Jehová okitlapejpeni Josué

Moisés kuikaya miyek xiuitl ika kiyekantoya Israel niman sa achijtsin poliuiya ika mikiskia. Jehová okijli: “Tejua xtikinkalaktis israelitas ipan tlajli tlen yonikijto nikinmakas. San ika, nimitskauilis xkita yejon tlajli”. Kuakon, Moisés okitlajtlanili Jehová makitlapejpeni akin makitlajpiya kalpan. Jehová okijli: “Xuiya kampa Josué niman xkijli ika yejua yes”.

Moisés okijli kalpan ika imikiskia niman ika Jehová yokitlapejpenijka Josué makinyekana ipan Tlajli tlen yokijtoka kinmakas. Kuakon Moisés okijli Josué: “Maka xmomojti. Jehová mitspaleuis”. Sakin, Moisés otlejkok ikuatipan tepetl Nebo, ompa Jehová okititi tlajli tlen yokijtoka kimakas Abrahán, Isaac, niman Jacob. Moisés kipiaya 120 xiuitl ijkuak omik.

Jehová okijli Josué: “Xpanaui atentli Jordán niman xuiya Canaán. Nimitspaleuis ijkon ken onikpaleui Moisés. Maka tikilkauas ika noneki tikpouas mojmostla Tlanauatijli. Maka xmomojti. Xyolchikaui. Xuiya niman xchiua nochi tlen yonimitsnauati”.

Josué okintitlan ome akin maichtakatlachiatij ueyikalpan Jericó. Ipan okse tlamachtijli, tiueliskej okseki itech tlen ompa opanok. Ijkuak yejuamej onokuepkej, okijtokej ika iueliskiaj kalakiskej Canaán. Uajmostla, Josué okijli kalpan matlakuiteuakan kampa onokajkaltijkaj. Kuakon, kachtopa okintitlan ipan atentli Jordán teopixkej akin kitkiyaj caja tlen tetlalnamiktia tlajtolkaualistli. Atentli melak tentoya. San ika, nimantsin ijkuak ikxiuan teopixkej okalajkej ijtik atl, atentli onotelti niman ouak. Teopixkej oajsikej itlajkotian atentli niman ompa onoteltijkej, hasta ijkuak nochimej israelitas yopanokaj oksekan. ¿Tiknemilia ika yejuin okimilnamikti milagro tlen Jehová okichiuj ipan mar Rojo?

Sakin ika yopanoka yejon xiujtin, israelitas inemiyaj ipan tlajli tlen yokimijlikaj kinmakaskej. Kichijchiuaskiaj kaltin niman ueyikalpamej. Kitokaskiaj tlen tlaki niman uvas. Ipan yejon tlajli onkatka miyek tlemach tlen kikuaskiaj niman koniskiaj. Ika yejon, noitaya ken tlajli kampa tlatlaki niman xtlaj poliui.