Nochiuiyan nikitkitinemiya nopistola

TLEN NIKCHIUAYA:

Onitlakat niman oninoskalti Roma kampa miyekej xkipiayaj tomin. Melak onitlajyoui ijkuak oninoskalti pampa xonikixmat nonan niman xkuajli ninouikaya iuan notaj. Nikitaya tlen xkuajli kichiuayaj oksekimej niman nejua noijki yejon nikchiuaya.

Ijkuak nikpiaya 10 xiuitl, opeuj nitlachteki, niman ijkuak nikpiaya 12 xiuitl, onikis de nochan. Miyekpa onechtsajkej ipan comisaría niman notaj ononek nechonkixtis. Melak nitlauele katka niman san nochipa teuan ninokualaniaya. Ijkuak nikpiaya 14 xiuitl, onikis de nochan niman xok keman oninokuep. San ipan ojtli nichantiya niman nikinkuiya drogas. Ijkuak uajtlayouaya, niktlapouaya se carro niman ompa nikochiya, niman ijkuak iuajtlanestiaya niktejtemouaya achijtsin atl para ika ninixamis.

Melak yoniuelka nitlachteki. Nitlachtekiya ipan ojtli niman ika tlayoua nikalakiya techan para nitlachtekis. Miyekej okitekakilijkej nochi tlen nikchiujtinemiya, ika yejon, se pandilla akin melak kixmatstoyaj onechijli ika tla niknekiya ninemis ipan yejon pandilla. Yejon okichiuj más maniueli manitlachteki pampa hasta opeuj nitlachteki ipan bancos. Nochimej nechtlakaitayaj pampa melak nitlauele katka. Nochiuiyan nikitkitinemiya nopistola, hasta iuan nikochiya. Yoninomatka nikinkuis drogas, nitlachtekis, niauilnemis niman niteuijuikaltis. Policia nochipa san nechpijpixtinemiya niman miyekpa onechtsajka. Kemantika ninemiya ipan ojtli niman kemantika ipan cárcel, ijkon oninen miyek xiuitl.

KEN BIBLIA OKICHIUJ MANINOPATLA:

Se tonajli, ijkuak onikis cárcel, oniktlajpaloto notía. Nejua xnikmatiya ika yejua niman omemej noprimos katkaj iteixpantijkauan Jehová. Yejuamej onechijlijkej imiuan maniuiya tlanechikojli. Imiuan oniaj, niman ijkuak otajsikej, onikimijli ika kiyauatenko ninotlaliskia niman ijkon nikimitas akinomej kalakiyaj niman akinomej kisayaj. Ompa nikpiaya nopistola.

Yejon tlanechikojli melak onechpaleui maninopatla. Ijkuakon oniknemili: “¡Ninemi ipan okse tlaltikpaktli!”. Nikitaya ika nochimej tenotskej katkaj niman nochimej pakiyaj. Hasta aman nikilnamiki kenijki melak kuajli onechselijkej iteixpantijkauan Jehová. ¡Yejuamej xijkon kichiuayaj ken oksekimej akin imiuan ninouikaya!

Opeuj ninomachtia imiuan iteixpantijkauan Jehová. Ijkuak más yonikasikamatka tlen niueltiaya itech Biblia, onikitak ika nonekiya ninopatlas. Melak onikuelitak Proverbios 13:20, kampa kijtoua: “Xmouika iuan sen tlamatki niman titlamatki yes, pero xmouika iminuan on tontos niman timixpolos”. Yejuin texto onechasikamachilti ika nonekiya nikisas ipan pandilla kampa ninemiya. Niknemiliaya ika xniueliskia, san ika, Jehová onechpaleui.

Noijki onijkajkauj ika nipoki niman xok nikinkuiya drogas. Oninoxin, onikinnokixtilij nopipinoluan niman xok nitlauijuikaltiaya. Xkeman niknemiliaya ika ueliskia nikajkauas tlen xkuajli nikchiuaya.

Nejua xnikuelitaya nitlaamapouas niman ninomachtis, ika yejon, xmas niueliya san noselti ninomachtiaya Biblia. Maski ijkon, ika yolik opeuj niktlasojtla Jehová. Satepan, opeuj melak nechyolkokoua nochi tlen xkuajli yonikchiujka niman hasta niknemiliaya ika Jehová xkeman nechtlapopoluiskia. Ijkuak ijkon ninomachiliaya, nikamapouaya Biblia kampa tlajtoua itech kenijki Jehová okitlapopolui tekiuaj David maski melak xkuajli tlen okichiujka. Yejon melak nechyolseuiaya (2 Samuel 11:1–12:13).

Noijki melak nechmojtiaya nitenojnotsas techajchan (Mateo 28:19, 20). ¡Niknemiliaya ika ueliskia ompa nikonnextis yakaj akin onikchiuilijka tlen xkuajli! Ika yolik, opeuj xok ninomojtia niman opeuj más nikuelita nikinnojnotsas oksekimej itech toueyiTajtsin iluikak chanej, akin techtlapopoluiya.

KEN YONECHPALEUI BIBLIA:

Tla xnikixmatiskia Jehová, kanaj xok niyoltoskia pampa miyekej akin imiuan ninouikaya yomijkej niman oksekimej nemij ipan cárcel. Nejua melak niyolpaki niman nikmatstika ika ajsis se tonajli ijkuak melak kualtsin tinemiskej. Niman pampa aman más niyolyemanki, nitetlakamati niman xok nitlauele, más kuajli ninouika imiuan oksekimej. Aman melak niyolpaki iuan nosiuatsin, Carmen. San sekan tikinpaleuiyaj akin chanti nisiuj tochan más kuajli makixmatikan tlen kijtoua Biblia.

¡Ah! Noijki nikneki nimechijlis ika aman nitekiti, ijkon tiknextijtiuej tlen ika topanoltiskej. Kemantika niauj kampa bancos, san ika, xok para nontlachtekis, aman niauj para nontlachipauas.