Biblia okichiuj manopatlakan
¿Tleka se siuatl akin ikipiya más de 60 xiuitl okikajkauj ika kinueyichiua imágenes? ¿Tleka se teopixki sintoísta okikauj ireligión niman onochiuj iteixpantijkauj Jehová? ¿Tlenon okipaleui se siuatl akin okitetlayokolijkej ijkuak otlakat maka melak manajmana? Matikitakan tlen techijliskej.
“Xok nikinueyichiua imágenes”. (ABA DANSOU)
IJKUAK OTLAKAT: 1938
PAÍS: BENÍN
TLEN KICHIUAYA: NIKINUEYICHIUAYA IMÁGENES
TLEN NIKCHIUAYA: Oninoskalti ipan se kalpantsin tlen itoka So-Tchahoué, tlen onka nisiuj se lago. Pampa ompa xonokej carreteras, akin ompa chanejkej nochipa yauej ipan barcos niman canoas. Akin ompa chantij kimajsij michimej, kintlajpiyaj borregos, chivos, pitsomej, uakaxtin niman totomej. Niman kaltin kinchijchiuaj ika madera, sakatl niman kemantika ika ladrillos. Maski miyekej xmás kipiyaj tomin, xmiyekej nemij akin kichiuaj tlen xkuajli, xijkon ken ipan ciudades.
Ijkuak nipitentsin katka nejua iuan nokniuj otechkauatoj kampa otechmachtijkej kenon tikinueyichiuaskej imágenes. Sakin melak opeuj nikueyichiua Dudua noso Oduduwa se imagen tlen kiueyichiuaj akin chantij Yoruba. Onikektlali kampa ueliskia nikuentlalis aceite de palma, ñames, caracoles, kuanakamej, totomej niman okseki yolkamej. Uelis tikijtoskej ika nochi tlen niktlaniya nikpopolouaya para ika nitlauentlalis.
KEN BIBLIA OKICHIUJ MANINOPATLA: Ijkuak opeuj ninomachtia Biblia, onikasikamat ika nemi san se toTajtsin akin melauak, Jehová. Niman ika yejua xkuelita matikinueyichiuakan imágenes (Éxodo 20:4, 5; 1 Corintios 10:14). Nimantsin onikasikamat tlenon nonekiya nikchiuas. Onikinxini nochi ídolos tlen ualeua itech fetichismo. Niman xok ninotlatemouiliaya niman xok nikchiuaya tlen kichiuayaj akin chantij kampa nichanti. Niman noijki xok nikchiuaya tlen kichiuayaj ijkuak yakaj miki.
Ouijtika onikitak xok nikueyichiuas tajtsitsintin, pampa inikpiaya más de 60 xiuitl ika ijkon nikchiuaya. Noamigos, novecinos niman akin ken nikimita xokuelitakej pampa nejua ijkon onikchiuj. Oniktlajtlanili Jehová manechpaleui manikchiua tlen kuajli, melak onechyolchikauj tlen kijtoua Proverbios 18:10, ompa kijtoua: “ToTeko ken sen torre yejuan ueyi niman kojtik yejuan itech yauij para nomanauiyaj on yolmelajkej”.
Noijki melak onechpaleui nias ipan intlanechikol iteixpantijkauan Jehová pampa ompa onikitak kenon melak notlasojtlaj. Onechmojkatlachialti nikitas kenon melak nokojtiliaj para kitlakamatiskej tlen temachtia Biblia, kuajli onikasikamat ika iteixpantijkauan Jehová yejuamej akin kipiayaj religión tlen melauak.
KEN YONECHPALEUI BIBLIA: Tlen yoniuel ipan Biblia yonechpaleui más kuajli maninouika imiuan nokoneuan, niman aman melak kuajli ninomachilia. Kachtopa melak miyek tomin nikpopolouaya para nikinuentlalilis imágenes tlen nion xitlaj ika nechpaleuiayaj, aman niktekichiuilia Jehová, akin kipopolos nochi tlen techtlajyouiltia (Apocalipsis 21:3 niman 4). Xok nikinueyichiua imágenes, aman nikueyichiua Jehová ika nochi noyojlo. Aman melak niyolpaki niman xok ninomojtia pampa nikmatstika ika Jehová nechtlajpiya.
