Parte 6
Tlakati Jesús niman ontlami ijkuak miki
Se iluikaktekitketl itoka Gabriel okititlankej itech se ichpochtli itoka María. Yejua okijli María ika kipiyaskia se ikoneuj akin tlanauatis nochipa kentla se tekiuaj. Ikoneuj, akin itoka Jesús, otlakat kampa kintsakuayaj yolkamej, niman kampa sekimej tlajpixkej okitatoj. Sakin, se sitlalin okinyekan kampa nemi Jesús sekimej tlakamej akin inpaís nokaua ikisayan tonajli. Tikasikamatij akinon okichiuj manesi yejuin sitlalin, niman kenon omakis Jesús ijkuak kinekiyaj kimiktiskej.
Sakin, tikitaj Jesús ijkuak kipiaya 12 xiuitl, tlajtotika iuan tlamachtijkej ipan teopan. Panoua dieciocho xiujtin niman Jesús noapolaktia, kuakon opeuj tlanojnotsa niman tlamachtia itech Tekiuajyotl, tlen ika toTajtsin okuajtitlan ipan tlaltikpaktli. Jesús okintlapejpeni 12 tlakamej akin onochiujkej itlatitlankauan niman ijkon okipaleuijkej ipan yejuin tekitl.
Jesús noijki okichiuj miyek milagros. Okintlakualti melak miyekej tlaltikpakchanejkej, ika seki michimej niman achijtsin panes. Okinpajti kokoxkej niman noijki okinyoliti akin yomijkaj. Niman tiueliskej itech miyek tlemach tlen ipan onochiuj Jesús ijkuak imikiskia, niman kenon okimiktijkej. Jesús otenojnots kanaj yeyi xiuitl uan tlajko, kuakon ika nochi opanokej ipantsin 34 xiujtin ipan Parte CHIKUASEN.