Itepanuan Jerusalén

Ipan itonaluan Esdras, nemiya se israelita itoka katka Nehemías. Akin tlakeuajli katka itech tekiuaj Artajerjes. Yejua chantiya Persia ipan ueyikalpan Susa. Ikniuj Nehemías oualeuj Judá okijliko tlen xkuajli panotoya: “Israelitas akin onokuepkej Jerusalén xkipiyaj tlen makinpaleui. Itepanuan niman ipuertas ueyikalpan tlen babilonios okixoxotonijkej ok xkinyektlaliaj”. Nehemías melak onoyolkoko, pampa kinekiya ontlapaleuis, okichiuili teoyotl toTajtsin ijkon makikauili tekiuaj mauiya Jerusalén.

Sakin, tekiuaj okitak ika Nehemías noyolkokouaya. Yejua okijli: “Xkeman ijkin nimitsitaya. ¿Tlenon panoua?”. Nehemías okijli: “Nokalpan Jerusalén yokixoxotonijkej, ¿kenon xninajmanas?”. Tekiuaj okitlajtolti: “¿Tlenon uelis nikchiuas mopampa?”. Nimantsin Nehemías okichiuj teoyotl ipan iyojlo. Kuakon okijto: “Nimitstlajtlanilia xnechkauili maniuiya Jerusalén manikinyektlaliti itepanuan”. Tekiuaj Artajerjes okikauili mauiya niman okimakak nochi tlen kitekitiltiskia ipan ojtli. Noijki okitlali ken tlanauatijketl ipan Judá niman okimakak madera tlen ika kiyektlaliskia ipuertas ueyikalpan.

Ijkuak Nehemías oajsik Jerusalén, okitato itepanuan ueyikalpan. Kuakon, okinsentlali teopixkej niman tlanauatijkej niman okimijli: “Yejuin melak xkuajli, noneki nimantsin matitekitikan”. Kalpan okiseli tlen okijto niman opeuj kinyektlalia tepantin.

San ika, sekimej intlauelikniuan israelitas opeuj kinpipinaujtiaj niman okimijlikej: “Se ostotsin ueliskia kitlajkalis tepantli tlen nenkichijchiujtokej”. Akin tekitiyaj xokinkakej nion xokikajkaujkej ika tekitij. Okinchijchiujkej tepantin uejkapamej niman chikaujkej.

Intlauelikniuan, okinemilijkej miyekan kixnamikiskej Jerusalén san se ueyi niman kichiuaskiaj ijkuak nion xnonemiliaya. Ijkuak judíos okimatkej yejuin, melak onomojtijkej. San ika, Nehemías okimijli: “Maka xmomojtikan. Jehová touan nemi”. Yejua okintlali akin kintlajpiyaskiaj tekitkej. Ijkon intlauelikniuan xueliskiaj kimixnamikiskej.

Tepantin niman puertas otlan kinyektlaliaj ipan 52 tonajli. Nehemías okinuikak Jerusalén nochimej levitas, ijkon iluichiuaskej. Ojkan okinxelo akin nokuikatiskiaj. Yejuamej otlejkokej ipan itepan Jerusalén, onoxelojkej niman okiyeualojkej ueyikalpan. Okintsotsonkej trompetas, címbalos iuan arpas niman okikuikatlalilijkej Jehová. Esdras oyaj imiuan sekimej niman Nehemías inuan oksekimej hasta ijkuak ononamijkej ipan teopan. Nochimej tlakamej, siuamej niman kokonej okitemakakej uentli niman oiluichiujkej. Uejka kakistiya ika melak pakiyaj.