Historia 22

Kitsakuaj José

JOSÉ kipiya 17 xiuitl ijkuak kuikaj Egipto. Ompa okinemakakej itech se tlakatl itoka Potifar. Potifar tekiti itech akin tekiuajti ipan Egipto, kitokayotiaj Faraón.

José tekipanoua chikauak itech iteko Potifar. Ika yejon, ijkuak José ueyiya, Potifar kinauatia matlayekana ichan. Kuakon, ¿tleka okitsaujkej José? Ipampa isiuauj Potifar.

Ijkuak José oueyiyak melak kualtsin nesi, niman isiuauj Potifar kineki iuan manoteka. San ika, José kimatstika ika yejon xkuajli, niman xkineki iuan notekas. Isiuauj Potifar melak kualani. Ijkuak iueuentsin uajlauj, kikajkayaua niman kijlia: ‘¡José melak xkuajli, kinekiya iuan maninoteka!’ Potifar kineltoka isiuauj, niman melak kualani iuan José. Kuakon tlanauatia makitsakuakan.

Tlakatl akin tlayekana kampa nemiyaj akin tsaujtokej, kita ika José kuajli nouika. Ika yejon, kijlia José makintlajpiya oksekimej akin tsaujtokej. Sakin, Faraón melak kualani iuan akin katlitia niman akin kichijchiuilia pan, niman tlanauatia makintsakuakan. Se yeuajli omemej temikij, san ika xkimatij tlen kijtosneki. Uajmostla José kimijlia: ‘Xnechijlikan tlenon onenkitemijkej’. Kuakon José ika ipaleuilis toTajtsin, kimijlia tlenon kijtosnekij.

Akin katlitia Faraón, José kijlia: ‘Ipan yeyi tonajli tikisas, niman oksejpa titekitis itech Faraón’. Kuakon José kijlia: ‘Ijkuak tikisas, xkijli Faraón akin nejua, niman xnechpaleui manikisa’. San ika, akin kichijchiua pan, José kijlia: ‘Ipan yeyi tonajli Faraón mitskechtekis’.

Ipan yeyi tonajli panoua nochi tlen José kijtoua. Faraón kikechteki akin kichijchiuilia pan. Niman akin katlitia kikixtia kampa tsaujtika iuan oksejpa tekiti itech Faraón. ¡San ika, kilkaua! Xkijlia Faraón akinon katka José, niman ompa nokaua José kampa tsaujtika.

Génesis 39:1-23; 40:1-23.