Cornelio okiseli espíritu santo

Ipan ueyikalpan Cesarea, nemiya se tlakatl akin kinyekanaya soldados romanos itoka katka Cornelio. Maski xjudío katka, judíos kitlakaitayaj. Yejua kuelitaya kinpaleuis akin xtlaj kipiayaj. Cornelio tlaneltokaya itech Jehová niman nochipa kichiuiliaya teoyotl. Se tonajli, se iluikaktekitketl ixpan ouajnonexti niman okijli: “ToTajtsin yokikak moteoyouan. Aman xkintitlani tlakamej mauiyan kalpan itoka Jope makijlitij Pedro mauajla motech”. Cornelio nimantsin okomintitlan Jope yeyimej itlakeualuan, maski nokauaya kanaj 50 kilómetros (30 millas) ika uejka.

Pedro, akin nemiya Jope, okipix se tlatlachalistli. Yejua okitak yolkamej tlen judíos xkinkauiliayaj makikuakan. Sakin okikak se tlajtojli tlen okijli makinkua. Pedro xokinek niman okijto: “Nejua xkeman nijkua se yolki tlen xchipauak”. Yejon tlajtojli okijli: “Maka xkijto ika yejuin yolkamej xchipaujkej. ToTajtsin yokichiuj machipaujkej”. Noijki okijli: “Nemij yeyimej tlakamej mokiyauatenpan. Imiuan xuiya”. Pedro oyaj kampa puerta niman okintlajtolti tleka kitejtemouayaj. Yejuamej okijlikej: “Otechuajtitlan Cornelio, se tlakatl akin kinyekana soldados romanos. Kineki touan xuiya ichan ipan Cesarea”. Pedro okimijli manokauakan yejon yeuajli. Uajmostla imiuan oyaj Cesarea, noijki sekimej akin kichiuayaj ken Cristo, chanejkej Jope, oyajkej.

Ijkuak Cornelio okitak Pedro, onotlakuankets ixpan. San ika, Pedro okijli: “¡Xmotelketsa! Nejua noijki san nitlakatl ken tejua. ToTajtsin onechijli maniuajla mochan, maski judíos xkalakij inchan akin xjudíos. Aman nimitstlajtlanilia xnechijli tleka otinechtlatitlanili”.

Cornelio okijli Pedro: “Ikipiya naui tonajli, nejua niknotstoya toTajtsin ipan teoyotl niman se iiluikaktekitkauj onechijli manimitstlatitlanili. Timitstlajtlaniliaj xtechmachti itech Jehová”. Pedro okijli: “Aman kuajli yonikmat ika toTajtsin xtechikoita. Yejua kiselia san akinon kineki kiueyichiuas”. Pedro okinmachti miyek tlemach itechkopa Jesús. Kuakon Cornelio niman akin ompa nemiyaj okiselijkej espíritu santo niman onoapolaktijkej.