Nochi tlen onikintlajtolti onechnankilijkej ika Biblia

TLEN NIKCHIUAYA:

Onitlakat ipan se granja tlen notajuan kipiayaj ipan se kalpantsin tlen nokaua Galicia, ne España. Notajuan okinpixkej chikueyimej inkoneuan, niman nejua uan ika naui inkoneuj. Tinochimej san sekan melak tiyolpakiyaj. Ipan yejon tonaltin, miyekej tajtin kintitlaniyaj inkoneuan kampa nomachtiaj akin kinekij yeskej monjas noso teopixkej. Ipan nofamilia tiyeyimej otiajkej.

Nokniuj nomachtiaya kampa kinmachtiaj monjas ne Madrid niman ijkuak nejua nikpiaya 13 xiuitl, noijki oniaj. Ompa xakaj kinpiaya amigos, san tikchiuayaj tlen techijliayaj, teoyotl niman xmiyek tlen tikpiayaj. Mojmostla ika kualkan tosentlaliayaj ipan capilla para titlanemiliskej, san ika, nejua xmás niueliya. Sakin, tokuikatiayaj niman tiayaj misa. Nochi kijtouayaj ika latín niman xtlaj nikasikamatiya, ika yejon, niknemiliaya ika xkeman ueliskia ninouikas iuan toTajtsin. Xkeman ueliya nitlajtouaya, maski kemantika nejua iuan nokniuj ompa tonamikiyaj, san toijliayaj: “Ave María purísima”. Sakin ika yotontlakuajkej, san tlajko hora techmakayaj para tonojnotsaskej. ¡Nochan melak niyolpakiya! San ika, ompa san noselti ninomachiliaya niman nochipa nichokaya.

Maski nikmachiliaya ika xmás nikixmatiya toTajtsin, oninochiuj monja ijkuak nikpiaya 17 xiuitl. Ijkon onikchiuj pampa yejon tlen oksekimej kinekiyaj manikchiua. San ika, sakin, opeuj ninotlajtoltia tla yemelak yejon tlen niknekiya nikchiuas. ¡Monjas techijliayaj ika tla yakaj ometlamatiya yaskia ipan infierno! Maski ijkon ok niometlamatiya. Nejua nikmatstoya ika Jesús melak kuelitaya kinmachtis niman kinpaleuis oksekimej (Mateo 4:23-25). Ijkuak nikpiaya 20 xiuitl, xok niknekiya niyes monja. Onechmojkatlachialti ijkuak akin ompa tlayekanaya onechijli, ika tla niometlamatiya, nimantsin manikisa de ompa. Niknemilia ika xkinekiya ika oksekimej noijki maometlamatikan ijkon ken nejua.

Notajuan okasikamatkej tleka oninokuep nochan, san ika, pampa ompa xonkatka tekitl, oniaj Alemania kampa chantiya okse nokniuj. Yejua nemiya ipan se grupo comunista kampa nemiyaj miyekej akin ualeuayaj España. Nikuelitaya ika yejuamej kiyejyekouayaj maka makintlajyouiltikan akin ompa tekitiyaj niman siuamej. Oninochiuj comunista niman sakin oninonamikti iuan yakaj akin noijki ompa nemiya ipan yejon grupo. Nikintemakaya amamej niman niaya ijkuak nochiuayaj marchas. Niknemiliaya ika melak nitepaleuijtoya.

San ika, sakin, xok nikuelitaya tlen kichiuayaj comunistas. Onikitak ika yejuamej xkichiuayaj tlen kiteijliayaj. Sakin, opeuj más xnikuelita tlen kichiuayaj pampa ipan 1971, sekimej telpokamej niman ichpokamej oyajkej okitlatitoj se oficina de gobierno de España tlen nokauaya Fráncfort. Yejuamej ijkon okichiujkej, pampa kinekiyaj kiteititiskej ika xkuelitayaj tlen nochiujtoya. San ika, nejua xonikuelitak tlen okichiujkej.

Ijkuak onemiko kachtopa tokoneuj, onikijli noueuentsin ika xok ninosentlaliskia kampa nosentlaliayaj comunistas. San noselti ninomachiliaya, pampa ijkuak onen nokoneuj xakaj onechitato. Ninotlajtoltiaya, ¿tleka tinemij?, ¿yemelak techpaleuis tla tokojtiliaj tikyektlaliskej tlen xkuajli nochiua?

KEN BIBLIA OKICHIUJ MANINOPATLA:

Ipan 1976, se tlakatl niman isiuatsin akin katkaj iteixpantijkauan Jehová onechnojnotstikiskej nochan niman onechinkauilijteujke seki amatlajkuiloltin. Ijkuak oksejpa onokuepkej, onikintlajtolti yejuin: “¿Tleka titlajyouiyaj? ¿Tleka miyekej kitechiuiliaj tlen xkinamiki?”. Nochi tlen onikintlajtolti onechnankilijkej ika Biblia. Yejua ika, oniknek ninomachtis Biblia.

Kachtopa, nejua san niknekiya miyek nikmatis, san ika, ijkuak noueuentsin niman nejua opeuj tiauej kampa nosentlaliaj iteixpantijkauan Jehová, nochi onopatlak. Ijkuakon yetikinpiayaj omemej tokoneuan, iteixpantijkauan Jehová techuikayaj kampa nosentlaliayaj niman kintlajpiayaj tokoneuan chika panouaya totlanechikol. Sajnoye opeuj nikintlasojtla.

Maski ijkon, ok niometlamatiya. Se tonajli ijkuak oniktlajpaloto nofamilia akin chantiya España, se notío akin teopixki katka, onechijli ika maka sa maninomachti Biblia. San ika, iteixpantijkauan Jehová akin ompa chantij, onechpaleuijkej manikasikamati tlen xnikasikamatiya itech Biblia, ijkon ken okichiujkaj iteixpantijkauan Jehová de Alemania. Ijkuakon onikijto, ika ijkuak ninokuepaskia nochan, oksejpa nipeuaskia ninomachtis Biblia. Maski noueuentsin xok kinekiya nomachtis Biblia, nejua onikchiuj ijkon ken yonikijtoka. Ipan 1978 oninoapolakti niman oninochiuj iteixpantijkauj Jehová.

KEN YONECHPALEUI BIBLIA:

Aman más kuajli ninemi pampa yonikasikamat tlen melauak temachtiaj Biblia. Ipan 1 Pedro 3:1-4 kijtoua ika tesiuauan noneki kintlakamatiskej inueuentsitsinuan, kintlakaitaskej niman yolyemankej yeskej ijkon “ken kuelita toTajtsin”. Yejuin niman okseki tlen kijtoua Biblia, yonechpaleui más kuajli manikchiua notekiyo ken tesiuauj niman ken nantli.

Yopanok 35 xiuitl ika oninochiuj iteixpantijkauj Jehová niman melak niyolpaki niktekichiuilis toTajtsin imiuan tokniuan akin noitaj ken se ueyi familia. Niman noijki, melak nechyolpaktia ika itech on makuijli nokoneuan, nauimej kitekichiuiliaj Jehová ijkon ken nejua.