Tlen okichiuj ika miyekej makinemilikan ika toTajtsin tetlajyouiltia

TLEN SEKIMEJ KIJTOUAJ

Catecismo de la Iglesia Católica kijtoua: ”Ijkuak miki yakaj akin okichiuj tlen melak xkuajli, nimantsin yauj infierno kampa melak tlajyouiya, ‘ipan tlitl tlen xkeman seui’”. Niman miyekej teopixkej kijtouaj ika akin nemij ipan infierno uejka nemij itech toTajtsin.

TLEN BIBLIA KIJTOUA

“Nemilistli tlen tlajtlakojtika... yejua mikis” (Ezequiel 18:4, TNM). Akin yomijkej “xokuitlaj kimatij” (Eclesiastés 9:5). Kuakon, tla nemilistli noso alma mikij niman akin yomijkej xitlaj kimatij, ¿kenon ueliskia tlajyouiskiaj “ipan tlitl tlen xkeman seui” noso uejka nemiskej itech toTajtsin?

Ipan Biblia, ika tlajtojli hebreo niman griego “infierno” kijtosneki “tlalkontli” kampa kintokaj akin yomijkej. Ijkuak Job melak kualouaya okijli toTajtsin: “Kuajli yeskia tla tinechiyanaskia ne miktlan” (Job 14:13). Noso ken kijtoua La Sagrada Biblia, de Guillermo Jünemann, “ipan infierno”. Job xkinekiya uejka nemis itech toTajtsin niman tlajyouijtos; yejua san kinekiya noseuis ipan tlalkontli.

TLEKA NONEKI TIKMATIS

Xuelis tiktlasojtlaskej toTajtsin tla tikitaj ken yakaj akin tetlajyouiltia. Rocío, akin chanti México, kijtoua: “Desde nipitentsin onechmachtijkej ika onka se infierno. Melak nikmakasiya toTajtsin niman xueliya nikneltokaya tla yejua kipiaya itlaj tlen kuajli. Niknemiliaya ika nochipa kualantoya niman ika xkeman teijyouiaya”.

Tlen Biblia kijtoua itech toTajtsin niman itech akin yomijkej okichiuj ika Rocío makipatla ken tlanemiliaya. Yejua kijtoua: “Ijkuak onikmat nochi yejuin, melak oniyolseuj. Onikasikamat ika toTajtsin kineki kuajli matinemikan, ika techtlasojtla niman ika nejua noijki uelis niktlasojtlas. Aman nikita ken se tajtli akin kuajli kintlajpiya ikoneuan niman kineki kuajli manemikan” (Isaías 41:13).

Miyekej nemij ipan se religión pampa kimakasij infierno, san ika, toTajtsin xkineki matiktekichiuilikan san pampa tikmakasij. Jesús okijto: “Xtlajsojtla moTEKO Dios ikan nochi moyojlo” (Marcos 12:29, 30). Ijkuak tikitaj ika toTajtsin xkichiua tlen xkuajli, yejon techpaleuiya matitlaneltokakan ika yejua kichiuas tlen melajki ijkuak kinpopolos akin xkuajkualtin ika tlayekapan. Ijkon ken Elihú, akin katka iamigo Job, tejuamej uelis tikijtoskej: “¡Maka nenkinemiliskej ika Dios, yejuan nochi ueli kichiua, xkuajli tlen kichiua, noso xkipiya yolmelajkanemilistli!” (Job 34:10).