“Kinekiyaj manikita tla melauak katka tlen nikneltokaya”

TLEN NIKCHIUAYA:

Onitlakat ne Santo Domingo, icapital República Dominicana. Notajuan okinpixkej naui inkoneuan niman nejua akin más nipitentsin. Pampa notajuan kuajli okinmiskaltijkej, noijki kinekiyaj ika tejuamej matoskaltikan imiuan akin kichiuayaj tlen kuajli. Naui xiuitl achto ika niuajnemiskia, notajuan okimixmatkej sekimej misioneros mormones niman melak okinmojkatlachialtij kenon yejuamej tetlakaitayaj, kenon chipaujkej katka niman kenon melak kuajli notlakentiayaj. Seki tiempo sakin, nochi nofamilia okalak ipan religión Iglesia de Jesucristo de los Santos de los Últimos Días tlen noijki noixmati ken Iglesia Mormona. Ipan República Dominicana, tejuamej iuan okseki familias akin kachtopa otipeujkej ipan yejon religión.

Nejua nochipa nitlapaleuiaya ipan tlen kichiuaya yejon religión, san ika, más nikuelitaya ika ompa temachtiayaj ika familia melak ueyi kijtosneki niman ika nonekiya tikchiuaskej tlen kuajli. Melak nikuelitaya niyes mormón niman onikijto ika niyeskia misionero.

Ijkuak onikajxilti 18 xiuitl, nejua iuan nofamilia otichantitoj Estados Unidos niman ijkon nejua ueliskia nias universidad. Niman ijkuak itikpiayaj se xiuitl ika tichantitoyaj Florida, notíos, akin iteixpantijkauan Jehová katkaj, otechtlajpalotoj niman otechnotskej imiuan matiuiyan ipan se ueyi tlanechikojli. Ijkuak otiajkej onikitak ika nochimej kintejtemojtoyaj textos ipan Biblia niman tlajkuilojtoyaj, ijkuakon nejua oniktlajtlan se amatl niman se lapicero niman noijki opeuj nitlajkuiloua.

Ijkuak otlan yejon ueyi tlanechikojli, notíos onechijlijkej ika kinekiyaj nechpaleuiskej más manikasikamati Biblia pampa niknekiya niyes misionero. Nejua oniknemili ika kuajli yeskiaj pampa más nikixmatiya Libro de Mormón xken Biblia.

KEN BIBLIA OKICHIUJ MANINOPATLA:

Sakin ika oyajkej sa tomachtiayaj Biblia ipan teléfono. Nochipa nechyolchikauayaj kuajli manikita tlen nikneltokaya niman tlen temachtiaya Biblia. Kinekiyaj manikita tla melauak katka tlen nikneltokaya.

Miyek tlen temachtiaya noreligión niknemiliaya ika melauak katka, san ika, xnikmatiya tla yejon noijki temachtiaya Biblia. Notía onechtitlanili revista ¡Despertad! del 8 de noviembre de 1995, tlen kuajkuiya ome tlamachtijli itech mormonismo. Yejuin revista kichijchiuaj iteixpantijkauan Jehová. Melak onechmojkatlachialti ika xnikmatiya miyek tlen temachtiaya noreligión, kuakon oniktejtemo ipan topágina de Internet para nikitas tla melauak tlen kijtouaya yejon revista, niman onikitak ika kema melauak katka. Niman más onikneltokak tlen kijtouaya ijkuak onikimixmatito museos mormones ipan estado de Utah.

Nejua niknemiliaya ika Biblia niman Libro de Mormón san noijki tlen temachtiayaj, san ika, ijkuak más kuajli opeuj nikamapoua Biblia onikasikamat ika xijkon katka. San manikonteneua yejuin, Biblia kijtoua ipan Ezequiel 18:4 ika alma miki. San ika, ipan Libro de Mormón ipan Alma 42:9 kijtoua ika alma xkeman ueli miki.

Xsan yejuin xkuajli nikasikamatiya, noijki melak nechpopolouaya tlen yejuamej kinemiliayaj itech okseki países. Yejuamej kineltokayaj ika jardín de Edén onkatka ipan tlen aman noixmati ken condado de Jackson (Misuri, Estados Unidos). Niman noijki, akin noixmatij ken teotlajtokej ipan yejon religión kijtouaj ika “ijkuak iTekiuajyo toTajtsin tlayekanas, ibandera Estados Unidos melak kiueyiteneuaskej niman kualtsin onias pampa kichiuas ika nochimej kuajli manemikan”.

Ninotlajtoltiaya tlenon ipan nochiuaskia nopaís niman okseki países ijkuak ijkon panoskia. Se tonajli, onechuajnots yakaj akin nikixmatiya niman nomachtijtoya para nochiuas misionero, nejua oniktlajtolti: “Tla mopaís kipiyaskia se guerra iuan okse país, ¿tikimixnamikiskia mormones akin ualeuaj ipan yejon okse país?”. Melak onechmojkatlachialti ijkuak okijto ika kema ijkon kichiuaskia. Más kuajli oninomachti tlen temachtiaya noreligión niman onikintlajtolti sekimej akin tlayekanayaj ipan noiglesia, san ika, yejuamej onechijlijkej ika tlen nejua xnikasikamatiya amantsin xakaj kimatiya, san ika, sakin ueliskia nasikamatis.

Melak xonikuelitak tlen onechijlijkej. Opeuj ninotlajtoltia itech tleka niknekiya ninochiuas misionero niman onikitak ika ijkon niknekiya nikchiuas pampa niknekiya nikinpaleuis oksekimej, noijki pampa nikuelitaya kenon kinueyikaitayaj akin kichiuayaj yejon tekitl. San ika, nejua xmás nikmatiya itech toTajtsin. Maski nejua miyekpa yonikinamapoujka miyek textos ipan Biblia, xmás nikpatiojkaitaya yejuin libro. Noijki xnikmatiya tlen toTajtsin kineki kichiuas ipan tlaltikpaktli niman kenijki kineki matinemikan.

KEN YONECHPALEUI BIBLIA:

Ijkuak opeuj ninomachtia Biblia imiuan iteixpantijkauan Jehová, miyek tlen oniuel: oniuel kenon itoka toTajtsin, tlenon topan nochiua ijkuak timikij, kenon tlapaleuiya Jesús ipan tlen toTajtsin kineki kichiuas... Aman kema opeuj nikasikamati yejuin kualtsin libro, ¡niman melak nikuelitaya nikimijlis oksekimej itech tlen niueltiaya! Nejua inikmatiya ika toTajtsin nemiya, san ika, aman ueliya niknotsaya kentla niknojnotstoskia se noamigo. Ipan 12 de julio de 2004 oninoapolakti ken iteixpantijkauj Jehová, niman chikuasen metstli sakin opeuj chikauak nitenojnotsa.

Onitlapaleui makuijli xiuitl ipan Oficina kampa noyekanaj nochi iSucursales iteixpantijkauan Jehová, ne Brooklyn (Nueva York). Melak onechyolpakti nitlapaleuis kampa nochijchiua biblias niman okseki amatlajkuiloltin tlen uelis kinpaleuis oksekimej. ¡Melak niyolpaki ika miyekej yonikinpaleui makixmatikan toTajtsin!