Matikchiuakan ijkon ken Jesús
MATITEIKNELIKAN
Jesús xokinpix tlaueltin niman ajmantin pampa yejua xtlajtlakole katka. San ika, yemelak najmanaya ipampa oksekimej niman kichiuaya nochi tlen ueliya para kinpaleuis. Ijkon okichiuj, pampa yejua sajnoye teikneliaya.
MATOKAUILIKAN MATECHNISIUIKAN
Nochimej kinekiyaj kinisiuiskej Jesús pampa yejua xnoueyimatiya niman nochipa kipiaya tiempo para oksekimej. Niman pampa Jesús melak tetlasojtlaya, nochimej melak kuelitayaj iuan nemiskej.
NOCHIPA MATIKCHIUAKAN TEOYOTL
Jesús nochipa kinotsaya toTajtsin ika nochi iyojlo, yejua ijkon kichiuaya maski tla san iselti nemiya noso maski tla nemiya imiuan akin noijki kiueyichiuayaj toTajtsin. Jesús xsan kichiuaya teoyotl achto tlakuas, yejua miyekpa kinotsaya toTajtsin. Ijkuak kichiuaya teoyotl yejua kitlasojkamachiliaya niman kiueyiteneuaya iTaj, niman ijkuak nonekiya itlaj kitlapejpenis kitlajtlaniliaya makipaleui.
IKA NOCHI TOYOJLO MATITEPALEUIKAN
Maski kemantika Jesús kinekiya noseuis, yejua xonoseui, pampa ika nochi iyojlo kinekiya kinpaleuis oksekimej. Kuajli nesi ika yejua xsan itech tlanemiliaya. Tejuamej noijki uelis tikchiuaskej ijkon ken yejua.
MATITETLAPOPOLUIKAN
Jesús xsan okijto ika sajnoye noneki titetlapopoluiskej, yejua nochipa okintlapopolui inomachtijkauan niman oksekimej.
MATIKTEKICHIUILIKAN JEHOVÁ IKA NOCHI TOYOJLO
Miyek teotlajtoltin kijtouayaj ika miyekej judíos xkiseliskiaj Mesías niman ika itlauelikniuan kimiktiskiaj. Ika yejon, Jesús ueliskia san achijtsin kichiuas, san ika, yejua melak onokojtili niman ijkon miyekej makimatikan tlen melauak. Tejuamej noijki uelis chikauak tiktekichiuiliskej Jehová maski tla techtlauelitaj noso techtlaueltokaj.
MATIYOLYEMANKEJ
Jesús xtlajtlakole katka, ika yejon, melak miyek kimatiya, nochi ueliya kichiuaya niman melak tlamachilise katka, xijkon ken tejuamej. San ika, maski ijkon, yejua melak yolyemanki katka niman nochipa okinpaleui oksekimej.
MATITEIJYOUIKAN
Jesús nochipa kimijyouiya iapóstoles niman oksekimej ijkuak xkichiuayaj ijkon ken yejua noso ijkuak xkichiuayaj tlen kimijliaya. Yejua xkinmajuaya, yej oksejpa kimijliaya tlenon nonekiya kichiuaskej para kinisiuiskej Jehová.