TLAJTOLTILISTIN ITECH BIBLIA
¿Uelis oksejpa nemiskej akin yomijkej?
Tikneltoka ika akin okichijchiuj nemilistli uelis teyolitis
Itech Jehová ualeua nemilistli (Salmo 36:9). Ika yejon, kuajli tiknemiliskej ika yejua kinmakas nemilistli akin yomijkej. Biblia techijlia ika yejon kichiuas ika tlayekapan. (Xpoua Hechos 24:15.) ¿Tleka kineki toTajtsin kiyolitis akin yomijkej?
Akin otexchijchiuj nochipa okinek ika matinemikan nochipa (Génesis 1:31; 2:15-17). Niman yejon tlen kineki kichiuas, xnopatla. Yejua kiyolkokoua ika xuejkaujtipan tinemij niman melak tikpiyaj tlaueltin. (Xpoua Job 14:1, 14, 15.)
¿Kanon nemiskej akin kinyolitiskej?
¿Okichijchiuj toTajtsin tlakatl manemi iluikak? Ka. Yejua okinchijchiuj iluikaktekitkej manemikan iluikak niman tejuamej matinemikan nikan ipan tlaltikpaktli (Génesis 1:28; Job 38:4, 7). Aman xnemili, ijkuak Jesús okintlachialti akin yomijkaj, ¿kanon oksejpa onenkej? Nikan ipan tlaltikpaktli. Niman noijki ijkon panos ika tlaltikpakchanejkej akin oksejpa kinmakaskej innemilis ika tlayekapan. Nemiskej ipan tlaltikpaktli. (Xpoua Juan 5:28, 29; 11:44.)
San ika, toTajtsin yokintlapejpeni san achijtsitsintin tlaltikpakchanejkej akin kinketsteuas ipan iluikak, akin yeskej espíritus (Lucas 12:32; 1 Corintios 15:49, 50). Yejuamej tekiuajtiskej iuan Jesucristo ipan tlaltikpaktli. (Xpoua Apocalipsis [Revelación] 5:9, 10.)