“Xmotlasojtlakan inuan oksekimej”
“Nemechmaka in yenkuik tlanauatijli: xmotlajsojtlakan inuan oksekimej. Ijkon ken nejua nemechtlajsojtla, nemejuamej no ijki xmotlajsojtlakan inuan oksekimej. Tla nemotlajsojtlaj inuan oksekimej, nochi tlakatl kitas ika nennotemachtijkauan” (JUAN 13:34, 35).
¿Tlenon kijtosnekiya Jesús? Jesús okimijli inomachtijkauan ika nonekiya notlasojtlaskej ijkon ken yejua okintlasojtlak. San ika, ¿kenon okintlasojtlak Jesús? Yejua xkeman okinchikoitak akin ualeuayaj oksekan noso siuamej (Juan 4:7-10). Noijki melak onokojtili kinpaleuis oksekimej maski kemantika yejua melak siaujtoya (Marcos 6:30-34). San ika, yejua más okiteititi ika melak tetlasojtla ijkuak okitemakak inemilis topampa. Yejua okijto: “Nejua nikuajli tlajpixki. On kuajli tlapixki kitemaka inemilis impampa on borregos” (Juan 10:11).
Tlen okichiujkej akin yeuejkaui kichiuayaj ken Cristo. Yejuamej nonotsayaj ken ikniujtin (Filemón 1, 2). Ipan tlanechikojli nochimej kuajli kinseliayaj maski san kanon ualeuayaj. Yejuamej xkinchikoitayaj akin griegos noso judíos pampa kineltokayaj ika san se inteko kipiayaj (Romanos 10:11, 12). Ipan xiuitl 33 ijkuak otlan iluitl Pentecostés, inomachtijkauan de Jerusalén “kinamakayaj intlal niman okseki tlajtlamach tlen kipiyayaj, niman on tomin kinxelouiliayaj ken cada se kipolojtikatka”. ¿Tleka ijkon okichiujkej? Para akin kemach onoapolaktijkaj ueliskia nokauaskej niman kikakiskej intlamachtiluan apóstoles (Hechos 2:41-45). Tertuliano okijto tleka ijkon nopaleuiayaj ijkuak yopanoka kanaj 200 xiuitl ika yomijkaj apóstoles, yejua okijto tlen kijtouayaj oksekimej itech akin kichiuayaj ken Cristo: “Xkita kenon melak notlasojtlaj semej iuan oksekimej niman kenon kinektokej mikiskej inpampa oksekimej”.
¿Akinomej noijki ijkon kichiuaj aman? Ipan libro Historia de la decadencia y ruina del Imperio romano kijtouaya ika melak miyek xiujtin akin kijtouayaj ika kichiuayaj ken Cristo, yonochiuilijkaj miyek tlen xkuajli xijkon ken okinchiuilijkej akin xkineltokaj Jesús. Xiuejkaui, ne Estados Unidos onoitak ika miyekej akin kijtouaj kichiuaj ken Cristo melak nochikoitaj. Ipan miyek países, miyekej maski san noijki inreligión kipiyaj nion xnotlasojtlaj niman xnoixmatij, ika yejon, nion xkinekij nopaleuiskej maski noneki ijkon makichiuakan.
Ipan 2004 ipan estado de Florida ne Estados Unidos, san ipan ome metstin nakpa melak chikauak oajakakiyauj. Akin tlayekanaya ipan comité de operaciones de emergencia okinek kitas kenon nochimej kitekitiltijtoyaj tlen okitemakak para tlapaleuis. Ijkuak okitak kenon iteixpantijkauan Jehová melak kualtsin nopaleuijtoyaj okimijli ika kuelitaskia kinpaleuis. Kanaj ipan 1997, sekimej iteixpantijkauan Jehová melak uejka oyajkej ipan República Democrática del Congo niman ijkon kimitkiliskej akin noijki iteixpantijkauan Jehová niman oksekimej tlen ika nopajtiskej, tlakuajli niman tlakentin. Nochi tlen okitetlayokolijkej, tlen okitemakakej iteixpantijkauan Jehová akin chantij Europa, oajsik kanaj se millón de dólares.