“Desde nipitentsin niknekiya nikixmatis toTajtsin”. (SHINJI SATO)
IJKUAK OTLAKAT: 1951
PAÍS: JAPÓN
TLEN KICHIUAYA: KATKA TEOPIXKI SINTOÍSTA
TLEN NIKCHIUAYA: Oninoskalti ipan se pitentsin kalpantsin tlen nokauaj Fukuoka. Notajuan melak tlaneltokayaj itech tajtsitsintin sintoístas, ika yejon, desde nipitentsin onechmachtijkej kenon nikinueyichiuas. Desde ijkuakon opeuj niknemilia kenon ninomakixtis niman kenon uelis nikinpaleuiskia akin kinpiayaj tlaueltin. Se tonajli se akin techmachtiaya otechtlajtolti tlenon tikuelitaskiaj tiyeskej ijkuak itiuejueyimej. Sekimej akin imiuan ninomachtiaya okijtojkej ika kinekiya más nomachtiskej, sekimej hasta kinekiya yeskej científicos. San ika, ijkuak onikijto ika nejua niknekiya niktekichiuilis toTajtsin, nochimej san onechuejuetskilijkej.
Ijkuak yonitlanka ninomachtia secundaria, onikalak ipan se escuela kampa kinmachtiayaj akin kinekiyaj yeskej temachtiskej ipan se religión. Ompa onikixmat se teopixki sintoísta akin nochipa ijkuak noseuiaya kiamapouaya se libro kapostik. Nejua yonikitaka tlenon nestoya ixpan on libro, ika yejon, ijkuak yejua onechtlajtolti tla nikmatstoya tlen libro kiamapoujtoya, nejua oniknankili: “Biblia”. Yejua onechijli: “Nochimej akin kinekij nochiuaskej teopixkej sintoístas noneki kiamapouaskej yejuin libro”.
Sakin onikouato se Biblia, niman oniktlali kampa ueliskia nimantsin nikitas. San ika, pampa ninomachtiaya miyek tlemach nion xnikpiya tiempo para nikamapouas. Onitlan ninomachtia niman oninochiuj teopixki sintoísta. ¡Onikchiuj tlen desde nipitentsin melak niknekiya nikchiuas!
Nimantsin onikitak ika ompa xnochiuaya ijkon ken nejua niknemiliaya. Miyekej teopixkej xnajmanaya ipampa oksekimej niman sekimej nion xtlaneltokayaj. Se akin ompa tlayekanaya onechijli: “Tla tikneki kuajli tonkisas san xtlajto itech tlen miyekej kineki kimatiskej. Maka titlajtos itech tlaneltokijli”.
Nochi yejuin melak onechajman. Maski xonikis de ompa, kema opeuj nikita tlenon kichiuayaj okseki religiones. San ika, ijkuak más kuajli nikitaya tlenon temachtiaj religiones, más ninajmanaya, pampa nesiya ika xonkatka nion se religión tlen matemachti tlen melauak.
KEN BIBLIA OKICHIUJ MANINOPATLA: Ipan 1988 onikixmat se budista akin onechyolchikauj manikamapoua noBiblia. Ijkuakon onikilnamik on teopixkej sintoísta akin noijki ijkon onechijlika. Ika yejon, onikchiuj tlen onechijlijkej niman opeuj nikamapoua. Melak nikuelitaya tlen nikamapouaya. Kemantika nochi yeuajli nitlaamapouaya.
Tlen nikamapouaya ipan Biblia onechpaleui manikchiuili oración toTajtsin ijkon ken uajnestiuj ipan Mateo 6:9-13. Cada ome hora nikchiuaya yejuin oración, maski nitekititoya ipan teopan sintoísta.
Ijkuak más nikamapoujtiaya noBiblia más miyekixtiaya tlen ninotlajtoltiaya. Nejua yoninonamiktijka, niman pampa iteixpantijkauan Jehová yokinojnotskaj nosiuatsin, nejua nikmatstoya ika yejuamej temachtiayaj itech Biblia. Ika yejon, oniktejtemo se iteixpantijkauj Jehová niman san tlemach oniktlajtolti. Melak onechmojkatlachialti pampa nochi tlen oniktlajtolti onechnankili ika Biblia. Sakin, yejon tokniuj siuatl okimijli oksekimej tokniuan manechmachtikan.
Sakin, nejua opeuj niauj ipan kajli kampa nosentlaliaj iteixpantijkauan Jehová. Kachtopa, xonikitak ika ipan yejon tlanechikojli nemiyaj sekimej tokniuan akin xkuajli onikinnotska, san ika, maski ijkon yejuamej melak kuajli onechnotskej niman kuajli onechselijkej.
