SECCIÓN 12
Tlamachilistli tlen techpaleuiya ipan tonemilis
Miyek itech amoxtli Proverbios okijkuilo Salomón. Kipiya miyek tlajtolpaleuilistin tlen techmaka toTajtsin niman techpaleuiyaj
¿TECHPALEUIS tla tikseliaj itlayekanalis toTajtsin? Tla tiknekij tikmatiskej, noneki matikitakan seki tlajtolpaleuilistin itech iTlajtol. ¿Yemelak techpaleuiyaj? ¿Techpaleuiyaj kuajli matinemikan? Ipan amoxtli Proverbios, tekiuaj Salomón okisentlali miyek tlajtoltin tlen uelis techpaleuiskej ipan tonemilis. Matikitakan san seki.
Matikneltokakan toTajtsin. Tla tiknekij kuajli iuan touikaskej Jehová, noneki matikneltokakan. Salomón okijto: “Xmokauili ika nochi moyojlo mamitsyekana Jehová niman maka xmopaleui san ipan motlamachilis. Ipan nochi tlen tikchiuas xkauili mamitsyekana niman yejua mitspaleuis xyolmelaujkanemi.” (Proverbios 3: 5, 6). ¿Kenon tikteititiaj ika tikneltokaj toTajtsin? Tla tokauiliaj matechyekana niman tla tiktlakamatij itlanauatiluan. Tla ijkon tikchiuaj, tikyolpaktiskej toTajtsin niman tikteititiskej ika Diablo se tlakajkayaujketl (Proverbios 27:11).
Tochanejkauan niman akin imiuan touikaj. Ipan yejuin tonaltin nochi familias melak noneki makinyekana itlanauatiluan Jehová. ToTajtsin kijlia teueuentsin: “Xpakto iuan mosiuauj akin iuan otimonamikti ijkuak titelpochtli”, ijkon kitlalnamiktia ika maka makikajkayaua isiuauj (Proverbios 5:18-20). Ipan Proverbios itlaxelol ueyi 31, akin tesiuauj kuajli kijlia tlenon uelis kichiuas niman ijkon makitlasojtlakan niman makitlakaitakan ikoneuan iuan iueuentsin. Niman tekoneuan, kiminyoleua makintlakamatikan intajuan (Proverbios 6:20). Ipan yejuin amoxtli noijki kijtoua kenon kuajli tinemiskej tla touikaj iuan oksekimej niman tla ka, xtiteitasnekiskej niman san tikchiuaskej tlen tiknekij (Proverbios 18:1). Aman, maski melak kuajli tla tikpiyaj akin imiuan touikaj, noneki kuajli matikintlapejpenikan niman maka imiuan matouikakan akin uelis techijtlakoskej (Proverbios 13:20; 17:17).
Ipan tonemilis. Proverbios kipiya tlajtolpaleuilistin tlen kichiuaj kuajli matinemikan, techpaleuiya maka matitlauantinemikan, san matiknemilikan tlen techpaleuis ipan tonemilis niman matochiuakan titekitkej (Proverbios 6:6; 14:30; 20:1). Noijki techijlia tlenon xkuajli topan nochiuas tla xtiktlakamatij itlanauatiluan toTajtsin (Proverbios 14:12). Niman techpaleuiya maka matikijtlakokan toyojlo —kampa ualeujtika totlanemililuan—, pampa “ompa peujtika tonemilis” (Proverbios 4:23).
Yejuin tlajtoltin melak yokiminpaleui sajnoye miyekej tlaltikpakchanejkej kuajli manemikan, yejuamej kimatstokej ika kuajli tinemiskej tla san Jehová techyekana.
(Onokixti itech amoxtli Proverbios.)