Onikasikamat ika Jehová techtlasojtla niman techtlapopoluiya

TLEN NIKCHIUAYA:

Oninoskalti kampa melak tlasojtiya tlen ika timopanoltis, itech ueyikalpan Montreal. Nejua akin más nipitentsin itech chikueyi nokniuan. Ijkuak nikpiaya chikuasen metstli omik notaj, niman nonan san iselti otechiskalti.

Desde ijkuak nipitentsin katka opeuj nijkui drogas, ninauiltia ika tomin niman nitlauijsokiya. Ninosentlaliaya imiuan akin xkuajli kichiuayaj. Ijkuak kemach nikpiaya 10 xiuitl, kampa nichantiya, nikchiuaya tlen nechtlajtlaniliayaj akin auilnemiyaj niman akin tetomintlanejtiayaj. Melak nikuelitaya nitekajkayauas niman nitlachtekis. Xueliya nikajkauaya, kentla droga katka.

Ijkuak nikpiaya 14 xiuitl, melak kuajli yoninomajmachtijka kenon nitekajkayauas. Nikinkouaya miyek relojes, pulseras niman anillos tlen san kinxauiliayaj oro. Nikintlaliliaya ika kipiaya 14 quilates, niman nikominnemakaya ipan ojtin niman kampa kinkauayaj incarros akin ontlakouayaj ipan plaza. ¡Xouijtika katka niktlanis tomin! Sejpa oniktlan 10,000 dólares canadienses san ipan se tonajli.

Ijkuak nikpiaya 15 xiuitl onechuajkixtijkej ipan escuela kampa nechpaleuijtoyaj maka sa manikchiua tlen xkuajli. Ika yejon, xok onikpix kampa nichantis. Nikochiya ipan ojtli, ipan parque noso inchan akin imiuan ninouikaya.

Miyekpa onechajsikej policías niman ijkon kimatiskiaj itech tlen niknemakaya. San ika, pampa tlen niknemakaya xnikichtekiya, xkeman onechtsajkej. Maski kema niktlaxtlauaya multas pampa nitekajkayauaya niman pampa xnikpiaya permiso para nitlanemakas. Xtlaj nikmakasiya, hasta onitekit imiuan akin kitetlanejtiayaj tomin. Niman pampa ueliskia nechmiktiskiaj, kemantika nikitkiya se arma. Noijki onitekit imiuan akin kitechiuiliaj tlen xkuajli.

KEN BIBLIA OKICHIUJ MANINOPATLA:

Nikpiaya 17 xiuitl ijkuak kachtopa onechnojnotskej itech Biblia. Nichantiya iuan nonovia, akin opeuj nomachtia Biblia imiuan iteixpantijkauan Jehová. San ika, xonikuelitak tlen Biblia tlanauatia ika se makichiua. Ika yejon, onikaujteuj niman oniaj iuan okse ichpochtli akin iuan nikistinemiya.

San ika, yejuin ichpochtli noijki opeuj nomachtia Biblia imiuan iteixpantijkauan Jehová. Melak nechmojkatlachaltiaya kenon nopatlatiaya ipan inemilis, aman más tenotski katka niman xnimantsin kualaniya. Se tonajli onechnotskej kampa yejuamej nonechikouaj, niman oniaj. Yejuamej tlamantikej katkaj pampa melak kuajli onechselijkej. Xkeman melak kuajli ninomachiliaya, pampa ijkuak nipitentsin katka, nochanejkauan xnechtlasojtlayaj niman xmás najmanayaj nopampa. Ken onechselijkej iteixpantijkauan Jehová, yejon tlen niktejtemojtoya. Ijkuak onechijlikej ika tla ninomachtiskia Biblia, onikimijli ika kema.

Niknemilia ika tlen oninomachti ipan Biblia onechpaleui. Pampa nikteuikiliaya 50 mil dólares, yotiknemilijkaj tontlachtekiskiaj iuan okseki omemej niman ijkon niktlaxtlauas. ¡Yompa ika nejua xok oniknek imiuan nias! Yejuamej kema oyajkej, niman se itech yejuamej okimiktijkej niman okse okitsajkej ipan cárcel.

Tlen ninomachtijtoya ipan Biblia okichiuj manikita kenon más uelis ninopatlas. Ken ipan 1 Corintios 6:​10, Biblia kijtoua: “Niman no xkalakiskej kampa Dios tlamandaroua on yejuan tlachtekij, yejuan sanoyej tlajtlamach kinoyaxkatisnekij, yejuan tlauanij, yejuan tetejteneuaj, niman on yejuan tlaixpachouaj”. Ijkuak onikpouj yejon tlaxelojli, opeuj nichoka. Nonekiya nikpatlas nochi nonemilis (Romanos 12:⁠2). Nochi tlen nikchiuaya melak xkuajli, pampa niteuisokiya, nitlauele katka niman nitekajkayauaya.

San ika, onikasikamat ika Jehová techtlasojtla niman techtlapopoluiya (Isaías 1:18). Ika nochi noyojlo, oniktlajtlanili Jehová ika manechpaleui manikajkaua tlen xkuajli nikchiuaya niman manikpatla nonemilis. Ika yolik, Jehová onechpaleui. Se tlen kuajli onikchiuj, ika nejua iuan nonovia otonamiktijkej.

Inikpiaya 24 xiuitl ijkuak oninonamikti niman inikinpiaya yeyimej nokoneuan. Nonekiya nikpiyas se tekitl kampa xnitekajkayauas niman ijkon uelis nikintlakualtis nochanejkauan. San ika, xmás oninomachti niman xniueliya nikchiuaya se tekitl. Oksejpa oniktlajtlanili Jehová manechpaleui niman oniktejtemoto tekitl. Kampa tetlakeualo nikimijliaya ika niknekiya ninopatlas niman nikchiuas kuajli notekiyo. Kemantika nikteijliaya ika ninomachtijtoya Biblia tlen nechpaleuijtoya manitekiti ken kinamiki. San ika, nochimej xokinejkej nechmakaskej se tekitl. Sakin, ijkuak oksejpa onikteijli itech tlen yonikchiujka ipan nonemilis, se tlakatl onechijli: “Xnikmati tleka, san ika, itlaj nechijlia ika kipiya ika nimitstlakeuas”. Kuajli nikmatstika ika Jehová nechnankilijtoya. Sakin, nejua niman nosiuauj otochiujkej iteixpantijkauan Jehová.

KEN YONECHPALEUI BIBLIA:

Niyoltika pampa nikchiua tlen kijtoua Biblia niman pampa nikchiua ijkon ken Jesús okichiuj. Nikinpiya nochanejkauan akin melak nikintlasojtla niman notlamachilis xok nechpasoloua, pampa kuajli nikmatstika ika Jehová yonechtlapopolui.

Nikuika catorce xiuitl ika nikchiujtika se kualtsin tekitl ika nochi noyojlo: nochipa nitenojnotsa, ijkon nikinpaleuis oksekimej makasikamatikan Biblia. Xiuejkaui, nosiuatsin noijki opeuj tenojnotsa ijkon ken nejua. Noijki ipan yejuin treinta xiujtin youel yonikinpaleui 22 akin imiuan nitekiti, manochiuakan iteixpantijkauan Jehová. Ok niauj kampa tlanemakalo, san ika, aman xok nitekajkayaua ken achto nikchiuaya. Niktejtemoua kenon nikinmakas tlaltikpakchanejkej yejon tetlayokolijli tlen melak ueyi: ika uelis nemiskej para nochipa ipan se yenkuik tlaltikpaktli kampa xok yakaj tlachtekis (Salmo 37:​10, 11).