ITECH TLEN TLAJTOUA IXPAN
Ijkuak miki akin tiktlasojtlaj
“ToTajtsin nochipa techmaka tlen kualtsin niman yejua kimati tleka ijkon panoua, Bebe... Maka xchoka”.
Yejuin tlen okijlikej san ichtakatsin se siuatl itoka Bebe ijkuak omik itaj ipan se accidente.
Bebe melak kuajli iuan nouikaya itaj. Yejon tlajtojli okijli se akin kuajli iuan nouikaya ichanejkauan. San ika, yejua melak noyolkokouaya niman xyolseuiya, niman miyekpa kinoijliaya: “Tlen ipan onochiuj notaj xkijtosneki tla melak kuajli”. Seki xiuitl sakin, ijkuak Bebe okijkuilo ipan se amoxtli itech tlen opanok, kuajli nesiya ika yejua ok melak noyolkokouaya.
Ijkon ken ipan onochiuj Bebe, ijkuak miki se akin melak kuajli iuan touikaj noso se tochanejkauj, nesi ika uelis uejkaujtipan toyolkokoskej. Ipan Biblia kijtoua ika mikilistli ken se totlauelikniuj (1 Corintios 15:26). Ijkuak yejko mikilistli, techijtlakoua niman xtlaj ueli kiteltia. Nochipa ijkon panoua pampa xtikchiaj ijkon topan manochiua, niman kentla techixtekilia se akin melak tiktlasojtlaj. Tinochimej melak toyolkokouaj ijkuak ijkon panoua. Xuelis tikijtoskej tla yakaj xnoyolkokoua ijkuak kipoloua se ichanejkauj niman sakin tlen panoua ijkuak miki.
Ika yejon, kanaj tejua timotlajtoltia: “¿Uejkaujtipan ijkon ninoyolkokojtos? ¿Kenon nikxikos yejuin? ¿Kenon uelis nikinyolchikauas akin noijki ijkon inpan nochiua? ¿Uelis nikchias mayejko tonajli ijkuak oksejpa tikimitaskej akin omijkej?”.