Ipan yejuin tlanechikoltin oniuel, ika toTajtsin kineki ika akin yononamiktijkej manotlasojtlakan niman makintlajpiyakan ichanejkauan. San ika, nejua san nitlanemiliaya ipan notekiyo ken teopixki, niman hasta xok kuajli nikintlajpiaya nosiuatsin niman nokoneuan. Onikitak ika maski nejua melak kuajli nikinkakiya akin yayaj ipan teopan, nosiuatsin xkeman kuajli nijkakiya.
Ijkuak más ninomachtiaya Biblia más niknisiuiaya Jehová. Miyek tlaxeloltin melak onechpaleuijkej, ken Romanos 10:13 kampa kijtoua ika nochimej akin kinotsaskej Jehová ika itokayo makisaskej. Desde nipitentsin niknekiya nikixmatis toTajtsin, niman aman ueliskia nikixmatis.
Xok kuajli ninomachiliaya ninemis ipan on teopan. Kachtopa xmás niknekiya nijkauas noreligión pampa nechmojtiaya tlen kinemiliskia oksekimej. San ika, nejua nochipa nikijtouaya ika tla kemantika niknextia se religión tlen manechpaleui manikixmati toTajtsin, nejua nikauaskia sintoísmo. Yejua ika, ipan 1989 onikis de ompa niman onikijto ika san Jehová itech niyolchikauiskia.
Melak ouijtika onikitak nikchiuas tlen onikchiuj, pampa akin nechyekanayaj xokuelitakej tlen nejua niknekiya nikchiuas niman san tlemach okichiujkej para ompa maninokaua. San ika, ijkuak onikimijli notajuan tlen niknekiya nikchiuas más ouijtika onikitak. Ijkuak niaya para inchan notajuan melak ninomojtijtiaya niman hasta nikxikuekuetlakatiaya. Ononek miyekpa ninoteltis para niktlajtlanilis Jehová manechpaleui.
Ijkuak onajsik inchan notajuan, xoninoyolchikauj nimantsin nikimijlis. Melak onikchiuili teoyotl Jehová niman ijkuak yopanoka seki horas, ouel onikijli notaj. Onikijli ika yoniknextijka akin yemelak toTajtsin ipan okse religión, niman ika nikauaskia sintoísmo para uelis niktekichiuilis. Yejua melak onajman niman xtlaj onechijli. Niman sekimej nochanejkauan hasta oyajkaj nochan para nechijliskej ika maka nikchiua tlen yonikijtoka nikchiuas. Nejua xniknekiya nikinyolkokos, san ika, niknekiya niktekichiuilis Jehová. Sakin nochanejkauan okasikamatkej niman opeuj nechtlakaita ipampa tlen oniktlapejpeni nikchiuas.
Nikmatstoya ika xsan nonekiya nijkauas noreligión, noijki nonekiya nikpatlas ken nitlanemiliaya. Melak nikuelitaya nitekitis ken teopixki niman maski niknekiya nikilkauas nochi tlen achto nikchiuaya, tlen nikitaya nechilnamiktiaya.
Para uelis nikxikos tlen nikixnamiktoya, ononek niktlatis nochi tlen nikpiaya itech sintoísmo. Onikintlati libros, cuadros niman okseki tlemach tlen melak patiojkej katkaj. Noijki melak onechpaleui más ninouikas imiuan tokniuan. Nochi yejuin onechpaleui manikilkaujtiuj nochi tlen achto nikchiuaya.
KEN YONECHPALEUI BIBLIA: Kachtopa xmás kuajli nikintlajpiaya nochanejkauan, yejua ika, yejuamej san inselti nomachiliayaj. San ika, ijkuak más opeuj imiuan ninemi, ijkon ken kijtoua Biblia, opeuj más kuajli touikaj. Sakin, nosiuatsin noijki okinek kitekichiuilis Jehová. Aman, nejua iuan nosiuatsin, totelpoch, tochpoch niman iueuentsin san sekan tiktekichiuiliaj Jehová.
Ijkuak nikilnamiki ika desde nipitentsin niknekiya niktekichiuilis Jehová niman nikinpaleuis oksekimej, melak niyolpaki pampa aman hasta más yonikchiuj tlen niknekiya nikchiuas. Hasta xueli nikijtoua kenon melak niktlasojkamachilia Jehová.
