Iyolchikaualis Jehoiadá

Jezabel okipix se ikoneuj siuatl itoka katka Atalía, akin noijki xkuajli katka. Atalía ononamikti iuan tekiuaj ipan Judá. Ijkuak iueuentsin omik, ikoneuj opeuj tekiuajti. Niman, ijkuak ikoneuj omik, Atalía opeuj tekiuajti ipan Judá. Kuakon okiyejyeko kinmiktis ikoneuan tekiuaj akin ueliskiaj kitekipatlaskiaj niman noijki oksekimej akin kikuiliskiaj itekiuajyo. ¡Hasta ixuiuan okinmikti! Nochimej melak kimakasiyaj.

Ueyi teopixketl Jehoiadá niman isiuauj Jehoseba kimatstoyaj ika xkuajli tlen kichiujtoya Atalía. Maski ueliskiaj kinmiktiskiaj, okimakixtijkej konetsintli itoka katka Jehoás, ixuiuj Atalía. Yejuamej okiskaltijkej ipan teopan.

Ijkuak Jehoás kipiaya chikome xiuitl, Jehoiadá okinsentlali nochimej tlayekankej iuan levitas niman okimijli: “Xtlajpiakan ipuertas teopan niman maka xkauilikan yakaj makalaki”. Kuakon, Jehoiadá okitlali Jehoás ken tekiuaj ipan Judá niman okitlalili se corona. Akin chantiyaj ipan Judá otsajtsikej: “¡Uejkaujtipan manemi totekiuaj!”.

Atalía okikak ika tlaltikpakchanejkej tsajtsitoyaj niman onotlalo kampa onka teopan. Ijkuak okitak yenkuik tekiuaj, otsajtsik: “¡Ninechixnamiktokej! ¡Ninechixnamiktokej!”. Tlayekankej okajsikej yejon xkuajli siuatl, okikixtijkej niman okimiktijkej. San ika ¿tlenon panoskia iuan kalpan aman ika yejua xok kimijtlakoskia?

Jehoiadá okipaleui kalpan manotlajtolkaua iuan Jehová, yejuamej okijtokej ika san yejua kiueyichiuaskiaj. Jehoiadá okichiuj ika makixoxotonikan iteopan Baal niman tajtsitsintin. Okintlali teopixkej niman levitas matekitikan ipan iteopan Jehová niman ijkon tlaltikpakchanejkej ueliskiaj ompa kiueyichiuaskej. Noijki okintlali tlajpixkej akin kitaskiaj maka makalaki nion se akin xchipauak. Kuakon Jehoiadá niman tlayekankej okuikakej Jehoás kampa chantiskia niman okitlalijkej kampa tlanauatiskia. Akin chantiyaj Judá melak opajkej. Aman ueliskiaj kiueyichiuaskiaj Jehová pampa xok nemiya Atalía niman xok noueyichiuaya Baal. ¿Tiknemilia ika Jehoiadá yolchikauak katka? ¿Tikita kenon okinpaleui miyekej?