaskej on imágenes.