Tlen techijlia Biblia
Jehová kinchijchiua Adán iuan Eva niman ijkon manemikan nochipa ipan Xochitlalpan. Satanás kitsojkuiloua itokatsin Jehová noijki kijtoua ika xkinamiki matlayekana. Diablo oteixnamik niman Adán iuan Eva noijki okichiujkej, ijkon okinkauilitejkej tlaltikpakchanejkej tlajtlakojli niman mikilistli
ToTajtsin kimijlia tlen iminpan nochiuas akin xotetlakamatkej niman okijto ika kuajtitlaniskia se Temakixtijketl akin kipopolos Satanás niman ijkon kiyektlalis nochi tlen xkuajli niman kipopolos tlajtlakojli tlen otechpanoltilijkej akin xotetlakamatkej
Jehová kijlia Abrahán niman David ika intech ualeuaskia akin yeskia Temakixtijketl, Mesías akin tekiuajtis nochipa
Jehová kijtoua ika iteotlajtokauan, ika Mesías kipopolos tlajtlakojli iuan mikilistli niman yejua yes Tekiuaj itech iTekiuajyo toTajtsin. Noijki iuan tekiuajtiskej sekimej tlaltikpakchanejkej, niman iuan kipopoloskej guerras, kokolistin niman mikilistli
Jehová kijtoua ika Jesús yejua Mesías akin yonoijtoka uajlas ipan tlaltikpaktli. Otenojnots itech iTekiuajyo toTajtsin niman ijkon okitemakak inemilis ipampa tlaltikpakchanejkej. Ijkuak omik, Jehová oksejpa okiyoliti Jesucristo kentla se espíritu
ToTajtsin kitlalia Cristo kentla Tekiuaj ipan iluikak, niman peua itlamiyan tonaltin ipan tlaltikpaktli. Jesús tlayekana ipan tlajtolmoyaualistli itech iTekiuajyo toTajtsin tlen nochiua ipan nochi tlaltikpaktli
Jehová kinauatia iKoneuj makipeualti itlayekanalis ipan tlaltikpaktli. Tekiuajyotl kipopoloua nochi akin tlayekanaj ipan tlaltikpaktli, kiyektlalia Xochitlalpan niman akin yolmelaujkanemij kinkixtilia tlajtlakojli. Itlayekanalis Jehová xok keman yakaj kixnamikis, niman nochipauas itokatsin