2 JUAN

1 Nejua akin nitlayekanketl,* nimitsontlajkuilouilia tejua siuatl akin yomitstlapejpenijkej niman noijki nikomontlajpaloua mokoneuan. Nejua niman nochimej akin kixmatij tlen melauak, timechtlasojtlaj. 2 Nimechtlasojtla pampa ipan toyojlo tikpiyaj tlen melauak niman nochipa ompa tikpiyaskej. 3 ToTajtsin akin Tajtli niman toTeko Jesucristo akin iKoneuj Tajtli, techikneliskej maski xtechnamiki niman techyolseuiskej pampa tikixmatij on tlen melauak niman totlasojtlaj imiuan oksekimej.

4 Melak oniyolpak ijkuak onikmat ika sekimej mokoneuan ok* nemij ipan ojtli tlen melauak, ijkon ken on Tajtli otechnauati matikchiuakan. 5 Kuakon, miyekpa nimitstlajtlanilia siuatl, matotlasojtlakan imiuan oksekimej. Yejuin tlanauatijli xyenkuik, youejkauj otechmakakej. 6 Tla titetlasojtlaj, tikintlakamatiskej itlanauatiluan. Niman nemejuamej desde yeuejkaui onenkikakkej kenon otechnauatijkej ika noneki nochipa matotlasojtlakan imiuan oksekimej. 7 Pampa ipan yejuin mundo yoneskej miyekej akin tekajkayauaj, akin xkineltokaj ika Jesucristo ouajla ken se tlakatl. Yejuin akin tekajkayaua niman akin kixnamiki Cristo.

8 Xmotlajpiyakan para maka nenpoliuis* nochi tlen yotikchijkej nemopampa niman para uelis nenkiseliskej nochi tlen yomechijlijkej mechmakaskej. 9 Nochimej akin xkiseliaj teKoneuj, xkiyolpaktiaj Tajtli, pero akin kiseliaj teKoneuj, kiyolpaktiaj Tajtli. 10 Tla yakaj nemotech uajlauj* niman xtemachtia tlen Cristo otemachti, maka xselikan nemochan nion maka xtlajpalokan. 11 Pampa akin kitlajpaloua kentla noijki kichijtoskia tlen xkuajli.

12 Maski onka miyek tlen noneki nimechijlis, xnikneki san nimechijkuilouilis. Nikuelitaskia nimechonitas niman ijkon nemouan nitlajtos para más nenyolpakiskej.

13 Mitsontlajpalouaj ikoneuan mokniuj akin yokitlapejpenijkej.