Se tlakeuajli akin okitlakamat toTajtsin

Se itech ikoneuan Jacob akin pipitikej, katka José. Ikniuan akin iuejueyimej okitakej ika intaj melak kitlasojtlaya. ¿Kenon tiknemilia onomachilijkej? Okinexikolitakej niman okitlauelitakej José. Se tonajli, okipix seki temiktli tlen xkeman kitemikiya niman okimijli ikniuan. Yejuamej okinemilijkej ika yejon temiktli kijtosnekiyaj ika se tonajli notlakuantelketsaskiaj ixpan. Ika yejon, ¡melak okitlauelitakej!

Se tonajli, ikniuan José kintlajpixtoyaj borregos nisiuj ueyikalpan Siquem. Jacob okititlan José makitati tlenon kichiujtoyaj. Ijkuak uejka okontakej José, opeuj noijliaj: “Nikan uajlauj akin temikini. ¡Matikmiktikan!”. Kuakon okajsikej niman okontlajkalkej ijtik se pozo. San ika, Judá okijto: “¡Maka nenkimiktiskej! Matiknemakakan ken se tlakeuajli”. Kuakon okinemakakej José ika 20 plata tomin itech tlasemankej madianitas akin yayaj Egipto.

Ikniuan okipolaktijkej itlaken ijtik iyesyo se chivo, okititlanilijkej intaj niman okijlikej: “Yejuin tlakentli, ¿xiyaxka mokoneuj?”. Jacob okinemili ika se yolki tlen tekuani okimikti José. Yejua melak onoyolkoko. Xakaj ueliya kiyolseuiaya.

Ijkuak oajsikej Egipto, Potifar se akin ueyixtoya okikouj José ken itlakeual. San ika, Jehová nemiya iuan José. Potifar okitak ika José melak kuajli tekitiya niman ika ueliskia itech tlaneltokas. Xouejkauj José okitlalijkej makitlajpiya nochi tlen iyaxka Potifar.

Isiuauj Potifar okitak ika José kojtik niman kualtsin katka. Mojmostla kijliaya José iuan manoteka. ¿Tlenon kichiuaskia José? Xokikak, yejua okijli: “¡Ka! Yejon xkuajli. Noteko notech tlaneltoka, niman tejua tiisiuauj. Tla mouan ninoteka, ¡nitlajtlakos ixpan toTajtsin!”.

Se tonajli isiuauj Potifar okinek kichiualtis José iuan manoteka. Yejua okajsik ipan itlaken, san ika, José ocholoj. Ijkuak Potifar onokuep ichan, yejua okikajkayauj, okijli ika José kinekiya kichiualtis iuan manoteka. Potifar melak okualan niman okitsauk José. San ika, Jehová xokilkauj.