“¿Kanon nemiya toTajtsin?”
“NOCHIPA OKSEJPA NOTLAJTOLTILO: ¿KANON NEMIYA TOTAJTSIN?” (Papa Benedicto XVI, ijkuak okitlajpaloto kampa yeuejkaui chikauak tetekitiltiayaj ipan Auschwitz [Polonia]).
¿NIMAN TEJUA? ¿YOTIMOTLAJTOLTIJKA YEJON IJKUAK PANOUA ITLAJ TLEN XKUAJLI? ¿ITLAJ MOPAN YONOCHIUJ TLEN TEAJMAN TLEN YOMITSTLANEMILILTI IKA TOTAJTSIN XKITA TLEN MOPAN NOCHIUJTIKA?
Sheila, akin chanti Estados Unidos, onoskalti iuan ichanejkauan akin melak tlaneltokayaj itech toTajtsin, kijtoua: “Opeuj nitlaneltoka itech toTajtsin ijkuak ok nipitentsin katka pampa nikmatstika ika yejua otexchijchiuj, san ika, xkeman onikmachili ika nisiuj notech nemiya. Maski nikmatiya ika ueli nechita, niknemiliaya ika xkimatisnekiya tlenon nechpanouaya. Xniknemiliaya tla nechtlauelitaya, san ika, noijki xniknemiliaya tla yejua najmanaya nopampa”. ¿Tleka Sheila ijkon tlanemiliaya? Yejua kijtoua: “Nochanejkauan miyekpa yokixnamijkej tlen xkuajli, niman nesiya kentla toTajtsin xtlaj ika techpaleuiaya”.
Ijkon ken Sheila, kanaj tejua noijki titlaneltoka itech toTajtsin akin nochi ueli kichiua. Maski ijkon, kanaj timotlajtoltia tla yejua najmana mopampa. Yejon tlen noijki kinekiya kimatis Job, se tlakatl yolmelaujki akin tlaneltokaya itech ikojtilis niman itlamachilis toTlachijchiujkauj (Job 2:3; 9:4). Ijkuak ipan yonochiujka miyek tlen xkuajli niman kitaya ika xok noyektlalis, okitlajtolti toTajtsin: “¿Tleka tikiyana moxayak niman tinechita ken motlauelikniuj?” (Job 13:24).
San ika, ¿tlenon kijtoua Biblia? ¿ToTajtsin kichiua ika maonia tlajyouilistli? ¿Kajmana tlen inpan nochiua nochi tlaltikpakchanejkej niman najmana inpampa inseselti? ¿Uelis tikmatiskej tla techixmati toseselti, techasikamati niman techpaleuiya ijkuak tikixnamikij ajmantin?
Ipan tlamachtiltin tlen uajlauej, tikitaskej kenon tlen toTajtsin yokichijchiuj niman Biblia kiteititiaj ika toTajtsin techtlasojtla (Romanos 1:20). Ijkon, tejua kuajli tikixmatis moTlachijchiujkauj niman ijkuak kuajli tikixmatstias, kuajli tikitas ika yejua kineki mitspaleuis (1 Juan 2:3; 1 Pedro 5:7).