“Nikmastoya ika itla nechpolouaya”. (LYNETTE HOUGHTING)
IJKUAK OTLAKAT: 1958
PAÍS: SUDÁFRICA
TLEN KICHIUAYA: KINEMILIAYA IKA XAKAJ KITLASOJTLAYA
TLEN NIKCHIUAYA: Onitlakat ipan se kalpan kampa onkatkaj minas tlen itoka katka Germiston, ompa xmás nochiuaya tlen xkuajli. Pampa notajuan kinemiliayaj ika xueliskiaj nechtlajpiaskej onechtetlayokolijke ijkuak san yopanoka 14 tonaltin ika yonitlakatka. Niknemiliaya ika on akin nechiskaltiayaj yemelak katka notajuan. San ika, ijkuak onikmat ika xyejuamej katka notajuan, opeuj nikmachilia ika xakaj nechtlasojtlaya. Niknemiliaya ika yejuamej xueliskia nechajsikamatiskej pampa xken nikimitaya.
Ijkuak nikpiaya 16 xiuitl, niaya imiuan noamigos kampa noijtotilo para tijtotiskej niman titlauelkakiskej. Ijkuak nikpiaya 17 xiuitl opeuj nipoki. Niknekiya ninesis ijkon ken ichpokamej akin uajkisayaj ipan anuncios tlen kichiua akin kinemaka cigarros. Ijkuak nikpiaya 19 xiuitl, onichantito Johannesburgo pampa nonekiya ompa nitekitis. Nimantsin opeuj ninouika imiuan akin san tlemach kijtouayaj, pokiyaj niman itlamiyan semana nochipa tlauantinemiyaj.
Maski ijkon, nejua melak nikchiuaya ejercicio. Nikchiuaya gimnasia aeróbica, ninauiltiaya squash niman fútbol. Melak miyekej nechixmatstoyaj ipampa nochi tlen nikchiuaya. Niman pampa kuajli nichantiya niman nikpiaya tomintsin, miyekej kinemiliayaj ika xtlaj nechpolouaya. San ika, xijkon katka, nejua melak ninajmanaya niman xniyolpakiya. Nikmatstoya ika itlaj nechpolouaya.
KEN BIBLIA OKICHIUJ MANINOPATLA: Ijkuak opeuj ninomachtia Biblia, oniuel ika Jehová melak techtlasojtlaj niman ika yejua otechtlayokoli Biblia. Biblia kentla se carta tlen yejua yotechijkuilouili para techyekanas (Isaías 48:17, 18). Onikasikamat ika tla niknekiya yejua manechyekana nonekiya ninopatlas.
Ijkon ken kijtoua Proverbios 13:20, “Xmouika iuan sen tlamatki niman titlamatki yes, pero xmouika iminuan on tontos niman timixpolos”. Niman yejon tlen onikchiuj, onikinkauj akin imiuan ninouikaya niman opeuj ninouika imiuan seki iteixpantijkauan Jehová.
Melak ouijtika onikitak nikajkauas ika nipoki. Ijkuak nikajkaujtoya ika nipoki onitlejkok 14 kilos. Yejon melak onechajman, oniuejkauj kanaj majtlaktli xiuitl para oksejpa nitemos. Nejua kuajli nikmatstoya ika nonekiya nikajkauas ika nipoki. Miyekpa niktlajtlaniliaya Jehová manechpaleui manikajkaua ika nipoki niman yejua onechpaleui.
KEN YONECHPALEUI BIBLIA: Aman xok más nikualo. Niman niyolpaki san ika tlen nikpiya, xok sajnoye nitekiti para nikpiyas miyek tomin. Melak niyolpaki iuan noueuentsin, pampa san sekan tikinmachtia oksekimej itech Biblia niman yonikinpaleui yeyimej akin imiuan nitekitiya makixmatikan Jehová. Niman achto mikiskej notajuan akin onechiskaltijkej, ouel onikinnojnots itech tlen kijtoua Biblia itech kenon toTajtsin kinyolitis akin yomijkej ipan se kualtsin tlaltikpaktli.
Melak kuajli ninouika iuan toTajtsin, yejon yonechpaleui maka sa maniknemili ika xakaj nechtlasojtla. Ipan ikalpan toTajtsin nikpiya se ueyi familia, kema ompa nikinpiya miyekej nonanuan, notajuan, nokniuan tlakamej niman nokniuan siuamej (Marcos 10:29, 30).
[Tlaixkopinajli]
Onikitak kenon iteixpantijkauan Jehová yemelak notlasojtla
[Tlaixkopinajli]
Teopan kampa nikchiuaya sintoísmo